ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠣᠶᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠨᠠᠶᠢᠷ ᠨᠠᠭᠠᠳᠤᠮ ᠤᠨ ᠵᠦᠢᠯᠡᠰ ︵ᠨᠢᠭᠡ︶ ᠪᠦᠬᠡ ᠪᠠᠷᠢᠯᠳᠤᠬᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/5/20
     ᠪᠦᠬᠡ ᠪᠠᠷᠢᠯᠳᠣᠬᠤ ᠪᠣᠯ ᠮᠤᠩᠭᠤᠯ ᠦᠨᠳᠤᠰᠤᠳᠡᠨ ᠤ ᠡᠷᠲᠡ ᠣᠵᠣᠭᠤᠷ ᠠᠴᠠ ᠣᠯᠠᠮᠵᠢᠯᠠᠵᠦ ᠢᠷᠡᠭᠰᠡᠨ ᠡᠷ᠎ᠡ  ᠶᠢᠨ ᠭᠤᠷᠪᠠᠨ ᠨᠠᠭᠠᠳᠣᠮ ᠤᠨ ᠨᠢᠭᠡ ᠵᠦᠢᠯ ᠤᠨ ᠲᠤᠭᠯᠠᠭᠠᠮ ᠬᠦᠳᠡᠯᠭᠡᠭᠡᠨ ᠪᠤᠯᠤᠨ᠎ᠠ᠃     ᠮᠤᠩᠭᠤᠯ ᠦᠨᠳᠣᠰᠣᠳᠡᠨ ᠡᠷᠲᠡ ᠲᠡᠭᠡᠲᠦ ᠠᠴᠠ ᠠᠩ ᠬᠦᠷᠦᠭᠡ ᠠᠪᠠᠯᠠᠬᠤ ᠮᠠᠯ ᠠᠵᠦ ᠠᠬᠤᠢ ᠪᠠᠷ ᠭᠤᠤᠯᠯᠠᠬᠤ ᠳᠤ ᠪᠠᠨ ᠵᠡᠷᠯᠢᠭ ᠠᠷᠢᠶᠠᠳᠠᠨ ᠢ ᠠᠯᠠᠬᠤ ᠳᠤ᠂ ᠠᠷᠳᠠᠭ ᠲᠤᠭᠰᠢᠨ ᠠᠳᠣᠭᠤ ᠦᠬᠡᠷ ᠢ ᠨᠤᠮᠤᠬᠠᠳᠬᠠᠨ ᠰᠣᠷᠭᠠᠬᠤ ᠳᠤ ᠢᠳᠡ ᠴᠢᠳᠠᠯ᠂ ᠲᠡᠩᠭᠡᠭᠡ ᠬᠦᠴᠦ᠂ ᠠᠷᠭ᠎ᠠ ᠮᠡᠭᠡ ᠶᠢ ᠶᠡᠭᠡᠳᠡ ᠬᠡᠷᠡᠭᠰᠡᠨ ᠱᠠᠭᠠᠷᠳᠠᠳᠠᠭ ᠠᠴᠠ ᠡᠷᠡᠴᠦᠳ ᠦᠪᠡᠷ ᠤᠨ ᠬᠦᠴᠦᠨ ᠴᠢᠳᠠᠯ ᠠᠷᠭ᠎ᠠ ᠠᠪᠬᠠᠯᠵᠢ ᠪᠠᠨ ᠲᠡᠭᠡᠭᠰᠢᠯᠡᠬᠦᠯᠥᠨ ᠰᠠᠶᠢᠵᠢᠷᠠᠭᠤᠯᠬᠤ ᠵᠤᠷᠢᠯᠭ᠎ᠠ ᠪᠠᠷ ᠪᠠᠷᠢᠯᠳᠣᠨ ᠨᠤᠴᠤᠯᠳᠤᠵᠠᠭᠠᠨ ᠡᠰᠡᠷᠬᠦ ᠡᠳᠡᠭᠡᠳ ᠢᠶᠠᠨ ᠲᠠᠷᠤᠵᠦ ᠤᠨᠠᠭᠠᠨ ᠰᠣᠷᠢᠵᠦ ᠪᠤᠯᠪᠠᠰᠣᠷᠠᠬᠤ ᠨᠢ ᠡᠳᠦᠷ ᠤᠨ ᠤᠳᠠᠭᠠᠨ ᠳᠤ ᠪᠠᠨ ᠪᠦᠬᠡ ᠪᠠᠷᠢᠯᠳᠤᠬᠤ ᠪᠤᠯᠵᠦ᠂ ᠠᠭᠠᠵᠢᠮ ᠳᠤ ᠪᠠᠨ ᠢᠳᠡ ᠪᠢᠷ᠎ᠠ᠂ ᠣᠷ᠎ᠠ ᠮᠡᠭᠡ ᠪᠠᠨ ᠰᠢᠯᠭᠠᠷᠠᠭᠤᠯᠬᠤ ᠵᠤᠭ᠎ᠠ ᠴᠡᠩᠭᠡᠯ ᠤᠨ ᠲᠣᠭᠯᠠᠭᠠᠮ ᠪᠤᠯᠵᠦ ᠬᠦᠭᠵᠢᠵᠡᠢ᠃ 13 ᠳ᠋ᠣᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠳᠤ ᠴᠢᠩᠬᠢᠰ ᠬᠠᠭᠠᠨ ᠴᠡᠷᠢᠭ ᠲᠠᠶᠢᠨ ᠳᠤ ᠮᠤᠷᠳᠠᠬᠤ᠂ ᠲᠠᠶᠢᠨ ᠤ ᠢᠯᠠᠯᠳᠠ ᠪᠠᠨ ᠪᠡᠯᠭᠡᠯᠡᠬᠦ᠂ ᠲᠤᠭ ᠰᠦᠯᠳᠠ ᠪᠠᠨ ᠲᠠᠬᠢᠬᠤ ᠵᠡᠷᠭᠡ ᠬᠦᠳᠡᠯᠭᠡᠭᠡᠨ ᠳᠤ ᠪᠦᠷ ᠡᠷ᠎ᠡ ᠶᠢᠨ ᠭᠤᠷᠪᠠᠨ ᠨᠠᠭᠠᠳᠤᠮ ᠢ ᠡᠷᠬᠢᠯᠡᠨ ᠶᠠᠪᠤᠭᠳᠠᠭᠤᠯᠳᠠᠭ ᠪᠠᠶᠢᠵᠠᠢ ᠭᠡᠵᠤ ᠲᠡᠤᠬᠡ ᠱᠠᠰᠳᠢᠷ ᠲᠤ ᠲᠤᠳᠤᠷᠬᠠᠢ ᠲᠡᠮᠳᠡᠭᠯᠡᠯ ᠲᠠᠢ ᠪᠠᠶᠢᠳᠠᠭ᠃     ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠤ ᠬᠤᠰᠢᠭᠤᠨ ᠤ ᠬᠢᠨᠢ ᠬᠢᠳᠡᠳ ᠰᠣᠶᠣᠯ ᠪᠠ ᠲᠠᠷᠢᠶᠠᠯᠠᠬᠤ ᠰᠤᠶᠤᠯ ᠢ ᠬᠠᠮᠤᠭ ᠡᠷᠲᠡ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠢᠶᠠᠷ ᠮᠤᠩᠭᠤᠯ ᠤᠨ ᠤᠯᠠᠮᠵᠢᠯᠠᠯᠲᠦ ᠵᠠᠩ ᠠᠷᠠᠨᠰᠢᠨ᠂ ᠦᠢᠯᠡᠳᠪᠦᠷᠢᠯᠡᠯ ᠤᠨ ᠠᠷᠭ᠎ᠠ ᠮᠠᠶ᠋ᠢᠭ ᠢᠶᠠᠨ ᠠᠭᠠᠵᠢᠮ ᠢᠶᠠᠷ ᠲᠠᠶᠠᠭᠳᠠᠬᠤ ᠬᠡᠮᠵᠢᠶᠡᠨ ᠳᠤ ᠬᠦᠷᠪᠡ᠃ ᠭᠡᠪᠡᠴᠦ ᠪᠦᠬᠡ ᠪᠠᠷᠢᠯᠳᠤᠬᠤ ᠤᠯᠠᠮᠵᠢᠯᠠᠯᠲᠣ ᠰᠣᠶᠣᠯ ᠢᠶᠠᠨ ᠶᠡᠷᠦᠨᠢ ᠮᠠᠷᠳᠠᠵᠦ ᠬᠠᠶᠠᠭᠰᠠᠨ ᠦᠭᠡᠢ ᠮᠦᠷᠲᠡᠭᠡᠨ ᠤᠯᠠᠮ ᠢᠶᠠᠷ ᠬᠦᠭᠵᠢᠬᠦᠯᠵᠦ ᠦᠷᠨᠢᠬᠦᠯᠥᠭᠰᠡᠭᠡᠷ ᠢᠷᠡᠵᠡᠢ᠃ ᠲᠡᠭᠡᠷ᠎ᠡ ᠵᠠᠭᠤᠨ ᠤ 30 — 40 ᠭᠡᠳ ᠣᠨ ᠤ ᠦᠶᠡᠰ ᠲᠤ ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠤ ᠬᠤᠰᠢᠭᠤᠨ ᠳᠤ ᠸᠠᠩᠹᠤᠯ ᠲᠠᠮᠠᠷᠢᠨᠵᠠᠪ ᠠᠬ᠎ᠠ ᠲᠡᠭᠦᠦ ᠬᠤᠶᠠᠭᠤᠯᠠ ︵ᠠᠭᠤᠯᠠ ᠪᠠᠯᠭᠠᠰᠣᠨ ᠤ ᠤᠷᠳᠤᠳᠠᠯ᠎ᠠ ᠭᠠᠴᠠᠭ᠎ᠠ︶᠂ ᠲᠠᠷᠱᠠ ︵ᠠᠭᠤᠯᠠ ᠪᠠᠯᠭᠠᠰᠣᠨ ᠤ ᠬᠦᠩ ᠤᠨ ᠠᠶᠢᠯ ᠭᠠᠴᠠᠭ᠎ᠠ︶︔70 ‍ᠭᠠᠳ ᠤᠨ  ᠤ ᠦᠶ᠎ᠡ ᠳᠤ ᠫᠤᠩᠰᠤᠭ ︵ᠠᠭᠤᠯᠠ ᠪᠠᠯᠭᠠᠰᠣᠨ ᠤ ᠵᠢᠯᠠᠭᠠᠳᠤ ᠭᠠᠴᠠᠭ᠎ᠠ︶᠂ ᠲᠡᠮᠤᠷᠭᠤᠯᠤᠤ ︵ᠠᠭᠤᠯᠠ ᠪᠠᠯᠭᠠᠰᠣᠨ ᠤ ᠰᠢᠳᠢᠬᠤᠳᠳᠤᠭ︶᠂ ᠬᠡᠰᠢᠭ ︵ᠶᠡᠭᠡᠳᠡᠯ᠎ᠡ ᠰᠣᠮᠣᠨ ᠤ ᠲᠠᠷᠭᠤᠨ ᠭᠠᠴᠠᠭ᠎ᠠ︶᠂ ᠠᠳᠢᠶ᠎ᠠ ︵ᠪᠠᠶᠠᠰᠬᠤᠯᠠᠩ ᠰᠣᠮᠣ︶᠂80 ‍ᠭᠠᠳ ᠤᠨ ᠤ ᠦᠶ᠎ᠡ ᠳᠤ ᠴᠣᠭᠯᠠ ︵ᠭᠠᠨᠵᠤᠭ᠎ᠠ ᠪᠠᠯᠭᠠᠰᠣ︶᠂ ᠪᠦᠷᠢᠨᠪᠠᠶᠠᠷ ︵ᠴᠢᠯᠠᠭᠤᠳᠤ ᠰᠣᠮᠣ︶᠂ ᠶᠢᠨ ᠱᠠᠨ ︵ᠠᠭᠤᠯᠠ ᠰᠤᠮᠤ ᠶᠢᠨ ᠠᠷᠤ ᠶᠢᠨ ᠠᠶᠢᠯ ᠭᠠᠴᠠᠭ᠎ᠠ︶90 ᠬᠡᠳ ᠣᠨ ᠤ ᠦᠶ᠎ᠡ ᠳᠤ ᠰᠠᠶᠢᠨ᠎ᠠ ︵ᠵᠢᠷᠭᠠᠯᠠᠩ ᠪᠠᠯᠭᠠᠰᠣᠨ ᠤ ᠰᠣᠳᠣᠨ ᠠᠶᠢᠯ︶᠂ ᠴᠠᠩ ᠱᠸᠤ ︵ᠠᠭᠤᠯᠠ ᠪᠠᠯᠭᠠᠰᠣᠨ ᠤ ᠰᠢᠳᠢᠬᠤᠳᠳᠤᠭ︶ ᠪᠦᠬᠦ ᠤᠷᠤᠨ ᠤ ᠪᠦᠬᠡ ᠶᠢᠨ ᠠᠩᠭᠢ ᠳᠤ ᠰᠣᠷᠢᠯᠲᠠ ᠪᠤᠯᠪᠠᠰᠣᠷᠠᠯ ᠬᠦᠷᠳᠡᠭᠰᠡᠨ᠃ ᠡᠳᠡᠭᠡᠷ ᠪᠦᠬᠡᠴᠢᠳ ᠬᠤᠰᠢᠭᠤ᠂ ᠠᠶᠢᠮᠠᠭ ᠪᠠ ᠣᠷᠣᠨ ᠤ ᠲᠠᠰ ᠲᠤ ᠲᠡᠷᠢᠬᠦᠨ᠂ ᠲᠡᠳ᠋᠂ ᠭᠤᠳᠠᠭᠠᠷ ᠱᠠᠩᠨᠠᠯ ᠢ ᠬᠦᠷᠳᠡᠵᠦ ᠬᠤᠰᠢᠭᠤ ᠠᠶᠢᠮᠠᠭ ᠤᠨ ᠢᠶᠠᠨ ᠠᠯᠳᠠᠷ ᠴᠣᠯᠠ ᠶᠢ ᠮᠠᠨᠳᠣᠭᠤᠯᠵᠦ ᠶᠠᠪᠤᠭᠰᠠᠨ ᠲᠡᠤᠬᠡ ᠲᠠᠢ᠃     ᠪᠦᠭᠡ ᠶᠢᠨ ᠡᠮᠥᠰᠭᠡᠯ ᠵᠠᠰᠠᠯ     ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠤ ᠬᠤᠰᠢᠭᠤᠨ ᠤ ᠪᠦᠬᠡᠴᠣᠳ ᠪᠠᠷᠢᠯᠳᠤᠬᠤ ᠳᠤ ᠪᠠᠨ ᠪᠤᠰᠤᠳ ᠭᠠᠵᠠᠷ ᠤᠨ ᠪᠦᠬᠡᠴᠦᠳ ᠲᠠᠢ ᠦᠡᠳᠦᠰᠦᠨ ᠳᠤ ᠪᠠᠨ ᠠᠳᠠᠯᠢ ᠪᠠᠶᠢᠵᠤ᠂ ᠵᠤᠳᠤᠭ᠂ ᠦᠮᠦᠳᠥ᠂ ᠪᠦᠰᠡᠯᠡᠬᠦᠷ᠂ ᠲᠤᠤᠬᠤ᠂ ᠴᠠᠷᠪᠠᠭ᠂ ᠭᠤᠳᠤᠯ ᠵᠡᠷᠭᠡ ᠶᠢ ᠡᠮᠥᠰᠴᠦ ᠪᠠᠷᠢᠯᠳᠤᠳᠠᠭ᠃     ᠵᠤᠳᠤᠭ ᠢ ᠦᠬᠡᠷ ᠤᠨ ᠠᠷᠠᠰᠣ ᠪᠠ ᠬᠡᠤᠳᠠᠢ ᠶᠢᠨ ᠪᠦᠰ ᠢᠶᠠᠷ ᠤᠶᠤᠵᠦ ᠬᠦᠪᠡᠭᠡ ᠲᠠᠭᠠᠤ ᠨᠢ ᠮᠦᠩᠭᠦ᠂ ᠲᠤᠭᠤᠯᠭ᠎ᠠ ᠪᠣᠶᠤ ᠭᠠᠤᠯᠢ ᠪᠠᠷ ᠲᠤᠪᠤᠷᠤᠤ ᠡᠮᠵᠢᠶᠡᠷᠯᠡᠵᠦ ᠵᠠᠷᠢᠮ ᠨᠢ ᠠᠷᠦ ᠳᠤ ᠨᠢ ᠬᠦᠷᠡᠯ ᠲᠤᠯᠢ ᠬᠠᠳᠠᠵᠦ ᠵᠠᠳᠠᠭᠠᠢ ᠡᠩᠭᠡᠷ ᠲᠠᠢ᠂ ᠦᠮᠥᠳᠦ ᠨᠢ ᠠᠭᠤᠵᠢᠭᠤ ᠦᠷᠬᠡᠨ ᠪᠠᠶᠢᠵᠦ ᠪᠠᠭᠢᠯᠢᠭ᠌ ᠬᠠᠳᠠᠭᠤᠬᠠᠨ ᠪᠦᠰ ᠢᠶᠠᠷ ᠤᠶᠤᠳᠠᠭ᠃     ᠭᠤᠳᠤᠯ ᠨᠢ ᠪᠤᠯᠢᠭᠠᠷᠢᠨ ᠭᠤᠳᠤᠯ᠂ ᠠᠷᠠᠰᠣᠨ ᠭᠤᠳᠤᠯ᠂ ᠪᠦᠰ ᠭᠤᠳᠤᠯ ᠵᠡᠷᠭᠡ ᠪᠤᠢ᠃ ᠭᠤᠳᠤᠯ ᠤᠨ ᠲᠦᠷᠡᠢ ᠶᠢᠨ ᠵᠠᠪᠰᠠᠷ ᠲᠤᠨᠢ ᠬᠤᠯᠤᠰᠤ ᠶᠢ ᠨᠢᠮᠭᠡᠯᠡᠨ ᠵᠠᠰᠠᠵᠦ ᠤᠯᠤᠰᠤᠨ ᠣᠳᠠᠰᠣ ᠪᠠᠷ ᠬᠡᠯᠬᠢᠯᠡᠨ ᠤᠶᠤᠵᠦ ᠬᠢᠩᠭ᠎ᠠ ᠰᠢᠯᠪᠢ ᠪᠠ ᠡᠪᠣᠳᠣᠭ᠌ ᠢ ᠬᠠᠮᠠᠭᠠᠯᠠᠵᠦ ᠭᠡᠮᠳᠦᠬᠦ ᠠᠴᠠ ᠰᠡᠷᠭᠡᠶᠢᠯᠡᠳᠡᠭ᠃     ᠭᠤᠷᠪᠠᠨ ᠵᠢᠯ ᠲᠠᠷᠠᠭᠠᠯᠠᠨ ᠲᠡᠷᠢᠬᠦᠯᠡᠭᠰᠡᠨ ᠪᠦᠭᠡᠴᠣᠳ ᠵᠠᠩᠭᠢᠶ᠎ᠠ ᠵᠡᠬᠦᠳᠡᠭ᠂ ᠡᠨᠡ ᠨᠢ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠠᠮᠢ ᠪᠡᠶ᠎ᠡ ᠪᠠᠨ ᠬᠠᠮᠠᠭᠠᠯᠠᠬᠤ ᠰᠠᠬᠢᠶ᠎ᠠ ᠠᠴᠠ ᠢᠷᠡᠯᠳᠡᠢ ᠪᠠᠶᠢᠵᠦ ᠪᠦᠬᠡᠴᠣᠳ ᠣᠯᠠᠭᠠᠨ ᠨᠤᠭᠤᠭᠠᠨ ᠰᠢᠷ᠎ᠠ ᠡᠯᠳᠡᠪ ᠦᠩᠭᠡ ᠶᠢᠨ ᠵᠠᠩᠭᠢᠶ᠎ᠠ ᠶᠢ ᠵᠡᠬᠦᠪᠡᠯ ᠰᠦᠷ ᠵᠢᠪᠬᠤᠭ᠎ᠠ ᠲᠠᠢ ᠬᠠᠷᠠᠭᠳᠠᠳᠠᠭ᠃ ᠪᠠᠷᠢᠯᠳᠤᠭᠠᠨ ᠡᠬᠢᠯᠡᠬᠦ ᠠᠴᠠ ᠡᠮᠤᠨ᠎ᠡ ᠪᠦᠬᠡᠴᠣᠳ ᠪᠠᠷᠢᠯᠳᠣᠬᠤ ᠵᠤᠳᠤᠭ᠂ ᠦᠮᠥᠲᠤ ᠭᠤᠳᠤᠯ ᠢᠶᠠᠨ ᠡᠮᠥᠰᠴᠥ ᠵᠠᠩᠭᠢᠶ᠎ᠠ ᠴᠠᠭᠠᠷᠢᠭ ᠢᠶᠠᠨ ᠵᠡᠬᠦᠵᠦ ᠶᠠᠭ ᠯᠠ ᠲᠠᠶᠢᠨ ᠳᠤ ᠭᠠᠷᠬᠤ ᠵᠠᠩᠵᠤᠨ ᠬᠤᠶᠠᠭ ᠲᠤᠭᠤᠯᠠᠭ᠎ᠠ ᠡᠮᠥᠰᠣᠭ᠍ᠰᠡᠨ ᠭᠡᠮᠡᠷ ᠮᠥᠷᠯᠡᠨ ᠵᠤᠭᠰᠣᠵᠦ ᠨᠢᠭᠡᠳᠦᠯᠳᠡᠢ ᠲᠤᠬᠢᠶ᠎ᠠ  ᠪᠠᠷ ᠬᠤᠪᠢ ᠬᠤᠪᠢᠨ ᠤ ᠰᠣᠷᠴᠦ ᠰᠣᠷᠢᠭᠰᠠᠨ ᠣᠷ᠎ᠠ ᠲᠡᠮ ᠢᠶᠠᠷ ᠴᠠᠴᠠᠷ ︵ᠲᠡᠷᠢᠬᠦᠯᠡᠭᠴᠢ ᠶᠢᠨ ᠲᠠᠶᠢᠰᠠ︶ ᠤᠨ ᠡᠮᠥᠨ᠎ᠡ ᠪᠠ ᠦᠵᠡᠭᠰᠡᠳ ᠤᠨ ᠡᠮᠥᠨᠡᠬᠦᠷ ᠲᠡᠯᠡᠪᠣᠷ ᠢ ᠲᠤᠭᠤᠷᠢᠨ ᠮᠠᠭᠰᠢᠨ ᠲᠡᠪᠢᠵᠦ ᠰᠦᠷ ᠬᠦᠴᠦᠨ ᠢᠶᠠᠨ ᠭᠠᠶᠢᠬᠠᠭᠤᠯᠤᠨ᠎ᠠ᠃     ᠪᠦᠬᠡᠴᠣᠳ ᠡᠬᠢᠯᠡᠨ ᠪᠠᠷᠢᠯᠳᠤᠬᠤ ᠳᠤ ᠣᠷᠣᠯᠳᠣᠭᠠᠨ ᠳᠤ ᠤᠷᠤᠯᠴᠠᠬᠤ ᠪᠦᠬᠡᠴᠣᠳ ᠬᠤᠶᠠᠷ ᠭᠠᠷᠯᠠᠨ ᠡᠰᠡᠷᠭᠦᠯᠡᠨ ᠰᠠᠭᠤᠬᠤ ᠳᠤ ᠪᠠᠷᠢᠯᠳᠣᠬᠤ ᠲᠠᠯᠠᠪᠣᠷ ᠤᠨ ᠢᠯᠡ ᠭᠠᠵᠠᠷ ᠠᠷᠪᠠ ᠬᠤᠷᠢᠨ ᠠᠬᠠᠮᠠᠳ ᠪᠦᠬᠡᠴᠢᠳ ᠢ ᠤᠷᠢᠵᠦ ᠰᠠᠭᠤᠯᠭᠠᠭᠠᠳ ᠪᠦᠭᠡ ᠣᠷᠢᠳᠠᠭ ᠠᠶᠠᠰ ᠢ ᠬᠦᠭᠵᠢᠮᠳᠡᠨ ᠪᠦᠬᠡ ᠶᠢ ᠤᠷᠢᠵᠦ ᠲᠠᠯᠠᠪᠠᠢ ᠳᠤ ᠣᠷᠣᠭᠤᠯᠵᠦ ᠪᠠᠷᠢᠯᠳᠣᠭᠤᠯᠳᠠᠭ᠃ ᠭᠠᠵᠠᠷ ᠭᠠᠵᠠᠷ ᠤᠨ ᠪᠦᠬᠡ ᠤᠷᠢᠬᠤ ᠠᠶᠠᠯᠭᠤ ᠪᠠ ᠦᠬᠡ ᠨᠢ ᠠᠳᠠᠯᠢ ᠴᠦ ᠶᠡᠭᠡ ᠲᠦᠯᠥᠪ ᠳᠤ  ᠪᠠᠨ ᠠᠭᠤᠯᠭ᠎ᠠ ᠣᠳᠬ᠎ᠠ ᠨᠢ ᠠᠳᠠᠯᠢᠪᠳᠤᠷ ᠪᠠᠶᠢᠳᠠᠭ᠃       ︽ᠣᠣ — ᠬᠠᠢ — ᠤᠤᠬᠠᠢ —       ᠣᠳᠠᠭ᠎ᠠ ᠪᠦᠷᠢ ᠶᠢᠨ ᠤᠷᠤᠯᠳᠤᠭᠠᠨ ᠳᠤ       ᠣᠨᠴᠠ ᠱᠠᠩ ᠬᠦᠷᠳᠡᠭᠰᠡᠨ       ᠣᠯᠠᠨ ᠠᠶᠢᠮᠠᠭ ᠬᠤᠰᠢᠭᠤᠨ ᠳᠤ ᠪᠠᠨ       ᠣᠨᠴᠠᠭᠠᠢ ᠠᠯᠳᠠᠷ ᠢᠶᠠᠨ ᠮᠠᠨᠳᠣᠭᠤᠯᠤᠭᠰᠠᠨ      ᠠᠷᠰᠯᠠᠨ ᠬᠦᠴᠦᠲᠦ ᠠᠪᠤᠷᠭᠤ ᠪᠦᠬᠡ ᠪᠠᠨ ᠲᠠᠯᠪᠢ︾ ᠭᠡᠵᠦ ᠨᠢᠭᠡ ᠨᠢ ᠲᠠᠭᠠᠭᠤᠯᠤᠨ ᠬᠡᠯᠡᠬᠦ ᠳᠤ ᠨᠦᠬᠦᠬᠡ ᠤᠯᠠᠨ ᠡᠪᠤᠭᠡᠳ ᠨᠢ᠄ ︽ᠪᠦᠬᠡ ᠪᠠᠨ ᠲᠠᠯᠪᠢ︕ ᠪᠦᠬᠡ ᠪᠠᠨ ᠲᠠᠯᠪᠢ᠂ ᠪᠦᠬᠡ ᠪᠠᠨ ᠲᠠᠯᠪᠢ︾ ᠭᠡᠵᠦ ᠦᠨᠳᠦᠷ ᠲᠠᠭᠤᠨ ᠢᠶᠠᠷ ᠣᠷᠢᠨ ᠬᠠᠰᠭᠢᠷᠳᠠᠭ᠃        ︽ᠬᠠᠭᠠᠨ ᠴᠢᠩᠭᠢᠰ ᠤᠨ ᠦᠶ᠎ᠡ ᠠᠴᠠ        ᠬᠠᠮᠤᠭ ᠤᠯᠠᠨ ᠢᠶᠠᠨ ᠪᠢᠰᠢᠷᠡᠭᠦᠯᠥᠭᠰᠡᠨ        ᠬᠠᠷᠴᠠᠭᠠᠢ ᠪᠦᠷᠭᠦᠳ ᠤᠨ ᠲᠡᠬᠦᠯᠢᠭᠡ ᠲᠠᠢ        ᠬᠦᠴᠦ ᠶᠡᠭᠡᠳᠡᠢ ᠪᠦᠬᠡ ᠪᠠᠨ ᠲᠠᠯᠪᠢ︾ ᠭᠡᠪᠡᠯ᠂ ︽ᠪᠦᠬᠡ ᠪᠠᠨ ᠲᠠᠯᠪᠢ︕ ᠪᠦᠬᠡ ᠪᠠᠨ ᠲᠠᠯᠪᠢ︕ ᠪᠦᠬᠡ ᠪᠠᠨ ᠲᠠᠯᠪᠢ︕︾ ᠬᠡᠵᠦ ᠬᠦᠴᠦ ᠨᠡᠮᠡᠨ ᠤᠷᠢᠳᠠᠭ᠃        ᠣᠷᠣᠯᠳᠣᠭᠠᠨ ᠤ ᠲᠤᠮᠲᠠ ᠬᠦᠳᠡᠯᠭᠡᠭᠡᠨ ᠢ ᠣᠯᠠᠮ ᠢᠳᠡ ᠬᠦᠴᠦᠯᠢᠭ ᠶᠠᠪᠤᠭᠳᠠᠭᠤᠯᠬᠤ ᠶᠢᠨ ᠲᠦᠯᠥᠭᠡ᠂        ︽ᠮᠤᠭᠠᠢ ᠪᠤᠤᠷ᠎ᠠ ᠶᠢᠨ ᠮᠡᠭᠡ ᠪᠠᠨ        ᠮᠥᠳᠳᠦ ᠲᠦᠷᠭᠡᠨ ᠬᠡᠷᠡᠭᠯᠡ︕        ᠮᠤᠩᠭᠤᠯ ᠦᠨᠳᠣᠰᠣᠳᠡᠨ ᠤ ᠪᠠᠭᠠᠳᠦᠷ ᠢᠶᠠᠷ       ᠮᠠᠵᠤᠭᠤᠯᠵᠦ ᠰᠠᠶᠢᠨ ᠭᠠᠷᠭ᠎ᠠ︾ ᠭᠡᠪᠡᠯ ᠨᠦᠬᠦᠬᠡ ᠤᠯᠠᠨ ᠤᠷᠢᠭᠰᠡᠳ ᠨᠢ᠄ ︽ᠴᠢᠷᠮᠠᠢ︕ ᠴᠢᠷᠮᠠᠢ︕ ᠴᠢᠷᠮᠠᠢ︕︾ ᠭᠡᠵᠦ ᠭᠤᠷᠪᠠᠨᠲᠠ ᠤᠷᠢᠳᠠᠭ᠃        ᠤᠷᠤᠯᠳᠣᠭᠠᠨ ᠲᠡᠬᠦᠰᠴᠦ ᠪᠦᠬᠡ ᠱᠠᠩᠨᠠᠬᠤ ᠦᠶ᠎ᠡ ᠳᠤ᠃        ︽ᠡᠷ᠎ᠡ ᠶᠢᠨ ᠭᠤᠷᠪᠠᠨ ᠨᠠᠭᠠᠳᠣᠮ ᠳᠤ        ᠡᠷᠡᠯᠬᠡᠭᠯᠡᠨ ᠪᠠᠷᠢᠯᠳᠤᠭᠰᠠᠨ ᠪᠦᠬᠡᠴᠣᠳ ᠮᠢᠨᠢ        ᠡᠩᠭᠡᠷ ᠲᠦᠬᠦᠷᠡᠩ ᠱᠠᠩᠨᠠᠯ ᠢᠶᠠᠷ ᠢᠶᠠᠨ        ᠡᠩᠭᠡ ᠲᠦᠮᠡᠨ ᠢᠶᠠᠨ ᠪᠠᠶᠠᠰᠬ᠎ᠠ︕︾ ᠭᠡᠪᠡᠯ᠂ ︽ᠪᠠᠶᠠᠰᠬ᠎ᠠ︕ ᠪᠠᠶᠠᠰᠬ᠎ᠠ︕ ᠪᠠᠶᠠᠰᠬ᠎ᠠ︕︾ ᠬᠡᠵᠦ ᠲᠠᠭᠤ ᠨᠢᠭᠡᠳᠡᠢ ᠢᠷᠦᠭᠡᠳᠡᠭ᠃        ᠬᠠᠮᠤᠭ ᠰᠡᠬᠦᠯ ᠳᠤ ᠨᠢ        ︽ᠪᠠᠷᠢᠯᠳᠣᠭᠰᠠᠨ ᠣᠯᠠᠨ ᠪᠦᠬᠡᠴᠣᠳ ᠮᠢᠨᠢ        ᠪᠠᠭᠠᠳᠦᠷ ᠴᠣᠯᠠ ᠪᠠᠨ ᠮᠠᠨᠳᠣᠭᠤᠯ        ᠪᠦᠬᠦᠳᠡ ᠣᠯᠠᠨ ᠦᠵᠡᠭᠰᠡᠳ ︵ᠮᠤᠩᠭᠤᠯᠴᠣᠳ︶ ᠢᠶᠠᠨ        ᠪᠠᠶᠠᠰᠬᠠᠵᠦ ᠡᠬᠦᠷᠢᠲᠡ ᠵᠢᠷᠭᠠᠭᠤᠯ ᠡ︕︾ ᠭᠡᠪᠡᠯ᠂ ︽ᠵᠢᠷᠭᠠᠭᠤᠯ︕ ᠵᠢᠷᠭᠠᠭᠤᠯ︕ ᠵᠢᠷᠭᠠᠭᠤᠯ︕ ︾ ᠭᠡᠵᠦ ᠪᠡᠯᠭᠡᠳᠡᠨ ᠢᠷᠦᠭᠡᠳᠡᠭ᠃       ᠣᠷᠣᠯᠳᠣᠭᠠᠨ ᠳᠤ ᠰᠢᠯᠭᠠᠷᠠᠭᠰᠠᠳ ᠤᠨ ᠠᠯᠳᠠᠷ ᠨᠡᠷ᠎ᠡ ᠶᠢ ᠨᠡᠶᠢᠭᠡᠮ ᠨᠡᠶᠢᠲᠡ ᠳᠤ ᠲᠠᠭᠤᠷᠢᠰᠤᠭᠤᠯᠵᠦ᠂ ᠮᠡᠷᠭᠡᠵᠢᠯ ᠮᠡᠭᠡ ᠪᠠᠨ ᠨᠡᠩ ᠰᠠᠶᠢᠨ ᠲᠡᠭᠡᠭᠰᠢᠯᠡᠬᠦᠯᠥᠨ ᠤᠯᠠᠮ ᠰᠢᠯᠢᠳᠡᠭ ᠪᠦᠳᠤᠮᠵᠢ ᠭᠠᠷᠭᠠᠬᠤ ᠶᠢ ᠵᠤᠷᠢᠭᠵᠢᠭᠤᠯᠬᠤ ᠪᠠ ᠪᠦᠬᠡ ᠪᠠᠷᠢᠯᠳᠣᠬᠤ ᠨᠠᠭᠠᠳᠣᠮ ᠬᠦᠳᠡᠯᠭᠡᠭᠡᠨ ᠢ ᠤᠯᠠᠮ ᠦᠷᠨᠢᠩᠭᠦᠢ ᠬᠦᠭᠵᠢᠬᠦᠯᠬᠦ ᠶᠢ ᠵᠤᠷᠢᠭᠵᠢᠭᠤᠯᠬᠤ ᠣᠯᠠᠮᠵᠢᠯᠠᠯᠲᠤ ᠲᠦᠷᠢᠮ ᠲᠤᠭᠳᠠᠭᠠᠯ ᠪᠤᠯᠤᠨ᠎ᠠ᠃      ᠰᠣᠮᠣ᠂ ᠬᠤᠰᠢᠭᠤ᠂ ᠠᠶᠢᠮᠠᠭ᠂ ᠣᠷᠣᠨ ᠮᠤᠵᠢ ᠶᠢᠨ ᠲᠡᠰ ᠲᠤ ᠰᠢᠯᠭᠠᠷᠠᠭᠰᠠᠨ ᠪᠦᠬᠡ ᠶᠢ ᠠᠷᠰᠯᠠᠨ᠂ ᠪᠠᠷᠰ ᠂ ᠵᠠᠭᠠᠨ᠂ ᠨᠠᠴᠢᠨ᠂ ᠱᠤᠩᠬᠤᠷ᠂ ᠭᠠᠷᠣᠳᠢ᠂ ᠬᠠᠷᠴᠠᠭᠠᠢ᠂ ᠪᠦᠷᠭᠦᠳ᠂ ᠪᠤᠬ᠎ᠠ ᠵᠡᠷᠭᠡ ᠪᠠᠷ ᠴᠣᠯᠠᠯᠠᠵᠦ᠂ ᠲᠤᠤᠷ᠎ᠠ ᠲᠡᠰ ︵ᠬᠡᠪᠴᠢᠶ᠎ᠡ ᠪᠠᠭ᠎ᠠ︶ ᠠᠴᠠ ᠲᠡᠭᠡᠷ᠎ᠡ ᠲᠡᠰ ᠲᠤ ᠠᠯᠬᠤᠮ ᠲᠠᠷᠠᠭᠠᠯᠠᠨ ᠰᠢᠯᠭᠠᠷᠠᠭᠳᠠᠪᠠᠯ ᠠᠷᠰᠯᠠᠨ — ᠠᠪᠤᠷᠭᠤ — ᠲᠠᠶᠠᠩ ᠠᠪᠣᠷᠭᠤ — ᠲᠠᠷᠬᠠᠨ ᠠᠪᠤᠷᠭᠤ ︵ᠲᠦᠷᠦ ᠶᠢᠨ ᠲᠡᠰ︶ ᠮᠡᠳᠦ ᠪᠠᠷ ᠬᠠᠮᠤᠭ ᠲᠡᠭᠡᠲᠦ ᠲᠡᠷᠬᠠᠨ ᠴᠣᠯᠠ ᠪᠠᠷ ᠮᠢᠯᠢᠶᠠᠳᠠᠭ᠃      ᠡᠷ᠎ᠡ ᠶᠢᠨ ᠭᠤᠷᠪᠠᠨ ᠨᠠᠭᠠᠳᠣᠮ ᠤᠨ ᠲᠣᠳᠣᠷᠠᠬᠢ ᠶᠠᠮᠠᠷᠴᠦ ᠪᠠᠭᠠᠵᠢ ᠬᠡᠷᠡᠭᠰᠡᠯ ︵ᠤᠨᠤᠭ᠎ᠠ ᠬᠦᠯᠥᠭ︶ ᠤᠨ ᠬᠠᠪᠰᠣᠷᠣᠯᠭ᠎ᠠ ᠲᠡᠮᠵᠢᠯᠭᠡ ᠦᠭᠡᠢ᠂ ᠴᠤᠯ ᠬᠤᠪᠢ ᠪᠡᠶ᠎ᠡ ᠶᠢᠨ ᠪᠢᠷ᠎ᠠ ᠴᠢᠳᠠᠯ᠂ ᠮᠡᠷᠭᠡᠵᠢᠯ ᠮᠡᠭᠡ᠂ ᠢᠳᠡ ᠬᠦᠴᠦ ᠲᠡᠮᠡᠴᠡᠨ ᠣᠷᠣᠯᠳᠣᠵᠦ ᠰᠢᠯᠭᠠᠷᠠᠬᠤ ᠶᠢᠨ ᠣᠴᠢᠷ ᠮᠤᠩᠭᠤᠯᠴᠣᠳ ᠪᠦᠬᠡ ᠳᠤ ᠰᠢᠯᠭᠠᠷᠠᠨ ᠴᠣᠯᠠᠯᠠᠭᠳᠠᠭᠰᠠᠳ ᠤᠨ ᠱᠠᠩᠨᠠᠯ ᠢ ᠡᠷᠬᠢᠮ ᠲᠡᠭᠡᠲᠦ ᠪᠠᠷ ᠦᠵᠡᠳᠡᠭ᠃ ᠲᠡᠶᠢᠮᠤ ᠠᠴᠠ ᠡᠷᠬᠢᠯᠡᠭᠰᠡᠳ ᠤᠨ ᠬᠦᠷᠢᠶ᠎ᠡ ᠬᠡᠪᠴᠢᠶ᠎ᠡ ᠠᠳᠠᠯᠢ ᠪᠤᠰᠤ ᠴᠦ ᠲᠤᠰ ᠣᠳᠠᠭᠠᠨ ᠤ ᠨᠠᠭᠠᠳᠣᠮ ᠤᠨ ᠲᠦᠷᠦᠯ ᠵᠦᠢᠯ ᠤᠨ ᠱᠠᠩᠨᠠᠯ ᠳᠤ ᠪᠦᠬᠡ ᠳᠤ ᠬᠠᠮᠤᠭ ᠲᠤᠮᠤ ᠱᠠᠩ ᠬᠦᠷᠳᠡᠭᠡᠳᠡᠭ᠃ ᠲᠡᠮᠡᠭᠡ᠂ ᠡᠮᠡᠬᠡᠯ ᠬᠠᠵᠠᠭᠠᠷᠲᠦ ᠵᠢᠷᠤᠭ᠎ᠠ ᠮᠤᠷᠢ᠂ ᠪᠤᠬ᠎ᠠ᠂ ᠬᠤᠨᠢ ᠁ ᠵᠡᠷᠬᠡ ᠶᠢᠨ ᠱᠠᠩ ᠣᠯᠭᠤᠳᠠᠭ ᠨᠢ ᠡᠩ ᠤᠨ ᠣᠴᠢᠷ᠃ ᠬᠤᠵᠢᠮ ᠤᠨ ᠤᠷᠤᠯᠳᠤᠭᠠᠨ ᠪᠠᠷᠢᠯᠳᠤᠭᠠᠨ ᠳᠤ ᠨᠡᠩ ᠰᠠᠶᠢᠨ ᠪᠦᠳᠦᠮᠵᠢ ᠤᠯᠬᠤ ᠶᠢ ᠪᠡᠯᠭᠡᠳᠡᠨ ᠲᠡᠷᠢᠬᠦᠦ ᠨᠤᠭᠤᠯᠤᠭᠠᠨ ᠳᠤ ᠬᠠᠶᠠᠭᠳᠠᠭᠰᠠᠨ ᠪᠦᠬᠡ ᠳᠤ ᠴᠦ ︽ᠰᠢᠷᠦᠢ ᠶᠢᠨ ᠱᠠᠩ︾ ᠬᠦᠷᠳᠡᠭᠡᠨ ᠵᠤᠷᠢᠭᠵᠢᠭᠤᠯᠳᠠᠭ᠃
  
ᠢᠷᠡᠯᠲᠡ᠄ ᠦᠪᠦᠷ ᠮᠤᠩᠭᠤᠯ ᠤᠨ ᠪᠤᠳᠠᠰ ᠤᠨ ᠪᠤᠰᠤ ᠪᠠ ᠪᠤᠳᠠᠰ ᠤᠨ ᠰᠤᠶᠤᠯ ᠤᠨ ᠦᠪ ᠤᠨ ᠴᠤᠪᠤᠷᠠᠯ ᠪᠢᠴᠢᠭ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠮᠤᠷᠢᠨ ᠤ ᠡᠳ᠋ᠯᠠᠯ ᠬᠡᠷᠡᠭᠰᠡᠯ ᠵᠢᠴᠢ ᠲᠡᠳᠡᠭᠡᠷ ᠤᠨ ᠨᠠᠷᠠᠶᠢᠳᠤᠯ
ᠮᠤᠩᠭᠤᠯ ᠡᠮᠡᠭᠳᠡᠢ ᠶᠢᠨ ᠵᠠᠰᠠᠯ ᠵᠢᠮᠰᠡᠭ
ᠲᠠᠮᠠᠬᠢ ᠶᠢᠨ ᠤᠭᠤᠳᠠ ᠤᠶᠤᠬᠤ ᠮᠡᠷᠭᠡᠵᠢᠯ
ᠮᠤᠩᠭᠤᠯ ᠭᠤᠳᠤᠯ
ᠮᠤᠩᠭᠤᠯ ᠬᠤᠪᠴᠠᠰᠤ ᠵᠠᠰᠠᠯ — ᠡᠷᠡᠭᠳᠡᠶᠢᠴᠣᠳ ᠤᠨ ᠡᠮᠦᠰᠭᠡᠯ ᠵᠠᠰᠠᠯ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号