ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠣᠶᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠮᠤᠷᠢᠨ ᠤ ᠡᠳ᠋ᠯᠠᠯ ᠬᠡᠷᠡᠭᠰᠡᠯ ᠵᠢᠴᠢ ᠲᠡᠳᠡᠭᠡᠷ ᠤᠨ ᠨᠠᠷᠠᠶᠢᠳᠤᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/5/10
       ᠬᠤᠷᠴᠢᠨ ᠬᠠᠨᠭ᠍ᠬᠠᠢ ᠡᠮᠡᠬᠡᠯ ᠢ ᠪᠦᠷᠢᠨ ᠪᠦᠳᠦᠨ ᠡᠮᠡᠬᠡᠯ ᠪᠤᠯᠭᠠᠨ ᠳᠡᠪᠰᠡᠯᠡᠨ ᠴᠢᠮᠡᠭᠯᠡᠬᠦ ᠳᠤ ᠳᠤᠩ ᠤᠯᠠᠨ ᠵᠤᠶᠢᠯ ᠤᠨ ᠨᠡᠷ᠎ᠠ ᠨᠡᠷᠡᠶᠢᠳᠦᠯ ᠲᠠᠢ ᠶᠠᠭᠤᠮ᠎ᠠ ᠶᠢ ᠪᠡᠯᠡᠳᠭᠡᠬᠦ ᠴᠢᠬᠤᠯᠠ ᠲᠠᠢ ᠪᠠᠶᠢᠳᠠᠭ᠃ ᠳᠡᠭᠡᠭᠡᠳ ᠳᠡᠳᠡᠭᠡᠷ ᠵᠤᠶᠢᠯᠡᠰ ᠨᠢ ᠴᠦᠮ ᠦᠪᠡᠷ ᠦᠪᠡᠷ ᠤᠨ ᠳᠤᠭᠳᠠᠭᠰᠠᠨ ᠤᠷᠤᠨ ᠪᠠᠶᠢᠷᠢ ᠲᠠᠢ ᠪᠦᠬᠡᠳ ᠤᠷᠳᠤ ᠤᠬᠤᠷ ᠤᠨ ᠬᠡᠮᠵᠢᠶ᠎ᠠ ᠂ ᠦᠷᠬᠡᠨ ᠨᠠᠷᠢᠨ ᠤ ᠬᠢᠵᠠᠭᠠᠷ᠂ ᠵᠤᠵᠠᠭᠠᠨ ᠨᠢᠮᠬᠡᠨ ᠤ ᠪᠠᠷᠢᠮᠵᠢᠶ᠎ᠠ᠂ ᠦᠡᠭᠭᠡ ᠪᠤᠳᠤᠭ ᠤᠨ ᠢᠯᠭᠠᠯ ᠲᠠᠢ ᠪᠠᠶᠢᠳᠠᠭ᠃ ᠨᠢᠬᠡ ᠪᠦᠷᠢᠨ ᠡᠮᠡᠬᠡᠯ ᠳᠠᠪᠰᠠᠯᠠᠵᠤ ᠤᠭᠰᠠᠷᠠᠬᠤ ᠳᠤ ᠤᠯᠤᠩ᠂ ᠵᠢᠷᠢᠮ᠂ ᠲᠦᠷᠦᠬᠡ᠂ ᠭᠠᠨᠵᠤᠭ᠎ᠠ᠂ ᠲᠤᠬᠤᠮ᠂ ᠬᠦᠯᠢᠮ᠂ ᠬᠠᠷᠠᠤ᠂ ᠳᠠᠪᠰᠠ᠂ ᠳᠠᠷᠤᠭᠤᠯᠭ᠎ᠠ᠂ ᠰᠤᠶᠢᠳᠡᠬᠦᠰᠦ ᠵᠡᠷᠭᠡ ᠶᠢᠨ ᠵᠤᠶᠢᠯᠡᠰ ᠳᠠᠭᠠᠯᠳᠤᠳᠠᠭ᠃ ᠡᠷᠳᠡᠨ ᠤ ᠬᠤᠷᠴᠢᠨ ᠡᠮᠡᠬᠡᠯ ᠳᠤ ᠬᠠᠵᠠᠭᠠᠷ ᠨᠤᠭᠳᠤ᠂ ᠬᠦᠮᠦᠯᠳᠦᠷᠭᠡ᠂ ᠬᠤᠳᠠᠷᠭ᠎ᠠ᠂ ᠮᠢᠯᠠᠭ᠎ᠠ᠂ ᠴᠢᠳᠤᠷ ᠦᠷᠦᠬᠡᠯ ᠳᠤᠱᠠ ᠳᠠᠭᠠᠯᠳᠤᠳᠠᠭ᠃ ᠡᠨᠡ ᠨᠢ ᠰᠠᠶ᠋ᠢ ᠨᠢᠬᠡ ᠬᠦᠯᠦᠭ ᠤᠨᠤᠭ᠎ᠠ ᠶᠢᠨ ᠨᠢᠬᠡᠨ ᠢᠵᠢ ᠪᠦᠷᠢᠨ ᠵᠠᠰᠠᠯ ᠴᠢᠮᠡᠭᠯᠡᠯ ᠪᠠᠶᠢᠪᠠ᠃    ᠤᠯᠤᠩ —— ᠡᠮᠡᠭᠡᠯ ᠤᠨ ᠪᠠᠷᠠᠭᠤᠨ ᠳᠠᠯ᠎ᠠ ︵ᠪᠤᠷᠤᠭᠤᠳᠠᠢ ᠳᠠᠯ᠎ᠠ︶ ᠶᠢᠨ ᠤᠭᠰᠤᠷᠭ᠎ᠠ ᠠᠴᠠ ᠬᠤᠯᠪᠤᠵᠤ᠂ ᠵᠡᠬᠦᠨ ᠳᠠᠯ᠎ᠠ ︵ᠵᠦᠪᠳᠡᠢ ᠳᠠᠯ᠎ᠠ︶ ᠶᠢᠨ ᠵᠢᠷᠢᠮ ᠢ ᠰᠢᠷᠭᠤᠭᠤᠯᠵᠤ ᠳᠠᠳᠠᠨ᠂ ᠭᠤᠷᠬᠢᠯᠠᠵᠤ ᠳᠡᠪᠡᠭᠡᠯᠡᠬᠦ ᠳᠡᠭᠡᠰᠤ ᠶᠢ ᠤᠯᠤᠩ ᠭᠡᠨ᠎ᠠ᠃ᠤᠯᠤᠩ ᠢ ᠬᠢᠯᠭᠠᠰᠤ ᠤᠡᠭᠭᠠᠰᠤᠨ ᠨᠠᠷᠢᠨ ᠵᠡᠭᠡᠭ ᠢ ᠵᠢᠷᠭᠤᠭ᠎ᠠ ᠪᠠᠷ ᠵᠡᠷᠭᠡᠴᠡᠬᠦᠯᠦᠨ ᠤᠶᠤᠬᠤ ᠪᠤᠶᠤ ᠡᠰᠡᠬᠦᠯ᠎ᠠ ᠰᠦᠯᠵᠢᠵᠦ ᠬᠦᠷᠦᠵᠦ ᠵᠤᠬᠢᠶᠠᠳᠠᠭ᠃ ᠪᠠᠰᠠ ᠵᠦᠬᠡᠯᠡᠨ ᠰᠤᠷ ᠢ ᠨᠠᠷᠢᠨ ᠵᠦᠰᠦᠵᠦ ᠰᠦᠯᠵᠢᠵᠦ ᠬᠢᠳᠡᠭ ᠪᠤᠶᠤ ᠪᠦᠰ  ᠢᠶᠠᠷ ᠪᠦᠷᠢᠵᠦ ᠤᠶᠤᠵᠤ ᠬᠢᠭᠰᠡᠨ ᠴᠦ ᠬᠠᠶᠠ ᠬᠠᠷᠠᠭᠳᠠᠳᠠᠭ᠃ ᠤᠯᠤᠩ ᠢ ᠪᠦᠬᠡᠷᠡᠩᠭᠡᠢ ᠳᠡᠭᠡᠰᠤ ᠪᠠᠷ ᠬᠢᠳᠡᠭ ᠦᠭᠡᠢ ᠃ ᠬᠦᠯᠦᠭ ᠤᠨᠤᠭ᠎ᠠ ᠶᠢᠨ ᠭᠡᠢ ᠮᠤᠷᠢ ᠬᠡᠪᠳᠡᠨ᠎ᠠ ᠭᠡᠳᠡᠭ᠃    ᠮᠤᠷᠢᠨ ᠡᠮᠡᠬᠡᠯ ᠳᠤ ᠤᠷᠢᠳᠤ ᠬᠤᠶᠢᠳᠤ ᠬᠤᠶᠠᠷ ᠤᠯᠤᠩ ᠲᠠᠢ ᠪᠠᠶᠢᠵᠦ᠂ ᠬᠤᠶᠢᠳᠤ ᠤᠯᠤᠩ ᠨᠢ ᠤᠷᠢᠳᠤ ᠤᠯᠤᠩ ᠠᠴᠠ ᠪᠠᠨ ᠳᠤᠬᠤᠢ ᠬᠢᠷᠢ ᠦᠨᠳᠦᠷ ᠪᠠᠶᠢᠳᠠᠭ᠃ ᠡᠮᠤᠨ᠎ᠠ ᠤᠯᠤᠩ ᠤᠨ ᠦᠨᠳᠦᠷ ᠨᠢ ᠪᠠᠷᠤᠭ ᠲᠦᠷᠪᠡᠨ ᠳᠤᠬᠤᠢ᠂ ᠡᠮᠡᠬᠡᠯ ᠤᠨ ᠪᠠᠷᠠᠭᠤᠨ ᠳᠠᠯ᠎ᠠ ᠶᠢᠨ ᠤᠷᠢᠳᠤ ᠪᠦᠬᠦᠷᠬᠡ ᠪᠠ ᠬᠠᠪᠳᠠᠭᠠᠯ ᠤᠨ ᠳᠡᠭᠡᠷᠡᠬᠢ ᠵᠢᠰᠢᠬᠦᠦ ᠵᠡᠷᠭᠡᠴᠡᠭᠡ ᠤᠷᠤᠰᠢᠬᠤ ᠨᠦᠬᠡ ᠶᠢᠨ ᠤᠭᠰᠤᠷᠭ᠎ᠠ ᠠᠴᠠ ᠬᠤᠯᠪᠤᠭᠰᠠᠨ ᠤᠯᠤᠩ ᠢ ᠤᠷᠢᠳᠤ ᠤᠯᠤᠩ ᠬᠡᠨ᠎ᠠ᠃ ᠡᠮᠡᠬᠡᠯ ᠤᠨ ᠪᠠᠷᠠᠭᠤᠨ ᠳᠠᠯ᠎ᠠ ᠶᠢᠨ ᠬᠤᠶᠢᠳᠤ ᠪᠦᠬᠦᠷᠬᠡ ᠪᠠ ᠬᠠᠪᠳᠠᠭᠠᠯ ᠤᠨ ᠳᠡᠭᠡᠷᠡᠬᠢ ᠵᠢᠰᠢᠬᠦᠦ ᠵᠡᠷᠭᠡᠴᠡᠭᠡ ᠤᠷᠤᠰᠢᠬᠤ ᠨᠦᠬᠡ ᠶᠢᠨ ᠤᠭᠰᠤᠷᠭ᠎ᠠ ᠠᠴᠠ ᠬᠤᠯᠪᠤᠭᠰᠠᠨ ᠤᠯᠤᠩ ᠢ ᠬᠤᠶᠢᠳᠤ ᠤᠯᠤᠩ ᠭᠡᠳᠡᠭ᠃ ᠤᠷᠢᠳᠤ ᠬᠤᠶᠢᠳᠤ ᠤᠯᠤᠩ ᠤᠨ ᠬᠤᠭᠤᠷᠤᠨᠳᠤᠬᠢ ᠵᠠᠢ ᠨᠢ ᠪᠠᠷᠤᠭ 22 ᠰᠠᠡᠲ᠋ᠢᠮᠧᠲᠷ ᠢᠶᠠᠷ ᠤᠷᠤᠰᠢᠳᠠᠭ᠃    ᠮᠤᠷᠢ ᠪᠠᠷ ᠬᠤᠯᠠ ᠶᠠᠪᠤᠬᠤ᠂ ᠳᠤᠪᠳᠤᠯᠵᠤ ᠶᠠᠪᠤᠬᠤ ᠳᠤ ᠪᠠᠨ ᠠᠷᠤ ᠤᠯᠤᠩ ᠢ ᠭᠡᠵᠢᠶᠡᠳᠡ ᠠᠳᠤᠷᠢᠳᠠᠯ᠎ᠠ ᠳᠠᠳᠠᠳᠠᠭ᠃ ᠡᠰᠡ ᠳᠡᠶᠢᠮᠤ ᠪᠤᠯ ᠬᠡᠨᠡᠳᠳᠡ ᠪᠠᠷ ᠮᠤᠷᠢ ᠵᠢᠭᠰᠢᠨ ᠨᠠᠳᠬᠤᠵᠤ᠂ ᠬᠡᠯᠪᠡᠷᠢᠨ ᠦᠷᠬᠦᠪᠡᠯ ᠡᠮᠡᠬᠡᠯ ᠠᠮᠠᠷᠬᠠᠨ ᠬᠦᠷᠪᠡᠵᠤ ᠤᠶᠢᠴᠢᠬᠤ ᠠᠶᠤᠯ ᠲᠠᠢ ᠪᠠᠶᠢᠳᠠᠭ᠃ ᠬᠤᠶᠢᠳᠤ ᠤᠯᠤᠩ ᠢ ᠴᠢᠩᠭ᠎ᠠ ᠳᠠᠳᠠᠪᠠᠯ ᠮᠤᠷᠢᠨ ᠳᠤ ᠬᠦᠡᠭᠭᠡᠨ ᠮᠦᠷᠳᠡᠭᠡᠨ ᠮᠤᠷᠢᠨ ᠨᠢᠷᠤᠭᠤᠨ ᠳᠤ ᠰᠠᠶᠢᠨ ᠭᠡᠳᠡᠭ᠃ ᠡᠮᠤᠨ᠎ᠠ ᠤᠯᠤᠩ ᠢ ᠳᠡᠳᠤᠢ ᠠᠳᠤᠷᠢᠳᠠᠯ᠎ᠠ ᠳᠠᠳᠠᠳᠠᠭ ᠦᠭᠡᠢ᠃    ᠤᠯᠤᠩ ᠤᠨ ᠢᠶᠠᠨ ᠨᠠᠭᠠᠳᠠᠢ ᠦᠵᠦᠬᠦᠷ ᠲᠤ ᠬᠡᠯᠡ ᠲᠠᠢ ᠳᠡᠮᠤᠷ ᠭᠤᠷᠭᠢ ᠳᠠᠭᠠᠷᠠᠭᠤᠯᠵᠤ᠂ ᠵᠢᠷᠢᠮ ᠢ ᠰᠢᠷᠭᠤᠭᠤᠯᠤᠨ ᠳᠡᠭᠡᠭᠰᠢ ᠳᠠᠳᠠᠵᠤ᠂ ᠵᠢᠷᠢᠮ ᠤᠨ ᠨᠦᠬᠡ᠂ ᠰᠡᠭᠡᠭᠡ ᠳᠤ ᠬᠡᠯᠡ ᠶᠢ ᠨᠢ ᠤᠷᠤᠭᠤᠯᠤᠨ ᠳᠡᠪᠡᠭᠡᠯᠡᠨ᠎ᠠ᠃    ᠵᠢᠷᠢᠮ —— ᠡᠮᠡᠬᠡᠯ ᠤᠨ ᠪᠤᠷᠤᠭᠤᠳᠠᠢ ᠳᠠᠯ᠎ᠠ ᠶᠢᠨ ᠤᠯᠤᠩ ᠢ ᠮᠤᠷᠢᠨ ᠤ ᠪᠡᠶ᠎ᠠ ᠳᠤᠤᠭᠤᠷ ᠵᠦᠪᠳᠠᠢ ᠳᠠᠯ᠎ᠠ ᠳᠤ ᠳᠡᠳᠡᠨ ᠠᠪᠴᠢᠷᠠᠭᠠᠳ᠂ ᠭᠤᠷᠬᠢᠨ ᠳᠤ ᠨᠢ ᠰᠢᠷᠭᠤᠭᠤᠯᠵᠤ ᠳᠡᠳᠡᠨ ᠳᠡᠪᠡᠭᠡᠯᠡᠬᠦ᠂ ᠵᠦᠪᠳᠠᠢ ᠳᠠᠯ᠎ᠠ ᠶᠢᠨ ᠤᠭᠰᠤᠷᠭ᠎ᠠ ᠠᠴᠠ ᠬᠤᠯᠪᠤᠭᠰᠠᠨ ᠬᠦᠷᠦᠮᠡᠯ ᠰᠦᠮᠵᠢᠮᠡᠯ ᠰᠡᠭᠡᠭᠡ ᠨᠦᠬᠡ ᠲᠠᠢ ᠳᠡᠭᠡᠰᠤ ᠶᠢ ᠵᠢᠷᠢᠮ ᠬᠡᠨ᠎ᠠ᠃    ᠵᠢᠷᠢᠮ ᠢ ᠵᠦᠬᠡᠯᠡᠨ ᠰᠤᠷ ᠢ ᠨᠠᠷᠢᠨ ᠵᠦᠰᠦᠵᠦ᠂ 16 ᠪᠤᠶᠤ 32 ᠰᠡᠷᠭᠡᠭ ᠢᠶᠠᠷ ᠳᠣᠮᠳᠠ ᠨᠢ ᠨᠦᠬᠡ ᠰᠡᠭᠡᠭᠡ ᠭᠠᠷᠭᠠᠨ ᠬᠠᠪᠳᠠᠭᠠᠶᠢᠯᠠᠨ ᠳᠤᠤᠷᠯᠠᠵᠤ᠂ ᠰᠦᠯᠵᠢᠵᠦ ᠬᠦᠷᠦᠵᠦ ᠬᠢᠨ᠎ᠠ᠃ ᠪᠠᠰᠠ ᠬᠠᠪᠳᠠᠭᠠᠢ ᠰᠤᠷ ᠢ ᠨᠤᠭᠤᠯᠵᠤ᠂ ᠳᠤᠮᠳᠠᠭᠤᠷ ᠨᠢ ᠵᠢᠭᠳᠡ ᠵᠠᠢ ᠪᠠᠷ ᠬᠠᠭᠠᠯᠤᠨ ᠬᠠᠭᠠᠯᠤᠨ ᠰᠢᠷᠭᠤᠭᠤᠯᠵᠤ᠂ ᠨᠦᠬᠡ ᠭᠠᠷᠭᠠᠨ ᠬᠠᠪᠳᠠᠭᠠᠶᠢᠯᠠᠵᠤ ᠬᠢᠳᠡᠭ᠃ ᠬᠠᠮᠤᠭ ᠤᠨ ᠲᠦᠬᠦᠮ ᠨᠢ ᠬᠡᠪᠡᠯ ᠳᠠᠷᠤᠢ ᠬᠠᠪᠳᠠᠭᠠᠢ ᠰᠤᠷ ᠢᠶᠠᠨ ᠨᠦᠬᠡᠯᠡᠵᠦ ᠬᠢᠨ᠎ᠠ᠃ ᠵᠠᠷᠢᠮ ᠬᠦᠮᠦᠰ ᠬᠢᠯᠭᠠᠰᠤᠨ ᠤᠳᠠᠰᠤᠨ ᠤ ᠬᠠᠪᠳᠠᠭᠠᠢ ᠬᠦᠷᠦᠮᠡᠯ ᠢᠶᠠᠷ ᠴᠦ ᠬᠢᠳᠡᠭ᠃    ᠡᠮᠡᠭᠡᠯ ᠳᠤ ᠬᠤᠶᠠᠷ ᠵᠢᠷᠢᠮ ᠪᠠᠶᠢᠳᠠᠭ᠃ ᠡᠮᠡᠬᠡᠯ ᠤᠨ ᠵᠡᠬᠦᠨ ᠳᠠᠯ᠎ᠠ ︵ᠵᠦᠪᠳᠠᠢ ᠳᠠᠯ᠎ᠠ︶ ᠶᠢᠨ ᠤᠷᠢᠳᠤ ᠪᠦᠬᠦᠷᠬᠡ ᠪᠠ ᠬᠠᠪᠳᠠᠭᠠᠯ ᠳᠡᠭᠡᠷᠡᠬᠢ ᠵᠢᠰᠢᠬᠦᠦ ᠵᠡᠷᠭᠡᠴᠡᠭᠡ ᠤᠷᠤᠰᠢᠬᠤ ᠨᠦᠬᠡ ᠶᠢᠨ ᠤᠭᠰᠤᠷᠭ᠎ᠠ ᠠᠴᠠ ᠬᠤᠯᠪᠤᠭᠰᠠᠨ ᠳᠡᠭᠡᠰᠤ ᠶᠢ ᠤᠷᠢᠳᠤ ᠵᠢᠷᠢᠮ ᠭᠡᠵᠤ᠂ ᠡᠮᠡᠬᠡᠯ ᠤᠨ ᠵᠡᠬᠦᠨ ᠳᠠᠯ᠎ᠠ ᠶᠢᠨ ᠬᠤᠶᠢᠳᠤ ᠪᠦᠬᠦᠷᠬᠡ ᠪᠠ ᠬᠠᠪᠳᠠᠭᠠᠯ ᠳᠡᠭᠡᠷᠡᠬᠢ ᠵᠢᠰᠢᠬᠦᠦ ᠵᠡᠷᠭᠡᠴᠡᠭᠡ ᠤᠷᠤᠰᠢᠬᠤ ᠨᠦᠬᠡ ᠶᠢᠨ ᠤᠭᠰᠤᠷᠭ᠎ᠠ ᠠᠴᠠ ᠬᠤᠯᠪᠤᠭᠰᠠᠨ ᠳᠡᠭᠡᠰᠤ ᠶᠢ ᠬᠤᠶᠢᠳᠤ ᠵᠢᠷᠢᠮ ᠬᠡᠨ᠎ᠠ ᠃ ᠤᠷᠢᠳᠤ ᠬᠤᠶᠢᠳᠤ ᠵᠢᠷᠢᠮ ᠤᠨ ᠬᠤᠭᠤᠷᠤᠨᠳᠤᠬᠢ ᠵᠠᠢ ᠨᠢ ᠤᠷᠢᠳᠤ ᠬᠤᠶᠢᠳᠤ ᠤᠯᠤᠩ ᠤᠨ ᠵᠠᠢ ᠲᠠᠢ ᠠᠳᠠᠯᠢᠬᠠᠨ᠃    ᠤᠭᠰᠤᠷᠭ᠎ᠠ —— ᠡᠮᠡᠬᠡᠯ ᠤᠨ ᠤᠯᠤᠩ ᠵᠢᠷᠢᠮ ᠢ ᠬᠠᠨᠭ᠍ᠬᠠᠢ ᠡᠮᠡᠭᠡᠯ ᠤᠨ ᠬᠠᠪᠳᠠᠭᠠᠯ ᠪᠦᠬᠦᠷᠭᠡ ᠶᠢᠨ ᠠᠭᠤᠯᠵᠠᠷ ᠳᠡᠬᠡᠷ᠎ᠠ ᠵᠢᠰᠢᠬᠦᠦ ᠪᠠᠷ ᠪᠠᠶᠢᠷᠢᠯᠠᠨ ᠵᠡᠷᠭᠡᠴᠡᠭᠰᠡᠨ ᠬᠤᠶᠠᠷ ᠨᠦᠬᠡ ᠠᠴᠠ ᠬᠤᠯᠪᠤᠵᠤ ᠤᠶᠠᠬᠤ ᠪᠤᠶᠤ ᠳᠡᠪᠡᠬᠡᠯᠡᠬᠦ ᠤᠭᠤᠰᠤᠷ ᠢ ᠤᠭᠰᠤᠷᠭ᠎ᠠ ᠬᠡᠨ᠎ᠠ᠃ ᠵᠠᠷᠢᠮ ᠳᠤ ᠪᠠᠨ ᠪᠠᠰᠠ ᠤᠭᠴᠤᠷᠭ᠎ᠠ ᠬᠡᠨ᠎ᠠ᠃    ᠤᠭᠰᠤᠷᠭ᠎ᠠ ᠶᠢ ᠰᠠᠶᠢᠨ ᠰᠤᠷ ᠢᠶᠠᠷ ᠳᠠᠪᠬᠤᠷᠯᠠᠵᠤ ᠬᠢᠨ᠎ᠠ᠃ ᠰᠤᠷ ᠢᠶᠠᠨ ᠳᠡᠪᠳᠦᠬᠡᠵᠦ᠂ ᠬᠠᠪᠳᠠᠭᠠᠢ ᠨᠤᠭᠤᠯᠤᠨ ᠂ ᠬᠠᠪᠳᠠᠭᠠᠯ ᠪᠦᠬᠦᠷᠬᠡ ᠶᠢᠨ ᠵᠢᠰᠢᠬᠦᠦ ᠵᠡᠷᠭᠡᠴᠡᠭᠡ ᠬᠤᠶᠠᠷ ᠨᠦᠬᠡ ᠪᠠᠷ ᠰᠢᠷᠭᠤᠭᠤᠯᠵᠤ᠂ ᠤᠯᠤᠩ ᠪᠠ ᠵᠢᠷᠢᠮ ᠢ ᠬᠤᠯᠪᠤᠨ ᠤᠶᠠᠳᠠᠭ᠃ ᠡᠮᠡᠬᠡᠯ ᠤᠨ ᠤᠭᠰᠤᠷᠭ᠎ᠠ ᠨᠡᠶᠢᠳᠡ ᠲᠦᠷᠪᠡ ᠪᠠᠶᠢᠳᠠᠭ᠃ ᠳᠠᠷᠤᠢ ᠤᠷᠢᠳᠤ ᠬᠤᠶᠢᠳᠤ ᠤᠯᠤᠩ  ᠤᠨ ᠬᠤᠶᠠᠷ ᠤᠭᠰᠤᠷᠭ᠎ᠠ᠂ ᠤᠷᠢᠳᠤ ᠬᠤᠶᠢᠳᠤ ᠵᠢᠷᠢᠮ ᠤᠨ ᠬᠤᠶᠠᠷ ᠤᠭᠰᠠᠷᠭ᠎ᠠ ᠪᠤᠯᠤᠨ᠎ᠠ᠃    ᠲᠦᠷᠦᠬᠡ —— ᠲᠦᠷᠦᠬᠡ ᠪᠤᠯ ᠳᠠᠷᠤᠢ ᠡᠮᠡᠭᠡᠯ ᠤᠨ ᠬᠢᠰᠬᠢᠬᠦᠷ᠂ ᠳᠡᠭᠡᠷ᠎ᠠ ᠨᠢᠬᠡᠨ ᠰᠠᠭᠤᠳᠠᠯ ᠳᠤ ᠭᠠᠷᠬᠤ  ᠶᠢᠨ ᠱᠠᠳᠤ᠃ ᠡᠮᠡᠬᠡᠯ ᠤᠨ ᠪᠤᠰᠤᠭ᠎ᠠ ᠬᠡᠢ ᠮᠤᠷᠢ ᠪᠤᠯ ᠳᠠᠷᠤᠢ ᠲᠦᠷᠦᠬᠡ ᠭᠡᠳᠡᠭ᠃ ᠬᠤᠷᠴᠢᠨᠴᠤᠳ᠂ ᠲᠦᠷᠦᠬᠡ ᠪᠤᠯ ᠳᠠᠷᠤᠢ ᠬᠦᠮᠦᠰ ᠢ ᠭᠠᠵᠠᠷ ᠠᠴᠠ ᠰᠠᠯᠭᠠᠨ᠂ ᠭᠡᠢ ᠠᠭᠠᠷ ᠳᠡᠬᠡᠷ᠎ᠠ ᠵᠤᠷᠴᠢᠭᠤᠯᠤᠨ ᠵᠢᠷᠭᠠᠭᠤᠯᠵᠤ ᠪᠠᠶᠢᠭ᠎ᠠ ᠡᠬᠦᠳᠡᠨ ᠪᠤᠱᠤᠭ᠎ᠠ ᠭᠡᠵᠤ ᠦᠵᠡᠳᠡᠭ᠃ ᠳᠡᠭᠡᠭᠡᠳ ᠯᠠ ᠯᠤᠤ ᠶᠢᠨ ᠠᠮᠠ ᠲᠠᠢ ᠲᠦᠷᠦᠭᠡ ᠭᠡᠳᠡᠯ᠎ᠠ ᠤᠭᠠᠯᠵᠠ ᠭᠡ ᠲᠠᠢ ᠲᠦᠷᠦᠬᠡ᠂ ᠪᠡᠯᠭᠡ ᠳᠡᠮᠪᠡᠷᠢᠯ ᠲᠠᠢ᠂ ᠦᠨ᠎ᠡ ᠪᠡᠨ᠎ᠠ ᠲᠠᠢ ᠲᠦᠷᠦᠬᠡ ᠡᠷᠢᠵᠦ ᠳᠡᠮᠡᠴᠡᠳᠡᠭ᠃ ᠯᠤᠤ ᠪᠤᠯ ᠤᠭᠳᠠᠷᠭᠤᠢ  ᠳᠤ ᠳᠡᠬᠦᠯᠢᠳᠡᠭ ᠷᠢᠳᠢ ᠰᠢᠳᠢ ᠲᠠᠢ᠂ ᠬᠤᠪᠢᠯᠭᠠᠨ ᠤᠪᠠᠳᠢᠰ ᠲᠠᠢ ᠠᠮᠢᠳᠠᠨ ᠤ ᠪᠦᠷᠢᠯᠸ᠎ᠠ᠂ ᠭᠠᠢ ᠪᠠᠷᠴᠢᠳ ᠤᠨ ᠳᠠᠷᠤᠯᠭ᠎ᠠ ᠭᠡᠵᠤ ᠦᠵᠡᠨ᠂ ᠤᠤᠯ ᠤᠤᠯ ᠠᠴᠠ ᠯᠤᠤ ᠶᠢᠨ ᠠᠮᠠ ᠲᠠᠢ ᠲᠦᠷᠦᠬᠡ ᠶᠢ ᠡᠷᠢᠵᠦ ᠬᠡᠷᠡᠭᠯᠡᠳᠡᠭ ᠪᠠᠶᠢᠪᠠ᠃ ᠳᠡᠬᠦᠨ ᠢᠶᠠᠨ ᠳᠠᠷᠠᠭᠠᠯᠠᠭᠠᠳ ᠵᠡᠰ ᠭᠠᠤᠯᠢᠨ ᠲᠦᠷᠦᠬᠡ᠂ ᠬᠦᠷᠡᠯ ᠳᠡᠮᠤᠷ ᠲᠦᠷᠦᠬᠡ ᠶᠢ ᠡᠮᠡᠬᠡᠯ ᠳᠤ ᠪᠠᠨ ᠤᠭᠰᠠᠷᠠᠵᠤ ᠢᠷᠡᠪᠡ᠃ ᠲᠦᠷᠦᠬᠡ ᠶᠢ ᠬᠦᠮᠦᠰ ᠪᠡᠯᠭᠡ ᠳᠠᠮᠪᠠᠷᠢᠯ ᠲᠠᠢ ᠶᠢ ᠡᠷᠢᠬᠦ ᠪᠤᠶᠤ ᠶᠠᠩᠵᠤ ᠡᠪ ᠢ ᠨᠢ ᠤᠨᠴᠠ ᠡᠷᠬᠢᠮᠯᠡᠳᠡᠭ ᠪᠤᠯᠪᠠᠴᠤ ᠬᠦᠡᠭᠭᠡᠨ ᠢ ᠨᠢ ᠮᠥᠨ ᠰᠤᠩᠭᠤᠵᠤ ᠬᠡᠷᠡᠭᠯᠡᠳᠡᠭ᠃    ᠨᠢᠬᠡ ᠡᠮᠡᠬᠡᠯ ᠳᠤ ᠨᠢᠬᠡ ᠬᠤᠤᠰ ᠲᠦᠷᠦᠬᠡ ᠤᠭᠰᠠᠷᠠᠳᠠᠭ᠃ ᠳᠠᠷᠤᠢ ᠵᠦᠪᠳᠠᠢ ᠲᠦᠷᠦᠬᠡ᠂ ᠪᠤᠷᠤᠭᠤᠳᠠᠢ ᠲᠦᠷᠦᠬᠡ ᠪᠤᠯᠤᠨ᠎ᠠ᠃ ᠵᠡᠬᠦᠨ ᠬᠦᠯ ᠤᠨ ᠲᠦᠷᠦᠬᠡ ᠶᠢ ᠵᠦᠪᠳᠠᠢ ᠲᠦᠷᠦᠬᠡ ᠭᠡᠵᠤ᠂ ᠪᠠᠷᠠᠭᠤᠨ ᠬᠦᠯ ᠤᠨ ᠲᠦᠷᠦᠬᠡ  ᠶᠢ ᠪᠤᠷᠤᠭᠤᠳᠠᠢ ᠲᠦᠷᠦᠬᠡ ᠬᠡᠨ᠎ᠠ᠃ ᠲᠦᠷᠦᠬᠡ ᠨᠢ ᠪᠠᠰᠠ ᠲᠦᠷᠦᠬᠡ ᠶᠢᠨ ᠬᠢᠰᠬᠢᠬᠦᠷ᠂ ᠲᠦᠷᠦᠬᠡ ᠶᠢᠨ ᠰᠡᠨᠵᠢ᠂ ᠲᠦᠷᠦᠬᠡᠨ ᠤᠭᠤᠰᠤᠷ ᠤᠨ ᠡᠯᠬᠦᠬᠦᠷ ᠵᠡᠷᠭᠡ ᠪᠠᠷ ᠪᠦᠷᠢᠯᠳᠦᠨ᠎ᠠ᠃    ᠲᠦᠷᠦᠬᠡ ᠶᠢ ᠡᠮᠡᠭᠡᠯ ᠤᠨ ᠤᠷᠢᠳᠤ ᠤᠯᠤᠩ᠂ ᠤᠷᠢᠳᠤ ᠵᠢᠷᠢᠮ ᠤᠨ ᠤᠭᠰᠤᠷᠭ᠎ᠠ ᠶᠢᠨ ᠨᠦᠬᠡ ᠠᠴᠠ ᠠᠷᠤᠨᠰᠢ 2 — 3 ᠰᠠᠨᠲ᠋ᠢᠮᠧᠲᠷ ᠤᠨ ᠵᠠᠢ ᠪᠠᠷ ᠬᠠᠪᠳᠠᠭᠠᠯ ᠢ ᠴᠤᠭᠤᠯᠵᠤ᠂ ᠰᠤᠷ ᠤᠭᠤᠰᠤᠷ ᠢᠶᠠᠷ ᠡᠯᠬᠦᠨ᠎ᠠ᠃ ᠲᠦᠷᠦᠬᠡ  ᠶᠢ ᠡᠯᠬᠦᠨ ᠳᠡᠬᠦᠵᠢᠯᠡᠳᠡᠭ ᠰᠤᠷ ᠳᠡᠭᠡᠰᠤ ᠶᠢ ᠲᠦᠷᠦᠬᠡᠨ ᠰᠤᠷ ᠬᠡᠨ᠎ᠠ᠃ ᠲᠦᠷᠦᠬᠡᠨ ᠰᠤᠷ ᠢ ᠰᠠᠶᠢᠨ ᠪᠤᠯᠪᠠᠰᠤᠷᠠᠭᠰᠠᠨ ᠵᠤᠵᠠᠭᠠᠨ ᠰᠤᠷ ᠢ ᠳᠠᠪᠤᠨ ᠬᠤᠷᠤᠭᠤ ᠪᠠᠷ ᠵᠦᠰᠦᠬᠡᠳ᠂ ᠭᠤᠤᠯ ᠢᠶᠠᠷ ᠨᠢ ᠨᠤᠭᠤᠯᠤᠨ ᠳᠠᠪᠬᠤᠷᠯᠠᠵᠤ᠂ ᠳᠡᠭᠡᠭᠰᠢ ᠡᠯᠬᠦᠬᠦ‍ ᠨᠢᠬᠡ ᠦᠵᠦᠬᠦᠷ ᠳᠡᠬᠡᠷ᠎ᠠ ᠨᠢ ᠬᠡᠯᠡ ᠲᠠᠢ ᠳᠡᠮᠤᠷ ᠭᠤᠷᠬᠢ ᠤᠭᠰᠠᠷᠠᠵᠤ᠂ ᠨᠦᠬᠦᠬᠡ ᠦᠵᠦᠬᠦᠷ ᠢ ᠬᠠᠪᠳᠠᠭᠠᠯ ᠤᠨ ᠲᠦᠷᠦᠬᠡᠨ ᠰᠤᠷ ᠤᠨ ᠨᠦᠬᠡ ᠶᠢᠨ ᠳᠤᠳᠤᠷ᠎ᠠ ᠳᠠᠯ᠎ᠠ ᠠᠴᠠ ᠨᠢ ᠭᠠᠳᠠᠭᠰᠢ ᠰᠢᠷᠭᠤᠭᠤᠯᠤᠨ ᠳᠠᠳᠠᠵᠤ ᠭᠠᠷᠭᠠᠭᠠᠳ᠂ ᠭᠤᠷᠬᠢᠨ ᠳᠤ ᠳᠡᠪᠡᠬᠡᠯᠡᠵᠦ ᠡᠯᠬᠦᠨ᠎ᠠ᠃    ᠬᠤᠶᠠᠷ ᠳᠠᠯ᠎ᠠ ᠶᠢᠨ ᠲᠦᠷᠦᠬᠡᠨ ᠰᠤᠷ ᠢ ᠨᠢᠬᠡᠯᠡ ᠠᠳᠠᠯᠢ ᠤᠷᠳᠤ ᠭᠢᠳᠡᠭ ᠦᠭᠡᠢ᠃ ᠵᠦᠪ ᠳᠠᠯ᠎ᠠ ᠶᠢᠨ ᠲᠦᠷᠦᠬᠡᠨ ᠰᠤᠷ ᠢ ᠮᠤᠷᠢᠨ ᠳᠡᠭᠡᠷ᠎ᠠ ᠭᠠᠷᠴᠤ ᠪᠠᠭᠤᠬᠤ ᠶᠢ ᠪᠤᠳᠤᠵᠤ ᠪᠤᠷᠤᠭᠤᠳᠠᠢ ᠳᠠᠯ᠎ᠠ ᠶᠢᠨ ᠬᠢᠨ ᠠᠴᠠ ᠪᠠᠭ᠋ᠠᠨ ᠤᠷᠳᠤ ᠳᠠᠯᠪᠢᠳᠠᠭ᠃ ᠲᠦᠷᠦᠬᠡᠨ ᠰᠤᠷ ᠤᠨ ᠤᠷᠳᠤ ᠨᠢ ᠶᠡᠷᠤᠩᠭᠡᠢ ᠳᠤ ᠪᠠᠨ ᠪᠠᠷᠤᠭ 35 ᠰᠠᠨᠲ᠋ᠢᠮᠧᠲᠷ ᠤᠷᠳᠤ ᠪᠠᠶᠢᠳᠠᠭ᠃ ᠬᠡᠪᠡᠴᠤ ᠬᠦᠳᠡᠯᠦᠩᠭᠦᠢ ᠪᠠᠷ ᠰᠤᠩᠭᠠᠵᠤ ᠠᠪᠴᠢᠭᠠᠬᠤ ᠪᠠᠷ ᠳᠠᠭᠠᠷᠠᠭᠤᠯᠳᠠᠭ᠃    ᠲᠦᠷᠦᠬᠡᠨ ᠰᠤᠷ ᠢ ᠡᠮᠡᠬᠡᠯ ᠤᠨ ᠬᠦᠯᠢᠮ ᠢ ᠴᠤᠭᠤᠯᠵᠤ᠂ ᠬᠦᠯᠢᠮ ᠤᠨ ᠭᠠᠳᠠᠨ᠎ᠠ ᠲᠦᠷᠦᠬᠡ ᠶᠢ ᠭᠠᠷᠭᠠᠨ᠎ᠠ᠃    ᠭᠠᠨᠵᠤᠭ᠎ᠠ —— ᠡᠮᠡᠬᠡᠯ ᠤᠨ ᠵᠢᠯᠤᠭᠤ ᠴᠤᠯᠪᠤᠭᠤᠷ ᠰᠤᠶᠢᠬᠤ᠂ ᠠᠪᠠ ᠠᠡᠭ ᠤᠨ ᠠᠰᠢᠭ ᠤᠯᠵᠠ᠂ ᠠᠶᠠᠨ ᠨᠡᠬᠦᠳᠡᠯ ᠤᠨ ᠠᠮᠤ ᠬᠦᠨᠡᠰᠤ᠂ ᠠᠶᠢᠯ ᠳᠤᠭᠤᠷᠢᠯ ᠤᠨ ᠪᠡᠯᠡᠭ ᠰᠡᠯᠳᠡ ᠪᠤᠶᠤ ᠤᠨᠤᠭᠰᠠᠨ ᠮᠤᠷᠢᠨ ᠤ ᠪᠠᠨ ᠵᠠᠷᠤᠳᠠᠯ ᠬᠡᠷᠡᠭᠰᠡᠯ ᠢ ᠤᠶᠠᠵᠤ ᠪᠠᠬᠢᠯᠡᠬᠦ ᠳᠤ ᠵᠤᠷᠢᠭᠤᠯᠤᠭᠰᠠᠨ᠂ ᠡᠮᠡᠬᠡᠯ ᠤᠨ ᠬᠤᠶᠠᠷ ᠬᠠᠪᠳᠠᠭᠠᠯ ᠤᠨ ᠬᠤᠶᠠᠷ ᠦᠵᠦᠭᠦᠷ ᠳᠡᠬᠡᠷ᠎ᠠ ᠳᠤᠰᠬᠠᠶᠢᠯᠠᠨ ᠣᠭᠰᠠᠷᠠᠭᠰᠠᠨ ᠲᠦᠷᠪᠡᠨ ᠢᠵᠢ ᠳᠡᠭᠡᠰᠤ ᠶᠢ ᠭᠠᠨᠵᠤᠭ᠎ᠠ ᠬᠡᠨ᠎ᠠ᠃    ᠭᠠᠨᠵᠤᠭ᠎ᠠ ᠶᠢ ᠶᠡᠷᠤ ᠠᠴᠠ ᠰᠤᠷ ᠢᠶᠠᠷ ᠭᠢᠳᠡᠭ᠃ ᠭᠠᠨᠵᠤᠭ᠎ᠠ ᠶᠢ ᠪᠠᠰᠠ ᠬᠠᠪᠳᠠᠭᠠᠢ ᠭᠠᠨᠵᠤᠭ᠎ᠠ ᠪᠠ ᠪᠦᠬᠡᠷᠡᠩᠭᠡᠢ ᠭᠠᠨᠵᠤᠭ᠎ᠠ ᠭᠡᠵᠤ ᠬᠤᠶᠠᠷ ᠲᠦᠷᠦᠯ ᠬᠤᠪᠢᠶᠠᠨ᠎ᠠ᠃ ᠰᠠᠪᠬ᠎ᠠ ᠠᠴᠠ ᠦᠷᠬᠡᠨ ᠵᠦᠰᠦᠵᠦ ᠬᠢᠭᠰᠡᠨ ᠰᠤᠷ ᠢ ᠬᠠᠪᠳᠠᠭᠠᠢ ᠭᠠᠨᠵᠤᠭ᠎ᠠ ᠭᠡᠵᠤ᠂ ᠰᠤᠷ ᠤᠨ ᠵᠤᠵᠠᠭᠠᠨ ᠢᠶᠠᠷ ᠦᠷᠬᠡᠯᠡᠵᠦ ᠬᠢᠭᠰᠡᠨ ᠭᠠᠨᠵᠤᠭ᠎ᠠ ᠶᠢ ᠪᠦᠬᠡᠷᠡᠩᠭᠡᠢ ᠭᠠᠨᠵᠤᠭ᠎ᠠ ᠬᠡᠨ᠎ᠠ᠃    ᠬᠠᠪᠳᠠᠭᠠᠢ ᠭᠠᠨᠵᠤᠭ᠎ᠠ ᠶᠢ ᠨᠢᠮᠬᠡᠨ ᠵᠤᠵᠠᠭᠠᠨ ᠨᠢ ᠠᠳᠠᠯᠢᠬᠠᠨ ᠰᠤᠷ ᠢᠶᠠᠷ ᠬᠢᠨ᠎ᠠ᠃ ᠰᠤᠷ ᠤᠨ ᠤᠷᠳᠤ ᠨᠢ ᠳᠤᠯᠤᠭᠠᠨ ᠲᠦᠬᠡ᠃ ᠨᠢᠬᠡ ᠢᠵᠢ ᠭᠠᠨᠵᠤᠭ᠎ᠠ ︵ᠨᠠᠢᠮᠠᠨ ᠰᠢᠷᠭᠡᠭ︶ ᠶᠢᠨ ᠢᠶᠠᠨ ᠭᠡᠮᠵᠢᠶ᠎ᠠ ᠪᠠᠷ ᠰᠤᠷ ᠢᠶᠠᠨ ᠵᠦᠰᠦᠬᠡᠳ ᠳᠤᠮᠳᠠ ᠨᠢ 2 ᠰᠠᠨᠲ᠋ᠢᠮᠧᠲᠷ ᠪᠢᠳᠡᠬᠦᠦ ᠳᠤᠬᠤ ᠦᠯᠡᠳᠡᠭᠡᠨ ᠬᠤᠶᠠᠷ ᠳᠡᠰᠢ ᠪᠠᠨ ᠳᠤᠰ ᠳᠤᠰ ᠲᠦᠷᠪᠡᠨ ᠰᠢᠷᠭᠡᠭ ᠭᠠᠨᠵᠤᠭ᠎ᠠ ᠵᠦᠰᠦᠨ᠎ᠠ᠃ ᠵᠦᠰᠦᠭᠰᠡᠨ ᠭᠠᠨᠵᠤᠭ᠎ᠠ ᠶᠢᠨ ᠢᠶᠠᠨ ᠦᠵᠦᠬᠦᠷ ᠢ ᠲᠦᠷᠪᠡ ᠲᠦᠷᠪᠡ ᠪᠠᠷ ᠭᠠᠨᠵᠤᠭ᠎ᠠ ᠶᠢᠨ ᠳᠤᠳᠤᠷ᠎ᠠ ᠳᠠᠯ᠎ᠠ ᠶᠢᠨ ᠨᠦᠬᠡ ᠪᠠᠷ ᠰᠢᠷᠭᠤᠭᠤᠯᠠᠨ᠂ ᠪᠢᠳᠡᠬᠦᠦ ᠳᠠᠯ᠎ᠠ ᠶᠢ ᠭᠠᠨᠵᠤᠭ᠎ᠠ ᠶᠢᠨ ᠰᠤᠷ ᠤᠨ ᠭᠤᠪᠬᠢᠯ ᠳᠤ ᠤᠨᠤᠭᠤᠯᠵᠤ᠂ ᠭᠠᠳᠠᠭᠰᠢ ᠪᠠᠨ ᠳᠠᠳᠠᠨ ᠭᠠᠷᠭᠠᠨ᠎ᠠ᠃    ᠨᠢᠬᠡ ᠢᠵᠢ ᠬᠠᠪᠳᠠᠭᠠᠢ ᠭᠠᠨᠵᠤᠭ᠎ᠠ ᠶᠢᠨ ᠳᠤᠭ᠎ᠠ ᠶᠡᠷᠤ ᠠᠴᠠ ᠨᠠᠢᠮᠨ ᠪᠠᠶᠢᠳᠠᠭ᠃ ᠲᠦᠷᠪᠡᠨ ᠢᠵᠢ ᠭᠠᠨᠵᠤᠭ᠎ᠠ  ᠶᠢᠨ ᠰᠢᠷᠭᠡᠭ ᠨᠡᠶᠢᠳᠡ 32 ᠪᠠᠶᠢᠳᠠᠭ᠃ ᠪᠦᠬᠡᠷᠡᠩᠭᠡᠢ ᠭᠠᠨᠵᠤᠭ᠎ᠠ ᠶᠢ ᠨᠢᠬᠡ ᠢᠵᠢ ᠳᠤ 10 ᠪᠤᠶᠤ 12 ᠰᠢᠷᠭᠡᠭ  ᠢᠶᠠᠷ ᠭᠠᠨᠵᠤᠭᠠᠯᠠᠳᠠᠭ᠃ ᠭᠠᠨᠵᠤᠭ᠎ᠠ ᠶᠢᠨ ᠤᠷᠳᠤ ᠶᠢ ᠬᠦᠯᠢᠮ ᠠᠴᠠ ᠤᠬᠤᠷ ᠢᠶᠠᠷ ᠵᠤᠬᠢᠴᠠᠭᠤᠯᠵᠤ ᠪᠠᠷᠤᠭ 70 ᠰᠠᠨᠲ᠋ᠢᠮᠧᠲᠷ ᠪᠠᠶᠢᠯᠭᠠᠳᠠᠭ᠃    ᠰᠤᠷ ᠭᠠᠨᠵᠤᠭ᠎ᠠ ᠶᠢ ᠶᠡᠷᠤ ᠠᠴᠠ ᠬᠠᠷ᠎ᠠ ᠪᠠᠷ ᠪᠤᠳᠤᠳᠠᠭ᠃ ᠬᠠᠷ᠎ᠠ ᠪᠠᠷ ᠪᠤᠳᠤᠪᠠᠯ ᠤᠯᠠᠭᠠᠨ ᠴᠢᠰᠤ ᠬᠦᠷᠦᠭᠰᠡᠨ ᠴᠦ ᠮᠡᠳᠡᠭᠳᠡᠬᠦ ᠦᠭᠡᠢ ᠭᠡᠳᠡᠭ ᠪᠦᠬᠡᠳ ᠶᠠᠭᠤ ᠤᠶᠠᠭᠰᠠᠨ ᠴᠦ ᠭᠭᠢᠷᠳᠦᠵᠦ ᠪᠤᠵᠠᠷᠳᠠᠬᠤ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠭᠡᠳᠡᠭ ᠃ ᠪᠤᠰᠤᠳ ᠵᠤᠶᠢᠯ ᠤᠨ ᠭᠠᠨᠵᠤᠭ᠎ᠠ ᠶᠢ ᠪᠤᠳᠤᠳᠠᠭ ᠦᠭᠡᠢ᠃    ᠭᠠᠨᠵᠤᠭ᠎ᠠ ᠪᠤᠯ ᠡᠮᠡᠬᠡᠯ ᠤᠨ ᠤᠨᠵᠢᠯᠭ᠎ᠠ ᠴᠢᠮᠡᠭ᠂ ᠵᠠᠰᠠᠯ ᠯᠠᠪᠷᠢ᠂ ᠤᠯᠵᠠ ᠤᠮᠤᠭ ᠤᠨ ᠪᠡᠯᠬᠡ᠂ ᠭᠡᠢ ᠮᠤᠷᠢ  ᠶᠢᠨ ᠳᠠᠯᠠᠯᠭ᠎ᠠ ᠭᠡᠳᠡᠭ᠃ ᠳᠡᠶᠢᠮᠤ ᠠᠴᠠ ᠬᠤᠷᠴᠢᠨᠴᠤᠳ ᠠᠪᠠ ᠠᠡᠭ᠂ ᠨᠠᠶᠢᠷ ᠬᠤᠷᠢᠮ ᠳᠤ ᠶᠠᠪᠤᠬᠤ᠂ ᠠᠯᠤᠰ ᠠᠶᠠᠨ ᠳᠤ ᠮᠤᠷᠳᠠᠵᠤ ᠭᠠᠷᠬᠤ ᠯᠠ ᠶᠤᠮ ᠪᠤᠯ ᠡᠮᠡᠬᠡᠯ ᠤᠨ ᠢᠶᠠᠨ ᠭᠠᠨᠵᠤᠭ᠎ᠠ ᠶᠢ ᠳᠤᠰᠤ ᠪᠠᠷ ᠮᠢᠯᠢᠶᠠᠳᠠᠭ᠃    ᠳᠤᠬᠤᠮ —— ᠬᠠᠨᠭ᠍ᠬᠠᠢ ᠮᠤᠳᠤᠨ ᠡᠮᠡᠭᠡᠯ ᠤᠨ ᠳᠤᠤᠷ᠎ᠠ᠂ ᠪᠠᠰᠠ ᠬᠦᠯᠢᠮ ᠤᠨ ᠳᠤᠳᠤᠷ᠎ᠠ ᠳᠠᠯ᠎ᠠ ᠳᠤ ᠳᠤᠬᠤᠬᠤ ᠪᠦᠰ ᠢᠶᠠᠷ ᠪᠦᠷᠢᠭᠰᠡᠨ ᠵᠢᠵᠢᠭ ᠤᠷᠳᠤ ᠲᠦᠷᠪᠡᠯᠵᠢᠨ ᠢᠰᠡᠭᠡᠢ᠂ ᠡᠰᠡᠬᠦᠯ᠎ᠠ ᠬᠢᠯᠭᠠᠰᠤ ᠶᠢ ᠵᠤᠯᠠᠵᠤ ᠪᠦᠰ  ᠢᠶᠠᠷ ᠪᠦᠷᠢᠵᠦ ᠭᠢᠭᠰᠡᠨ ᠵᠦᠬᠡᠯᠡᠪᠴᠢ ᠳᠡᠪᠢᠰᠬᠡᠷ ᠢ ᠳᠤᠬᠤᠮ ᠭᠡᠳᠡᠭ᠃    ᠳᠤᠬᠤᠮ ᠢ ᠵᠢᠪᠡᠷ ᠰᠠᠯᠬᠢ ᠨᠠᠪᠳᠠᠷᠠᠵᠤ᠂ ᠬᠠᠯᠠᠭᠤᠳᠬᠤ ᠶᠢ ᠰᠡᠷᠭᠡᠶᠢᠯᠡᠵᠦ ᠰᠡᠶᠢᠮᠡᠬᠡᠢ ᠰᠡᠭᠡᠭᠡ ᠲᠠᠢ ᠮᠦᠷᠳᠡᠭᠡᠨ ᠭᠦᠪᠰᠡᠭᠡᠷ ᠵᠦᠬᠡᠯᠡᠨ ᠭᠢᠳᠡᠭ᠂ ᠬᠦᠪᠤᠡᠭ ᠪᠤᠶᠤ ᠮᠢᠨᠳᠠᠰᠤ ᠵᠡᠷᠭᠡ ᠵᠦᠬᠡᠯᠡᠨ ᠪᠤᠯᠪᠠᠴᠤ ᠬᠠᠯᠠᠭᠤᠨ ᠡᠳ᠋ ᠢᠶᠠᠷ ᠭᠢᠳᠡᠭ ᠦᠭᠡᠢ᠃ ᠭᠡᠳᠤᠷᠬᠡᠢ ᠬᠠᠯᠠᠭᠤᠨ ᠪᠤᠯ ᠮᠤᠷᠢᠨ ᠨᠢᠷᠤᠭᠤᠨ ᠤ ᠠᠷᠠᠰᠤ ᠦᠰᠦ ᠠᠶᠠᠨᠳᠠᠭᠠᠨ ᠵᠤᠯᠭᠠᠷᠠᠴᠢᠬᠠᠳᠠᠭ᠃    ᠳᠤᠬᠤᠮ ᠤᠨ ᠵᠤᠵᠠᠭᠠᠨ ᠨᠢ ᠪᠠᠷᠤᠭ ᠬᠤᠶᠠᠷ ᠬᠤᠷᠤᠭᠤ ᠪᠠᠶᠢᠳᠠᠭ᠃ ᠡᠮᠡᠬᠡᠯ ᠤᠨ ᠬᠠᠪᠳᠠᠭᠠᠯ ᠮᠤᠷᠢᠨ ᠤ ᠬᠠᠪᠢᠷᠭ᠎ᠠ ᠰᠦᠪᠡᠷᠬᠡ ᠳᠤ ᠬᠠᠯᠠ ᠪᠤᠯᠬᠤ ᠠᠴᠠ ᠪᠤᠶᠤ ᠡᠮᠡᠬᠡᠯ ᠤᠨ ᠳᠠᠷᠤᠯᠳᠠ ᠶᠢ ᠨᠢᠷᠤᠭᠤᠨ ᠭᠤᠤᠯ ᠳᠡᠭᠡᠷ᠎ᠠ ᠵᠤᠬᠢᠬᠤ ᠬᠡᠮᠵᠢᠶ᠎ᠠ ᠪᠠᠷ ᠳᠠᠮᠨᠠᠭᠤᠯᠬᠤ ᠪᠠᠷ ᠳᠤᠰᠬᠠᠶᠢᠯᠠᠨ ᠵᠤᠬᠢᠶᠠᠭᠰᠠᠨ ᠳᠡᠪᠢᠰᠬᠡᠷ ᠡᠳ᠋ ᠪᠠᠶᠢᠭ᠎ᠠ ᠶᠤᠮ᠃    ᠳᠤᠬᠤᠮ ᠢ ᠴᠠᠭᠠᠨ ᠪᠦᠰ ᠢᠶᠠᠷ ᠪᠦᠷᠢᠵᠦ᠂ ᠬᠦᠪᠡᠭᠡ ᠶᠢ ᠨᠢ ᠳᠤᠭᠤᠷᠢᠭᠤᠯᠤᠨ ᠤᠯᠠᠭᠠᠨ ᠪᠦᠰ ᠢᠶᠠᠷ ᠤᠷᠢᠶᠠᠨ ᠴᠢᠮᠡᠭᠯᠡᠨ᠎ᠠ᠃ ᠤᠨᠤᠭ᠎ᠠ ᠬᠦᠯᠦᠭ ᠳᠡᠪᠳᠤᠳᠡᠯ᠎ᠠ ᠬᠦᠯᠦᠰᠦᠷᠡᠭᠰᠡᠨ ᠪᠠᠶᠢᠪᠠᠯ ᠮᠤᠷᠢᠨ ᠠᠴᠠ ᠪᠠᠨ ᠪᠠᠭᠤᠵᠤ᠂ ᠬᠤᠶᠢᠳᠤ ᠤᠯᠤᠩ ᠢ ᠰᠤᠯᠠᠳᠬᠠᠨ᠂ ᠡᠮᠡᠬᠡᠯ ᠢ ᠡᠷᠬᠦᠰᠬᠢᠨ ᠰᠢᠯᠬᠡᠬᠡᠪᠡᠯ ᠳᠤᠬᠤᠮ ᠨᠢ ᠳᠡᠷᠡ ᠳᠠᠷᠤᠢ ᠰᠡᠭᠡᠬᠡ ᠵᠠᠪᠰᠠᠷ ᠢᠶᠠᠨ ᠰᠡᠷᠬᠦᠬᠡᠨ ᠬᠠᠷᠢᠮᠠᠬᠠᠢ ᠬᠦᠴᠦ ᠪᠠᠨ ᠤᠯᠳᠠᠭ᠃ ᠳᠡᠶᠢᠮᠤᠷᠬᠦ ᠳᠤᠬᠤᠮ ᠭᠡᠭᠴᠢ ᠨᠢ ᠡᠮᠡᠬᠡᠯ ᠤᠨ ᠳᠡᠪᠢᠰᠬᠡᠷ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠬᠠᠯᠠᠭᠤᠨ ᠬᠦᠢᠳᠡᠨ ᠢ ᠵᠤᠬᠢᠴᠠᠭᠤᠯᠤᠭᠴᠢ ᠮᠦᠷᠳᠡᠭᠡᠨ ᠳᠡᠭᠡᠭᠡᠷ᠎ᠠ ᠳᠠᠷᠤᠭᠠᠰᠤ ᠶᠢ ᠨᠢ ᠬᠤᠪᠢᠶᠠᠯᠴᠠᠭᠤᠯᠤᠭᠴᠢ ᠡᠳᠡᠭᠡᠳ ᠡᠳ᠋ ᠪᠠᠶᠢᠭ᠎ᠠ ᠶᠤᠮ᠃    ᠳᠤᠬᠤᠮ ᠢ ᠬᠤᠶᠢᠰᠢ ᠤᠷᠤᠭᠰᠢ ᠪᠠᠨ ᠡᠮᠡᠬᠡᠯ ᠤᠨ ᠬᠠᠪᠳᠠᠭᠠᠯ ᠠᠴᠠ 2 — 4 ᠰᠠᠨᠲ᠋ᠢᠮᠧᠲᠷ ᠤᠷᠳᠤ᠂ ᠦᠬᠡᠷ᠎ᠠ ᠪᠠᠷ ᠬᠡᠯᠡᠪᠡᠯ 50 — 52 ᠰᠠᠨᠲ᠋ᠢᠮᠧᠲᠷ ᠢᠶᠠᠷ ᠡᠰᠭᠡᠵᠦ᠂ ᠵᠡᠬᠦᠨᠰᠢ ᠪᠠᠷᠠᠭᠤᠨᠰᠢ ᠦᠷᠬᠡᠨ ᠨᠢ 35 — 37 ᠰᠠᠨᠲ᠋ᠢᠮᠧᠲᠷ ᠢᠶᠠᠷ ᠭᠡᠮᠵᠢᠶᠡᠯᠡᠵᠦ ᠭᠢᠳᠡᠭ᠃     ᠬᠤᠷᠴᠢᠨᠴᠤᠳ ᠤᠨ ᠡᠮᠡᠬᠡᠯ ᠤᠨ ᠳᠤᠬᠤᠮ ᠳᠤ ᠪᠠᠰᠠ ᠨᠢᠬᠡᠨ ᠵᠢᠵᠢᠭ ᠭᠤᠷᠪᠠᠯᠵᠢᠨ ᠬᠡᠪᠡᠭ ᠲᠠᠢ ᠤᠭᠤᠳᠠ ᠳᠠᠭᠠᠭᠠᠯᠳᠤᠳᠠᠭ᠃ ᠳᠡᠬᠦᠨ ᠢᠶᠠᠨ ᠪᠠᠰᠠ ᠬᠠᠯᠢᠰᠤᠨ ᠤᠭᠤᠳᠠ ᠭᠡᠬᠦ ᠪᠤᠶᠤ ᠳᠤᠬᠤᠮ ᠤᠨ ᠳᠡᠷ᠎ᠠ ᠭᠡᠳᠡᠭ᠃ ᠵᠢᠵᠢᠭ ᠭᠤᠷᠪᠠᠯᠵᠢᠨ ᠤᠭᠤᠳᠠᠨ ᠤ ᠪᠠᠨ ᠳᠤᠳᠤᠷ᠎ᠠ ᠰᠠᠭᠠᠭ ᠤᠨ ᠪᠤᠳᠠᠭᠠᠨ ᠤ ᠪᠦᠳᠦᠬᠦᠨ ᠬᠠᠯᠢᠰᠤ ᠶᠢ ᠬᠠᠭᠠᠰ ᠳᠤᠨᠳᠠᠭᠤᠷ ᠰᠠᠪᠠᠯᠠᠵᠤ ᠤᠶᠤᠳᠠᠭ᠃    ᠮᠤᠷᠢᠨ ᠤ ᠮᠤᠨᠳᠠᠭ᠎ᠠ ᠶᠢᠨ ᠠᠷᠤ᠂ ᠳᠠᠷᠤᠢ ᠰᠡᠬᠡᠷ ᠤᠨ ᠬᠦᠳᠦᠬᠦᠷ ᠬᠡᠰᠡᠭ ᠤᠨ ᠠᠷᠤ ᠳᠤ ᠪᠠᠭ᠋ᠠᠨ ᠮᠢᠳᠠᠭ ᠬᠤᠨᠭ᠍ᠬᠢᠯ ᠲᠠᠢ ᠪᠠᠶᠢᠳᠠᠭ᠃ ᠳᠡᠶᠢᠮᠤᠷᠬᠦ ᠳᠤᠬᠤᠮ ᠨᠢᠮᠬᠡᠨ ᠪᠤᠶᠤ ᠬᠠᠳᠠᠭᠤ ᠡᠰᠡᠬᠦᠯ᠎ᠠ ᠬᠠᠪᠳᠠᠭᠠᠯ ᠤᠨ ᠤᠷᠢᠳᠤ ᠦᠵᠦᠬᠦᠷ ᠬᠡᠳᠤᠷᠬᠡᠢ ᠠᠰ ᠵᠢᠬᠢᠳᠠᠩ ᠪᠠᠶᠢᠪᠠᠯ ᠬᠢᠯᠪᠠᠷᠬᠠᠨ ᠢᠶᠠᠷ ᠮᠤᠷᠢᠨ ᠤ ᠮᠤᠨᠳᠠᠭ᠎ᠠ ᠶᠢ ᠮᠦᠷᠬᠦᠵᠦ ᠳᠠᠭᠠᠷᠢᠳᠤᠭᠤᠯᠳᠠᠭ᠃ ᠳᠡᠶᠢᠮᠤ ᠠᠴᠠ ᠬᠤᠷᠴᠢᠨᠴᠤᠳ ᠳᠤᠬᠤᠮ ᠤᠨ ᠤᠷᠢᠳᠤ ᠦᠵᠦᠬᠦᠷ ᠤᠨ ᠳᠤᠤᠷ᠎ᠠ ᠳᠠᠯ᠎ᠠ ᠳᠤ ᠰᠠᠭᠠᠭ ᠤᠨ ᠬᠠᠯᠢᠰᠤ ᠰᠠᠪᠠᠯᠠᠭᠰᠠᠨ ᠵᠢᠵᠢᠭ ᠭᠤᠷᠪᠠᠯᠵᠢᠨ ᠤᠭᠤᠳᠠ ᠶᠢ ᠬᠠᠳᠠᠵᠤ ᠤᠶᠤᠬᠤ ᠪᠤᠯᠤᠭᠰᠠᠨ ᠶᠤᠮ᠃     ᠭᠦᠯᠢᠮ —— ᠡᠮᠡᠭᠡᠯ ᠤᠨ ᠳᠤᠬᠤᠮ ᠤᠨ ᠳᠡᠬᠡᠷ᠎ᠠ ᠳᠠᠯ᠎ᠠ ᠳᠤ ᠳᠠᠪᠬᠤᠷᠯᠠᠨ᠂ ᠬᠠᠪᠳᠠᠭᠠᠯ ᠤᠨ ᠳᠤᠤᠷ᠎ᠠ ᠳᠡᠪᠢᠰᠦᠭᠳᠡᠳᠡᠭ ᠬᠦᠮ᠂ ᠠᠷᠠᠰᠤ᠂ ᠪᠤᠯᠢᠭᠠᠷ᠂ ᠭᠢᠪᠢᠰ ᠵᠡᠷᠭᠡ ᠪᠠᠷ ᠬᠢᠭᠰᠡᠨ ᠤᠷᠳᠤ ᠲᠦᠷᠪᠡᠯᠵᠢᠨ ᠡᠩ ᠲᠠᠢ ᠭᠡᠰᠡᠭ  ᠢ ᠬᠦᠯᠢᠮ ᠭᠡᠳᠡᠭ᠃ ᠬᠦᠯᠢᠮ ᠢ ᠡᠯᠳᠡᠵᠦ ᠪᠤᠯᠪᠠᠰᠤᠷᠠᠭᠤᠯᠤᠭᠰᠠᠨ ᠦᠬᠡᠷ ᠤᠨ ᠠᠷᠠᠰᠤ ᠪᠠᠷ ᠬᠢᠳᠡᠭ᠃ ᠨᠢᠬᠡ ᠪᠦᠳᠦᠬᠦᠨ ᠦᠬᠡᠷ ᠤᠨ ᠠᠷᠠᠰᠤ ᠬᠤᠶᠠᠷ ᠡᠮᠡᠬᠡᠯ ᠤᠨ ᠬᠦᠯᠢᠮ ᠭᠠᠷᠳᠠᠭ ᠶᠤᠮ᠃ ᠳᠠᠯ᠎ᠠ ᠪᠡᠶ᠎ᠠ ᠶᠢᠨ ᠠᠷᠠᠰᠤ ᠨᠢ ᠳᠠᠷᠤᠢ ᠨᠢᠬᠡ ᠡᠮᠡᠬᠡᠯ ᠤᠨ ᠬᠦᠯᠢᠮ᠃ ᠡᠯᠳᠡᠵᠦ ᠪᠤᠯᠪᠠᠰᠤᠷᠠᠭᠤᠯᠤᠭᠰᠠᠨ ᠦᠬᠡᠷ ᠤᠨ ᠠᠷᠠᠰᠤ ᠪᠠᠨ ᠵᠢᠭᠳᠡ ᠰᠠᠶᠢᠬᠠᠨ ᠡᠩᠵᠢᠬᠦᠯᠦᠨ ᠳᠠᠯᠠᠵᠤ᠂ 156 ᠰᠠᠨᠲ᠋ᠢᠮᠧᠲᠷ ᠤᠷᠳᠤ᠂ ᠬᠤᠶᠠᠷ ᠦᠵᠦᠬᠦᠷ ᠵᠦᠭ ᠢᠶᠠᠨ 53 ᠰᠠᠨᠲ᠋ᠢᠮᠧᠲᠷ ᠦᠷᠬᠡᠨ᠂ ᠭᠤᠤᠯ ᠳᠤᠮᠳᠠ ᠭᠡᠰᠡᠭ ᠲᠤ ᠪᠠᠨ 48 ᠰᠠᠨᠲ᠋ᠢᠮᠧᠲᠷ ᠦᠷᠬᠡᠨ ᠢᠶᠠᠷ ᠵᠦᠰᠦᠬᠡᠳ ᠨᠢᠬᠡ ᠬᠠᠪᠰᠤᠷᠤᠭ᠎ᠠ ᠬᠦᠯᠢᠮ ᠪᠤᠯᠭᠠᠨ᠎ᠠ᠃ ᠳᠠᠬᠢᠭᠠᠳ ᠪᠢᠳᠡᠬᠦᠦ ᠪᠠᠷ ᠬᠡᠷᠡᠭᠯᠡᠪᠡᠯ ᠬᠦᠯᠢᠮ ᠤᠨ ᠭᠤᠤᠯ ᠰᠢᠯᠵᠢᠵᠦ ᠵᠡᠬᠦᠨ ᠪᠠᠷᠠᠭᠤᠨ ᠬᠦᠯᠢᠮ ᠳᠡᠬᠡᠷ᠎ᠠ ᠳᠤᠤᠷ᠎ᠠ  ᠲᠠᠢ ᠪᠤᠯᠤᠨ᠎ᠠ ᠭᠡᠵᠤ᠂ ᠭᠤᠤᠯ ᠳᠤᠮᠳᠠᠭᠤᠷ ᠨᠢ ᠵᠦᠰᠦᠨ ᠰᠠᠯᠭᠠᠭᠠᠳ᠂ ᠬᠤᠶᠠᠷ ᠬᠡᠰᠡᠭ ᠢ ᠨᠡᠶᠢᠯᠡᠬᠦᠯᠦᠨ᠂ ᠬᠠᠪᠰᠤᠷᠤᠭᠰᠠᠨ ᠳᠡᠭᠡᠷ᠎ᠠ ᠢᠷᠮᠡᠭ ᠢ ᠨᠢ ᠳᠤᠷᠰᠢ ᠳᠤ ᠨᠢ ᠰᠢᠷᠢ ᠪᠤᠶᠤ ᠬᠢᠯᠭᠠᠰᠤᠨ ᠤᠳᠠᠰᠤ ᠪᠠᠷ ᠱᠠᠭᠯᠠᠵᠤ ᠤᠶᠤᠨ᠎ᠠ ᠃ ᠢᠡᠭᠭᠢᠵᠦ ᠤᠶᠤᠵᠤ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭ᠎ᠠ ᠬᠦᠯᠢᠮ ᠤᠨ ᠬᠤᠶᠢᠰᠢ ᠤᠷᠤᠭᠰᠢ ᠬᠠᠨᠳᠤᠰᠢ᠂ ᠦᠬᠡᠷ᠎ᠠ ᠪᠠᠷ ᠬᠡᠯᠡᠪᠡᠯ ᠵᠦᠪ ᠪᠤᠷᠤᠭᠤ ᠳᠠᠯ᠎ᠠ ᠶᠢ ᠭᠡᠵᠢᠶᠡᠳᠡ ᠢᠯᠭᠠᠬᠤ ᠶᠢᠨ ᠲᠦᠯᠦᠬᠡ᠂ ᠪᠠᠰᠠ ᠬᠦᠯᠢᠮ ᠤᠨ ᠬᠤᠶᠢᠳᠤ ᠳᠤᠤᠷ᠎ᠠ ᠦᠨᠴᠦᠭ ᠮᠤᠷᠢᠨ ᠤ ᠴᠢᠪᠢ ᠭᠤᠶᠠ ᠶᠢ ᠴᠢᠴᠢᠯᠬᠢᠯᠡᠬᠦ ᠠᠴᠠ ᠬᠢᠴᠢᠶᠡᠵᠦ᠂ ᠬᠦᠯᠢᠮ ᠤᠨ ᠬᠤᠶᠢᠳᠤ ᠳᠤᠤᠷ᠎ᠠ ᠦᠨᠴᠦᠭ ᠢ ᠵᠢᠵᠢᠭ ᠬᠠᠭᠠᠰ ᠰᠠᠷᠠᠨ ᠤ ᠬᠡᠯᠪᠡᠷᠢ ᠪᠠᠷ ᠤᠬᠤᠨ ᠵᠦᠰᠦᠵᠦ ᠠᠪᠳᠠᠭ᠃    ᠬᠦᠯᠢᠮ ᠤᠨ ᠭᠠᠳᠠᠷ ᠳᠠᠯ᠎ᠠ ᠶᠢᠨ ᠨᠢᠭᠤᠷ ᠢ ᠬᠠᠷ᠎ᠠ ᠪᠤᠳᠤᠭ ᠢᠶᠠᠷ ᠪᠤᠳᠤᠵᠤ᠂ ᠪᠦᠬᠦ ᠬᠦᠪᠡᠭᠡ ᠶᠢ ᠨᠢ ᠳᠤᠭᠤᠷᠢᠭᠤᠯᠤᠨ ᠬᠠᠷᠠᠩᠭᠤᠢ ᠨᠤᠭᠤᠭᠠᠨ ᠦᠡᠭᠭᠡ ᠶᠢᠨ ᠬᠦᠮ ᠢᠶᠠᠷ ᠪᠢᠳᠡᠬᠦᠯᠦᠨ ᠭᠦᠪᠡᠬᠡᠯᠡᠵᠦ᠂ ᠨᠠᠷᠢᠨ ᠰᠢᠷᠢ ᠤᠳᠠᠰᠤ ᠪᠤᠶᠤ ᠬᠢᠯᠭᠠᠰᠤᠨ ᠤᠳᠠᠰᠤ ᠪᠠᠷ ᠱᠠᠭᠯᠠᠨ ᠤᠶᠤᠳᠠᠭ᠃ ᠬᠦᠯᠢᠮ ᠤᠨ ᠳᠤᠳᠤᠷ᠎ᠠ ᠳᠠᠯ᠎ᠠ ᠳᠤ ᠪᠤᠳᠤᠭ ᠳᠠᠯᠪᠢᠳᠠᠭ ᠦᠭᠡᠢ᠃    ᠬᠦᠯᠢᠮ ᠢᠶᠠᠨ ᠪᠤᠳᠤᠭᠯᠠᠵᠤ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠲᠦᠷᠦᠬᠡᠨ ᠰᠤᠷ ᠤᠨ ᠨᠦᠬᠡ ᠶᠢ ᠲᠦᠷᠪᠡᠯᠵᠢᠯᠡᠨ ᠤᠬᠤᠵᠤ ᠭᠠᠷᠭᠠᠨ᠎ᠠ᠃    ᠤᠨᠤᠭ᠎ᠠ ᠬᠦᠯᠦᠭ ᠮᠤᠷᠢᠨ ᠤ ᠡᠮᠡᠭᠡᠯ ᠳᠤ ᠠᠷᠠᠰᠤᠨ ᠬᠦᠯᠢᠮ ᠳᠠᠭᠠᠷᠠᠭᠤᠯᠵᠤ ᠪᠠᠶᠢᠭ᠎ᠠ ᠶᠢᠨ ᠤᠴᠢᠷ ᠶᠤᠰᠤᠨ ᠬᠡᠪᠡᠯ ᠳᠠᠷᠤᠢ ᠳᠠᠶᠢᠨ ᠳᠤ ᠤᠷᠤᠯᠴᠠᠬᠤ ᠵᠠᠩᠵᠤᠨ ᠴᠡᠷᠢᠭ ᠤᠨ ᠬᠤᠶᠠᠭᠯᠠᠵᠤ ᠪᠠᠶᠢᠭ᠎ᠠ ᠲᠠᠢ ᠨᠢᠬᠡ ᠯᠠ ᠠᠳᠠᠯᠢ ᠪᠠᠶᠢᠳᠠᠭ᠃ ᠳᠤᠪᠳᠤᠯᠵᠤ ᠪᠠᠶᠢᠭ᠎ᠠ ᠬᠦᠯᠦᠭ ᠮᠤᠷᠢᠨ ᠤ ᠠᠷᠠᠰᠤᠨ ᠬᠦᠯᠢᠮ ᠳᠤ ᠪᠠᠷᠤᠭ ᠤᠨ ᠵᠢᠳᠠ ᠰᠡᠯᠡᠮ᠎ᠠ᠂ ᠢᠯᠳᠤ ᠵᠠᠪᠠ ᠠᠮᠠᠷ ᠬᠢᠯᠪᠡᠷ ᠢᠶᠠᠷ ᠮᠤᠷᠢᠨ ᠤ ᠪᠡᠶ᠎ᠠ᠂ ᠬᠦᠨᠳᠡᠢ ᠴᠡᠭᠡᠵᠢᠨ ᠳᠤ ᠬᠦᠷᠳᠡᠯ᠎ᠠ ᠰᠢᠪᠳᠤᠯᠤᠨ ᠤᠷᠤᠵᠤ ᠴᠢᠳᠠᠳᠠᠭ ᠦᠭᠡᠢ ᠶᠤᠮ᠃ ᠳᠠᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ ᠬᠦᠯᠦᠭ ᠡᠷᠡᠬᠦᠯ ᠪᠤᠯ ᠡᠵᠡᠨ ᠡᠷᠡᠬᠦᠯ᠂ ᠡᠵᠡᠨ ᠡᠷᠡᠬᠦᠯ ᠪᠤᠯ ᠬᠦᠯᠦᠭ ᠡᠷᠡᠬᠦᠯ ᠪᠠᠶᠢᠳᠠᠭ᠃ ᠳᠡᠬᠦᠨ ᠠᠴᠠ ᠭᠠᠳᠠᠨ᠎ᠠ ᠰᠦᠨᠢ ᠤᠷᠤᠢ ᠪᠠᠷ ᠢᠬᠴᠤ ᠰᠠᠬᠤᠯᠢᠭ ᠤᠢ ᠮᠤᠳᠤᠨ ᠤ ᠳᠤᠮᠳᠠᠭᠤᠷ ᠳᠤᠪᠳᠤᠯᠤᠭᠰᠠᠨ ᠴᠦ ᠦᠷᠬᠡᠰᠤ ᠰᠤᠶᠤᠭ᠎ᠠ ᠬᠦᠯᠦᠭ ᠮᠤᠷᠢ ᠶᠢ ᠬᠠᠰᠢᠵᠦ ᠬᠠᠷᠰᠢᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠬᠠᠯᠬᠠᠪᠴᠢ ᠪᠠᠮᠪᠠᠢ ᠶᠢᠨ ᠦᠢᠯᠡᠳᠤᠯ ᠦᠵᠡᠬᠦᠯᠵᠦ ᠪᠠᠶᠢᠭ᠎ᠠ ᠶᠤᠮ᠃ ᠪᠠᠰᠠ ᠬᠦᠢᠳᠡᠨ ᠪᠤᠷᠤᠭᠠᠨ ᠴᠠᠰᠤ ᠳᠤᠬᠢᠶᠠᠭᠰᠠᠨ ᠦᠶ᠎ᠠ ᠳᠤ ᠬᠦᠯᠦᠭ ᠤᠨᠤᠭ᠎ᠠ ᠳᠤ ᠳᠤᠯᠠᠭᠠᠨ ᠨᠦᠮᠦᠷᠢ ᠪᠤᠯᠳᠠᠭ ᠦᠢᠯᠡᠳᠤᠯ ᠲᠠᠢ ᠶᠤᠮ᠃    ᠵᠠᠷᠢᠮ ᠭᠠᠵᠠᠷ ᠤᠷᠤᠨ ᠤ ᠬᠢᠨᠢ ᠬᠦᠯᠢᠮ ᠢ ᠬᠤᠶᠠᠷ ᠠᠰᠳᠠᠭᠠᠨ ᠬᠡᠰᠡᠭ ᠪᠤᠯᠭᠠᠨ ᠰᠠᠯᠭᠠᠵᠤ᠂ ᠳᠡᠭᠡᠷ᠎ᠠ ᠢᠷᠮᠡᠭ  ᠠᠴᠠ ᠨᠢ ᠬᠤᠶᠠᠷ ᠨᠦᠬᠡ ᠴᠤᠭᠤᠯᠤᠨ᠂ ᠤᠭᠤᠰᠤᠷᠯᠠᠨ ᠭᠡᠯᠬᠢᠵᠦ ᠬᠤᠯᠪᠤᠭᠠᠳ ᠡᠮᠡᠭᠡᠯ ᠳᠤᠤᠷ᠎ᠠ ᠪᠠᠨ ᠳᠡᠪᠢᠰᠦᠳᠡᠭ ᠪᠤᠶᠤ ᠪᠠᠰᠠ ᠤᠯᠤᠩ ᠵᠢᠷᠢᠮ ᠤᠨ ᠤᠭᠰᠤᠷᠭ᠎ᠠ ᠠᠴᠠ ᠬᠤᠯᠪᠤᠵᠤ ᠳᠠᠭᠠᠷᠠᠭᠤᠯᠳᠠᠭ ᠴᠦ ᠪᠤᠢ᠃    ᠤᠷᠴᠢᠮ ᠤᠨ ᠵᠢᠯ ᠤᠳ ᠲᠤ ᠬᠤᠷᠴᠢᠨᠴᠤᠳ ᠪᠠᠷᠤᠭ ᠯᠠ ᠴᠦᠮ ᠵᠤᠬᠢᠶᠠᠮᠠᠯ ᠠᠷᠠᠰᠤ᠂ ᠵᠤᠬᠢᠶᠠᠮᠠᠯ ᠭᠡᠪᠢᠰᠦᠨ ᠬᠦᠯᠢᠮ ᠢᠶᠠᠷ ᠤᠷᠤ ᠵᠠᠰᠠᠯ ᠬᠢᠵᠦ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠤᠳᠤ ᠪᠤᠯᠵᠤ ᠢᠷᠡᠭᠡᠳ ᠳᠠᠬᠢᠨ ᠡᠷᠳᠡᠨ ᠤ ᠪᠠᠨ ᠰᠡᠷᠬᠦᠬᠡᠬᠦ ᠪᠤᠯᠵᠠᠭᠠᠵᠤ ᠪᠠᠶᠢᠨ᠎ᠠ᠃    ᠬᠠᠷᠠᠤ —— ᠡᠮᠡᠭᠡᠯ ᠤᠨ ᠤᠷᠢᠳᠤ ᠬᠤᠶᠢᠳᠤ ᠤᠭᠰᠤᠷᠭ᠎ᠠ ᠠᠴᠠ ᠬᠤᠯᠪᠤᠵᠤ᠂ ᠡᠮᠡᠬᠡᠯ ᠤᠨ ᠵᠦᠪ ᠪᠤᠷᠤᠭᠤ ᠳᠠᠯ᠎ᠠ ᠶᠢᠨ ᠬᠦᠯᠢᠮ ᠤᠨ ᠨᠦᠬᠡ ᠪᠤᠶᠤ ᠲᠦᠷᠦᠬᠡᠨ ᠰᠤᠷ ᠤᠨ ᠭᠤᠷᠬᠢ ᠳᠡᠪᠡᠭᠡ ᠶᠢ ᠢᠯᠠ ᠭᠠᠷᠭᠠᠬᠤ ᠦᠭᠡᠢ ᠪᠠᠷ ᠨᠢᠭᠤᠵᠤ ᠳᠠᠷᠤᠭᠰᠠᠨ ᠬᠠᠯᠬᠠᠪᠴᠢ ᠶᠢ ᠬᠠᠷᠠᠤ ᠬᠡᠨ᠎ᠠ᠃ ᠵᠠᠷᠢᠮ ᠭᠠᠵᠠᠷ ᠤᠷᠤᠨ ᠳᠤ ᠤᠭᠵᠢᠭᠤᠷᠭ᠎ᠠ ᠭᠡᠵᠤ᠂ ᠪᠠᠰᠠ ᠬᠠᠪᠴᠢᠶᠠᠷᠢ ᠬᠡᠨ᠎ᠠ᠃ ᠬᠡᠤᠬᠡᠨ ᠬᠦᠯᠢᠮ ᠭᠡᠵᠤ ᠬᠡᠯᠡᠳᠡᠭ ᠴᠦ ᠪᠠᠶᠢᠳᠠᠭ᠃    ᠬᠠᠷᠠᠤ ᠶᠢᠨ ᠨᠦᠬᠦᠬᠡ ᠨᠢᠬᠡ ᠳᠠᠯ᠎ᠠ ᠶᠢᠨ ᠬᠡᠷᠡᠭᠴᠡᠭᠡ ᠨᠢ ᠬᠡᠪᠡᠯ ᠳᠠᠷᠤᠢ ᠬᠦᠯᠢᠮ ᠤᠨ ᠴᠤᠭᠤᠯᠤᠭᠰᠠᠨ ᠨᠦᠬᠡ  ᠪᠠᠷ ᠰᠠᠯᠬᠢ ᠵᠢᠪᠡᠷ ᠨᠡᠪᠳᠡᠷᠡᠬᠦ ᠶᠢ ᠰᠡᠷᠭᠡᠶᠢᠯᠡᠵᠦ ᠪᠠᠶᠢᠭ᠎ᠠ ᠪᠦᠬᠡᠳ ᠬᠦᠯᠢᠮ ᠢ ᠪᠢᠳᠡᠬᠦᠦ ᠪᠤᠯᠭᠠᠵᠤ᠂ ᠬᠦᠯᠦᠭ ᠤᠨᠤᠭ᠎ᠠ ᠮᠤᠷᠢ ᠪᠠᠨ ᠬᠠᠮᠠᠭᠠᠯᠠᠵᠤ ᠪᠠᠶᠢᠭ᠎ᠠ ᠶᠠᠪᠤᠳᠠᠯ ᠪᠤᠯᠬᠤ ᠶᠤᠮ᠃    ᠬᠠᠷᠠᠤ ᠶᠢ ᠪᠠᠰᠠ ᠬᠠᠷᠠᠤ ᠶᠢᠨ ᠬᠡᠯᠡ᠂ ᠬᠠᠷᠠᠤ ᠶᠢᠨ ᠳᠤᠯᠢ᠂ ᠬᠠᠷᠠᠤ ᠶᠢᠨ ᠳᠤᠪᠤᠷᠤᠤ᠂ ᠬᠠᠷᠠᠤ ᠶᠢᠨ ᠬᠦᠪᠡᠭᠡ ᠭᠡᠵᠤ ᠬᠡᠳᠤᠨ ᠶᠠᠩᠵᠤ ᠪᠠᠷ ᠠᠩᠭᠢᠯᠡᠨ ᠨᠡᠷᠡᠯᠡᠵᠦ ᠬᠡᠯᠡᠳᠡᠭ᠃    ᠬᠠᠷᠠᠤ ᠶᠢ ᠵᠦᠬᠡᠯᠡᠨ ᠦᠬᠡᠷ ᠤᠨ ᠠᠷᠠᠰᠤ ᠪᠠᠷ ᠬᠢᠵᠦ ᠬᠠᠷ᠎ᠠ ᠦᠡᠭᠭᠡ ᠶᠢᠨ ᠰᠢᠷ ᠪᠤᠳᠤᠭ ᠢᠶᠠᠷ ᠪᠤᠳᠤᠳᠠᠭ᠃ ᠳᠤᠳᠤᠷ᠎ᠠ ᠳᠠᠯ᠎ᠠ ᠳᠤ ᠨᠢ ᠪᠦᠰ ᠨᠠᠭᠠᠵᠤ᠂ ᠤᠯᠠᠭᠠᠨ ᠪᠤᠳᠤᠭ ᠲᠠᠢ ᠬᠦᠮ ᠪᠤᠶᠤ ᠤᠯᠠᠭᠠᠨ ᠪᠦᠰ ᠢᠶᠠᠷ ᠬᠦᠪᠡᠬᠡᠯᠡᠵᠦ ᠶᠤᠩᠬᠤᠷ ᠤᠳᠠᠰᠤ ᠪᠠᠷ ᠱᠠᠭᠯᠠᠨ ᠤᠶᠤᠨ᠎ᠠ᠃ ᠬᠠᠷᠠᠤ ᠶᠢ ᠬᠦᠨᠳᠡᠯᠡᠨ ᠤᠭᠳᠤᠯᠤᠭᠠᠰᠤ ᠨᠢ 26 ᠰᠠᠨᠲ᠋ᠢᠮᠧᠲᠷ ᠢᠶᠠᠷ ᠳᠤᠭᠤᠷᠢᠭᠯᠠᠵᠤ᠂ ᠳᠡᠭᠡᠭᠰᠢ ᠪᠠᠨ 20 ᠰᠠᠨᠲ᠋ᠢᠮᠧᠲᠷ ᠦᠷᠬᠡᠨ᠂ 12 ᠰᠠᠨᠲ᠋ᠢᠮᠧᠲᠷ ᠤᠷᠳᠤ ᠪᠠᠷ ᠰᠤᠩᠭᠠᠵᠤ ᠵᠦᠰᠦᠨ᠎ᠠ᠃ ᠳᠡᠷᠡᠬᠦ ᠳᠤᠭᠤᠷᠢᠭ ᠪᠡᠶ᠎ᠠ ᠶᠢ ᠨᠢ ᠬᠠᠷᠠᠤ ᠶᠢᠨ ᠳᠤᠯᠢ ᠭᠡᠵᠤ᠂ ᠰᠤᠩᠭᠠᠭᠰᠠᠨ ᠭᠡᠰᠡᠭ ᠢ ᠨᠢ ᠬᠠᠷᠠᠤ ᠶᠢᠨ ᠬᠡᠯᠡ ᠭᠡᠳᠡᠭ᠃ ᠬᠠᠷᠠᠤ ᠶᠢᠨ ᠳᠤᠯᠢ ᠳᠡᠭᠡᠷ᠎ᠠ ᠰᠢᠷ᠎ᠠ᠂ ᠴᠠᠭᠠᠨ ᠬᠤᠶᠠᠷ ᠦᠡᠭᠭᠡ ᠶᠢᠨ ᠮᠠᠯᠠᠭᠠᠢ ᠲᠠᠢ ᠭᠠᠳᠠᠭ᠎ᠠ ᠶᠢᠨ ᠨᠢᠬᠡ ᠦᠡᠭᠭᠡ ᠶᠢ ᠰᠤᠩᠭᠤᠵᠤ᠂ ᠭᠤᠤᠯ ᠳᠤᠮᠳᠠ ᠨᠢ ᠬᠤᠶᠠᠷ ᠮᠦᠷ ᠢᠶᠠᠷ ᠦᠯᠵᠠᠢ ᠵᠠᠩᠭᠢᠶ᠎ᠠ ᠶᠢ ᠵᠢᠷᠤᠭᠯᠠᠨ ᠭᠠᠳᠠᠵᠤ᠂ ᠳᠤᠯᠢ ᠶᠢᠨ ᠭᠦᠪᠡᠭᠡ ᠶᠢ ᠳᠠᠭᠠᠭᠤᠯᠵᠤ ᠮᠥᠨ ᠬᠤᠶᠠᠷ ᠮᠦᠷ ᠢᠶᠠᠷ ᠳᠤᠭᠤᠷᠢᠭᠤᠯᠤᠨ ᠭᠠᠳᠠᠵᠤ ᠳᠡᠪᠯᠡᠨ᠎ᠠ᠃ ᠳᠡᠬᠦᠨ ᠢ ᠳᠤᠪᠤᠷᠤᠤ ᠬᠡᠳᠡᠭ᠃    ᠬᠠᠷᠠᠤ ᠶᠢᠨ ᠬᠡᠯᠡᠨ ᠤ ᠳᠠᠯ᠎ᠠ ᠶᠢ ᠬᠠᠷᠠᠤ ᠶᠢᠨ ᠪᠤᠰᠤᠭ᠎ᠠ ᠳᠠᠯ᠎ᠠ ᠭᠡᠵᠤ᠂ ᠬᠡᠯᠡᠨ ᠤ ᠳᠡᠭᠡᠷ᠎ᠠ ᠬᠦᠪᠡᠭᠡ ᠳᠡᠭᠡᠷ᠎ᠠ᠂ ᠡᠮᠡᠬᠡᠯ ᠤᠨ ᠳᠠᠷᠤᠭᠤᠯᠭ᠎ᠠ ᠶᠢᠨ ᠨᠦᠬᠡᠨ ᠤ ᠵᠠᠢ ᠪᠠᠷ ᠬᠤᠶᠠᠷ ᠨᠦᠬᠡ ᠴᠤᠭᠤᠯᠵᠤ᠂ ᠡᠮᠡᠬᠡᠯ ᠢ ᠳᠠᠪᠰᠡᠯᠡᠬᠦ ᠦᠶ᠎ᠠ ᠳᠤ ᠬᠠᠮᠳᠤ ᠳᠤ ᠨᠢ ᠰᠢᠷᠭᠤᠭᠤᠯᠵᠤ ᠡᠯᠬᠦᠨ᠎ᠠ᠃    ᠬᠤᠷᠴᠢᠨᠴᠤᠳ ᠳᠤᠪᠤᠷᠤᠤ ᠲᠠᠢ ᠬᠠᠷᠠᠤ ᠪᠠᠨ ᠰᠢᠪᠠᠭᠤᠨ ᠤ ᠮᠦᠡᠭᠭᠦᠨ ᠳᠠᠯᠠᠪᠴᠢ᠂ ᠪᠡᠯᠴᠢᠬᠡ ᠬᠤᠨᠢᠨ ᠰᠦᠷᠦᠭ ᠂ ᠨᠡᠬᠦᠳᠡᠯ ᠤᠨ ᠴᠠᠭᠠᠨ ᠡᠬᠦᠯᠡ ᠭᠡᠬᠦ ᠵᠡᠷᠭᠡ ᠪᠠᠷ ᠪᠡᠯᠬᠡᠳᠡᠳᠡᠭ᠃     ᠳᠠᠪᠰᠠ —— ᠡᠮᠡᠭᠡᠯ ᠤᠨ ᠰᠠᠭᠤᠳᠠᠯ ᠳᠡᠭᠡᠷ᠎ᠠ ᠵᠦᠬᠡᠯᠡᠨ ᠢᠰᠡᠬᠡᠢ ᠶᠢ ᠬᠠᠷ᠎ᠠ ᠦᠡᠭᠭᠡ ᠶᠢᠨ ᠪᠦᠰ ᠢᠶᠠᠷ ᠪᠦᠷᠢᠵᠦ᠂ ᠲᠦᠷᠪᠡᠨ ᠳᠠᠷᠤᠭᠤᠯᠭ᠎ᠠ ᠪᠠᠷ ᠳᠠᠷᠤᠵᠤ ᠳᠡᠪᠢᠰᠦᠭᠰᠡᠨ ᠵᠦᠬᠡᠯᠡᠨ ᠤᠯᠪᠤᠭ ᠢ ᠡᠮᠡᠭᠡᠯ ᠤᠨ ᠳᠡᠪᠰᠡ ᠬᠡᠨ᠎ᠠ᠃    ᠳᠡᠪᠰᠡ ᠶᠢ ᠬᠤᠷᠤᠭᠤ ᠵᠤᠵᠠᠭᠠᠨ ᠢᠰᠡᠭᠡᠢ ᠪᠠᠷ ᠬᠤᠶᠠᠷ ᠪᠦᠬᠦᠷᠬᠡ ᠶᠢᠨ ᠬᠤᠭᠤᠷᠤᠨᠳᠤᠬᠢ ᠵᠠᠢ ᠪᠠ ᠬᠤᠶᠠᠷ ᠬᠠᠪᠳᠠᠭᠠᠯ ᠤᠨ ᠳᠤᠤᠷ᠎ᠠ ᠢᠷᠮᠡᠭ ᠲᠠᠢ ᠴᠠᠴᠠᠤᠯᠠᠵᠤ ᠡᠰᠭᠡᠵᠦ ᠬᠢᠳᠡᠭ᠃ ᠬᠤᠶᠠᠷ ᠪᠦᠬᠦᠷᠬᠡ ᠶᠢᠨ ᠬᠤᠭᠤᠷᠤᠨᠳᠤᠬᠢ ᠵᠠᠢ ᠨᠢ ᠪᠠᠷᠤᠭ 40 ᠰᠠᠨᠲ᠋ᠢᠮᠧᠲᠷ ᠤᠷᠳᠤ᠂ ᠵᠡᠬᠦᠨᠰᠢ ᠪᠠᠷᠠᠭᠤᠨᠰᠢ ᠵᠠᠢ ᠨᠢ ᠪᠠᠷᠤᠭ 48 ᠰᠠᠨᠲ᠋ᠢᠮᠧᠲᠷ᠂ ᠬᠤᠶᠠᠷ ᠪᠦᠬᠦᠷᠬᠡ ᠶᠢᠨ ᠤᠷᠢᠳᠤ ᠬᠤᠶᠢᠳᠤ ᠬᠦᠯ ᠤᠨ ᠬᠤᠭᠤᠷᠤᠨᠳᠤᠬᠢ ᠵᠠᠢ ᠨᠢ ᠪᠠᠷᠤᠭ 20 ᠰᠠᠨᠲ᠋ᠢᠮᠧᠲᠷ ᠪᠠᠶᠢᠳᠠᠭ᠃    ᠳᠠᠪᠰᠠ ᠶᠢᠨ ᠭᠠᠳᠠᠷ ᠬᠦᠪᠡᠭᠡ ᠶᠢ ᠬᠤᠷᠤᠭᠤ ᠦᠷᠬᠡᠨ ᠤᠯᠠᠭᠠᠨ ᠪᠦᠰ ᠢᠶᠠᠷ ᠳᠠᠷᠤᠭᠤᠯᠵᠤ ᠤᠶᠤᠬᠤ ᠪᠦᠬᠡᠳ ᠰᠠᠭᠤᠳᠠᠯ ᠤᠨ ᠭᠤᠤᠯ ᠳᠤᠮᠳᠠ ᠦᠯᠵᠠᠢ ᠵᠠᠩᠭᠢᠶ᠎ᠠ ᠪᠤᠶᠤ ᠪᠤᠶᠠᠨ ᠦᠯᠵᠠᠢ ᠦᠰᠦᠭ ᠢ ᠬᠤᠷᠤᠭᠤ ᠦᠷᠬᠡᠨ ᠤᠯᠠᠭᠠᠨ ᠪᠦᠰ ᠢᠶᠠᠷ ᠵᠢᠷᠤᠭᠯᠠᠨ ᠤᠶᠤᠵᠤ᠂ ᠳᠤᠭᠤᠷᠢᠭ ᠢᠶᠠᠷ ᠬᠦᠪᠡᠬᠡᠯᠡᠨ᠎ᠠ᠃    ᠳᠠᠪᠰᠠ ᠶᠢ ᠤᠶᠤᠵᠤ ᠴᠢᠮᠡᠭᠯᠡᠵᠦ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠡᠮᠡᠬᠡᠯ ᠤᠨ ᠰᠠᠭᠤᠳᠠᠯ ᠳᠡᠬᠡᠷ᠎ᠠ ᠳᠡᠩᠴᠡᠬᠦᠦ ᠵᠠᠢ ᠪᠠᠷ ᠤᠷᠢᠳᠡᠰᠠ ᠴᠤᠭᠤᠯᠤᠭᠰᠠᠨ ᠨᠦᠬᠡ ᠪᠠᠷ ᠬᠡᠤᠬᠡᠨ ᠬᠦᠯᠢᠮ ᠤᠨ ᠬᠡᠯᠡᠨ ᠤ ᠨᠦᠬᠡ ᠶᠢ ᠳᠠᠭᠠᠷᠠᠭᠤᠯᠤᠨ ᠳᠠᠪᠬᠤᠷᠯᠠᠵᠤ ᠪᠠᠶᠢᠭᠠᠳ᠂ ᠳᠠᠷᠤᠭᠤᠯᠭ᠎ᠠ ᠶᠢᠨ ᠤᠭᠤᠰᠤᠷ ᠤᠨ ᠦᠵᠦᠬᠦᠷ ᠢ ᠳᠤᠳᠤᠭᠰᠢ ᠬᠢᠨ᠂ ᠳᠤᠤᠷ᠎ᠠ ᠠᠴᠠ ᠨᠢ ᠳᠠᠳᠠᠨ ᠭᠠᠷᠭᠠᠭᠠᠳ ᠪᠠᠬᠢᠯᠡᠨ ᠳᠤᠷᠭᠤᠭᠠᠨ᠎ᠠ᠃ ᠡᠬᠦᠨ ᠢ ᠡᠮᠡᠬᠡᠯ ᠳᠡᠪᠰᠡᠯᠡᠨ᠎ᠠ ᠭᠡᠳᠡᠭ᠃ ᠪᠠᠷᠤᠭ ᠤᠨ ᠡᠮᠡᠭᠳᠡᠶᠢᠴᠤᠳ ᠡᠮᠡᠬᠡᠯ ᠳᠡᠪᠰᠡᠯᠡᠵᠦ ᠵᠤᠬᠢᠷᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠶᠢᠳᠠᠭ ᠠᠴᠠ ᠬᠦᠮᠦᠰ ᠴᠦᠮ ᠨᠡᠷ᠎ᠠ ᠠᠯᠳᠠᠷ ᠲᠠᠢ ᠤᠷᠠᠨ ︽ᠡᠮᠡᠬᠡᠯ ᠳᠡᠪᠰᠡᠯᠡᠭᠴᠢ︾ ᠶᠢ ᠡᠷᠢᠳᠡᠭ ᠶᠤᠮ᠃    ᠳᠠᠷᠤᠭᠤᠯᠭ᠎ᠠ —— ᠡᠮᠡᠭᠡᠯ ᠤᠨ ᠳᠡᠪᠰᠡ᠂ ᠬᠠᠷᠠᠤ ᠶᠢ ᠨᠢ ᠳᠠᠷᠤᠵᠤ ᠤᠶᠠᠬᠤ ᠰᠤᠷ ᠰᠦᠪᠡᠭᠴᠢ ᠲᠠᠢ ᠭᠠᠤᠯᠢ᠂ ᠵᠡᠰ᠂ ᠠᠯᠳᠠ᠂ ᠮᠦᠡᠭᠭᠦ ᠵᠡᠷᠭᠡ ᠪᠠᠷ ᠬᠢᠭᠰᠡᠨ ᠬᠦᠯᠢᠬᠡᠷ ᠬᠦᠳᠦᠬᠦᠷ ᠳᠤᠮᠤ ᠳᠤᠪᠴᠢ ᠶᠢ ᠳᠠᠷᠤᠭᠤᠯᠭ᠎ᠠ ᠬᠡᠨ᠎ᠠ᠃ ᠳᠤᠳᠤᠷ᠎ᠠ ᠬᠤᠨᠭ᠍ᠬᠢᠯ ᠤᠨ ᠲᠦᠪ ᠳᠤ ᠨᠢ ᠵᠢᠵᠢᠭ ᠪᠢᠳᠡᠬᠦᠦ ᠭᠠᠷᠬ᠎ᠠ ᠬᠠᠳᠠᠭᠰᠠᠨ ᠪᠠᠶᠢᠳᠠᠭ᠃ ᠳᠡᠬᠦᠨ ᠢ ᠳᠠᠷᠤᠭᠤᠯᠭ᠎ᠠ ᠶᠢᠨ ᠰᠠᠨᠵᠢ ᠭᠡᠳᠡᠭ᠃    ᠳᠠᠷᠤᠭᠤᠯᠭ᠎ᠠ ᠶᠢᠨ ᠰᠠᠨᠵᠢ ᠠᠴᠠ ᠰᠠᠪᠬ᠎ᠠ ᠶᠢᠨ ᠦᠵᠦᠬᠦᠷ ᠤᠨ ᠭᠢᠷᠢ ᠰᠤᠷ ᠤᠨ ᠨᠢᠬᠡ ᠦᠵᠦᠬᠦᠷ ᠳᠡᠬᠡᠷ᠎ᠠ ᠬᠦᠨᠳᠡᠯᠡᠨ ᠴᠤᠭᠤᠯᠵᠤ᠂ ᠰᠠᠨᠵᠢ ᠶᠢᠨ ᠭᠠᠷᠬ᠎ᠠ ᠠᠴᠠ ᠭᠤᠭᠴᠤᠭᠠᠯᠠᠨ ᠤᠶᠠᠭᠠᠳ᠂ ᠨᠦᠬᠦᠬᠡ ᠦᠵᠦᠬᠦᠷ ᠢᠶᠠᠷ ᠳᠠᠪᠰᠠ ᠶᠢ ᠴᠤᠭᠤᠯᠵᠤ᠂ ᠬᠠᠷᠠᠤ ᠶᠢᠨ ᠬᠡᠯᠡᠨ ᠤ ᠨᠦᠬᠡ ᠪᠠ ᠰᠠᠭᠤᠳᠠᠯ ᠤᠨ ᠨᠦᠬᠡ ᠪᠠᠷ ᠳᠤᠳᠤᠭᠰᠢ ᠪᠠᠨ ᠰᠢᠷᠭᠤᠭᠤᠯᠤᠨ ᠳᠠᠳᠠᠨ ᠭᠠᠷᠭᠠᠨ᠎ᠠ᠃ ᠡᠨᠡᠬᠦ ᠳᠠᠳᠠᠨ ᠭᠠᠷᠭᠠᠭᠰᠠᠨ ᠰᠤᠷ ᠢᠶᠠᠨ ᠳᠠᠷᠤᠭᠤᠯᠭ᠎ᠠ ᠶᠢᠨ ᠰᠤᠷ ᠬᠡᠳᠡᠭ᠃ ᠪᠠᠰᠠ ᠳᠠᠷᠤᠭᠤᠯᠭ᠎ᠠ ᠶᠢᠨ ᠤᠭᠤᠰᠤᠷ ᠭᠡᠳᠡᠭ᠃ ᠳᠠᠷᠤᠭᠤᠯᠭ᠎ᠠ ᠶᠢᠨ ᠤᠭᠤᠰᠤᠷ ᠢ ᠳᠤᠳᠤᠭᠰᠢ ᠴᠢᠩᠭᠠᠬᠠᠨ ᠳᠠᠳᠠᠵᠤ᠂ ᠳᠠᠷᠤᠭᠤᠯᠭ᠎ᠠ ᠶᠢᠨ ᠨᠦᠬᠡᠨ ᠤ ᠢᠷᠮᠡᠭ ᠲᠠᠢ ᠳᠡᠩᠴᠡᠬᠦᠯᠦᠨ ᠬᠦᠨᠳᠡᠯᠡᠨ ᠴᠤᠭᠤᠯᠤᠭᠠᠳ ᠤᠭᠤᠰᠤᠷ ᠤᠨ ᠦᠵᠦᠬᠦᠷ  ᠢ ᠬᠦᠨᠳᠡᠯᠡᠨ ᠨᠦᠬᠡᠨ ᠳᠤ ᠨᠢ ᠰᠢᠷᠭᠤᠭᠤᠯᠤᠨ ᠳᠤᠪᠴᠢᠯᠠᠨ ᠵᠠᠩᠭᠢᠳᠴᠤ ᠤᠶᠠᠨ᠎ᠠ᠃ ᠡᠬᠦᠨ ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠨᠢᠬᠡᠨ ᠳᠠᠷᠤᠭᠤᠯᠭ᠎ᠠ ᠶᠢ ᠳᠤᠷᠭᠤᠬᠤ ᠠᠷᠭ᠎ᠠ ᠬᠡᠪᠡᠯ᠂ ᠵᠦᠪ ᠳᠠᠯ᠎ᠠ ᠶᠢᠨ ᠬᠤᠶᠠᠷ ᠳᠠᠷᠤᠭᠤᠯᠭ᠎ᠠ ᠶᠢᠨ ᠤᠭᠤᠰᠤᠷ ᠢ ᠬᠤᠯᠪᠤᠨ ᠤᠶᠠᠬᠤ ᠪᠤᠶᠤ ᠪᠤᠷᠤᠭᠤ ᠳᠠᠯ᠎ᠠ ᠶᠢᠨ ᠬᠤᠶᠠᠷ ᠳᠠᠷᠤᠭᠤᠯᠭ᠎ᠠ ᠶᠢᠨ ᠤᠭᠤᠰᠤᠷ ᠢ ᠬᠤᠯᠪᠤᠨ ᠤᠶᠠᠬᠤ ᠠᠷᠭ᠎ᠠ ᠪᠤᠯᠤᠨ᠎ᠠ᠃ ᠡᠨᠡᠬᠦ ᠤᠶᠠᠭᠠᠯᠢ ᠨᠢ ᠳᠤᠶᠢᠯ ᠤᠨ ᠴᠢᠩᠭ᠎ᠠ ᠮᠦᠷᠳᠡᠭᠡᠨ ᠲᠦᠬᠦᠮ ᠬᠢᠯᠪᠡᠷ ᠪᠤᠯᠪᠠᠴᠤ ᠬᠤᠯᠪᠤᠭᠠᠰᠤ ᠤᠶᠠᠭᠠᠰᠤ ᠨᠢ ᠬᠡᠨᠡᠳᠳᠡ ᠳᠠᠰᠤᠷᠠᠬᠤ ᠳᠤ ᠬᠦᠷᠪᠡᠯ ᠬᠤᠶᠠᠷ ᠳᠠᠷᠤᠭᠤᠯᠭ᠎ᠠ ᠶᠢᠨ ᠳᠤᠪᠴᠢ ᠬᠤᠶᠠᠭᠤᠯᠠ ᠪᠠᠨ ᠭᠡᠭᠡᠴᠢᠬᠦ ᠠᠶᠤᠯ ᠲᠠᠢ ᠪᠦᠬᠡᠳ ᠬᠠᠷᠠᠤ ᠪᠠᠨ ᠴᠦ ᠭᠡᠭᠡᠴᠢᠳᠡᠭ ᠶᠤᠮ᠃ ᠳᠡᠶᠢᠮᠤ ᠠᠴᠠ ᠬᠦᠮᠦᠰ ᠶᠡᠷᠤᠨᠢ ᠬᠤᠶᠠᠷ ᠳᠠᠷᠤᠭᠤᠯᠭ᠎ᠠ ᠶᠢᠨ ᠤᠭᠤᠰᠤᠷ ᠢ ᠬᠤᠯᠪᠤᠨ ᠤᠶᠠᠳᠠᠭ ᠦᠭᠡᠢ᠃ ᠠᠰ ᠠᠰ ᠢᠶᠠᠷ ᠨᠢ ᠵᠠᠩᠭᠢᠳᠤᠨ ᠳᠤᠪᠴᠢᠯᠠᠵᠤ ᠤᠶᠠᠳᠠᠭ ᠶᠤᠮ᠃    ᠬᠤᠷᠴᠢᠨ ᠡᠮᠡᠬᠡᠯ ᠤᠨ ᠳᠠᠷᠤᠭᠤᠯᠭ᠎ᠠ ᠶᠢᠨ ᠳᠤᠪᠴᠢ ᠨᠢ ᠴᠦᠮ ᠮᠦᠡᠭᠭᠦᠨ ᠵᠤᠭᠤᠰ ᠠᠴᠠ ᠶᠡᠭᠡ᠂ ᠴᠤᠮᠤᠨ ᠠᠮᠠᠰᠠᠷ ᠠᠴᠠ ᠪᠠᠭ᠎ᠠ ᠪᠠᠶᠢᠳᠠᠭ᠃ ᠳᠠᠷᠤᠭᠤᠯᠭ᠎ᠠ ᠶᠢ ᠬᠦᠮᠦᠰ ᠶᠡᠷᠤ ᠠᠴᠠ ᠨᠢᠬᠡᠯᠡ ᠠᠳᠠᠯᠢ ᠶᠡᠭᠡ ᠪᠠᠭ᠎ᠠ ᠪᠦᠬᠡᠳ ᠨᠢᠬᠡᠯᠡ ᠦᠡᠭᠭᠡ ᠶᠢᠨ ᠬᠢ ᠶᠢ ᠰᠤᠩᠭᠤᠵᠤ ᠬᠡᠷᠡᠭᠯᠡᠳᠡᠭ᠃    ᠳᠠᠷᠤᠭᠤᠯᠭ᠎ᠠ ᠶᠢᠨ ᠤᠭᠤᠰᠤᠷ ᠳᠠᠰᠤᠷᠠᠪᠠᠯ᠂ ᠳᠠᠷᠤᠵᠤ ᠰᠠᠭᠤᠵᠤ ᠪᠠᠶᠢᠭ᠎ᠠ ᠬᠦᠯᠦᠭ ᠤᠨ ᠡᠵᠡᠨ ᠤ ᠭᠡᠰᠢᠭ ᠪᠤᠶᠠᠨ ᠨᠢᠮᠬᠡᠷᠡᠵᠦ ᠪᠠᠶᠢᠭ᠎ᠠ ᠪᠦᠬᠡᠳ ᠬᠡᠢ ᠮᠤᠷᠢ ᠬᠡᠪᠳᠡᠵᠦ ᠪᠠᠶᠢᠨ᠎ᠠ ᠭᠡᠵᠤ ᠦᠵᠡᠳᠡᠭ ᠠᠴᠠ ᠭᠡᠵᠢᠶ᠎ᠠ ᠡᠬᠦᠷᠢᠳᠡ ᠠᠩᠬᠠᠷᠴᠤ ᠠᠵᠢᠭᠯᠠᠵᠤ ᠶᠠᠪᠤᠳᠠᠭ᠃    ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠶᠡᠷᠤ ᠨᠢ ᠮᠤᠷᠢᠨ ᠡᠮᠡᠬᠡᠯ ᠢ ᠠᠮᠢᠳᠤᠷᠠᠯ ᠤᠨ ᠢᠶᠠᠨ ᠡᠩᠭᠡ ᠳᠠᠶᠢᠪᠤᠡᠭ ᠤᠷᠤᠨ ᠤᠷᠤᠰᠢᠯ ᠢᠶᠠᠷ ᠦᠵᠡᠳᠡᠭ ᠳᠤᠯᠠ ᠶᠠᠮᠠᠷ ᠨᠢᠬᠡᠨ ᠵᠤᠶᠢᠯᠡᠰ ᠨᠢ ᠳᠤᠳᠠᠭᠤ ᠳᠤᠷᠭᠤᠨ ᠪᠤᠶᠤ ᠰᠠᠯᠪᠠᠷᠢᠵᠦ ᠤᠭᠴᠤᠷᠠᠪᠠᠯ ᠪᠡᠯᠬᠡ ᠳᠡᠮᠪᠡᠷᠢᠯ ᠦᠭᠡᠢ᠂ ᠮᠠᠭᠤ ᠢᠷᠸ᠎ᠠ ᠶᠢᠨ ᠳᠡᠮᠳᠡᠭ ᠭᠡᠵᠤ ᠦᠵᠡᠳᠡᠭ᠃ ᠳᠡᠭᠡᠭᠡᠳ ᠯᠠ᠄ ︽ᠰᠠᠭᠤᠳᠠᠯ ᠬᠠᠭᠠᠷᠠᠪᠠᠯ ᠰᠠᠭᠤᠷᠢ ᠦᠬᠡᠶᠢᠳᠡᠨ᠎ᠠ᠂ ᠳᠠᠷᠤᠭᠤᠯᠭ᠎ᠠ ᠳᠠᠰᠤᠷᠠᠪᠠᠯ ᠳᠠᠶᠢᠪᠤᠡᠭ ᠦᠬᠡᠶᠢᠳᠡᠨ᠎ᠠ︾ ᠬᠡᠳᠡᠭ᠃    ᠰᠤᠶᠢᠳᠡᠬᠦᠰᠦ —— ᠡᠮᠡᠬᠡᠯ ᠤᠨ ᠬᠤᠶᠠᠷ ᠳᠠᠯ᠎ᠠ ᠶᠢᠨ ᠤᠷᠢᠳᠤ ᠬᠤᠶᠢᠳᠤ ᠤᠭᠰᠤᠷᠭ᠎ᠠ ᠠᠴᠠ ᠤᠭᠤᠰᠤᠷᠯᠠᠨ ᠡᠯᠭᠦᠳᠡᠭ ᠦᠯᠵᠠᠢ ᠵᠠᠩᠭᠢᠶ᠎ᠠ ᠲᠠᠢ ᠯᠠᠪᠷᠢ ᠴᠢᠮᠡᠭ ᠤᠨᠵᠢᠯᠭ᠎ᠠ ᠶᠢ ᠰᠦᠢᠳᠡᠬᠦᠰᠦ ᠭᠡᠳᠡᠭ᠃ ᠨᠢᠬᠡ ᠡᠮᠡᠬᠡᠯ ᠳᠤ ᠨᠡᠶᠢᠳᠡ 4 ᠰᠦᠢᠳᠡᠬᠦᠰᠦ ᠡᠯᠬᠦᠳᠡᠭ᠃    ᠰᠦᠢᠳᠡᠬᠦᠰᠦ ᠶᠢ ᠡᠩ ᠤᠨ ᠦᠶ᠎ᠠ ᠳᠤ ᠵᠦᠡᠭᠳᠡᠭᠡᠨ ᠡᠯᠬᠦᠳᠡᠭ ᠦᠭᠡᠢ᠃ ᠠᠪᠠ ᠠᠡᠭ ᠤᠨ ᠦᠶ᠎ᠠ ᠳᠤ ᠴᠦ ᠡᠯᠬᠦᠳᠡᠭ ᠦᠭᠡᠢ᠃ ᠤᠶᠢᠷ᠎ᠠ ᠲᠦᠷᠦᠯ ᠠᠶᠢᠯ ᠠᠶᠢᠮᠠᠭ ᠤᠨ ᠳᠤᠭᠤᠷᠢᠯ᠂ ᠠᠯᠤᠰ ᠬᠤᠯᠠ ᠶᠢᠨ ᠠᠶᠠᠨ᠂ ᠬᠤᠷᠢᠮ ᠬᠤᠷᠠᠯ ᠨᠠᠶᠢᠷ ᠴᠤᠭᠯᠠᠭᠠᠨ ᠳᠤ ᠶᠠᠪᠤᠬᠤ ᠦᠶ᠎ᠠ ᠳᠤ᠂ ᠤᠨᠴᠤᠭᠤᠶᠢᠯᠠᠨ ᠬᠦᠯᠦᠭ ᠮᠤᠷᠢ᠂ ᠡᠮᠡᠬᠡᠯ ᠤᠨ ᠵᠠᠰᠠᠯ ᠭᠠᠶᠢᠬᠠᠭᠤᠯᠬᠤ ᠦᠶ᠎ᠠ ᠳᠤ ᠴᠢᠮᠡᠭ ᠵᠠᠰᠠᠯ ᠪᠤᠯᠭᠠᠵᠤ ᠡᠯᠬᠦᠳᠡᠭ᠃    ᠰᠤᠶᠢᠳᠡᠬᠦᠰᠦ ᠨᠢ ᠭᠤᠷᠪᠠᠨ ᠭᠡᠰᠡᠭ ᠢᠶᠠᠷ ᠪᠦᠷᠢᠯᠳᠦᠨ᠎ᠠ᠃ ᠰᠤᠶᠢᠳᠡᠬᠦᠰᠦ ᠶᠢᠨ ᠵᠠᠩᠭᠢᠶ᠎ᠠ᠂ ᠰᠤᠶᠢᠳᠡᠬᠦᠰᠦ ᠶᠢᠨ ᠰᠠᠴᠢᠭ᠂ ᠰᠤᠶᠢᠳᠡᠬᠦᠰᠦ ᠶᠢᠨ ᠤᠭᠤᠰᠤᠷ ᠭᠤᠷᠪᠠ ᠪᠠᠷ ᠪᠦᠷᠢᠯᠳᠦᠨ᠎ᠠ᠃    ᠬᠤᠷᠤᠭᠤ ᠦᠷᠬᠡᠨ ᠰᠤᠷ ᠢᠶᠠᠷ ᠰᠤᠶᠢᠳᠡᠬᠦᠰᠦ ᠶᠢᠨ ᠦᠯᠵᠠᠢ ᠵᠠᠩᠭᠢᠶ᠎ᠠ ᠶᠢ ᠰᠢᠷᠭᠤᠭᠤᠯᠤᠨ ᠰᠦᠯᠵᠢᠵᠦ ᠵᠠᠩᠭᠢᠳᠤᠭᠠᠳ ᠳᠤᠷᠤᠭᠰᠢ ᠨᠠᠷᠢᠨ ᠵᠦᠬᠡᠯᠡᠨ ᠰᠤᠷ ᠢᠶᠠᠷ 20 ᠰᠠᠨᠲ᠋ᠢᠮᠧᠲᠷ ᠤᠷᠳᠤ᠂ 32 —64 ᠰᠢᠷᠭᠡᠭ ᠰᠠᠴᠢᠭ ᠤᠨᠵᠢᠭᠤᠯᠤᠨ᠎ᠠ᠃ ᠳᠠᠪᠬᠤᠷ ᠦᠯᠵᠠᠢ ᠵᠠᠩᠭᠢᠶ᠎ᠠ ᠵᠠᠩᠬᠢᠳᠤᠭᠰᠠᠨ ᠴᠦ ᠪᠠᠶᠢᠳᠠᠭ᠃ ᠵᠠᠩᠬᠢᠳᠤᠭᠰᠠᠨ ᠦᠯᠵᠠᠢ ᠵᠠᠩᠭᠢᠶ᠎ᠠ ᠶᠢᠨ ᠳᠡᠭᠡᠷ᠎ᠠ ᠳᠤᠯᠤᠭᠠᠢ ᠠᠴᠠ ᠬᠤᠷᠤᠭᠤ ᠦᠷᠬᠡᠨ ᠰᠤᠷ ᠢᠶᠠᠷ 80 ᠰᠠᠨᠲ᠋ᠢᠮᠧᠲᠷ ᠤᠷᠳᠤ ᠤᠭᠤᠰᠤᠷ ᠬᠢᠨ᠎ᠠ᠃    ᠰᠦᠢᠳᠡᠬᠦᠰᠦ ᠶᠢᠨ ᠤᠭᠤᠰᠤᠷ ᠢᠶᠠᠷ ᠢᠶᠠᠨ ᠡᠮᠡᠬᠡᠯ ᠤᠨ ᠵᠡᠬᠦᠨ ᠪᠠᠷᠠᠭᠤᠨ᠂ ᠤᠷᠢᠳᠤ ᠬᠤᠶᠢᠳᠤ ᠤᠯᠤᠩ ᠵᠢᠷᠢᠮ  ᠤᠨ ᠤᠭᠰᠤᠷᠭ᠎ᠠ ᠠᠴᠠ ᠭᠡᠮᠵᠢᠶᠡᠯᠡᠨ ᠡᠯᠬᠦᠨ᠎ᠠ᠃ ᠦᠯᠵᠡᠢ ᠵᠠᠩᠭᠢᠶ᠎ᠠ ᠶᠢᠨ ᠳᠡᠭᠡᠷ᠎ᠠ ᠳᠤᠯᠤᠭᠠᠢ ᠶᠢ ᠬᠦᠯᠢᠮ ᠤᠨ ᠳᠤᠤᠷ᠎ᠠ ᠢᠷᠮᠡᠭ ᠲᠠᠢ ᠴᠠᠴᠠᠤᠯᠠᠳᠠᠭ᠃ ᠰᠤᠶᠢᠳᠡᠬᠦᠰᠦ ᠨᠢ ᠠᠭᠳᠠ ᠬᠦᠯᠦᠭ ᠮᠤᠷᠢ ᠳᠤᠪᠳᠤᠯᠤᠭᠠᠳ ᠭᠠᠷᠤᠮᠠᠭᠴᠠ ᠪᠠᠨ ᠳᠡᠷᠪᠡᠯᠵᠢᠨ ᠭᠡᠶᠢᠰᠴᠤ᠂ ᠡᠪᠡᠰᠤᠨ ᠳᠤᠯᠤᠭᠠᠢ ᠶᠢ ᠱᠦᠷᠬᠦᠬᠡᠨ ᠨᠠᠮᠢᠷᠠᠳᠠᠭ᠃ ᠠᠯᠤᠰ ᠠᠴᠠ ᠬᠠᠷᠠᠬᠤ ᠳᠤ ᠠᠭᠳᠠ ᠬᠦᠯᠦᠭ ᠮᠤᠷᠢ ᠨᠢ ᠡᠬᠦᠯᠡ ᠬᠦᠯᠦᠭᠯᠡᠵᠦ ᠪᠠᠶᠢᠭ᠎ᠠ ᠬᠡᠮᠡᠷ ᠬᠦᠮᠦᠰ ᠴᠦ ᠰᠠᠨᠠᠭᠳᠠᠭᠤᠯᠳᠠᠭ᠃    ᠵᠠᠰᠠᠯ ᠪᠦᠷᠢᠳᠦᠭᠰᠡᠨ ᠬᠤᠷᠴᠢᠨ ᠮᠤᠷᠢᠨ ᠡᠮᠡᠬᠡᠯ ᠦᠨᠡᠬᠡᠷ ᠦᠵᠡᠮᠤᠷᠢ ᠲᠠᠢ ᠪᠠᠶᠢᠳᠠᠭ᠂ ᠬᠠᠶᠢᠷᠠᠳᠠᠢ ᠴᠦ ᠪᠠᠶᠢᠳᠠᠭ ᠃ ᠬᠤᠷᠴᠢᠨᠴᠤᠳ᠂ ᠡᠮᠡᠬᠡᠯ ᠢᠶᠠᠨ ᠬᠡᠷᠡᠭᠯᠡᠬᠦ ᠦᠭᠡᠢ ᠦᠶ᠎ᠠ ᠳᠤ ᠴᠦ ᠬᠠᠮᠢᠶ᠎ᠠ ᠨᠠᠮᠢᠶ᠎ᠠ ᠦᠭᠡᠢ ᠬᠠᠶᠠᠳᠠᠭ ᠦᠭᠡᠢ᠃ ᠨᠠᠷᠠᠨ ᠳᠤ ᠬᠠᠭᠰᠠᠭᠠᠵᠤ᠂ ᠪᠤᠷᠤᠭᠠᠨ ᠴᠠᠰᠤᠨ ᠳᠤ ᠴᠢᠭᠢᠭᠳᠦᠬᠦᠯᠬᠦ ᠠᠴᠠ ᠬᠢᠴᠢᠶᠡᠵᠦ᠂ ᠰᠡᠬᠦᠳᠡᠷ ᠭᠠᠵᠠᠷ ᠪᠤᠶᠤ ᠢᠯᠡᠬᠦᠦ ᠬᠡᠷ ᠲᠤ ᠪᠠᠨ ᠮᠤᠳᠤᠨ ᠮᠤᠷᠢᠨ ᠳᠡᠬᠡᠷ᠎ᠠ ᠳᠤᠬᠤᠵᠤ ︵ᠤᠨᠤᠭᠤᠯᠵᠤ︶ ᠳᠠᠯᠪᠢᠳᠠᠭ᠃    ᠬᠡᠬᠡᠷ᠎ᠠ ᠭᠠᠳᠠᠨ᠎ᠠ ᠴᠦ ᠬᠡᠰᠡᠨ ᠮᠤᠳᠤᠨ ᠰᠡᠬᠦᠳᠡᠷ ᠢ ᠡᠷᠢᠵᠦ ᠪᠤᠷᠤᠭᠤ ᠳᠠᠯ᠎ᠠ ᠪᠠᠷ ᠨᠢ ᠬᠡᠪᠳᠡᠬᠦᠯᠵᠦ ᠳᠠᠯᠪᠢᠨ᠎ᠠ᠃ ᠮᠦᠳᠳᠤ ᠳᠤᠬᠤᠮᠠᠷ ᠪᠠᠶᠢᠪᠠᠯ ᠦᠨᠳᠦᠷ ᠡᠪᠡᠰᠤ ᠲᠦᠯᠡᠭᠡ ᠶᠢᠨ ᠳᠡᠬᠡᠷ᠎ᠠ ᠳᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠳᠤᠬᠤᠮ ᠢ ᠢᠷᠠᠵᠤ ᠨᠠᠷᠠᠨ ᠳᠤ ᠬᠠᠳᠠᠭᠠᠨ᠎ᠠ᠃ ᠭᠡᠪᠡᠴᠤ ᠬᠠᠯᠠᠭᠤᠨ ᠢᠶᠠᠷ ᠨᠢ ᠮᠤᠷᠢᠨ ᠳᠤ ᠪᠠᠨ ᠳᠤᠬᠤᠳᠠᠭ ᠦᠭᠡᠢ᠃    ᠬᠤᠭᠤᠰᠤᠨ ᠡᠮᠡᠬᠡᠯ ᠤᠨ ᠳᠡᠭᠡᠬᠦᠷ ᠬᠦᠮᠦᠨ ᠤ ᠠᠯᠬᠤᠵᠤ ᠭᠠᠷᠬᠤ᠂ ᠨᠤᠬᠠᠢ ᠮᠤᠤᠷ ᠤᠨ ᠬᠠᠷᠠᠶᠢᠵᠦ ᠭᠠᠷᠬᠤ ᠶᠢ ᠤᠨᠴᠠ ᠴᠡᠭᠡᠷᠯᠡᠳᠡᠭ ᠪᠦᠬᠡᠳ ᠬᠡᠤᠬᠡᠳ ᠢᠶᠠᠨ ᠴᠦ ᠳᠡᠭᠡᠷ᠎ᠠ ᠨᠢ ᠤᠨᠤᠭᠤᠯᠵᠤ ᠨᠠᠭᠠᠯᠳᠤᠭᠤᠯᠬᠤ ᠶᠢ ᠡᠷᠡᠰ ᠳᠡᠪᠴᠢᠳᠡᠭ᠃ ᠬᠤᠷᠴᠢᠨᠴᠤᠳ ᠶᠠᠮᠠᠷᠴᠤ ᠰᠠᠶᠢᠬᠠᠨ ᠠᠬ᠎ᠠ ᠳᠡᠬᠦᠦ ᠨᠠᠶᠢᠵᠠ ᠨᠦᠬᠦᠳ ᠲᠤ ᠪᠠᠨ ᠴᠦ ᠬᠡᠰᠡᠨ ᠡᠮᠡᠭᠡᠯ ᠢ ᠵᠢᠬᠡᠯᠡᠬᠦᠯᠬᠦ ᠳᠤᠷ᠎ᠠ ᠦᠭᠡᠢ ᠪᠠᠶᠢᠳᠠᠭ᠃ ᠡᠮᠡᠬᠡᠯ ᠤᠨ ᠵᠤᠬᠢᠮᠵᠢ ᠡᠪᠳᠡᠷᠡᠨ᠎ᠠ᠂ ᠰᠠᠭᠤᠳᠠᠯ ᠬᠠᠵᠠᠶᠢᠨ᠎ᠠ᠂ ᠭᠡᠢ ᠮᠤᠷᠢ ᠬᠡᠪᠳᠡᠨ᠎ᠠ᠂ ᠭᠡᠰᠢᠭ ᠪᠤᠶᠠᠨ ᠵᠠᠶᠢᠯᠠᠨ᠎ᠠ ᠭᠡᠳᠡᠭ᠃    ᠬᠤᠷᠴᠢᠨᠴᠤᠳ ᠤᠨ ᠬᠠᠨᠭ᠍ᠬᠠᠢ ᠡᠮᠡᠬᠡᠯ ᠳᠡᠪᠰᠡᠯᠡᠨ᠎ᠠ ᠭᠡᠳᠡᠭ ᠨᠢ ᠳᠠᠷᠤᠢ ᠳᠡᠭᠡᠷᠡᠬᠢ ᠮᠡᠳᠤ ᠶᠢᠨ ᠵᠤᠶᠢᠯᠡᠰ ᠢ ᠪᠦᠷᠢᠳᠬᠡᠨ ᠬᠦᠢᠴᠡᠳᠭᠡᠵᠦ᠂ ᠤᠭᠰᠠᠷᠠᠵᠤ ᠳᠠᠭᠠᠷᠠᠭᠤᠯᠬᠤ ᠶᠢ ᠬᠡᠯᠡᠳᠡᠭ᠃ ᠡᠨᠡ ᠨᠢ ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠲᠤ ᠠᠪᠴᠤ ᠬᠡᠯᠡᠪᠡᠯ ᠡᠪ ᠡᠩ ᠤᠨ ᠨᠢᠭᠡ ᠠᠵᠢᠯ ᠳᠡᠳᠤᠢ ᠪᠠᠶᠢᠳᠠᠭ᠃ ᠭᠡᠪᠡᠴᠤ ᠭᠦᠯᠦᠭ ᠮᠤᠷᠢᠨ ᠳᠤ ᠭᠠᠭᠴᠠᠬᠠᠨ ᠭᠤᠶᠤ ᠡᠮᠡᠬᠡᠯ ᠵᠠᠰᠠᠯ ᠪᠤᠯᠳᠠᠭ ᠦᠭᠡᠢ᠂ ᠬᠡᠤᠬᠡᠨ ᠬᠦᠮᠦᠨ ᠳᠤ ᠨᠢᠬᠡᠯᠡ ᠰᠠᠶᠢᠬᠠᠨ ᠳᠡᠪᠡᠯ ᠵᠠᠮᠰᠡᠭ ᠪᠤᠯᠳᠠᠭ ᠦᠭᠡᠢ᠃ ᠦᠨᠡᠩᠭᠦ ᠰᠠᠶᠢᠬᠠᠨ ᠳᠡᠪᠰᠡᠭᠰᠡᠨ ᠡᠮᠡᠭᠡᠯ ᠢ ᠠᠭᠳᠠ ᠬᠦᠯᠦᠭ ᠮᠤᠷᠢᠨ ᠳᠤ ᠳᠤᠬᠤᠳᠠᠭ ᠲᠤ ᠬᠦᠷᠪᠡᠯ ᠨᠤᠭᠳᠤ᠂ ᠬᠠᠵᠠᠭᠠᠷ᠂ ᠬᠦᠮᠦᠯᠳᠦᠷᠬᠡ᠂ ᠬᠤᠳᠠᠷᠭ᠎ᠠ ᠁ ᠭᠡᠬᠦ ᠵᠡᠷᠭᠡ ᠪᠠᠷ ᠳᠡᠰ ᠢ ᠨᠢ ᠳᠡᠭᠡᠷᠡᠳᠡᠬᠦᠯᠵᠦ ᠤᠭᠰᠠᠷᠠᠬᠤ ᠯᠠ ᠴᠢᠬᠤᠯᠠ ᠲᠠᠢ ᠪᠤᠯᠳᠠᠭ ᠶᠤᠮ᠃ ᠡᠰᠡ ᠳᠡᠶᠢᠮᠤ ᠪᠤᠯ ᠸᠠᠩ ᠢ ︽ᠬᠤᠵᠢᠬᠡᠷ︾ ᠢᠶᠠᠷ ᠭᠤᠳᠤᠭᠠᠭᠰᠠᠨ ᠤᠴᠢᠷ ᠪᠤᠯᠤᠨ᠎ᠠ᠃    ᠳᠡᠭᠡᠭᠡᠳ ᠯᠠ ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠮᠤᠷᠢᠨ ᠵᠠᠰᠠᠯ ᠢ ᠬᠦᠨᠳᠦᠳᠬᠡᠬᠦ ᠪᠤᠯᠤᠭᠰᠠᠨ ᠶᠤᠮ᠃ ᠮᠤᠷᠢᠨ ᠤ ᠨᠤᠭᠳᠤ᠂ ᠬᠠᠵᠠᠭᠠᠷ᠂ ᠴᠤᠯᠪᠤᠭᠤᠷ᠂ ᠵᠢᠯᠤᠭᠤ ᠨᠢ ᠤᠶᠠᠭᠠᠰᠤ ᠬᠦᠯᠢᠶᠡᠰᠤ ᠳᠡᠳᠤᠢ ᠯᠠ ᠪᠢᠰᠢ ᠪᠠᠰᠠ ᠵᠠᠰᠠᠯ ᠴᠢᠮᠡᠭ  ᠤᠨ ᠭᠤᠤᠯ ᠪᠠᠶᠢᠷᠢᠨ ᠳᠤ ᠤᠷᠤᠵᠤ᠂ ᠮᠤᠷᠢᠨ ᠳᠤ ᠦᠡᠭᠭᠡ ᠵᠢᠰᠤ᠂ ᠴᠤᠭ ᠵᠢᠪᠬᠤᠭ᠎ᠠ ᠨᠡᠮᠡᠷᠢᠯᠡᠳᠡᠭ᠃ ᠳᠡᠶᠢᠮᠤ ᠠᠴᠠ ᠤᠨᠤᠭ᠎ᠠ ᠬᠦᠯᠦᠭ ᠮᠤᠷᠢᠨ ᠤ ᠡᠮᠡᠭᠡᠯ ᠠᠴᠠ ᠠᠰᠳᠠᠭᠠᠨ ᠵᠠᠰᠠᠯ ᠴᠢᠮᠡᠭ ᠤᠨ ᠵᠤᠶᠢᠯᠡᠰ ᠭᠡᠪᠡᠯ ᠳᠠᠷᠤᠢ᠄ ᠨᠤᠭᠳᠤ ᠴᠤᠯᠪᠤᠭᠤᠷ᠂ ᠬᠠᠵᠠᠭᠠᠷ ᠵᠢᠯᠤᠭᠤ᠂ ᠬᠦᠮᠦᠯᠳᠤᠷᠬᠡ᠂ ᠬᠤᠳᠠᠷᠭ᠎ᠠ᠂ ᠴᠢᠳᠤᠷ ᠳᠤᠱᠠ ᠦᠷᠦᠬᠡᠯ᠂ ᠮᠢᠯᠠᠭ᠎ᠠ ᠤᠷᠭ᠎ᠠ ᠵᠡᠷᠭᠡ ᠪᠠᠶᠢᠳᠠᠭ᠃    ᠨᠤᠭᠳᠤ —— ᠮᠤᠷᠢᠨ ᠤ ᠳᠤᠯᠤᠭᠠᠢ ᠳᠤ ᠤᠭᠯᠠᠨ᠂ ᠴᠤᠯᠪᠤᠭᠤᠷ ᠳᠠᠷᠠᠭᠠᠷᠠᠭᠤᠯᠤᠨ ᠤᠶᠠᠵᠤ ᠬᠦᠯᠢᠬᠦ ᠳᠡᠭᠡᠰᠤᠨ ᠳᠤᠤᠷ ᠢ ᠨᠤᠭᠳᠤ ᠭᠡᠳᠡᠭ᠃ ᠮᠤᠷᠢᠨ ᠨᠤᠭᠳᠤ ᠨᠢ ᠨᠤᠭᠳᠤᠨ ᠳᠤᠯᠤᠭᠠᠢ᠂ ᠬᠠᠴᠠᠷ᠂ ᠬᠠᠮᠠᠷ᠂ ᠡᠷᠡᠤ᠂ ᠰᠠᠭᠠᠯᠳᠤᠷᠭ᠎ᠠ᠂ ᠴᠤᠯᠪᠤᠭᠤᠷ ᠵᠡᠷᠭᠡ ᠪᠠᠷ ᠪᠦᠷᠢᠯᠳᠦᠳᠡᠭ᠃    ᠨᠤᠭᠳᠤ ᠶᠢᠨ ᠮᠤᠷᠢᠨ ᠴᠢᠬᠢᠨ ᠤ ᠠᠷᠤ ᠠᠴᠠ ᠳᠡᠭᠡᠭᠰᠢᠬᠢ ᠳᠡᠭᠡᠳᠤ ᠭᠡᠰᠡᠭ ᠢ ᠨᠤᠭᠳᠤ ᠶᠢᠨ ᠳᠤᠯᠤᠭᠠᠢ ᠭᠡᠵᠤ᠂ ᠮᠤᠷᠢᠨ ᠤ ᠬᠠᠮᠠᠷ ᠳᠡᠭᠡᠬᠦᠷ ᠬᠦᠨᠳᠡᠯᠡᠨ ᠳᠠᠳᠠᠭᠰᠠᠨ ᠪᠦᠰᠡᠯᠡᠬᠦᠷ ᠢ ᠨᠤᠭᠳᠤ ᠶᠢᠨ ᠬᠠᠮᠠᠷ ᠬᠡᠨ᠎ᠠ᠃ ᠮᠤᠷᠢᠨ ᠤ ᠡᠷᠡᠤ  ᠶᠢᠨ ᠳᠤᠤᠭᠤᠷ ᠳᠠᠳᠠᠭᠰᠠᠨ᠂ ᠨᠤᠭᠳᠤ ᠶᠢᠨ ᠬᠠᠮᠠᠷ ᠤᠨ ᠬᠤᠶᠠᠷ ᠦᠵᠦᠬᠦᠷ ᠲᠠᠢ ᠬᠤᠯᠪᠤᠵᠤ ᠪᠠᠶᠢᠭ᠎ᠠ ᠪᠦᠰᠡᠯᠡᠬᠦᠷ ᠢ ᠨᠤᠭᠳᠤ ᠶᠢᠨ ᠡᠷᠡᠤ ᠭᠡᠳᠡᠭ᠃ ᠨᠤᠭᠳᠤ ᠶᠢᠨ ᠬᠠᠮᠠᠷ ᠪᠠ ᠡᠷᠡᠤ ᠶᠢᠨ ᠠᠭᠤᠯᠵᠠᠷ ᠠᠴᠠ ᠳᠡᠭᠡᠭᠰᠢ᠂ ᠮᠤᠷᠢᠨ ᠴᠢᠬᠢ  ᠠᠴᠠ ᠳᠤᠷᠤᠭᠰᠢᠬᠢ ᠭᠡᠰᠡᠭ ᠢ ᠨᠢ ᠨᠤᠭᠳᠤ ᠶᠢᠨ ᠬᠠᠴᠠᠷ ᠬᠡᠨ᠎ᠠ᠃ ᠮᠤᠷᠢᠨ ᠤ ᠪᠤᠷᠤᠭᠤᠳᠠᠢ ᠴᠢᠬᠢᠨ ᠤ ᠳᠤᠤᠷ᠎ᠠ ᠳᠠᠯ᠎ᠠ ᠠᠴᠠ ᠭᠤᠭᠴᠤᠭᠠᠯᠠᠨ ᠤᠶᠠᠵᠤ᠂ ᠵᠦᠪᠳᠠᠢ ᠳᠠᠯ᠎ᠠ ᠶᠢᠨ ᠴᠢᠬᠢᠨ ᠤ ᠳᠤᠤᠷ᠎ᠠ ᠪᠡᠶ᠎ᠠ ᠳᠤ ᠳᠤᠰᠬᠠᠶᠢᠯᠠᠨ ᠳᠡᠪᠡᠭᠡ ᠵᠤᠬᠢᠶᠠᠵᠤ ᠳᠡᠳᠡᠨ ᠤᠶᠠᠬᠤ ᠨᠠᠷᠢᠨ ᠰᠤᠷ ᠤᠭᠤᠰᠤᠷ ᠢ ᠰᠠᠭᠠᠯᠳᠤᠷᠭ᠎ᠠ ᠭᠡᠳᠡᠭ᠃    ᠤᠤᠯ ᠳᠤ ᠪᠠᠨ ᠮᠤᠷᠢᠨ ᠨᠤᠭᠳᠤ ᠶᠢ ᠨᠢᠬᠡᠯᠡ ᠤᠷᠳᠤ ᠰᠤᠷ ᠢᠶᠠᠷ ᠬᠠᠮᠠᠷ᠂ ᠡᠷᠡᠤ᠂ ᠬᠤᠶᠠᠷ ᠬᠠᠴᠠᠷ ᠭᠠᠷᠭᠠᠨ ᠳᠤᠨᠤᠯᠵᠢᠨ ᠵᠠᠩᠭᠢᠳᠴᠤ᠂ ᠬᠤᠶᠠᠷ ᠦᠵᠦᠬᠦᠷ ᠢ ᠨᠢ ᠰᠢᠯᠢᠨ ᠳᠡᠭᠡᠷ᠎ᠠ ᠨᠢ ᠵᠤᠯᠭᠠᠭᠤᠯᠤᠨ ᠬᠤᠯᠪᠤᠵᠤ ᠨᠤᠭᠳᠤ ᠪᠤᠯᠭᠠᠵᠤ ᠪᠠᠶᠢᠪᠠ᠃ ᠡᠬᠦᠨ ᠢ ᠵᠠᠳᠠᠭᠠᠢ ᠨᠤᠭᠳᠤ ᠭᠡᠳᠡᠭ᠃ ᠡᠶᠢᠮᠤᠷᠬᠦ ᠵᠠᠳᠠᠭᠠᠢ ᠨᠤᠭᠳᠤ ᠶᠢ ᠵᠤᠬᠢᠶᠠᠵᠤ ᠬᠡᠷᠡᠭᠯᠡᠳᠡᠭ  ᠤᠨ ᠤᠴᠢᠷ ᠨᠢ ᠳᠠᠷᠤᠢ ᠤᠶᠠᠭᠠᠨ ᠤ ᠮᠤᠷᠢ ᠦᠷᠬᠦᠵᠦ ᠳᠤᠩᠭᠤᠷᠤᠨ ᠤᠨᠠᠬᠤ ᠪᠤᠶᠤ ᠪᠤᠭᠤᠮᠢᠯᠠᠨ ᠪᠤᠬᠢᠵᠦ ᠤᠨᠠᠪᠠᠯ᠂ ᠨᠤᠭᠳᠤᠨ ᠳᠤᠯᠤᠭᠠᠢ ᠶᠢᠨ ᠤᠶᠠᠭᠠᠰᠤ ᠠᠮᠠᠷᠬᠠᠨ ᠪᠤᠯᠳᠠᠷᠠᠵᠤ ᠮᠤᠷᠢᠨ ᠳᠤ ᠠᠶᠤᠯ ᠦᠭᠡᠢ ᠪᠠᠶᠢᠳᠠᠭ᠃    ᠰᠡᠬᠦᠯ ᠰᠡᠬᠦᠯᠳᠡᠵᠦ᠂ ᠮᠤᠷᠢ ᠤᠨᠤᠭ᠎ᠠ ᠴᠦᠬᠡᠷᠡᠭᠰᠡᠨ ᠪᠤᠶᠤ ᠬᠦᠯᠦᠭ ᠮᠤᠷᠢᠨ ᠠᠴᠠ ᠪᠠᠨ ᠭᠦᠯᠦᠭ ᠤᠨ ᠡᠵᠡᠨ ᠪᠤᠶᠤ ᠠᠰᠠᠷᠠᠭᠴᠢ ᠬᠤᠯᠠᠳᠠᠳᠠᠭ ᠦᠭᠡᠢ ᠤᠴᠢᠷ ᠠᠴᠠ ᠪᠤᠯᠳᠠᠷᠠᠰᠢ ᠦᠭᠡᠢ ᠪᠠᠳᠤ ᠪᠠᠬᠢ ᠨᠤᠭᠳᠤ ᠬᠢᠬᠦ ᠪᠤᠯᠤᠭᠰᠠᠨ ᠶᠤᠮ᠃    ᠨᠤᠭᠳᠤ ᠶᠢᠨ ᠳᠤᠯᠤᠭᠠᠢ ᠶᠢᠨ ᠵᠠᠯᠪᠠᠷᠢᠭᠤᠯᠤᠨ ᠤᠶᠠᠵᠤ ᠪᠠᠶᠢᠭᠰᠠᠨ ᠢ ᠦᠬᠡᠷᠡᠴᠢᠯᠡᠨ᠂ ᠵᠦᠪᠳᠠᠢ ᠳᠠᠯ᠎ᠠ ᠶᠢᠨ ᠬᠠᠴᠠᠷ ᠳᠡᠬᠡᠷ᠎ᠠ ᠳᠡᠭᠡᠭᠰᠢ ᠬᠠᠨᠳᠤᠭᠰᠠᠨ ᠬᠡᠯᠡ ᠲᠠᠢ ᠭᠤᠷᠬᠢ ᠶᠢ ᠴᠢᠬᠢ ᠠᠴᠠ ᠭᠤᠷᠪᠠ ᠲᠦᠷᠪᠡᠨ ᠬᠤᠷᠤᠭᠤ ᠳᠤᠤᠷ᠎ᠠ ᠳᠠᠭᠠᠷᠠᠭᠤᠯᠤᠨ᠎ᠠ᠃ ᠪᠤᠷᠤᠭᠤᠳᠠᠢ ᠬᠠᠴᠠᠷ ᠤᠨ ᠰᠤᠷ ᠢ ᠰᠤᠩᠭᠠᠵᠤ᠂ ᠨᠤᠭᠳᠤ ᠶᠢᠨ ᠳᠤᠯᠤᠭᠠᠢ ᠭᠠᠷᠭᠠᠭᠠᠳ᠂ ᠦᠵᠦᠬᠦᠷ ᠳᠡᠬᠡᠷ᠎ᠠ ᠨᠢ ᠶᠡᠬᠡᠰᠬᠡᠵᠦ ᠪᠠᠭᠠᠰᠬᠠᠬᠤ ᠬᠡᠳᠤᠨ ᠨᠦᠬᠡ ᠴᠤᠭᠤᠯᠤᠨ᠂ ᠭᠤᠷᠬᠢᠨ ᠳᠤ ᠤᠷᠤᠭᠤᠯᠤᠨ ᠳᠡᠪᠡᠭᠡᠯᠡᠬᠦ ᠪᠤᠯᠪᠠ᠃ ᠮᠤᠷᠢᠨ ᠳᠤᠯᠤᠭᠠᠢ ᠶᠡᠭᠡ ᠪᠤᠯ ᠨᠤᠭᠳᠤᠨ ᠳᠤᠯᠤᠭᠠᠢ ᠶᠢ ᠶᠡᠭᠡᠰᠭᠡᠵᠦ᠂ ᠮᠤᠷᠢᠨ ᠳᠤᠯᠤᠭᠠᠢ ᠪᠠᠭ᠎ᠠ ᠪᠤᠯ ᠨᠤᠭᠳᠤᠨ ᠳᠤᠯᠤᠭᠠᠢ ᠶᠢ ᠪᠠᠭᠠᠰᠬᠠᠨ ᠨᠤᠭᠳᠤᠯᠠᠨ᠎ᠠ᠃    ᠡᠶᠢᠮᠤ ᠨᠤᠭᠳᠤᠨ ᠳᠤ ᠪᠠᠰᠠ ᠬᠤᠶᠠᠷ ᠰᠠᠭᠠᠯᠳᠤᠷᠭ᠎ᠠ ᠪᠠᠶᠢᠳᠠᠭ᠃ ᠮᠤᠷᠢᠨ ᠤ ᠪᠤᠷᠤᠭᠤᠳᠠᠢ ᠨᠢᠳᠤᠨ ᠠᠴᠠ ᠵᠢᠰᠢᠬᠦᠦ ᠳᠤᠤᠷ᠎ᠠ ᠨᠤᠭᠳᠤᠨ ᠬᠠᠴᠠᠷ ᠢ ᠴᠤᠭᠤᠯᠵᠤ᠂ ᠰᠠᠪᠬᠠᠨ ᠦᠵᠦᠬᠦᠷ ᠠᠴᠠ ᠨᠠᠷᠢᠨ᠂ ᠳᠤᠬᠤᠢ ᠤᠷᠳᠤ ᠰᠤᠷ  ᠤᠨ ᠨᠢᠬᠡ ᠦᠵᠦᠬᠦᠷ ᠢ ᠭᠤᠭᠴᠤᠭᠠᠯᠠᠨ ᠤᠶᠠᠵᠤ ᠳᠠᠯᠪᠢᠨ᠎ᠠ᠃ ᠡᠬᠦᠨ ᠢ ᠰᠠᠭᠠᠯᠳᠤᠷᠭ᠎ᠠ ᠭᠡᠳᠡᠭ᠂ ᠪᠠᠰᠠ ᠡᠷᠡᠤ ᠰᠠᠭᠠᠯᠳᠤᠷᠭ᠎ᠠ ᠬᠡᠨ᠎ᠠ᠃ ᠵᠦᠪᠳᠠᠢ ᠳᠠᠯ᠎ᠠ ᠶᠢᠨ ᠨᠤᠭᠳᠤ ᠶᠢᠨ ᠬᠠᠴᠠᠷ ᠳᠡᠬᠡᠷᠡᠬᠢ ᠭᠤᠷᠬᠢᠨ ᠤ ᠳᠤᠤᠷ᠎ᠠ ᠨᠠᠷᠢᠨ ᠰᠤᠷ  ᠢᠶᠠᠷ ᠪᠢᠳᠡᠬᠦᠦ ᠭᠤᠭᠴᠤᠭ᠎ᠠ ᠭᠠᠷᠭᠠᠵᠤ ᠤᠶᠠᠨ᠎ᠠ᠃ ᠳᠡᠬᠦᠨ ᠢ ᠰᠠᠭᠠᠯᠳᠤᠷᠭ᠎ᠠ ᠶᠢᠨ ᠬᠦᠬᠦ ᠬᠡᠨ᠎ᠠ᠃ ᠮᠤᠷᠢ ᠪᠠᠨ ᠨᠤᠭᠳᠤᠯᠤᠭᠰᠠᠨ ᠤ ᠳᠠᠷᠠᠭ᠎ᠠ ᠡᠷᠡᠤ ᠰᠠᠭᠠᠯᠳᠤᠷᠭ᠎ᠠ ᠶᠢ ᠵᠦᠪᠳᠠᠢ ᠳᠠᠯ᠎ᠠ ᠶᠢᠨ ᠬᠦᠬᠦ ᠳᠤ ᠴᠢᠩᠭᠠᠵᠤ ᠤᠶᠠᠨ᠎ᠠ᠃ ᠨᠤᠭᠳᠤ ᠪᠠᠨ ᠠᠮᠠᠷᠬᠠᠨ ᠪᠤᠯᠳᠠᠯᠠᠳᠠᠭ ᠮᠤᠷᠢᠨ ᠳᠤ ᠪᠠᠰᠠ ᠳᠤᠬᠤᠨ ᠰᠠᠭᠠᠯᠳᠤᠷᠭ᠎ᠠ ᠳᠠᠭᠠᠷᠠᠭᠤᠯᠳᠠᠭ᠃ ᠨᠤᠭᠳᠤ ᠶᠢᠨ ᠳᠤᠯᠤᠭᠠᠢ ᠶᠢᠨ ᠭᠤᠤᠯ ᠳᠤ ᠴᠤᠭᠤᠯᠵᠤ ᠰᠠᠪᠬᠠᠨ ᠦᠷᠬᠡᠨ ᠰᠤᠷ ᠢ ᠨᠢᠬᠡ ᠦᠨᠳᠦᠷ᠂ ᠨᠢᠬᠡ ᠪᠤᠭᠤᠨᠢ ᠪᠠᠷ ᠭᠤᠭᠴᠤᠭᠠᠯᠠᠨ ᠤᠶᠠᠵᠤ᠂ ᠪᠤᠭᠤᠨᠢ ᠰᠤᠷ ᠤᠨ ᠦᠵᠦᠬᠦᠷ ᠲᠤ ᠭᠡᠯᠡ ᠲᠠᠢ ᠵᠢᠵᠢᠭ ᠭᠤᠷᠬᠢ ᠶᠢ ᠳᠠᠭᠠᠷᠠᠭᠤᠯᠤᠨ᠂ ᠦᠨᠳᠦᠷ ᠰᠤᠷ ᠤᠨ ᠦᠵᠦᠬᠦᠷ ᠭᠡᠰᠡᠭ ᠲᠤ ᠬᠡᠳᠤᠨ ᠨᠦᠬᠡ ᠴᠤᠭᠤᠯᠤᠨ᠎ᠠ᠃ ᠦᠨᠳᠦᠷ ᠰᠤᠷ ᠢ ᠳᠤᠬᠤᠨ ᠰᠠᠭᠠᠯᠳᠤᠷᠭ᠎ᠠ ᠭᠡᠵᠤ᠂ ᠭᠤᠷᠬᠢ ᠲᠠᠢ ᠳᠠᠯ᠎ᠠ ᠶᠢ ᠮᠤᠷᠢᠨ ᠤ ᠵᠦᠪ ᠳᠠᠯ᠎ᠠ ᠳᠤ ᠭᠠᠷᠭᠠᠨ᠂ ᠰᠠᠭᠠᠯᠳᠤᠷᠭ᠎ᠠ ᠶᠢᠨ ᠳᠡᠪᠡᠭᠡ ᠂ ᠰᠠᠭᠠᠯᠳᠤᠷᠭ᠎ᠠ ᠶᠢᠨ ᠭᠤᠷᠬᠢ ᠬᠡᠳᠡᠭ᠃    ᠨᠤᠭᠳᠤ ᠶᠢᠨ ᠬᠤᠶᠠᠷ ᠬᠠᠴᠠᠷ᠂ ᠬᠠᠮᠠᠷ ᠤᠨ ᠰᠤᠷ ᠢ ᠬᠤᠶᠠᠷ ᠬᠦᠪᠡᠭᠡ ᠪᠠᠷ ᠨᠢ ᠢᠷᠮᠡᠭᠯᠡᠨ ᠤᠯᠠᠭᠠᠨ ᠰᠢᠷᠢ ᠪᠠᠷ ᠠᠯᠠᠭᠯᠠᠨ ᠤᠷᠢᠶᠠᠵᠤ ᠴᠢᠮᠡᠭᠯᠡᠳᠡᠭ᠃    ᠴᠤᠯᠪᠤᠭᠤᠷ —— ᠮᠤᠷᠢᠨ ᠨᠤᠭᠳᠤ ᠶᠢᠨ ᠡᠷᠡᠤ ᠶᠢᠨ ᠡᠷᠬᠢᠬᠦᠯᠬᠡ ᠠᠴᠠ ᠵᠠᠯᠭᠠᠵᠤ ᠤᠶᠠᠭᠰᠠᠨ ᠳᠡᠭᠡᠰᠤ ᠶᠢ ᠴᠤᠯᠪᠤᠭᠤᠷ ᠭᠡᠳᠡᠭ᠃    ᠶᠡᠷᠤᠩᠭᠡᠢ ᠳᠤ ᠪᠠᠨ ᠵᠢᠷᠭᠤᠭᠠᠨ ᠳᠤᠬᠤᠢ ᠤᠷᠳᠤ ᠵᠦᠬᠡᠯᠡᠨ ᠰᠤᠷ ᠪᠤᠶᠤ ᠬᠢᠯᠭᠠᠰᠤᠨ ᠳᠡᠭᠡᠰᠤ᠂ ᠳᠡᠮᠡᠬᠡᠨ ᠤ ᠡᠷ᠎ᠠ ᠤᠡᠭᠭᠠᠰᠤᠨ ᠳᠡᠭᠡᠰᠤ ᠪᠠᠷ ᠬᠢᠳᠡᠭ᠃ ᠬᠢᠯᠭᠠᠰᠤ ᠶᠢ ᠭᠤᠷᠮᠤᠰᠤᠨ ᠳᠠᠮᠤᠵᠤ ᠨᠡᠶᠢᠳᠭᠡᠬᠦ ᠪᠦᠭᠡᠳ ᠳᠡᠮᠡᠭᠡᠨ ᠤ ᠡᠷ᠎ᠠ ᠤᠡᠭᠭᠠᠰᠤ ᠶᠢ ᠵᠢᠷᠭᠤᠭᠠᠨ ᠮᠦᠰᠦᠯᠡᠨ ᠨᠡᠶᠢᠳᠬᠡᠵᠦ ᠬᠢᠨ᠎ᠠ᠃    ᠮᠤᠷᠢᠨ ᠳᠤ ᠨᠤᠭᠳᠤ᠂ ᠬᠠᠵᠠᠭᠠᠷ ᠢ ᠬᠠᠮᠳᠤ ᠳᠤ ᠨᠢ ᠤᠭᠰᠠᠷᠠᠵᠤ ᠮᠤᠷᠢᠨ ᠳᠤ ᠪᠠᠨ ᠮᠤᠷᠳᠠᠬᠤ ᠦᠶ᠎ᠠ ᠳᠤ ᠴᠤᠯᠪᠤᠭᠤᠷ ᠢ ᠤᠷᠢᠳᠤ ᠪᠦᠬᠦᠷᠬᠡ ᠪᠠ ᠳᠠᠪᠰᠠ ᠶᠢᠨ ᠬᠤᠭᠤᠷᠤᠨᠳᠤ ᠬᠠᠪᠴᠢᠭᠤᠯᠵᠤ ᠳᠠᠯᠪᠢᠬᠤ ᠪᠤᠶᠤ ᠵᠦᠪᠳᠠᠢ ᠤᠷᠢᠳᠤ ᠭᠠᠨᠵᠤᠭ᠎ᠠ ᠠᠴᠠ ᠤᠶᠠᠵᠤ ᠳᠠᠯᠪᠢᠨ᠎ᠠ᠃ ᠴᠤᠯᠪᠤᠭᠤᠷ ᠵᠢᠯᠤᠭᠤ ᠬᠤᠶᠠᠷ ᠢ ᠬᠠᠮᠳᠤ ᠳᠤ ᠨᠢ ᠠᠳᠬᠤᠵᠤ ᠶᠠᠪᠤᠳᠠᠭ ᠦᠭᠡᠢ᠃ ᠮᠤᠷᠢᠨ ᠴᠤᠯᠪᠤᠭᠤᠷ ᠢ ᠤᠯᠤᠰᠤ ᠪᠠ ᠬᠢᠮ᠎ᠠ ᠪᠠᠷ ᠳᠠᠮᠤᠵᠤ ᠬᠢᠳᠡᠭ ᠦᠭᠡᠢ᠂ ᠮᠤᠷᠢᠨ ᠤ ᠬᠡᠢ ᠮᠤᠷᠢ ᠬᠡᠪᠳᠡᠨ᠎ᠠ ᠭᠡᠳᠡᠭ᠃ ᠴᠤᠯᠪᠤᠭᠤᠷ ᠭᠡᠭᠴᠢ ᠳᠠᠷᠤᠢ ᠮᠤᠷᠢᠨ ᠠᠴᠠ ᠪᠠᠨ ᠪᠠᠭᠤᠮᠠᠭᠴᠠ ᠮᠤᠷᠢ ᠪᠠᠨ ᠤᠶᠠᠬᠤ ᠳᠡᠬᠡᠰᠤ ᠮᠥᠨ᠃ ᠮᠦᠨᠴᠤ ᠮᠤᠷᠢ ᠰᠤᠶᠢᠬᠤ ᠨᠤᠭᠳᠤ ᠶᠢᠨ ᠤᠶᠠᠭᠠᠰᠤ ᠮᠥᠨ᠃    ᠬᠠᠵᠠᠭᠠᠷ —— ᠮᠤᠷᠢᠨ ᠤ ᠠᠮᠠᠨ ᠳᠤ ᠠᠮᠠᠭᠠᠶᠢᠯᠠᠨ ᠳᠤᠯᠤᠭᠠᠢ ᠳᠤ ᠤᠭᠰᠠᠷᠠᠨ ᠤᠭᠯᠠᠬᠤ ᠳᠡᠬᠡᠰᠤᠨ ᠳᠤᠤᠷ ᠢ ᠬᠠᠵᠠᠭᠠᠷ ᠬᠡᠨ᠎ᠠ᠃    ᠬᠠᠵᠠᠭᠠᠷ ᠤᠨ ᠪᠦᠳᠦᠴᠡ ᠨᠢ ᠨᠤᠭᠳᠤ ᠲᠠᠢ ᠦᠨᠳᠦᠰᠦᠨ ᠳᠤ ᠪᠠᠨ ᠠᠳᠠᠯᠢ ᠪᠠᠶᠢᠳᠠᠭ᠃ ᠠᠳᠠᠯᠢ ᠦᠭᠡᠢ ᠳᠠᠯ᠎ᠠ  ᠨᠢ ᠬᠡᠪᠡᠯ ᠡᠷᠡᠤ ᠦᠭᠡᠢ᠂ ᠡᠷᠡᠤ ᠶᠢᠨ ᠤᠷᠤᠨ ᠳᠤ ᠬᠤᠶᠠᠷ ᠳᠡᠮᠤᠷ ᠮᠢᠳᠠᠭᠠᠷ ᠭᠡᠯᠬᠢᠶᠡᠰᠤ ᠶᠢ ᠬᠠᠮᠠᠷ ᠤᠨ ᠬᠤᠶᠠᠷ ᠦᠵᠦᠬᠦᠷ ᠲᠠᠢ ᠬᠤᠯᠪᠤᠵᠤ ᠮᠤᠷᠢᠨ ᠤ ᠠᠮᠠᠨ ᠳᠤ ᠵᠠᠭᠤᠯᠭᠠᠨ᠎ᠠ᠃ ᠳᠡᠬᠦᠨ ᠢ ᠠᠮᠠᠭᠠᠢ ᠭᠡᠳᠡᠭ᠃ ᠠᠮᠠᠭᠠᠢ ᠤᠨ ᠭᠠᠳᠠᠨ᠎ᠠ ᠬᠤᠶᠠᠷ ᠦᠵᠦᠬᠦᠷ ᠳᠡᠬᠡᠷ᠎ᠠ ᠬᠠᠮᠠᠷ ᠲᠠᠢ ᠬᠤᠯᠪᠤᠵᠤ ᠭᠠᠷᠬ᠎ᠠ ᠶᠢ ᠳᠤᠰ ᠳᠤᠰ ᠭᠡᠯᠬᠢᠨ᠎ᠠ᠃ ᠳᠡᠬᠦᠨ ᠢ ᠵᠤᠤᠵᠠᠢ ᠭᠡᠬᠦ ᠪᠤᠶᠤ ᠵᠤᠤᠵᠠᠢ ᠶᠢᠨ ᠭᠠᠷᠬ᠎ᠠ ᠬᠡᠳᠡᠭ᠃ ᠬᠠᠵᠠᠭᠠᠷ ᠤᠨ ᠳᠤᠯᠤᠭᠠᠢ ᠪᠤᠶᠤ ᠬᠠᠵᠠᠭᠠᠷ ᠤᠨ ᠬᠠᠴᠠᠷ ᠤᠨ ᠠᠭᠤᠯᠵᠠᠷ ᠳᠡᠭᠡᠷ᠎ᠠ ᠮᠤᠷᠢᠨ ᠤ ᠮᠠᠩᠨᠠᠢ ᠳᠡᠭᠡᠬᠦᠷ ᠳᠠᠳᠠᠭᠰᠠᠨ ᠪᠦᠰᠡᠯᠡᠬᠦᠷ ᠳᠡᠭᠡᠰᠤ ᠲᠠᠢ᠂ ᠳᠡᠬᠦᠨ ᠢ ᠬᠠᠵᠠᠭᠠᠷ ᠤᠨ ᠳᠠᠳᠠᠭᠤᠷ ᠬᠡᠨ᠎ᠠ᠃ ᠬᠤᠷᠴᠢᠨᠴᠤᠳ ᠬᠠᠵᠠᠭᠠᠷ ᠤᠨ ᠳᠤᠯᠤᠭᠠᠢ ᠶᠢᠨ ᠭᠡᠰᠡᠭ ᠢ ᠦᠵᠡᠮᠦᠷᠢ ᠲᠠᠢ ᠰᠠᠶᠢᠬᠠᠨ ᠵᠠᠰᠠᠨ ᠴᠢᠮᠡᠭᠯᠡᠳᠡᠭ᠃ ᠳᠠᠳᠠᠭᠤᠷ ᠢ ᠨᠤᠭᠤᠯᠤᠭᠰᠠᠨ ᠰᠤᠷ ᠢᠶᠠᠷ ᠬᠢᠵᠦ᠂ ᠬᠤᠶᠠᠷ ᠬᠦᠪᠡᠭᠡ ᠢᠷᠮᠡᠭ ᠢ ᠨᠢ ᠦᠡᠭᠭᠡᠳᠠᠢ ᠰᠢᠷᠢ  ᠪᠠᠷ ᠤᠷᠢᠶᠠᠨ ᠰᠢᠷᠳᠡᠵᠦ᠂ ᠳᠡᠭᠡᠭᠰᠢ ᠬᠠᠨᠳᠤᠭᠰᠠᠨ ᠬᠡᠳᠤᠨ ᠪᠠᠭᠴᠠ ᠤᠯᠠᠭᠠᠨ ᠵᠠᠯᠠᠭ᠎ᠠ᠂ ᠳᠤᠷᠤᠭᠰᠢ ᠬᠠᠨᠳᠤᠭᠰᠠᠨ ᠬᠡᠳᠤᠨ ᠪᠠᠭᠴᠠ ᠤᠯᠠᠭᠠᠨ ᠨᠤᠭᠤᠭᠠᠨ ᠴᠠᠴᠤᠭ ᠳᠠᠭᠠᠷᠠᠭᠤᠯᠵᠤ᠂ ᠳᠠᠳᠠᠭᠤᠷ ᠤᠨ ᠨᠢᠭᠤᠷ ᠳᠡᠬᠡᠷ᠎ᠠ ᠨᠠᠷᠢᠨ ᠭᠡᠯᠪᠡᠷᠢ  ᠶᠢᠨ ᠦᠯᠵᠡᠢ ᠵᠠᠩᠭᠢᠶ᠎ᠠ ᠬᠠᠳᠠᠳᠠᠭ᠃ ᠪᠠᠰᠠ ᠵᠢᠵᠢᠭ ᠵᠢᠵᠢᠭ ᠦᠯᠵᠠᠢ ᠵᠠᠩᠭᠢᠶ᠎ᠠ ᠶᠢ ᠳᠤᠷᠤᠭᠰᠢ ᠤᠨᠵᠢᠭᠤᠯᠬᠤ ᠴᠦ ᠪᠠᠶᠢᠳᠠᠭ᠃ ᠬᠠᠵᠠᠭᠠᠷ ᠤᠨ ᠳᠤᠯᠤᠭᠠᠢ᠂ ᠬᠠᠵᠠᠭᠠᠷ ᠤᠨ ᠬᠠᠴᠠᠷ ᠳᠡᠬᠡᠷ᠎ᠠ ᠵᠡᠰ ᠭᠠᠤᠯᠢ ᠪᠠᠷ ᠬᠢᠭᠰᠡᠨ ᠶᠠᠩᠵᠤ ᠪᠦᠷᠢ  ᠶᠢᠨ ᠴᠢᠮᠬᠢᠬᠦᠷ ᠵᠡᠬᠦᠯᠬᠡᠨ᠎ᠠ᠃ ᠳᠡᠬᠦᠨ ᠢ ᠨᠢ ᠬᠠᠵᠠᠭᠠᠷ ᠤᠨ ᠪᠦᠯᠡᠵᠡᠭ ᠭᠡᠳᠡᠭ᠂ ᠵᠢᠵᠢᠭ ᠵᠢᠵᠢᠭ ᠬᠤᠨᠭ᠍ᠬᠤ ᠳᠠᠭᠠᠷᠠᠭᠤᠯᠤᠭᠰᠠᠨ ᠴᠦ ᠪᠠᠶᠢᠳᠠᠭ᠃    ᠬᠠᠵᠠᠭᠠᠷ ᠤᠨ ᠬᠠᠮᠠᠷ ᠢ ᠮᠥᠨ ᠨᠤᠭᠳᠤ ᠶᠢᠨ ᠬᠠᠮᠠᠷ ᠰᠢᠭ᠋ ᠴᠢᠮᠡᠳᠡᠭ᠃ ᠬᠤᠷᠴᠢᠨᠴᠤᠳ ᠮᠤᠷᠢᠨ ᠳᠤ ᠪᠠᠨ ᠨᠤᠭᠳᠤ ᠪᠠ ᠬᠠᠵᠠᠭᠠᠷ ᠢ ᠬᠠᠮᠳᠤ ᠳᠤ ᠨᠢ ᠤᠭᠰᠠᠷᠠᠬᠤ ᠶᠢ ᠡᠷᠬᠢᠮᠯᠡᠳᠡᠭ᠂ ᠳᠠᠩ ᠬᠠᠵᠠᠭᠠᠷ ᠵᠠᠷᠤᠬᠤ ᠨᠢ ᠴᠦᠬᠡᠨ ᠬᠠᠷᠠᠭᠳᠠᠨ᠎ᠠ᠃    ᠬᠠᠵᠠᠭᠠᠷ ᠲᠤ ᠪᠠᠰᠠ ᠰᠠᠭᠠᠯᠳᠤᠷᠭ᠎ᠠ ᠪᠠᠶᠢᠳᠠᠭ᠃ ᠭᠡᠪᠡᠴᠤ ᠭᠠᠭᠴᠠ ᠡᠷᠡᠤ ᠰᠠᠭᠠᠯᠳᠤᠷᠭ᠎ᠠ ᠭᠢᠳᠡᠭ ᠶᠤᠮ᠃ ᠬᠠᠵᠠᠭᠠᠷ ᠤᠨ ᠳᠤᠯᠤᠭᠠᠢ ᠶᠢ ᠮᠥᠨ ᠨᠤᠭᠳᠤ ᠶᠢᠨ ᠳᠤᠯᠤᠭᠠᠢ ᠰᠢᠭ᠋ ᠶᠡᠭᠡᠰᠬᠡᠵᠦ ᠪᠠᠭᠠᠰᠬᠠᠬᠤ ᠪᠠᠷ ᠵᠤᠬᠢᠶᠠᠳᠠᠭ᠃    ᠵᠢᠯᠤᠭᠤ —— ᠬᠠᠵᠠᠭᠠᠷ ᠤᠨ ᠠᠮᠠᠭᠠᠢ ᠶᠢᠨ ᠬᠤᠶᠠᠷ ᠦᠵᠦᠬᠦᠷ ᠲᠤ ᠬᠤᠯᠪᠤᠵᠤ ᠪᠠᠶᠢᠭ᠎ᠠ ᠵᠤᠤᠵᠢ ᠶᠢᠨ ᠭᠠᠷᠬ᠎ᠠ ᠠᠴᠠ ᠬᠤᠯᠪᠤᠭᠰᠠᠨ ᠪᠢᠳᠡᠬᠦᠦ ᠤᠷᠳᠤ ᠤᠭᠤᠰᠤᠷ ᠢ ᠵᠢᠯᠤᠭᠤ ᠬᠡᠨ᠎ᠠ᠃    ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠳᠠᠪᠤᠨ ᠬᠤᠰᠢᠭᠤ ᠮᠠᠯ ᠢᠶᠠᠨ ᠬᠠᠷᠢᠭᠤᠯᠵᠤ ᠶᠠᠪᠤᠬᠤ ᠳᠤ ᠨᠤᠭᠳᠤ ᠪᠠᠷ ᠮᠤᠷᠢ ᠤᠨᠤᠳᠠᠭ ᠠᠴᠠ ᠪᠢᠰᠢ᠂ ᠡᠬᠦᠨ ᠠᠴᠠ ᠪᠠᠭ᠎ᠠ ᠯᠠ ᠶᠡᠭᠡ ᠶᠠᠪᠤᠳᠠᠯ ᠰᠠᠭᠤᠳᠠᠯ ᠳᠡᠬᠡᠷ᠎ᠠ ᠴᠦᠮ ᠬᠠᠵᠠᠭᠠᠷ ᠤᠭᠰᠠᠷᠠᠵᠤ ᠮᠤᠷᠢ ᠤᠨᠤᠳᠠᠭ᠃ ᠤᠴᠢᠷ ᠨᠢ ᠶᠠᠮᠠᠷᠴᠤ ᠮᠤᠷᠢ ᠨᠤᠭᠳᠤ ᠴᠤᠯᠪᠤᠭᠤᠷ ᠢᠶᠠᠷ ᠠᠮᠠᠷᠬᠠᠨ ᠵᠠᠬᠢᠷᠤᠭᠳᠠᠳᠠᠭ ᠦᠭᠡᠢ᠃ ᠬᠠᠮᠠᠷ᠂ ᠡᠷᠡᠤ ᠲᠦᠬᠦᠰᠢ ᠬᠠᠳᠠᠭᠤ ᠮᠤᠷᠢ ᠨᠡᠩ ᠴᠦ ᠵᠦᠪ ᠵᠠᠬᠢᠷᠤᠭᠳᠠᠳᠠᠭ ᠦᠭᠡᠢ ᠶᠤᠮ᠃ ᠬᠦᠯᠦᠭ ᠮᠤᠷᠢ ᠶᠢ ᠰᠠᠨᠠᠭ᠎ᠠ ᠪᠠᠷ ᠢᠶᠠᠨ ᠳᠤᠪᠳᠤᠯᠤᠯᠠᠭᠤᠯᠤᠶ᠎ᠠ᠂ ᠤᠷᠭ᠎ᠠ ᠶᠢᠨ ᠮᠤᠷᠢ ᠰᠢᠭ᠋ ᠵᠠᠬᠢᠷᠤᠶ᠎ᠠ ᠬᠡᠪᠡᠯ ᠳᠠᠷᠤᠢ ᠬᠠᠵᠠᠭᠠᠷ ᠵᠢᠯᠤᠭᠤ ᠵᠠᠷᠤᠳᠠᠭ᠂ ᠮᠤᠷᠢ ᠴᠦ ᠰᠠᠨᠠᠭ᠎ᠠ ᠪᠠᠷ ᠢᠶᠠᠨ ᠳᠤᠪᠳᠤᠯᠵᠤ ᠬᠦᠴᠦ ᠪᠠᠨ ᠪᠠᠷᠠᠬᠤ ᠦᠭᠡᠢ᠂ ᠮᠤᠷᠢᠨ ᠤ ᠡᠵᠡᠨ ᠴᠦ ᠰᠠᠨᠠᠭ᠎ᠠ ᠠᠮᠠᠷ ᠤᠨᠤᠨ᠎ᠠ᠃ ᠬᠠᠵᠠᠭᠠᠷ ᠤᠨ ᠠᠮᠠᠭᠠᠢ ᠭᠡᠭᠴᠢ ᠮᠤᠷᠢᠨ ᠤ ᠡᠩᠬᠦᠷ ᠵᠦᠬᠡᠯᠡᠨ ᠵᠠᠪᠠᠵᠢ ᠶᠢ ᠳᠠᠳᠠᠵᠤ ᠪᠠᠶᠢᠭ᠎ᠠ ᠤᠴᠢᠷ ᠵᠡᠬᠦᠨ ᠪᠠᠷᠠᠭᠤᠨ ᠠᠮᠠᠭᠠᠢ ᠵᠢᠯᠤᠭᠤ ᠶᠢᠨ ᠳᠠᠳᠠᠵᠤ ᠵᠢᠯᠤᠭᠤᠳᠬᠤ ᠶᠢ ᠳᠠᠭᠠᠬᠤ ᠯᠠ ᠬᠡᠷᠡᠭ ᠶᠤᠮ᠃ ᠳᠡᠶᠢᠮᠤ ᠠᠴᠠ ᠬᠠᠵᠠᠭᠠᠷ ᠤᠨ ᠪᠢᠳᠡᠬᠦᠦ ᠳᠠᠳᠠᠭ᠎ᠠ ᠳᠡᠭᠡᠰᠤ ᠶᠢ ᠵᠢᠯᠤᠭᠤ ᠭᠡᠵᠤ ᠨᠡᠷᠡᠯᠡᠭᠰᠡᠨ ᠪᠠᠶᠢᠭ᠎ᠠ ᠶᠤᠮ᠃    ᠬᠠᠵᠠᠭᠠᠷ ᠤᠨ ᠵᠢᠯᠤᠭᠤ ᠶᠢᠨ ᠤᠷᠳᠤ ᠶᠢ ᠡᠮᠡᠬᠡᠯ ᠤᠨ ᠠᠷᠤ ᠪᠦᠬᠦᠷᠬᠡ ᠠᠴᠠ ᠭᠤᠬᠠᠳᠠᠵᠤ ᠡᠯᠬᠦᠬᠦ ᠬᠡᠮᠵᠢᠶ᠎ᠠ ᠪᠠᠷ ᠬᠢᠳᠡᠭ᠃ ᠬᠦᠵᠦᠬᠦᠦ ᠤᠷᠳᠤ ᠮᠤᠷᠢᠨ ᠤ ᠵᠢᠯᠤᠭᠤ ᠶᠢ ᠤᠷᠳᠤ ᠬᠢᠵᠦ᠂ ᠬᠦᠵᠦᠬᠦᠦ ᠪᠤᠭᠤᠨᠢ ᠪᠠᠭ᠎ᠠ ᠪᠡᠶᠡᠳᠠᠢ ᠮᠤᠷᠢᠨ  ᠤ ᠵᠢᠯᠤᠭᠤ ᠶᠢ ᠤᠬᠤᠷ ᠬᠢᠳᠡᠭ᠃ ᠶᠡᠷᠤᠩᠭᠡᠢ ᠳᠤ ᠪᠠᠨ ᠨᠠᠢᠮᠠᠨ ᠳᠤᠬᠤᠢ ᠤᠷᠳᠤ ᠪᠠᠶᠢᠳᠠᠭ᠃    ᠵᠢᠯᠤᠭᠤ ᠶᠢ ᠬᠠᠮᠤᠭ ᠵᠦᠬᠡᠯᠡᠨ ᠰᠤᠷ ᠢᠶᠠᠷ ᠬᠢᠬᠦ ᠪᠦᠬᠡᠳ ᠬᠢᠯᠭᠠᠰᠤ ᠤᠡᠭᠭᠠᠰᠤ ᠪᠠᠷ ᠶᠠᠩᠵᠤ ᠪᠦᠷᠢ ᠪᠠᠷ ᠤᠭᠠᠯᠵᠠᠯᠠᠨ ᠰᠦᠯᠵᠢᠵᠦ᠂ ᠬᠠᠪᠳᠠᠭᠠᠢ ᠬᠦᠷᠦᠵᠦ ᠬᠢᠳᠡᠭ᠃ ᠬᠠᠪᠳᠠᠭᠠᠢ ᠶᠢᠨ ᠬᠡᠮᠵᠢᠶ᠎ᠠ ᠨᠢ ᠨᠢᠬᠡ ᠢᠮᠠᠬᠤ ᠬᠢᠷᠢ᠃ ᠶᠡᠷᠤ ᠠᠴᠠ ᠪᠦᠬᠡᠷᠡᠩᠬᠡᠢ ᠳᠡᠭᠡᠰᠤ ᠪᠠᠷ ᠵᠢᠯᠤᠭᠤ ᠬᠢᠳᠡᠭ ᠦᠭᠡᠢ᠃    ᠵᠢᠯᠤᠭᠤ ᠶᠢᠨ ᠬᠤᠶᠠᠷ ᠦᠵᠦᠬᠦᠷ ᠢ ᠵᠤᠤᠵᠠᠢ ᠳᠤ ᠬᠤᠯᠪᠤᠬᠤ ᠳᠤ ᠪᠠᠨ ᠪᠢᠳᠡᠬᠦᠦ ᠪᠠᠨ ᠭᠤᠭᠴᠤᠭᠠᠯᠠᠨ᠂ ᠳᠤᠳᠤᠭᠰᠢ ᠪᠠᠨ ᠨᠢᠬᠡ ᠰᠦᠬᠦᠮ ᠰᠦᠯᠵᠢᠨ ᠰᠡᠯᠬᠦᠵᠦ᠂ ᠦᠵᠦᠬᠦᠷ ᠢ ᠨᠢ ᠮᠥᠨ ᠨᠢᠬᠡ ᠰᠦᠬᠦᠮ ᠰᠠᠴᠢᠭᠯᠠᠨ ᠵᠠᠯᠭᠠᠯᠠᠨ᠎ᠠ᠃    ᠬᠦᠯᠦᠭ ᠤᠨ ᠵᠢᠯᠤᠭᠤ ᠰᠤᠯᠠ ᠪᠤᠯ ᠬᠦᠯᠦᠭ ᠬᠦᠨᠳᠡᠷᠴᠤ᠂ ᠬᠦᠯᠦᠭ ᠤᠨ ᠵᠢᠯᠤᠭᠤ ᠴᠢᠩᠭ᠎ᠠ ᠪᠤᠯ ᠬᠦᠯᠦᠭ ᠰᠠᠶᠢᠪᠤᠷᠢᠯᠡᠨ᠎ᠠ᠃ ᠵᠢᠯᠤᠭᠤ ᠬᠠᠮᠢᠭᠠᠰᠢ ᠪᠠᠨ ᠪᠤᠯ ᠬᠦᠯᠦᠭ ᠬᠠᠮᠢᠭᠠᠰᠢ ᠪᠠᠨ ᠪᠠᠶᠢᠳᠠᠭ᠃    ᠬᠦᠮᠦᠯᠳᠦᠷᠬᠡ —— ᠡᠮᠡᠭᠡᠯ ᠤᠨ ᠡᠮᠤᠨ᠎ᠠ ᠬᠤᠶᠠᠷ ᠤᠭᠰᠤᠷᠭ᠎ᠠ ᠠᠴᠠ ᠬᠤᠯᠪᠤᠵᠤ᠂ ᠮᠤᠷᠢᠨ ᠤ ᠤᠮᠤᠷᠤᠤ ᠳᠤᠤᠭᠤᠷ ᠳᠠᠳᠠᠭᠰᠠᠨ ᠤᠭᠤᠰᠤᠷ ᠢ ᠬᠦᠮᠦᠯᠳᠦᠷᠬᠡ ᠬᠡᠨ᠎ᠠ᠃ ᠬᠦᠮᠦᠯᠳᠦᠷᠬᠡ ᠶᠢ ᠵᠦᠬᠡᠯᠡᠨ ᠰᠤᠷ ᠪᠤᠶᠤ ᠳᠡᠮᠡᠭᠡᠨ ᠤᠡᠭᠭᠠᠰᠤ ᠪᠠᠷ ᠬᠢᠳᠡᠭ᠃ ᠰᠤᠷ ᠢᠶᠠᠷ ᠬᠢᠪᠡᠯ ᠲᠦᠷᠪᠡᠨ ᠬᠤᠷᠤᠭᠤ ᠵᠦᠬᠡᠯᠡᠨ ᠰᠤᠷ ᠢ ᠨᠤᠭᠤᠯᠵᠤ᠂ ᠬᠠᠪᠰᠤᠷᠤᠭᠰᠠᠨ ᠬᠤᠶᠠᠷ ᠵᠠᠳᠠᠭᠠᠢ ᠳᠠᠯ᠎ᠠ ᠪᠤᠶᠤ ᠪᠢᠳᠡᠬᠦᠦ ᠳᠠᠯ᠎ᠠ ᠶᠢ ᠬᠢᠯᠭᠠᠰᠤᠨ ᠤᠳᠠᠰᠤ ᠪᠤᠶᠤ ᠰᠢᠷᠢ ᠪᠠᠷ ᠱᠠᠭᠯᠠᠵᠤ ᠤᠶᠤᠨ᠎ᠠ᠃ ᠬᠠᠪᠳᠠᠭᠠᠢ ᠰᠤᠷ ᠤᠭᠤᠰᠤᠷ ᠤᠨ ᠢᠶᠠᠨ ᠭᠤᠤᠯ ᠢᠶᠠᠷ ᠨᠢᠬᠡ ᠢᠮᠠᠬᠤ ᠠᠯᠤᠰᠯᠠᠬᠤ ᠪᠦᠷᠢ ᠳᠤ ᠨᠢᠬᠡ ᠴᠤᠭᠤᠯᠵᠤ᠂ ᠰᠤᠷ ᠢᠶᠠᠷ ᠰᠢᠷᠭᠤᠭᠤᠯᠤᠨ ᠰᠦᠯᠵᠢᠬᠡᠳ ᠦᠯᠵᠠᠢ ᠵᠠᠩᠭᠢᠶ᠎ᠠ᠂ ᠵᠢᠵᠢᠭ ᠬᠤᠨᠭ᠍ᠬᠤ᠂ ᠤᠯᠠᠭᠠᠨ ᠦᠡᠭᠭᠡ ᠶᠢᠨ ᠮᠤᠯᠴᠤᠭ ᠴᠠᠴᠤᠭ ᠢ ᠠᠯᠠᠭᠯᠠᠨ ᠵᠡᠬᠦᠵᠦ ᠬᠠᠳᠠᠳᠠᠭ᠃ ᠡᠬᠦᠨ ᠢ ᠴᠢᠮᠡᠭ ᠬᠦᠮᠦᠯᠳᠦᠷᠬᠡ ᠬᠡᠳᠡᠭ᠃    ᠳᠡᠮᠡᠭᠡᠨ ᠤᠡᠭᠭᠠᠰᠤᠨ ᠤᠳᠠᠰᠤ ᠪᠠᠷ 16᠂ 24᠂ 32 ᠰᠢᠷᠭᠡᠭ ᠢᠶᠠᠷ ᠰᠡᠭᠡᠭᠡ ᠭᠠᠷᠭᠠᠵᠤ ᠬᠠᠪᠳᠠᠭᠠᠶᠢᠯᠠᠨ ᠬᠦᠷᠦᠵᠦ ᠬᠢᠨ᠎ᠠ᠃ ᠵᠠᠰᠠᠯ ᠵᠡᠮᠰᠡᠭ ᠢ ᠳᠡᠭᠡᠷᠡᠬᠢ ᠲᠠᠢ ᠠᠳᠠᠯᠢ ᠪᠠᠷ ᠵᠡᠬᠦᠯᠭᠡᠳᠡᠭ᠃    ᠬᠦᠮᠦᠯᠳᠦᠷᠬᠡ ᠶᠢᠨ ᠤᠷᠳᠤ ᠨᠢ ᠪᠠᠷᠤᠭ ᠲᠦᠷᠪᠡᠨ ᠳᠤᠬᠤᠢ᠂ ᠤᠷᠢᠳᠤ ᠤᠯᠤᠩ ᠤᠨ ᠤᠷᠳᠤ ᠲᠠᠢ ᠠᠳᠠᠯᠢ᠃ ᠮᠤᠷᠢ ᠪᠠᠷ ᠭᠤᠤᠯ ᠮᠦᠷᠡᠨ ᠢ ᠳᠤᠭᠤᠯᠵᠤ ᠭᠠᠷᠬᠤ ᠳᠤ ᠳᠤᠰᠬᠠᠢ ᠬᠦᠮᠦᠯᠳᠦᠷᠬᠡ ᠦᠭᠡᠢ ᠪᠤᠯ ᠡᠮᠤᠨ᠎ᠠ ᠤᠯᠤᠩ ᠢᠶᠠᠷ  ᠢᠶᠠᠨ ᠬᠦᠮᠦᠯᠳᠦᠷᠬᠡ ᠬᠢᠳᠡᠭ᠃ ᠡᠰᠡ ᠳᠡᠶᠢᠮᠤ ᠪᠤᠯ ᠡᠮᠡᠬᠡᠯ ᠠᠷᠤᠨᠰᠢ ᠭᠤᠯᠭᠤᠷᠢᠵᠦ ᠮᠤᠷᠢᠨ ᠨᠢᠷᠤᠭᠤᠨ ᠳᠤ ᠳᠤᠭᠳᠠᠬᠤ ᠦᠭᠡᠢ ᠪᠠᠶᠢᠳᠠᠭ᠃    ᠳᠡᠶᠢᠮᠤ ᠠᠴᠠ ᠬᠦᠮᠦᠰ᠂ ᠠᠶᠠᠨ ᠳᠠᠶᠢᠨ᠂ ᠠᠪᠠ ᠠᠡᠭ᠂ ᠨᠡᠬᠦᠳᠡᠯ ᠤᠳᠤᠷᠯᠠᠯ᠂ ᠨᠠᠭᠤᠷ ᠭᠤᠤᠯ ᠢ ᠭᠡᠳᠦᠯᠬᠦ  ᠳᠤ ᠮᠤᠷᠢ ᠤᠨᠤᠭ᠎ᠠ ᠪᠠᠨ ᠶᠡᠷᠤ ᠠᠴᠠ ᠬᠦᠮᠦᠯᠳᠦᠷᠬᠡᠯᠡᠳᠡᠭ᠃    ᠬᠦᠮᠦᠯᠳᠦᠷᠬᠡ ᠨᠢ ᠪᠠᠰᠠ ᠬᠦᠯᠦᠭ ᠮᠤᠷᠢᠨ ᠤ ᠬᠡᠢ ᠮᠤᠷᠢ ᠶᠢ ᠮᠠᠨᠳᠤᠭᠤᠯᠬᠤ ᠵᠡᠰᠡᠯ ᠵᠡᠮᠰᠡᠭ ᠮᠦᠷᠳᠡᠭᠡᠨ ᠬᠦᠯᠦᠭ  ᠤᠨ ᠡᠵᠡᠨ ᠤ ᠴᠤᠭ ᠵᠢᠪᠬᠤᠭ᠎ᠠ᠂ ᠰᠦᠷ ᠬᠡᠷᠡᠯ ᠤᠨ ᠨᠡᠮᠡᠷᠢ ᠪᠤᠯᠳᠠᠭ᠃    ᠬᠤᠳᠠᠷᠭ᠎ᠠ —— ᠡᠮᠡᠬᠡᠯ ᠤᠨ ᠬᠤᠶᠢᠳᠤ ᠬᠤᠶᠠᠷ ᠤᠭᠰᠤᠷᠭ᠎ᠠ ᠠᠴᠠ ᠬᠤᠯᠪᠤᠵᠤ᠂ ᠮᠤᠷᠢᠨ ᠤ ᠰᠡᠬᠦᠯ  ᠠᠴᠠ ᠲᠦᠬᠡ ᠳᠤᠤᠭᠤᠷ ᠳᠠᠳᠠᠭᠰᠠᠨ ᠤᠭᠤᠰᠤᠷ ᠢ ᠬᠤᠳᠠᠷᠭ᠎ᠠ ᠬᠡᠨ᠎ᠠ᠃    ᠬᠤᠳᠠᠷᠭ᠎ᠠ ᠶᠢ ᠬᠦᠮᠦᠯᠳᠦᠷᠬᠡ ᠲᠠᠢ ᠨᠢᠬᠡ ᠯᠠ ᠠᠳᠠᠯᠢ ᠴᠢᠮᠡᠵᠦ ᠬᠢᠳᠡᠭ ᠪᠤᠯᠪᠠᠴᠤ ᠦᠷᠬᠡᠨ ᠢ ᠨᠢ ᠳᠠᠬᠢᠨ ᠢᠶᠠᠷ ᠬᠢᠳᠡᠭ᠃ ᠬᠤᠳᠠᠷᠭ᠎ᠠ ᠶᠢᠨ ᠤᠷᠳᠤ ᠨᠢ ᠪᠠᠷᠤᠭ ᠵᠢᠷᠭᠤᠭᠠᠨ ᠳᠤᠬᠤᠢ᠃    ᠬᠤᠳᠠᠷᠭ᠎ᠠ ᠪᠠᠨ ᠭᠤᠷᠪᠠᠨ ᠡᠯᠬᠦᠬᠦᠷ ᠢᠶᠠᠷ ᠡᠯᠬᠦᠳᠡᠭ᠃ ᠵᠦᠬᠡᠯᠡᠨ ᠰᠤᠷ ᠪᠤᠶᠤ ᠤᠡᠭᠭᠠᠰᠤᠨ ᠤᠳᠠᠰᠤ ᠪᠠᠷ ᠠᠳᠠᠯᠢ ᠬᠠᠵᠠᠭᠤᠳᠤ ᠭᠤᠷᠪᠠᠯᠵᠢᠨ ᠪᠤᠶᠤ ᠳᠤᠭᠤᠷᠢᠭ ᠭᠠᠷᠬ᠎ᠠ ᠠᠴᠠ ᠭᠤᠷᠪᠠᠨ ᠳᠡᠰᠢ ᠬᠠᠨᠳᠤᠭᠰᠠᠨ ᠤᠭᠤᠰᠤᠷ ᠤᠨᠵᠢᠭᠤᠯᠵᠤ᠂ ᠬᠤᠶᠠᠷ ᠤᠭᠤᠰᠤᠷ ᠢ ᠮᠤᠷᠢᠨ ᠤ ᠵᠦᠪ ᠪᠤᠷᠤᠭᠤ ᠬᠤᠨᠳᠤᠯᠠᠢ ᠳᠡᠭᠡᠬᠦᠷ ᠳᠤᠷᠤᠭᠰᠢ ᠪᠠᠭᠤᠯᠭᠠᠨ ᠬᠤᠳᠠᠷᠭ᠎ᠠ ᠶᠢ ᠳᠤᠰ ᠳᠤᠰ ᠡᠯᠬᠦᠨ᠎ᠠ᠃ ᠨᠦᠬᠦᠬᠡ ᠳᠤᠳᠤᠭᠰᠢ ᠬᠠᠨᠳᠤᠭᠰᠠᠨ ᠤᠭᠤᠰᠤᠷ ᠢ ᠡᠮᠡᠭᠡᠯ ᠤᠨ ᠠᠷᠤ ᠬᠦᠬᠦᠷᠬᠡ ᠶᠢᠨ ᠳᠤᠤᠷ᠎ᠠ ᠬᠠᠪᠢ ᠠᠴᠠ ᠬᠤᠯᠪᠤᠨ᠎ᠠ᠃ ᠡᠬᠦᠨ ᠢ ᠡᠮᠡᠬᠡᠯ ᠤᠨ ᠪᠤᠶᠤ ᠬᠤᠳᠠᠷᠭ᠎ᠠ ᠶᠢᠨ ᠭᠤᠷᠪᠠᠯᠵᠢᠨ ᠡᠯᠬᠦᠬᠦᠷ ᠭᠡᠳᠡᠭ᠃ ᠭᠤᠷᠪᠠᠯᠵᠢᠨ ᠡᠯᠬᠦᠬᠦᠷ ᠳᠡᠬᠡᠷ᠎ᠠ ᠮᠥᠨ ᠶᠠᠩᠵᠤ ᠪᠦᠷᠢ ᠶᠢᠨ ᠵᠠᠰᠠᠯ ᠴᠢᠮᠡᠭ ᠵᠡᠬᠦᠯᠬᠡᠨ ᠬᠠᠳᠠᠳᠠᠭ᠃    ᠭᠤᠷᠪᠠᠯᠵᠢᠨ ᠡᠯᠬᠦᠬᠦᠷ ᠳᠠᠭᠠᠷᠠᠭᠤᠯᠬᠤ ᠨᠢ ᠳᠠᠷᠤᠢ ᠬᠤᠳᠠᠷᠭ᠎ᠠ ᠶᠢᠨ ᠳᠤᠷᠤᠭᠰᠢ ᠤᠨᠵᠢᠵᠦ᠂ ᠮᠤᠷᠢᠨ ᠤ ᠬᠦᠯ ᠢ ᠳᠤᠷᠭᠤᠬᠤ ᠪᠤᠶᠤ ᠱᠦᠷᠬᠦᠬᠡᠵᠦ ᠬᠤᠯᠭᠤᠬᠤ ᠠᠴᠠ ᠰᠡᠷᠭᠡᠶᠢᠯᠡᠵᠦ ᠪᠠᠶᠢᠭ᠎ᠠ ᠶᠠᠪᠤᠳᠠᠯ ᠪᠤᠯᠬᠤ ᠶᠤᠮ᠃    ᠬᠤᠳᠠᠷᠭ᠎ᠠ ᠨᠢ ᠮᠦᠨᠴᠤ ᠬᠦᠯᠦᠭ ᠤᠨᠤᠭ᠎ᠠ ᠶᠢᠨ ᠵᠠᠰᠠᠯ ᠴᠢᠮᠡᠭ ᠢ ᠠᠷᠤᠨᠰᠢ ᠪᠦᠷᠢᠨᠰᠢᠬᠦᠯᠦᠭᠰᠡᠨ ᠳᠡᠩᠴᠡᠬᠦᠷᠢ ᠵᠠᠰᠠᠯ ᠮᠦᠷᠳᠡᠭᠡᠨ ᠬᠦᠯᠦᠭᠴᠢᠨ ᠤᠨᠤᠭᠠᠴᠢᠨ ᠤ ᠰᠦᠷ ᠵᠢᠪᠬᠤᠭ᠎ᠠ ᠪᠠᠶᠢᠭ᠎ᠠ ᠶᠤᠮ᠃    ᠴᠢᠳᠤᠷ —— ᠮᠤᠷᠢᠨ ᠤ ᠬᠤᠶᠠᠷ ᠬᠠ᠂ ᠨᠢᠬᠡ ᠭᠤᠶ᠎ᠠ ᠶᠢ ᠳᠤᠷᠭᠤᠳᠠᠭ ᠳᠤᠰᠬᠠᠢ ᠵᠤᠬᠢᠶᠠᠭᠰᠠᠨ ᠬᠡᠯᠬᠢᠶᠡᠰᠤ ᠳᠡᠭᠡᠰᠤ ᠶᠢ ᠴᠢᠳᠤᠷ ᠬᠡᠨ᠎ᠠ᠃ ᠴᠢᠳᠤᠷ ᠢ ᠰᠤᠷ᠂ ᠬᠢᠯᠭᠠᠰᠤ᠂ ᠳᠡᠮᠤᠷ ᠭᠠᠷᠬ᠎ᠠ ᠪᠠᠷ ᠬᠢᠳᠡᠭ᠃ ᠶᠠᠪᠤᠭᠤᠷᠢ ᠴᠢᠳᠤᠷ ᠢ ᠳᠡᠬᠡᠰᠤ ᠪᠠᠷ ᠬᠢᠨ᠎ᠠ᠃    ᠴᠢᠳᠤᠷ ᠨᠢ ᠠᠯᠠᠭ᠎ᠠ᠂ ᠬᠦᠬᠦ᠂ ᠰᠤᠮᠤ ᠭᠤᠷᠪᠠ ᠪᠠᠷ ᠪᠦᠳᠦᠳᠡᠭ᠃ ᠮᠤᠷᠢᠨ ᠤ ᠬᠦᠯ ᠢ ᠤᠷᠢᠶᠠᠭᠰᠠᠨ ᠴᠢᠬᠳᠠ  ᠲᠠᠢ ᠬᠠᠪᠳᠠᠭᠠᠢ ᠰᠤᠷ ᠢ ᠠᠯᠠᠭ᠎ᠠ ᠭᠡᠵᠤ᠂ ᠠᠯᠠᠭ᠎ᠠ ᠶᠢᠨ ᠴᠢᠬᠳᠠ ᠶᠢ ᠤᠷᠬᠠᠯᠠᠵᠤ ᠳᠡᠪᠡᠬᠡᠯᠡᠬᠦ ᠭᠤᠭᠴᠤᠭ᠎ᠠ ᠰᠤᠷ ᠢ ᠬᠦᠬᠦ ᠬᠡᠨ᠎ᠠ᠃ ᠬᠤᠶᠠᠷ ᠠᠯᠠᠭ᠎ᠠ ᠠᠴᠠ ᠪᠠᠨ ᠰᠤᠮᠤᠨ ᠤ ᠳᠤᠯᠤᠭᠠᠢ ᠬᠦᠷᠬᠦ ᠵᠠᠢ ᠶᠢᠨ ᠭᠡᠯᠬᠢᠶᠡᠰᠤ ᠶᠢ ᠴᠢᠳᠤᠷ ᠤᠨ ᠬᠠ ᠭᠡᠵᠤ᠂ ᠬᠤᠶᠠᠷ ᠬᠠ ᠶᠢ ᠨᠡᠶᠢᠯᠡᠬᠦᠯᠦᠭᠰᠡᠨ ᠵᠠᠩᠬᠢᠶᠠᠰᠤ ᠶᠢ ᠴᠢᠳᠤᠷ ᠤᠨ ᠳᠤᠯᠤᠭᠠᠢ ᠬᠡᠨ᠎ᠠ᠃ ᠴᠢᠳᠤᠷ ᠤᠨ ᠳᠤᠯᠤᠭᠠᠢ ᠠᠴᠠ ᠭᠤᠶ᠎ᠠ ᠶᠢᠨ ᠠᠯᠠᠭ᠎ᠠ ᠬᠦᠷᠬᠦ ᠬᠤᠶᠠᠷ ᠲᠦᠬᠡ ᠢᠯᠡᠬᠦᠦ ᠶᠢᠨ ᠮᠤᠰᠬᠢᠮᠠᠯ ᠰᠤᠷ ᠢ ᠴᠢᠳᠤᠷ ᠤᠨ ᠰᠤᠮᠤ ᠭᠡᠳᠡᠭ᠃ ᠭᠤᠶ᠎ᠠ ᠶᠢᠨ ᠠᠯᠠᠭ᠎ᠠ ᠶᠢ ᠬᠠ ᠶᠢᠨ ᠠᠯᠠᠭ᠎ᠠ ᠲᠠᠢ ᠠᠳᠠᠯᠢ ᠵᠤᠬᠢᠶᠠᠳᠠᠭ᠃ ᠴᠢᠳᠤᠷ ᠤᠨ ᠭᠤᠷᠪᠠᠨ ᠠᠯᠠᠭ᠎ᠠ ᠶᠢ ᠴᠦᠮ ᠵᠦᠪᠳᠠᠢ ᠳᠠᠯ᠎ᠠ ᠠᠴᠠ ᠳᠡᠪᠡᠬᠡᠯᠡᠬᠦ ᠪᠠᠷ ᠬᠦᠬᠦ ᠶᠢ ᠨᠢ ᠨᠠᠭᠠᠨ᠎ᠠ ᠳᠠᠯ᠎ᠠ ᠳᠤ ᠨᠢ ᠭᠠᠷᠭᠠᠳᠠᠭ᠃ ᠤᠴᠢᠷ ᠨᠢ ᠠᠭᠠᠰᠢ ᠠᠪᠵᠢᠭ ᠲᠠᠢ ᠮᠤᠷᠢᠨ ᠤ ᠪᠤᠷᠤᠭᠤᠳᠠᠢ ᠳᠠᠯ᠎ᠠ ᠳᠤ ᠭᠠᠷᠴᠤ ᠴᠢᠳᠦᠷᠯᠡᠵᠦ ᠳᠡᠶᠢᠯᠬᠦ ᠦᠭᠡᠢ ᠪᠠᠶᠢᠳᠠᠭ᠃    ᠴᠢᠳᠤᠷ ᠤᠨ ᠬᠢᠴᠡ ᠪᠦᠳᠦᠴᠡ᠂ ᠭᠡᠯᠪᠡᠷᠢ ᠲᠦᠷᠰᠦ ᠪᠠᠷ ᠨᠢ ᠰᠤᠷ ᠴᠢᠳᠤᠷ᠂ ᠬᠢᠯᠭᠠᠰᠤᠨ ᠴᠢᠳᠤᠷ᠂ ᠳᠡᠮᠤᠷ ᠴᠢᠳᠤᠷ᠂ ᠭᠤᠷᠮᠤᠰᠤᠨ ᠰᠤᠮᠤᠨ ᠴᠢᠳᠤᠷ᠂ ᠰᠦᠯᠵᠢᠮᠡᠯ ᠰᠤᠮᠤᠨ ᠴᠢᠳᠤᠷ᠂ ᠬᠠᠪᠳᠠᠭᠠᠢ ᠰᠤᠮᠤᠨ ᠴᠢᠳᠤᠷ᠂ ᠤᠶᠤᠮᠠᠯ ᠰᠤᠮᠤᠨ ᠴᠢᠳᠤᠷ᠂ ᠳᠠᠪᠬᠤᠷ ᠰᠤᠮᠤᠨ ᠴᠢᠳᠤᠷ ᠁ ᠭᠡᠬᠦ ᠮᠡᠳᠤ ᠪᠠᠷ ᠨᠡᠷᠡᠯᠡᠨ ᠬᠡᠯᠡᠳᠡᠭ ᠪᠦᠬᠡᠳ ᠬᠢᠵᠦ ᠦᠢᠯᠡᠳᠦᠳᠡᠭ᠃    ᠤᠤᠯ ᠳᠤ ᠪᠠᠨ ᠰᠤᠷ ᠴᠢᠳᠤᠷ ᠢ ᠭᠤᠷᠪᠠᠨ ᠭᠡᠰᠡᠭ ᠰᠤᠷ ᠢᠶᠠᠷ ᠮᠤᠰᠬᠢᠨ ᠵᠠᠩᠭᠢᠳᠴᠤ ᠭᠠᠷᠭᠠᠵᠤ ᠪᠠᠶᠢᠪᠠ᠂ 25 ᠲᠦᠬᠡ ᠤᠷᠳᠤ ᠰᠤᠷ ᠬᠡᠷᠡᠭᠯᠡᠳᠡᠭ ᠭᠡᠳᠡᠭ᠃ ᠰᠡᠬᠦᠯᠳᠡᠵᠦ ᠢᠷᠡᠭᠡᠳ ᠰᠤᠮᠤᠨ ᠤ ᠳᠤᠯᠤᠭᠠᠢ ᠳᠤ ᠪᠠᠨ ᠪᠢᠳᠡᠬᠦᠦ ᠳᠤᠮᠤ ᠭᠠᠷᠬ᠎ᠠ ᠭᠢᠵᠦ᠂ ᠳᠤᠰ ᠭᠠᠷᠬ᠎ᠠ ᠠᠴᠠ ᠪᠠᠨ ᠬᠤᠶᠠᠷ ᠪᠢᠳᠡᠬᠦᠦ ᠭᠠᠷᠬ᠎ᠠ ᠵᠠᠯᠭᠠᠵᠤ᠂ ᠬᠤᠶᠠᠷ ᠬᠠ ᠶᠢᠨ ᠠᠯᠠᠭ᠎ᠠ ᠶᠢ ᠳᠠᠭᠠᠷᠠᠭᠤᠯᠳᠠᠭ᠃ ᠳᠤᠮᠤ ᠭᠠᠷᠬ᠎ᠠ ᠪᠠᠨ ᠰᠤᠮᠤᠨ ᠤ ᠳᠤᠯᠤᠭᠠᠢ ᠭᠡᠵᠤ᠂ ᠰᠤᠮᠤᠨ ᠤ ᠳᠤᠯᠤᠭᠠᠢ ᠠᠴᠠ  ᠪᠠᠨ ᠭᠤᠶ᠎ᠠ ᠶᠢᠨ ᠠᠯᠠᠭ᠎ᠠ ᠶᠢᠨ ᠭᠠᠷᠬ᠎ᠠ ᠬᠦᠷᠳᠡᠯ᠎ᠠ ᠴᠦᠮ ᠳᠡᠮᠤᠷ ᠭᠠᠷᠬ᠎ᠠ ᠪᠠᠷ ᠰᠤᠮᠤ ᠬᠢᠬᠦ ᠪᠤᠯᠪᠠ᠃ ᠳᠡᠷᠡ ᠨᠢ ᠪᠤᠷᠤᠭᠠᠨ ᠴᠢᠬᠢᠭ ᠲᠤ ᠠᠮᠠᠷᠬᠠᠨ ᠦᠵᠢᠷᠡᠬᠦ ᠦᠭᠡᠢ ᠪᠤᠯᠤᠭᠰᠠᠨ ᠪᠦᠭᠡᠳ ᠬᠠᠷᠠᠩᠭᠤᠢ ᠰᠦᠨᠢ ᠪᠠᠷ ᠴᠢᠳᠤᠷ ᠲᠠᠢ ᠮᠤᠷᠢ ᠪᠠᠨ ᠴᠢᠳᠤᠷ ᠤᠨ ᠳᠠᠭᠤ ᠪᠠᠷ ᠨᠢ ᠡᠷᠢᠬᠡᠳ ᠤᠯᠴᠢᠬᠠᠳᠠᠭ ᠵᠡᠷᠭᠡ ᠰᠠᠶᠢᠨ ᠳᠠᠯ᠎ᠠ ᠲᠠᠢ ᠶᠤᠮ᠃    ᠤᠳᠤᠬᠠᠨ ᠪᠤᠯᠵᠤ ᠢᠷᠡᠭᠡᠳ ᠴᠢᠳᠤᠷ ᠢ ᠴᠦᠮ ᠰᠤᠮᠤᠨ ᠤ ᠬᠢᠨᠢ ᠪᠦᠳᠦᠴᠡ ᠪᠠᠷ ᠶᠠᠭᠤ ᠪᠠᠷ ᠬᠢᠭᠰᠡᠨ ᠪᠤᠯ ᠶᠠᠮᠠᠷ ᠴᠢᠳᠤᠷ ᠭᠡᠵᠤ ᠬᠡᠯᠡᠬᠦ ᠪᠤᠯᠵᠠᠢ᠃    ᠴᠢᠳᠤᠷ ᠢ ᠬᠢᠬᠦ ᠳᠤ ᠤᠯᠠᠮᠵᠢᠯᠠᠯᠳᠤ ᠶᠤᠰᠤ ᠵᠢᠷᠤᠮ ᠲᠠᠢ ᠳᠤᠯᠠ ᠬᠦᠮᠦᠰ ᠶᠡᠷᠤ ᠠᠴᠠ ᠬᠠᠰᠢ ᠶᠠᠰᠢ ᠪᠠᠷ ᠬᠢᠳᠡᠭ ᠦᠭᠡᠢ᠃ ᠮᠦᠨᠴᠤ ᠳᠡᠭᠡᠰᠤ ᠪᠤᠯᠭᠠᠨ ᠢᠶᠠᠷ ᠮᠤᠷᠢ ᠪᠠᠨ ᠴᠢᠳᠦᠷᠯᠡᠳᠡᠭ ᠦᠭᠡᠢ᠃ ᠮᠤᠷᠢᠨ ᠤ ᠬᠡᠢ ᠮᠤᠷᠢ ᠬᠡᠪᠳᠡᠵᠦ ᠤᠷᠤᠭᠤᠳᠠᠨ᠎ᠠ ᠭᠡᠳᠡᠭ᠃ ᠴᠢᠳᠤᠷ ᠢ ᠬᠡᠷᠡᠭᠯᠡᠬᠦ ᠦᠭᠡᠢ ᠦᠶ᠎ᠠ ᠳᠤ ᠡᠮᠡᠬᠡᠯ ᠤᠨ ᠢᠶᠠᠨ ᠵᠦᠪ ᠳᠠᠯ᠎ᠠ ᠶᠢᠨ ᠬᠤᠶᠢᠳᠤ ᠭᠠᠨᠵᠤᠭ᠎ᠠ ᠳᠡᠬᠡᠷ᠎ᠠ ᠰᠤᠮᠤᠨ ᠤ ᠬᠢᠨᠢ ᠳᠤᠯᠤᠭᠠᠢ ᠠᠴᠠ ᠤᠶᠠᠨ᠎ᠠ᠃ ᠪᠠᠶᠢᠰᠢᠩ ᠬᠡᠷ᠂ ᠢᠯᠡᠬᠦᠦ ᠬᠡᠷ ᠤᠨ ᠢᠶᠠᠨ ᠬᠠᠨ᠎ᠠ ᠶᠢᠨ ᠬᠠᠳᠠᠭᠠᠰᠤ ᠠᠴᠠ ᠡᠯᠬᠦᠵᠦ ᠬᠠᠳᠠᠭᠠᠯᠠᠨ᠎ᠠ᠃    ᠳᠤᠱᠠ —— ᠮᠤᠷᠢᠨ ᠤ ᠬᠤᠶᠠᠷ ᠬᠠ ᠶᠢ ᠬᠤᠯᠪᠤᠨ ᠤᠶᠠᠭᠰᠠᠨ ᠳᠤᠷᠭᠤᠭᠠᠯ ᠢ ᠳᠤᠱᠠ ᠬᠡᠨ᠎ᠠ᠃ ᠳᠠᠷᠤᠢ ᠴᠢᠳᠤᠷ ᠤᠨ ᠰᠤᠮᠤᠨ ᠳᠤᠯᠤᠭᠠᠢ ᠠᠴᠠ ᠡᠮᠤᠨᠡᠬᠢ ᠬᠤᠶᠠᠷ ᠠᠯᠠᠭ᠎ᠠ ᠲᠠᠢ ᠬᠡᠰᠡᠭ ᠢ ᠳᠤᠱᠠ ᠭᠡᠳᠡᠭ ᠶᠤᠮ᠃    ᠳᠤᠱᠠ ᠶᠢᠨ ᠠᠯᠠᠭ᠎ᠠ ᠶᠢ ᠮᠥᠨ ᠴᠢᠳᠤᠷ ᠤᠨ ᠠᠯᠠᠭ᠎ᠠ ᠲᠠᠢ ᠨᠢᠬᠡ ᠯᠠ ᠠᠳᠠᠯᠢ ᠳᠠᠭᠠᠷᠠᠭᠤᠯᠵᠤ᠂ ᠮᠤᠷᠢᠨ ᠤ ᠬᠦᠯ ᠢ ᠳᠤᠱᠠᠬᠤ ᠦᠶ᠎ᠠ ᠳᠤ ᠮᠥᠨ ᠵᠦᠪ ᠳᠠᠯ᠎ᠠ ᠠᠴᠠ ᠨᠢ ᠳᠤᠷᠭᠤᠬᠤ ᠶᠠᠩᠵᠤ ᠪᠠᠷ ᠬᠦᠬᠦ ᠶᠢ ᠨᠢ ᠨᠠᠭᠠᠨ᠎ᠠ ᠳᠠᠯ᠎ᠠ  ᠳᠤ ᠨᠢ ᠭᠠᠷᠭᠠᠵᠤ᠂ ᠠᠯᠠᠭ᠎ᠠ ᠶᠢ ᠤᠷᠢᠳᠠᠭᠤᠷ ᠨᠢ ᠨᠠᠭᠠᠰᠢ ᠬᠤᠮᠢᠵᠦ ᠳᠤᠱᠠᠨ᠎ᠠ᠃    ᠳᠤᠱᠠ ᠶᠢ ᠰᠤᠷ᠂ ᠬᠢᠯᠭᠠᠰᠤ᠂ ᠳᠡᠮᠤᠷ ᠢᠶᠠᠷ ᠬᠤᠯᠪᠤᠭᠠᠰᠤ ᠶᠢ ᠨᠢ ᠵᠤᠬᠢᠴᠠᠭᠤᠯᠵᠤ ᠬᠢᠳᠡᠭ᠃ ᠳᠤᠮᠳᠠ ᠬᠤᠯᠪᠤᠭᠠᠰᠤ ᠶᠢ ᠨᠢᠬᠡ ᠲᠦᠬᠡ ᠠᠴᠠ ᠤᠷᠳᠤ ᠬᠢᠳᠡᠭ ᠦᠭᠡᠢ᠂ ᠭᠡᠳᠤᠷᠬᠡᠢ ᠤᠷᠳᠤ ᠬᠢᠪᠡᠯ ᠮᠤᠷᠢᠨ ᠤ ᠬᠦᠯ ᠢ ᠱᠦᠷᠬᠦᠬᠡᠵᠦ ᠦᠰᠦ ᠨᠢ ᠵᠤᠯᠭᠠᠷᠠᠬᠤ ᠪᠦᠬᠡᠳ ᠠᠮᠠᠷᠬᠠᠨ ᠰᠢᠷᠬ᠎ᠠ ᠤᠯᠳᠠᠭ᠃    ᠦᠷᠦᠬᠡᠯ —— ᠮᠤᠷᠢᠨ ᠤ ᠳᠠᠯ᠎ᠠ ᠪᠡᠶ᠎ᠠ ᠶᠢᠨ ᠬᠠ ᠭᠤᠶ᠎ᠠ ᠶᠢ ᠬᠤᠯᠪᠤᠵᠤ ᠤᠶᠠᠬᠤ ᠳᠤᠷᠭᠤᠭᠠᠯ ᠳᠡᠬᠡᠰᠤ  ᠶᠢ ᠦᠷᠦᠬᠡᠯ ᠬᠡᠨ᠎ᠠ᠃    ᠦᠷᠦᠬᠡᠯ ᠨᠢ ᠴᠢᠳᠤᠷ ᠤᠨ ᠨᠢᠬᠡ ᠬᠠ ᠶᠢᠨ ᠠᠯᠠᠭ᠎ᠠ ᠶᠢ ᠠᠪᠴᠤ ᠬᠠᠶᠠᠭᠰᠠᠨ ᠲᠠᠢ ᠨᠢᠬᠡ ᠯᠠ ᠠᠳᠠᠯᠢ ᠪᠠᠶᠢᠳᠠᠭ ᠃ ᠦᠷᠦᠭᠡᠯ ᠢ ᠮᠥᠨ ᠴᠢᠳᠤᠷ ᠬᠢᠬᠦ ᠲᠠᠢ ᠨᠢᠬᠡ ᠯᠠ ᠠᠳᠠᠯᠢ ᠭᠢᠳᠡᠭ᠃ ᠠᠯᠠᠭ᠎ᠠ ᠶᠢ ᠨᠢ ᠳᠡᠪᠡᠭᠡᠯᠡᠬᠦ ᠨᠢ ᠴᠦ ᠨᠢᠬᠡ ᠯᠠ ᠠᠳᠠᠯᠢ᠃    ᠬᠦᠮᠦᠰ ᠶᠡᠷᠤ ᠠᠴᠠ ᠠᠭᠠᠰᠢ ᠲᠠᠢ ᠮᠤᠷᠢ ᠶᠢ ᠴᠢᠳᠤᠷᠯᠠᠵᠤ᠂ ᠨᠤᠮᠤᠬᠠᠨ ᠮᠤᠷᠢ ᠶᠢ ᠦᠷᠦᠬᠡᠯᠡᠳᠡᠭ᠃ ᠳᠡᠶᠢᠮᠤ  ᠠᠴᠠ ᠵᠦᠪᠳᠠᠢ ᠳᠠᠯ᠎ᠠ ᠶᠢ ᠨᠢ ᠦᠷᠦᠬᠡᠯᠳᠤᠪᠠᠯ ᠦᠷᠦᠬᠡᠯ ᠤᠨ ᠢᠶᠠᠨ ᠠᠯᠠᠭ᠎ᠠ ᠶᠢ ᠬᠠ ᠭᠤᠶ᠎ᠠ ᠶᠢᠨ ᠢᠶᠠᠨ ᠴᠠᠭᠠᠨ᠎ᠠ ᠳᠠᠯ᠎ᠠ ᠠᠴᠠ ᠨᠢ ᠨᠠᠰᠢ ᠤᠷᠢᠶᠠᠨ ᠠᠪᠴᠢᠷᠠᠵᠤ᠂ ᠨᠠᠭᠠᠨᠠᠬᠢ ᠬᠦᠬᠦ ᠳᠤ ᠪᠠᠨ ᠳᠤᠪᠴᠢᠯᠠᠨ᠎ᠠ᠃ ᠪᠤᠷᠤᠭᠤᠳᠠᠢ ᠳᠠᠯ᠎ᠠ  ᠠᠴᠠ ᠨᠢ ᠦᠷᠦᠬᠡᠯᠳᠦᠪᠡᠯ ᠦᠷᠦᠬᠡᠯ ᠢᠶᠠᠨ ᠪᠤᠷᠤᠭᠤᠰᠢ ᠪᠠᠨ ᠬᠠᠨᠳᠤᠭᠤᠯᠵᠤ ᠳᠡᠪᠡᠬᠡᠯᠡᠨ᠎ᠠ᠃    ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠮᠤᠷᠢᠨ ᠤ ᠪᠠᠨ ᠵᠦᠪ ᠪᠤᠷᠤᠭᠤ ᠳᠠᠯ᠎ᠠ ᠶᠢᠨ ᠬᠠ ᠭᠤᠶ᠎ᠠ ᠶᠢ ᠶᠡᠷᠤ ᠠᠴᠠ ᠰᠤᠯᠢᠪᠴᠢᠭᠤᠯᠵᠤ ᠦᠷᠦᠬᠡᠯᠳᠦᠬᠦ ᠶᠢ ᠴᠡᠬᠡᠷᠯᠡᠳᠡᠭ᠃ ᠮᠤᠷᠢᠨ ᠤ ᠨᠦᠬᠦᠬᠡ ᠬᠦᠯ ᠭᠤᠬᠠᠳᠠᠭᠳᠠᠵᠤ ᠠᠳᠡᠬᠦ ᠳᠠᠩᠭᠠᠷᠢᠭ  ᠲᠠᠢ ᠬᠡᠳᠡᠭ᠃    ᠦᠷᠦᠬᠡᠯ ᠢ ᠬᠡᠷᠡᠭᠯᠡᠬᠦ ᠦᠭᠡᠢ ᠦᠶ᠎ᠠ ᠬᠠᠮᠢᠶ᠎ᠠ ᠨᠠᠮᠢᠶ᠎ᠠ ᠦᠭᠡᠢ ᠭᠠᠵᠠᠷ ᠳᠤᠷ᠎ᠠ ᠪᠠᠷ ᠬᠠᠶᠠᠳᠠᠭ ᠦᠭᠡᠢ᠃ ᠮᠥᠨ ᠴᠢᠳᠤᠷ ᠲᠠᠢ ᠠᠳᠠᠯᠢ ᠬᠤᠷᠢᠶᠠᠳᠠᠭ᠃ᠮᠢᠯᠠᠭ᠎ᠠ —— ᠮᠤᠷᠢᠴᠢᠨ ᠤᠨᠤᠭᠠᠴᠢᠨ ᠬᠦᠮᠦᠨ ᠤ ᠬᠡᠷᠡᠭᠯᠡᠳᠡᠭ ᠤᠬᠤᠷ ᠪᠠᠷᠢᠶ᠎ᠠ ᠲᠠᠢ ᠰᠤᠷ ᠳᠠᠰᠢᠭᠤᠷ ᠢ ᠮᠢᠯᠠᠭ᠎ᠠ ᠭᠡᠳᠡᠭ᠃    ᠬᠤᠷᠴᠢᠨ ᠤ ᠬᠦᠮᠦᠰ ᠶᠡᠷᠤ ᠳᠤ ᠪᠠᠨ ᠮᠤᠷᠢᠨ ᠳᠠᠰᠢᠭᠤᠷ ᠭᠡᠳᠡᠭ ᠦᠭᠡᠢ᠂ ᠴᠦᠮ ᠮᠢᠯᠠᠭ᠎ᠠ ᠭᠡᠳᠡᠭ᠃ ᠬᠦᠯᠦᠭ ᠤᠨᠤᠭ᠎ᠠ ᠳᠤ ᠮᠤᠷᠳᠠᠬᠤ ᠦᠶ᠎ᠠ ᠳᠤ ᠶᠡᠷᠤ ᠨᠢ ᠪᠠᠷᠢᠶ᠎ᠠ ᠶᠢᠨ ᠳᠡᠬᠡᠷ᠎ᠠ ᠭᠡᠰᠡᠭ ᠲᠤ ᠨᠦᠬᠡᠯᠡᠨ ᠰᠢᠷᠭᠤᠭᠤᠯᠵᠤ ᠤᠶᠠᠭᠰᠠᠨ ᠪᠢᠳᠡᠬᠦᠦ ᠭᠤᠭᠴᠤᠭ᠎ᠠ ᠳᠤ ᠪᠠᠷᠠᠭᠤᠨ ᠭᠠᠷ ᠢᠶᠠᠨ ᠬᠢᠵᠦ ᠪᠠᠭᠤᠪᠴᠢᠯᠠᠭᠠᠳ ᠮᠢᠯᠠᠭ᠎ᠠ ᠪᠠᠨ ᠳᠡᠬᠦᠵᠢᠯᠡᠳᠡᠭ᠃ ᠳᠡᠷᠡᠬᠦ ᠪᠠᠷᠢᠶ᠎ᠠ ᠶᠢᠨ ᠪᠢᠳᠡᠬᠦᠦ ᠭᠤᠭᠴᠤᠭ᠎ᠠ ᠶᠢ ᠮᠢᠯᠠᠭ᠎ᠠ ᠶᠢᠨ ᠰᠡᠭᠡᠯᠳᠦᠷᠬᠡ ᠭᠡᠳᠡᠭ᠃    ᠮᠢᠯᠠᠭ᠎ᠠ ᠶᠢᠨ ᠪᠠᠷᠢᠶ᠎ᠠ ᠶᠢᠨ ᠳᠡᠩᠰᠡ ᠮᠤᠳᠤ ᠶᠢ ᠮᠢᠯᠠᠭ᠎ᠠ ᠶᠢᠨ ᠡᠰᠢ ᠭᠡᠳᠡᠭ᠃ ᠮᠢᠯᠠᠭ᠎ᠠ ᠶᠢᠨ ᠰᠡᠬᠡᠯᠳᠦᠷᠬᠡ ᠶᠢᠨ ᠨᠦᠬᠡ ᠠᠴᠠ ᠳᠤᠷᠤᠭᠰᠢ ᠨᠢᠬᠡ ᠠᠳᠬᠤᠭᠤᠷ ᠤᠨ ᠵᠠᠢ ᠦᠯᠡᠳᠡᠭᠡᠭᠡᠳ ᠰᠢᠷᠢ ᠪᠤᠶᠤ ᠰᠤᠷ ᠢᠶᠠᠷ ᠬᠤᠶᠠᠷ ᠵᠡᠷᠭᠡᠴᠡᠭᠡ ᠤᠷᠢᠶᠠᠮᠠᠭ ᠬᠦᠷᠦᠨ᠎ᠠ᠃ ᠳᠡᠬᠦᠨ ᠢ ᠮᠢᠯᠠᠭ᠎ᠠ ᠶᠢᠨ ᠳᠠᠪᠬᠤᠷ ᠪᠦᠬᠡᠵᠢ ᠭᠡᠳᠡᠭ᠃ ᠳᠠᠪᠬᠤᠷ ᠪᠦᠬᠡᠵᠢ ᠠᠴᠠ ᠪᠠᠨ ᠳᠤᠤᠷ᠎ᠠ ᠮᠢᠯᠠᠭ᠎ᠠ ᠶᠢᠨ ᠡᠰᠢ ᠶᠢ ᠬᠦᠨᠳᠡᠯᠡᠨ ᠬᠡᠳᠤ ᠴᠤᠭᠤᠯᠵᠤ᠂ ᠨᠠᠷᠢᠨ ᠵᠦᠰᠦᠭᠰᠡᠨ ᠰᠤᠷ ᠢ ᠰᠢᠷᠭᠤᠭᠤᠯᠤᠨ ᠭᠠᠷᠭᠠᠵᠤ᠂ ᠳᠤᠷᠤᠭᠰᠢ ᠤᠷᠢᠶᠠᠵᠤ ᠨᠢᠬᠡ ᠳᠠᠯ᠎ᠠ ᠳᠤ ᠨᠢ ᠪᠠᠬᠢᠯᠡᠨ ᠬᠦᠷᠦᠬᠡᠳ ᠲᠦᠷᠪᠡᠨ ᠬᠤᠷᠤᠭᠤ ᠶᠠᠪᠤᠭᠰᠠᠨ ᠤ ᠳᠠᠷᠠᠭ᠎ᠠ ᠪᠠᠬᠢᠯᠡᠨ ᠬᠦᠷᠦᠭᠰᠡᠨ ᠳᠠᠯ᠎ᠠ ᠳᠤ ᠰᠠᠴᠢᠭ ᠦᠯᠡᠳᠡᠭᠡᠨ ᠪᠠᠰᠠ ᠬᠤᠶᠠᠷ ᠪᠦᠬᠡᠵᠢ ᠤᠷᠢᠶᠠᠨ ᠪᠠᠬᠢᠯᠡᠨ᠎ᠠ᠃ ᠳᠡᠬᠦᠨ ᠠᠴᠠ ᠪᠠᠨ ᠳᠤᠷᠤᠭᠰᠢ ᠰᠤᠷ ᠭᠤᠤᠯ ᠢ ᠨᠢᠬᠡ ᠬᠤᠷᠤᠭᠤ ᠪᠠᠷ ᠬᠢᠵᠦ᠂ ᠭᠠᠳᠠᠭᠤᠷ ᠨᠢ ᠨᠠᠷᠢᠨ ᠵᠦᠰᠦᠮᠡᠯ ᠰᠤᠷ ᠢᠶᠠᠷ ᠢᠶᠠᠨ ᠲᠦᠷᠪᠡᠨ ᠳᠠᠯ᠎ᠠ ᠲᠠᠢ ᠪᠤᠶᠤ ᠮᠤᠭᠠᠢ ᠶᠢᠨ ᠡᠯᠢᠬᠡ ᠲᠠᠢ ᠳᠠᠰᠢᠭᠤᠷ ᠢ ᠰᠦᠯᠵᠢᠨ ᠬᠦᠷᠦᠨ᠎ᠠ᠃ ᠨᠢᠬᠡ ᠳᠤᠬᠤᠢ ᠤᠷᠳᠤ ᠦᠵᠦᠬᠦᠷ ᠵᠦᠭ ᠢᠶᠠᠨ ᠨᠠᠷᠢᠰᠬᠠᠨ ᠬᠦᠷᠦᠬᠡᠳ᠂ ᠦᠵᠦᠬᠦᠷ ᠳᠡᠬᠡᠷ᠎ᠠ ᠨᠢ ᠪᠦᠬᠡᠵᠢ ᠤᠷᠢᠶᠠᠨ ᠵᠠᠩᠭᠢᠳᠤᠭᠠᠳ ᠭᠤᠷᠪᠠᠨ ᠬᠤᠷᠤᠭᠤ ᠶᠢᠨ ᠰᠠᠴᠢᠭ ᠦᠯᠡᠳᠡᠭᠡᠵᠦ ᠳᠠᠭᠤᠰᠬᠠᠨ᠎ᠠ᠃    ᠡᠶᠢᠮᠤᠷᠬᠦ ᠬᠤᠷᠴᠢᠨ ᠮᠢᠯᠠᠭ᠎ᠠ ᠨᠢ ᠰᠡᠭᠡᠯᠳᠦᠷᠬᠡ᠂ ᠰᠡᠭᠡᠯᠳᠦᠷᠭᠡ ᠶᠢᠨ ᠨᠢᠳᠤᠨ ᠨᠦᠬᠡ᠂ ᠮᠢᠯᠠᠭ᠎ᠠ ᠶᠢᠨ ᠡᠰᠢ᠂ ᠳᠠᠪᠬᠤᠷ ᠪᠦᠭᠡᠵᠢ᠂ ᠰᠦᠯᠵᠢᠶ᠎ᠠ ᠨᠢᠷᠤᠭᠤ᠂ ᠤᠷᠢᠶᠠᠯᠳᠠ ᠶᠢᠨ ᠰᠠᠴᠢᠭ᠂ ᠤᠷᠢᠶᠠᠮᠠᠭ ᠪᠦᠬᠡᠵᠢ᠂ ᠳᠠᠰᠢᠭᠤᠷ ᠪᠡᠶ᠎ᠠ᠂ ᠦᠵᠦᠬᠦᠷ ᠪᠦᠬᠡᠵᠢ᠂ ᠦᠵᠦᠬᠦᠷ ᠰᠠᠴᠢᠭ ᠵᠡᠷᠭᠡ ᠪᠠᠷ ᠪᠦᠷᠢᠯᠳᠦᠳᠡᠭ᠃    ᠮᠢᠯᠠᠭ᠎ᠠ ᠪᠤᠯ ᠬᠤᠷᠴᠢᠨ ᠤᠨᠤᠭᠠᠴᠢᠳ ᠤᠨ ᠬᠡᠢ ᠮᠤᠷᠢ ᠶᠢᠨ ᠳᠠᠯᠠᠯᠠᠭ᠎ᠠ᠂ ᠭᠡᠰᠢᠭ ᠪᠤᠶᠠᠨ ᠤ ᠬᠤᠷᠤᠢ ᠬᠡᠳᠡᠭ᠃ ᠤᠨᠤᠭᠠᠴᠢᠨ ᠬᠦᠮᠦᠨ ᠳᠤ ᠮᠢᠯᠠᠭ᠎ᠠ ᠦᠭᠡᠢ ᠪᠤᠯ ᠤᠷᠭᠤᠭ᠎ᠠ ᠮᠤᠳᠤᠨ ᠳᠤ ᠨᠠᠮᠠᠭ᠎ᠠ ᠦᠭᠡᠢ ᠰᠢᠭ ᠭᠡᠵᠤ ᠬᠦᠮᠦᠰ ᠬᠡᠯᠡᠳᠡᠭ᠃    ᠤᠷᠭ᠎ᠠ —— ᠬᠤᠷᠴᠢᠨ ᠮᠤᠩᠭᠤᠯᠴᠤᠳ ᠤᠨ ᠠᠭᠳᠠ ᠬᠦᠯᠦᠭ ᠤᠨᠤᠭᠰᠠᠨ ᠠᠳᠤᠭᠤᠴᠢᠨ ᠮᠠᠯᠴᠢᠳ ᠤᠨ ᠬᠡᠬᠡᠷ᠎ᠠ ᠠᠪᠴᠤ ᠶᠠᠪᠤᠳᠠᠭ ᠣᠷᠳᠤ ᠪᠢᠳᠡᠬᠦᠦ ᠳᠠᠰᠢᠭᠤᠷ ᠢ ᠤᠷᠭ᠎ᠠ ᠬᠡᠳᠡᠭ᠃ ᠬᠤᠶᠠᠷ ᠠᠴᠠ ᠭᠤᠷᠪᠠᠨ ᠵᠠᠯᠭᠠᠭ᠎ᠠ ᠪᠦᠬᠦᠢ ᠪᠤᠷᠭᠠᠰᠤ ᠳᠠᠯᠳᠤᠨ ᠮᠤᠳᠤᠨ ᠤ ᠦᠵᠦᠬᠦᠷ ᠲᠤ ᠬᠤᠶᠢᠪᠢ ᠤᠶᠠᠵᠤ ᠠᠳᠤᠭᠤ ᠶᠢ ᠤᠷᠭᠠᠯᠠᠬᠤ ᠪᠤᠶᠤ ᠳᠠᠭᠤᠬᠤ ᠳᠤ ᠬᠡᠷᠡᠭᠯᠡᠳᠡᠭ᠃    ᠤᠷᠭ᠎ᠠ ᠶᠢᠨ ᠡᠰᠢ ᠨᠢ 3 —7 ᠠᠯᠳᠠ ᠦᠨᠳᠦᠷ ᠪᠠᠶᠢᠳᠠᠭ᠃ ᠤᠷᠭ᠎ᠠ ᠶᠢᠨ ᠡᠰᠢᠨ ᠤ ᠦᠵᠦᠬᠦᠷ ᠲᠠᠬᠢ ᠪᠢᠳᠡᠬᠦᠦ ᠳᠠᠰᠢᠭᠤᠷ ᠢ ᠬᠤᠶᠢᠪᠢ ᠬᠡᠳᠡᠭ᠃    ᠤᠷᠭ᠎ᠠ ᠪᠤᠯ ᠪᠦᠭᠰᠡ᠂ ᠴᠡᠭᠡᠵᠢ᠂ ᠬᠤᠶᠢᠪᠢ ᠵᠡᠷᠭᠡ ᠭᠤᠷᠪᠠᠨ ᠭᠡᠰᠡᠭ ᠢᠶᠠᠷ ᠪᠦᠷᠢᠯᠳᠦᠨ᠎ᠠ᠃ ᠤᠷᠭᠠᠨ ᠪᠦᠭᠰᠡ  ᠶᠢ ᠶᠡᠷᠤ ᠨᠢ ᠢᠳᠡ ᠰᠠᠶᠢᠳᠠᠢ ᠦᠨᠳᠦᠷ ᠪᠤᠷᠭᠠᠰᠤ ᠪᠠᠷ ᠭᠢᠪᠡᠯ ᠬᠦᠡᠭᠭᠡᠨ ᠰᠠᠶᠢᠬᠠᠨ ᠪᠠᠶᠢᠳᠠᠭ᠃ ᠤᠷᠭ᠎ᠠ ᠶᠢᠨ ᠴᠡᠬᠡᠵᠢ ᠶᠢ ᠴᠠᠭᠠᠨ ᠪᠤᠷᠭᠠᠰᠤ ᠪᠠᠷ ᠬᠢᠪᠡᠯ ᠮᠥᠨ ᠨᠠᠮᠢᠯᠵᠠᠮ᠎ᠠ ᠰᠠᠶᠢᠬᠠᠨ ᠪᠠᠶᠢᠳᠠᠭ᠃    ᠠᠳᠤᠭᠤᠴᠢᠳ ᠶᠡᠷᠤ ᠠᠴᠠ ᠵᠠᠰᠠᠯ ᠪᠦᠷᠢᠳᠦᠭᠰᠡᠨ ᠬᠦᠯᠦᠭ ᠮᠤᠷᠢᠨ ᠳᠤ ᠪᠠᠨ ᠤᠷᠭ᠎ᠠ ᠶᠢᠨ ᠡᠰᠢ ᠶᠢ ᠳᠤᠯᠵᠤ ᠮᠤᠷᠳᠠᠨ᠂ ᠴᠡᠬᠡᠵᠢ ᠶᠢ ᠨᠢ ᠳᠡᠭᠡᠭᠰᠢ ᠦᠨᠳᠡᠶᠢᠯᠬᠡᠨ ᠠᠪᠴᠤ ᠶᠠᠪᠤᠳᠠᠭ᠃    ᠤᠷᠭ᠎ᠠ ᠪᠤᠯ ᠠᠳᠤᠭᠤᠴᠢᠨ ᠮᠠᠯᠴᠢᠨ᠂ ᠬᠦᠯᠦᠭ ᠤᠨᠤᠭᠠᠴᠢᠨ ᠤ ᠵᠠᠰᠠᠯ ᠵᠡᠮᠰᠡᠭ ᠰᠦᠷ ᠵᠢᠪᠬᠤᠭ᠎ᠠ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠠᠳᠠᠭᠠᠳᠠᠨ ᠠᠷᠢᠶᠠᠳᠠᠨ ᠤ ᠰᠦᠰᠦ ᠶᠢ ᠨᠢ ᠬᠡᠮᠬᠡᠯᠡᠵᠦ ᠠᠮᠢ ᠶᠢ ᠨᠢ ᠬᠤᠷᠤᠭᠠᠳᠠᠭ ᠳᠠᠷᠤᠯᠭ᠎ᠠ ᠪᠠᠶᠢᠭ᠎ᠠ ᠶᠤᠮ ᠃    ᠬᠤᠷᠴᠢᠨ ᠡᠮᠡᠬᠡᠯ ᠢ ᠱᠠᠭᠠᠬᠤ ᠳᠤ ᠳᠡᠬᠡᠷᠡᠬᠢ ᠮᠡᠳᠤ ᠳᠡᠶᠢᠮᠤᠷᠬᠦ ᠤᠯᠠᠨ ᠨᠠᠷᠢᠨ ᠶᠠᠪᠤᠴᠠ ᠶᠢ ᠦᠡᠭᠭᠡᠷᠡᠬᠡᠬᠦ ᠪᠦᠬᠡᠳ ᠡᠯ᠎ᠠ ᠬᠡᠷᠡᠭᠰᠡᠯ ᠵᠤᠶᠢᠯ ᠢ ᠪᠦᠷᠢᠨᠰᠢᠬᠦᠯᠦᠨ ᠪᠦᠷᠢᠳᠬᠡᠵᠦ᠂ ᠤᠭᠰᠠᠷᠠᠨ ᠳᠡᠪᠡᠭᠡᠯᠡᠬᠦ ᠳᠤ ᠠᠯᠢ ᠤᠯᠠᠨ ᠨᠢᠮᠪᠠᠢ ᠭᠠᠷ ᠤᠷᠠᠯᠠᠯ ᠤᠨ ᠦᠢᠯᠡ ᠤᠷᠤᠳᠠᠭ᠃ ᠢᠡᠭᠭᠢᠬᠡᠳ ᠰᠠᠶ᠋ᠢ ᠦᠪᠡᠷ ᠤᠨ ᠬᠡᠰᠡᠨ ᠤᠷᠤᠨ ᠨᠤᠳᠤᠭ ᠤᠨ ᠤᠨᠴᠠᠯᠢᠭ  ᠲᠠᠢ ᠪᠤᠯᠵᠤ᠂ ᠤᠨᠤᠭ᠎ᠠ ᠬᠦᠯᠦᠭ᠂ ᠤᠨᠤᠭᠰᠠᠨ ᠡᠵᠡᠨ ᠤ ᠦᠵᠡᠮᠤᠷᠢ ᠵᠠᠰᠠᠯ ᠪᠤᠯᠵᠤ ᠴᠢᠳᠠᠵᠠᠢ᠃ ᠭᠡᠪᠡᠴᠤ ᠭᠠᠭᠴᠠᠬᠦ ᠦᠵᠡᠮᠵᠢ ᠪᠦᠷᠢᠳᠦᠭᠰᠡᠨ ᠡᠮᠡᠬᠡᠯ ᠨᠢ ᠬᠦᠯᠦᠭ ᠤᠨᠤᠭᠠᠨ ᠳᠤ ᠴᠤᠯᠭᠤᠢ ᠵᠠᠰᠠᠯ ᠳᠡᠳᠤᠢ ᠪᠤᠯᠳᠠᠭ ᠠᠴᠠ ᠬᠦᠯᠦᠭ ᠮᠤᠷᠢᠨ ᠤ ᠳᠡᠷᠢᠬᠦᠨ ᠰᠡᠬᠦᠯ᠂ ᠬᠦᠯᠦᠭᠴᠢᠨ ᠤᠨᠤᠭᠠᠴᠢᠨ ᠤ ᠠᠳᠬᠤᠭᠤᠯ ᠪᠠᠷᠢᠳᠠᠯ ᠵᠡᠷᠭᠡ ᠶᠢ ᠴᠦ ᠤᠳᠠᠭᠠᠨ ᠵᠢᠯ  ᠢᠶᠠᠷ ᠨᠡᠮᠡᠨ ᠴᠢᠮᠡᠭᠯᠡᠭᠡᠳ ᠰᠠᠶ᠋ᠢ ᠦᠶ᠎ᠠ ᠤᠯᠠᠮᠵᠢᠯᠠᠭᠰᠠᠨ ᠬᠤᠷᠴᠢᠨ ᠡᠮᠡᠬᠡᠯ ᠤᠨ᠂ ᠬᠤᠷᠴᠢᠨ ᠤᠨᠤᠭᠠᠴᠢᠨ ᠤ ᠢᠵᠢ ᠪᠦᠷᠢᠳᠦᠭᠰᠡᠨ ᠦᠵᠡᠮᠵᠢ ᠲᠠᠢ ᠰᠠᠶᠢᠬᠠᠨ ᠵᠠᠰᠠᠯᠭ᠎ᠠ ᠪᠤᠯᠭᠠᠵᠤ ᠢᠷᠡᠭᠰᠡᠨ ᠶᠤᠮ᠃
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠮᠤᠩᠭᠤᠯ ᠡᠮᠡᠭᠳᠡᠢ ᠶᠢᠨ ᠵᠠᠰᠠᠯ ᠵᠢᠮᠰᠡᠭ
ᠲᠠᠮᠠᠬᠢ ᠶᠢᠨ ᠤᠭᠤᠳᠠ ᠤᠶᠤᠬᠤ ᠮᠡᠷᠭᠡᠵᠢᠯ
ᠮᠤᠩᠭᠤᠯ ᠭᠤᠳᠤᠯ
ᠮᠤᠩᠭᠤᠯ ᠬᠤᠪᠴᠠᠰᠤ ᠵᠠᠰᠠᠯ — ᠡᠷᠡᠭᠳᠡᠶᠢᠴᠣᠳ ᠤᠨ ᠡᠮᠦᠰᠭᠡᠯ ᠵᠠᠰᠠᠯ
ᠡᠯ᠎ᠡ ᠵᠦᠢᠯ ᠤᠨ ᠪᠤᠷᠭᠠᠰᠤᠨ ᠬᠦᠷᠦᠮᠡᠯ ᠤᠨ ᠮᠡᠷᠭᠡᠵᠢᠯ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号