ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠣᠶᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠴᠤᠤᠳᠦ ᠬᠦᠮᠦᠰ ᠤᠨ ᠲᠤᠰᠬᠠᠢ ᠨᠡᠮᠳᠡᠷ — ᠰᠡᠩᠭᠡᠷᠢᠨᠴᠢᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/3/22
     ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠦ ᠬᠤᠰᠢᠭᠤᠨ ᠤ      ᠲᠡᠦᠭᠡᠨ ᠳᠠᠬᠢ ᠴᠤᠤᠳᠤ ᠬᠦᠮᠦᠰ ᠤᠨ ᠲᠤᠰᠬᠠᠢ ᠨᠠᠮᠳᠡᠷ                  ᠰᠡᠩᠭᠡᠷᠢᠨᠴᠢᠨ ︵1811 — 1865︶         ᠰᠡᠩᠭᠡᠷᠢᠨᠴᠢᠨ᠂ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ᠂ ᠪᠤᠷᠵᠢᠬᠢᠨ ᠤᠪᠤᠭᠳᠡᠨ᠂ ᠰᠠᠶᠢᠰᠢᠶᠠᠯ ᠢᠷᠦᠬᠡᠯᠳᠦ ᠶᠢᠨ ᠴᠠᠭᠠᠭᠴᠢᠨ ᠬᠤᠨᠢᠨ ᠵᠢᠯ ︵1811 ᠤᠨ︶ ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠦ ᠬᠤᠰᠢᠭᠤᠨ ᠤ ᠬᠠᠷᠡᠡᠬᠢ ᠰᠤᠮᠤ  ᠶᠢᠨ ᠪᠠᠶᠢᠰᠢᠩᠳᠦ ᠭᠠᠴᠠᠭᠠᠨ ᠤ ᠡᠩ ᠤᠨ ᠨᠢᠬᠡᠨ ᠲᠠᠶᠢᠵᠢ ᠶᠢᠨ ᠭᠡᠷ ᠲᠤ ᠲᠦᠷᠦᠪᠡ᠃ ᠲᠡᠬᠦᠨ ᠤ ᠡᠴᠢᠬᠡ ᠪᠦᠬᠡᠳᠡᠯᠭᠡᠷ ᠭᠡᠳᠡᠭ᠂ ᠲᠡᠦᠬᠡᠨ ᠪᠢᠴᠢᠭ ᠲᠤ ᠪᠢᠴᠢ ︵ᠲᠠᠶᠢᠵᠢ︶ ᠭᠡᠵᠤ ᠲᠠᠭᠤᠳᠠᠳᠠᠭ᠂ ᠵᠢᠷᠭᠠᠯᠠᠩ ᠪᠠᠯᠭᠠᠰᠤ ᠶᠢᠨ ᠪᠠᠶᠠᠨᠬᠠᠭ ᠠᠶᠢᠯ ᠤᠨ ᠬᠦᠮᠦᠨ᠂ ᠭᠡᠷ ᠤᠨ ᠠᠮᠢᠳᠦᠷᠡᠯ ᠨᠢ ᠶᠠᠳᠠᠭᠤ ᠬᠦᠴᠢᠷᠳᠡᠢ ᠪᠠᠶᠢᠪᠠ᠃ ᠰᠡᠩᠭᠡᠷᠢᠨᠴᠢᠨ ᠪᠠᠭ᠎ᠠ ᠨᠠᠰᠤᠨ ᠳᠠᠭᠠᠨ ᠡᠴᠢᠬᠡ ᠪᠠᠨ ᠲᠠᠭᠠᠵᠦ ᠪᠠᠶᠠᠨ ᠬᠦᠮᠦᠨ ᠤ ᠮᠠᠯ ᠢ ᠬᠠᠷᠢᠭᠤᠯᠵᠦ᠂ 12 ᠨᠠᠰᠤᠳᠡᠢ ᠳᠠᠭᠠᠨ ᠴᠠᠩᠳᠦ  ᠶᠢᠨ ᠬᠠᠭᠤᠴᠢᠨ ᠬᠤᠳᠡ ᠶᠢᠨ ᠸᠡᠨ ᠴᠠᠩ ᠭᠦᠩ ᠳᠤ ᠪᠢᠴᠢᠭ ᠦᠵᠡᠪᠡ᠃     ᠲᠦᠷᠦ ᠬᠡᠷᠡᠯᠳᠦ ᠶᠢᠨ ᠲᠠᠪᠤᠳᠤᠭᠠᠷ ᠤᠨ ︵1825 ᠤᠨ︶ ᠳᠤ ᠰᠤᠳᠨᠠᠮᠳᠤᠪᠵᠡᠢ ᠵᠢᠶᠦ᠋ᠨ ᠸᠠᠩ ᠤᠨ ᠵᠠᠯᠭᠠᠮᠵᠢ ᠬᠦᠦ ᠨᠢ ᠪᠤᠯᠵᠦ᠂ ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠦ ᠬᠤᠰᠢᠭᠤᠨ ᠤ ᠵᠠᠰᠠᠭᠳᠦ ᠵᠢᠶᠦ᠋ᠨ ᠸᠠᠩ ᠤᠨ ᠰᠠᠭᠤᠷᠢᠨ ᠢ ᠵᠠᠯᠭᠠᠮᠵᠢᠯᠠᠪᠠ᠃     ᠲᠦᠷᠦ ᠬᠡᠷᠡᠯᠳᠦ ᠶᠢᠨ ᠲᠠᠪᠤᠳᠤᠭᠠᠷ ᠤᠨ ᠤ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠰᠡᠷ᠎ᠡ ᠳᠤ᠂ ᠵᠠᠷᠯᠢᠭ ᠢᠶᠠᠷ ᠬᠠᠭᠠᠨ ᠤ ᠡᠮᠦᠨ᠎ᠡ ᠶᠠᠪᠤᠬᠤ ᠰᠢᠳᠡᠷ ᠨᠤᠶᠠᠨ ᠢᠶᠠᠷ ᠲᠤᠮᠢᠯᠠᠭᠳᠡᠨ᠂ ᠭᠤᠷᠪᠡᠨ ᠨᠢᠳᠦᠳᠦ ᠲᠤᠭᠤᠰ ᠤᠳᠤᠭ᠎ᠠ ᠱᠠᠩᠨᠠᠵᠦ ᠵᠡᠬᠦᠯᠬᠡᠪᠡ ᠃ ᠲᠦᠷᠦ ᠬᠡᠷᠡᠯᠳᠦ ᠶᠢᠨ ᠵᠢᠷᠭᠤᠳᠤᠭᠠᠷ ᠤᠨ ᠳᠤ ᠤᠯᠠᠭᠠᠨ ᠵᠢᠯᠤᠭᠤ ᠪᠠᠷ ᠱᠠᠩᠨᠠᠭᠳᠡᠪᠡ᠃ ᠲᠦᠷᠦ ᠬᠡᠷᠡᠯᠳᠦ ᠶᠢᠨ ᠶᠢᠰᠦᠳᠦᠭᠡᠷ ᠤᠨ ᠳᠤ᠂ ᠰᠢᠷ᠎ᠡ ᠮᠠᠩᠨᠤᠭ ᠲᠠᠪᠠᠯ ᠱᠠᠩᠨᠠᠵᠦ ᠡᠮᠦᠰᠭᠡᠪᠡ᠃ ᠲᠤᠰ ᠵᠢᠯ ᠤᠨ ᠬᠤᠶᠠᠳᠤᠭᠠᠷ ᠰᠡᠷ᠎ᠡ ᠳᠤ᠂ ᠴᠡᠷᠢᠭ ᠤᠨ ᠲᠤᠰᠢᠶᠠᠯ ᠤᠯᠭᠤᠪᠡ᠃ ᠶᠢᠰᠦᠳᠦᠭᠡᠷ ᠰᠡᠷ᠎ᠡ ᠳᠤᠨᠢ ᠵᠡᠷ ᠵᠡᠪᠰᠡᠭ ᠬᠠᠮᠢᠶᠠᠷᠤᠭᠤᠯᠪᠡ᠃ ᠠᠷᠪᠠᠨ ᠲᠦᠷᠪᠡᠳᠦᠭᠡᠷ ᠤᠨ ᠳᠤ᠂ ᠬᠠᠭᠠᠨ ᠤ ᠡᠮᠦᠨ᠎ᠡ ᠶᠠᠪᠤᠬᠤ ᠶᠡᠭᠡ ᠲᠦᠰᠢᠮᠡᠯ ᠪᠤᠯᠵᠦ᠂ ᠰᠢᠯᠤᠭᠤᠨ ᠴᠠᠭᠠᠨ ᠬᠤᠰᠢᠭᠤᠨ  ᠤ ᠲᠤᠳᠤᠭᠠᠳᠦ ᠬᠢᠶ᠎ᠡ ᠨᠡᠷ ᠢ ᠵᠠᠬᠢᠷᠬᠤ ᠶᠡᠭᠡ ᠲᠦᠰᠢᠮᠡᠯ ᠪᠤᠯᠵᠦ᠂ ᠶᠢᠰᠦᠳᠦᠭᠡᠷ ᠰᠡᠷ᠎ᠡ ᠳᠤᠨᠢ ᠰᠢᠳᠡᠷ ᠲᠦᠰᠢᠮᠡᠯ ᠪᠤᠯᠪᠠ᠃ ᠠᠷᠪᠠᠨ ᠲᠠᠪᠤᠳᠤᠭᠠᠷ ᠤᠨ ᠤ ᠴᠠᠭᠠᠨ ᠰᠡᠷ᠎ᠡ ᠨᠢ ᠬᠦᠪᠡᠭᠡᠳᠦ ᠤᠯᠠᠭᠠᠨ ᠬᠤᠰᠢᠭᠤᠨ ᠤ ᠮᠤᠩᠭᠤᠯ ᠴᠡᠷᠢᠭ  ᠤᠨ ᠠᠮᠪᠠᠨ ᠲᠡᠪᠰᠢᠵᠦ᠂ ᠬᠤᠶᠠᠳᠤᠭᠠᠷ ᠰᠡᠷ᠎ᠡ ᠳᠤᠨᠢ ᠪᠦᠬᠦᠳᠡ ᠶᠢ ᠲᠠᠭᠠᠭᠤᠯᠬᠤ ᠪᠠ ᠫᠤᠤ ᠵᠡᠪᠰᠡᠭ ᠢ ᠬᠠᠮᠢᠠᠶ᠋ᠷᠬᠤ ᠰᠠᠶᠢᠳ ᠪᠤᠯᠵᠦ᠂ ᠲᠤᠯᠤᠳᠤᠭᠠᠷ ᠰᠡᠷ᠎ᠡ ᠳᠤᠨᠢ ᠴᠡᠷᠢᠭ ᠤᠨ ᠴᠡᠴᠡᠷ ᠢ ᠶᠡᠷᠦᠩᠭᠡᠶᠢᠯᠡᠨ ᠬᠠᠮᠢᠶᠠᠷᠴᠦ᠂ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠰᠡᠷ᠎ᠡ ᠳᠤᠨᠢ ᠴᠡᠷᠢᠭ ᠤᠨ ᠵᠢᠭᠰᠠᠭᠠᠯ ᠢ ᠪᠠᠶᠢᠴᠠᠭᠠᠬᠤ ᠶᠡᠭᠡ ᠲᠦᠰᠢᠮᠡᠯ ᠪᠤᠯᠪᠠ᠃ ᠠᠷᠪᠡᠨ ᠵᠢᠷᠭᠤᠳᠤᠭᠠᠷ ᠤᠨ ᠳᠤ᠂ ᠬᠦᠪᠡᠭᠡᠳᠦ ᠴᠠᠭᠠᠨ ᠬᠤᠰᠢᠭᠤᠨ ᠤ ᠮᠠᠨᠵᠦ ᠶᠢᠨ ᠴᠡᠷᠢᠭ ᠤᠨ ᠠᠮᠪᠠᠨ ᠢᠶᠠᠷ ᠲᠤᠮᠢᠯᠠᠭᠳᠡᠪᠠ ᠃ ᠠᠷᠪᠠᠨ ᠲᠤᠯᠤᠳᠤᠭᠠᠷ ᠤᠨ ᠳᠤ᠂ ᠰᠢᠷ᠎ᠡ ᠵᠢᠯᠤᠭᠤ ᠪᠠᠷ ᠱᠠᠩᠨᠠᠭᠳᠡᠪᠡ᠃ ᠬᠤᠷᠢᠨ ᠨᠢᠬᠡᠳᠦᠭᠡᠷ ᠤᠨ ᠤ ᠶᠢᠰᠦᠳᠦᠭᠡᠷ ᠰᠡᠷ᠎ᠡ ᠳᠤ᠂ ᠰᠢᠯᠤᠭᠤᠨ ᠰᠢᠷ᠎ᠡ ᠬᠤᠰᠢᠭᠤᠨ ᠤ ᠮᠠᠨᠵᠦ ᠶᠢᠨ  ᠴᠡᠷᠢᠭ ᠤᠨ ᠠᠮᠪᠠᠨ ᠪᠤᠯᠪᠠ᠃ ᠬᠤᠷᠢᠨ ᠲᠦᠷᠪᠡᠳᠦᠭᠡᠷ ᠤᠨ ᠳᠤ᠂ ᠪᠠᠷᠠᠭᠤᠨ ᠭᠠᠷ ᠤᠨ ᠬᠢᠨᠠᠭᠴᠢ᠂ ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨ ᠤ ᠮᠠᠨᠵᠦ ᠶᠢᠨ ᠴᠡᠷᠢᠭ  ᠤᠨ ᠠᠮᠪᠠᠨ ᠢᠶᠠᠷ ᠲᠤᠮᠢᠯᠠᠭᠳᠠᠪᠠ᠃ ᠬᠤᠷᠢᠨ ᠲᠡᠪᠤᠳᠤᠭᠠᠷ ᠤᠨ ᠤ ᠬᠤᠶᠠᠳᠤᠭᠠᠷ ᠰᠡᠷ᠎ᠡ ᠳᠤ᠂ ᠬᠦᠪᠡᠭᠡᠳᠦ ᠰᠢᠷ᠎ᠡ ᠬᠤᠰᠢᠭᠤᠨ ᠤ ᠲᠤᠳᠤᠭᠠᠳᠦ ᠬᠢᠶ᠎ᠡ ᠵᠢᠬᠦᠷ ᠤᠨ ᠶᠡᠭᠡ ᠲᠦᠰᠢᠮᠡᠯ ᠪᠤᠯᠪᠠ᠃ ᠬᠤᠷᠢᠨ ᠵᠢᠷᠭᠤᠳᠤᠭᠠᠷ ᠤᠨ ᠤ ᠲᠡᠪᠤᠨ ᠰᠡᠷ᠎ᠡ ᠳᠤ᠂ ᠰᠢᠯᠤᠭᠤᠨ ᠴᠠᠭᠠᠨ ᠬᠤᠰᠢᠭᠤᠨ ᠤ ᠲᠤᠳᠤᠭᠠᠳᠦ ᠬᠢᠶ᠎ᠡ ᠵᠢᠬᠦᠷ ᠤᠨ ᠶᠡᠭᠡ ᠲᠦᠰᠢᠮᠡᠯ ᠪᠤᠯᠪᠠ᠃ ᠲᠦᠷᠦ ᠬᠡᠷᠡᠯᠳᠦ ᠶᠢᠨ ᠭᠤᠴᠢᠳᠤᠭᠠᠷ ᠤᠨ ᠳᠤ᠂ ᠬᠦᠪᠡᠭᠡᠳᠦ ᠰᠢᠷ᠎ᠡ ᠬᠤᠰᠢᠭᠤᠨ ᠤ ᠮᠤᠩᠭᠤᠯ ᠴᠡᠷᠢᠭ ᠤᠨ ᠠᠮᠪᠠᠨ ᠪᠤᠯᠵᠦ᠂ ᠶᠢᠰᠦᠳᠦᠭᠡᠷ ᠰᠡᠷ᠎ᠡ ᠳᠤ᠂ ᠮᠢ ᠶᠦᠨ ᠰᠢᠶᠠᠨ ᠤ ᠮᠤ᠋ ᠵᠢᠶᠠ ᠢᠦᠢ ᠳᠤ ᠲᠡᠭᠡᠷᠡᠮ ᠰᠠᠮᠠᠭᠤᠷᠠᠭᠰᠠᠨ ᠳᠤ᠂ ᠰᠡᠩᠭᠡᠷᠢᠨᠴᠢᠨ ᠵᠠᠷᠯᠢᠭ ᠢᠶᠠᠷ ᠴᠡᠷᠢᠭ ᠲᠠᠭᠠᠭᠠᠯᠤᠨ ᠲᠡᠭᠡᠷᠡᠮ ᠢ ᠤᠰᠠᠳᠬᠠᠭᠠᠳ ᠵᠡᠬᠦᠨ ᠭᠠᠷᠤᠨ ᠰᠢᠳᠡᠷ ᠲᠦᠰᠢᠮᠡᠯ ᠪᠤᠯᠪᠠ᠃ ᠲᠤᠰ ᠵᠢᠯ ᠤᠨ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠰᠡᠷ᠎ᠡ ᠳᠤ᠂ ᠲᠦᠷᠦ ᠬᠡᠷᠡᠯᠳᠦ ᠬᠠᠭᠠᠨ ᠲᠡᠭᠡᠷᠡᠮ ᠢ ᠤᠰᠠᠳᠬᠠᠪᠠ ᠬᠡᠮᠡᠨ ᠰᠡᠩᠭᠡᠷᠢᠨᠴᠢᠨ ᠢ ᠲᠦᠷᠪᠡᠨ ᠪᠠᠭᠴᠠᠳᠦ ᠯᠤᠤᠳᠤ ᠮᠠᠩᠨᠤᠭ ᠲᠡᠪᠡᠯ ᠢᠶᠠᠷ ᠱᠠᠩᠨᠠᠵᠦ᠂ ᠪᠠᠰᠠ ᠦᠷᠬᠦᠯᠵᠢᠳᠡ ᠡᠮᠦᠰᠬᠦ ᠶᠢ  ᠨᠢ ᠵᠦᠪᠰᠢᠶᠡᠷᠡᠪᠡ᠃       ᠲᠦᠷᠦ ᠭᠡᠷᠡᠯᠳᠦ ᠬᠠᠭᠠᠨ ᠲᠠᠭᠠᠯᠠᠯ ᠪᠤᠯᠬᠤ ᠦᠶᠡᠰ ᠰᠡᠩᠭᠡᠷᠢᠨᠴᠢᠨ ᠠᠷᠪᠠᠨ ᠶᠡᠭᠡ ᠰᠠᠶᠢᠳ ᠤᠨ ᠨᠢᠬᠡ ᠨᠢ ᠪᠠᠶᠢᠪᠠ᠃      ᠲᠦᠭᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠲᠡᠷᠢᠬᠦᠨ ᠤᠨ ︵1851 ᠤᠨ︶ ᠳᠤ᠂ ᠰᠡᠩᠭᠡᠷᠢᠨᠴᠢᠨ ᠢ ᠮᠥᠨ ᠬᠠᠭᠠᠨ ᠤ ᠡᠮᠦᠨ᠎ᠡ ᠶᠠᠪᠤᠬᠤ ᠶᠡᠭᠡ ᠲᠦᠰᠢᠮᠡᠯ ᠪᠤᠯᠭᠠᠵᠦ᠂ ᠬᠠᠭᠠᠨ ᠤ ᠰᠢᠳᠡᠷ ᠬᠠᠮᠠᠭᠠᠯᠠᠭᠴᠢ ᠶᠢ ᠵᠠᠬᠢᠷᠠᠭᠤᠯᠪᠠ᠃ ᠲᠦᠭᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠬᠤᠶᠠᠳᠤᠭᠠᠷ ᠤᠨ ᠳᠤ᠂ ᠲᠦᠷᠦ ᠬᠡᠷᠡᠯᠳᠦ ᠬᠠᠭᠠᠨ ᠢ ᠤᠩᠭᠤᠨ ᠳᠤᠨᠢ ᠤᠷᠤᠰᠢᠭᠤᠯᠬᠤ  ᠶᠡᠭᠡ ᠦᠢᠯᠡ ᠶᠢ ᠬᠢᠴᠢᠶᠡᠩᠭᠦᠶᠢᠯᠡᠨ ᠬᠦᠢᠴᠡᠳᠭᠡᠪᠡ᠂ ᠡᠬᠦᠨ ᠳᠤ ᠲᠦᠭᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠪᠤᠯᠭᠤᠮᠵᠢᠳᠡᠢ ᠰᠠᠶᠢᠨ ᠬᠦᠢᠴᠡᠳᠭᠡᠪᠡ ᠭᠡᠵᠤ ᠭᠤᠷᠪᠡᠨ ᠲᠡᠰ ᠤᠨ ᠱᠠᠩ  ᠬᠠᠶᠢᠷᠠᠯᠠᠪᠠ᠃ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠭᠤᠷᠪᠡᠳᠤᠭᠠᠷ ᠤᠨ ᠤ ᠲᠡᠪᠤᠨ ᠰᠡᠷ᠎ᠡ ᠳᠤ᠂ ᠰᠡᠩᠭᠡᠷᠢᠨᠴᠢᠨ ᠵᠠᠷᠯᠢᠭ ᠢᠶᠠᠷ ᠪᠡᠬᠡᠵᠢᠩ ᠬᠤᠳᠡ ᠶᠢ ᠪᠠᠶᠢᠴᠠᠭᠠᠨ ᠬᠠᠮᠠᠭᠠᠯᠠᠬᠤ ᠦᠢᠯᠡ ᠶᠢ ᠲᠤᠰᠬᠠᠶᠢᠯᠠᠨ ᠬᠠᠷᠢᠭᠤᠴᠠᠪᠠ᠃      ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠭᠤᠷᠪᠡᠳᠤᠭᠠᠷ ᠤᠨ ᠤ ᠲᠠᠪᠤᠨ ᠰᠡᠷ᠎ᠡ ᠳᠤ᠂ ᠲᠠᠢ ᠫᠢᠩ ᠲᠢᠶᠠᠨ ᠭᠥᠸᠧ ᠲᠢᠶᠠᠨᠵᠢᠩ ︵ᠤᠳᠤ ᠶᠢᠨ ᠨᠠᠨᠵᠢᠩ︶ ᠳᠤ ᠨᠡᠶᠢᠰᠯᠡᠵᠦ᠂ ᠤᠮᠠᠷᠡᠰᠢ ᠲᠠᠶᠢᠯᠠᠬᠤ ᠴᠡᠷᠢᠭ ᠲᠤᠮᠢᠯᠠᠨ ᠾᠧᠨᠡᠨ ᠮᠤᠵᠢ ᠶᠢ ᠲᠤᠪᠳᠤᠯᠪᠡ᠃ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ᠄ ︽ᠨᠡᠶᠢᠰᠯᠡᠯ ᠪᠤᠯᠪᠠᠰᠤ ᠴᠢᠬᠤᠯᠡ ᠰᠠᠭᠤᠷᠢᠨ ᠭᠠᠵᠠᠷ᠂ ᠰᠡᠷᠬᠡᠶᠢᠯᠡᠨ ᠬᠠᠮᠠᠭᠠᠯᠠᠵᠦ ᠪᠠᠶᠢᠴᠠᠭᠠᠬᠤ ᠪᠤᠯ ᠬᠠᠮᠤᠭ ᠴᠢᠬᠤᠯᠡ︾ ᠭᠡᠵᠤ᠂ ᠰᠡᠩᠭᠡᠷᠢᠨᠴᠢᠨ ᠢ ᠵᠠᠷᠯᠢᠭᠳᠠᠨ ᠵᠡᠬᠦᠨ ᠮᠦᠷᠦ ᠶᠢᠨ ᠳ᠋ᠦ᠋ ᠢᠦᠢ ᠲᠦᠰᠢᠮᠡᠯ ᠬᠤᠸᠠᠱᠠᠨ᠎ᠠ ᠶᠢ ᠬᠠᠮᠵᠢᠨ᠂ ᠲᠤᠰᠬᠠᠶᠢᠯᠠᠨ ᠡᠯ᠎ᠡ ᠬᠤᠰᠢᠭᠤᠨ ᠤ ᠴᠡᠷᠢᠭ ᠢ ᠵᠠᠬᠢᠷᠠᠭᠤᠯᠵᠦ ᠰᠡᠷᠬᠡᠶᠢᠯᠡᠨ ᠬᠠᠮᠠᠭᠯᠠᠭᠤᠯᠪᠠ᠃ ᠰᠡᠩᠭᠡᠷᠢᠨᠴᠢᠨ ᠲᠡᠷᠡ ᠲᠡᠷᠤᠢ ᠳᠤᠨᠢ ᠰᠡᠷᠬᠡᠶᠢᠯᠡᠨ ᠬᠠᠮᠠᠭᠠᠯᠠᠬᠤ ᠲᠦᠷᠢᠮ ᠠᠷᠪᠠᠨ ᠬᠤᠶᠠᠷ ᠵᠤᠷᠪᠤᠰ ᠲᠤᠭᠤᠷᠪᠢᠨ ᠬᠠᠭᠠᠨ ᠳᠤ ᠡᠷᠬᠦᠵᠦ᠂ ᠬᠠᠭᠠᠨ ᠠᠶᠢᠯᠠᠳᠬᠠᠯ ᠢ ᠵᠦᠪᠰᠢᠶᠡᠷᠡᠨ ᠡᠯ᠎ᠡ ᠶᠠᠮᠤᠨ ᠳᠤ ᠲᠠᠷᠬᠠᠭᠠᠨ ᠬᠡᠷᠡᠭᠵᠢᠬᠦᠯᠪᠡ᠃ ᠲᠤᠰ ᠰᠡᠷ᠎ᠡ ᠳᠤᠨᠢ᠂ ᠰᠡᠩᠭᠡᠷᠢᠨᠴᠢᠨ ᠢ ᠵᠡᠷᠯᠢᠭ᠌ᠳᠠᠨ ᠨᠡᠶᠢᠰᠯᠡᠯ ᠬᠤᠳᠡ ᠶᠢ ᠲᠤᠭᠤᠷᠢᠨ ᠪᠠᠶᠢᠴᠠᠭᠠᠵᠦ ᠰᠡᠷᠬᠡᠶᠢᠯᠡᠨ ᠬᠠᠮᠠᠭᠠᠯᠠᠬᠤ ᠦᠢᠯᠡ ᠶᠢ ᠬᠦᠢᠴᠡᠳᠭᠡᠯᠭᠡᠪᠡ᠂ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠤᠨ ᠤ ᠨᠠᠢᠮᠠᠳᠤᠭᠠᠷ ᠰᠡᠷ᠎ᠡ ᠳᠤ᠂ ᠴᠢᠩ ᠤᠯᠤᠰ ᠤᠨ ᠰᠢᠭᠤᠳ ᠬᠠᠷᠢᠶᠠᠯᠠᠭᠳᠠᠬᠤ ᠪᠦᠬᠦᠳᠡ ᠶᠢ ᠵᠠᠬᠢᠷᠤᠭᠴᠢ ᠰᠠᠶᠢᠳ ᠨᠠᠷᠠᠵᠢᠩᠭᠡ ᠶᠢ ᠶᠡᠭᠡ ᠪᠠᠷ ᠢᠯᠡᠵᠦ᠂ ᠯᠢᠨ ᠮᠢᠩ ᠭᠤᠸᠠᠨ ᠢᠶᠠᠷ ᠵᠧᠩ ᠳ᠋ᠢᠩ ᠤᠷᠤᠨ ᠳᠤ ᠨᠦᠷᠢᠨ ᠤᠷᠤᠪᠡ᠃ ᠶᠢᠰᠦᠳᠦᠬᠡᠷ ᠰᠡᠷ᠎ᠡ ᠳᠤᠨᠢ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠨᠠᠷᠠᠵᠢᠩᠭᠡ ᠶᠢᠨ ᠵᠡᠷᠭᠡ ᠶᠢ ᠤᠭᠴᠠᠷᠠᠭᠤᠯᠤᠨ᠂ ᠾᠦᠢ ᠴᠢᠨ ᠸᠠᠩ ᠮᠢᠶᠠᠨ ᠢᠦᠢ ᠶᠢ ᠵᠠᠷᠯᠢᠭ ᠬᠦᠯᠢᠶᠠᠭᠰᠡᠨ ᠶᠡᠭᠡ ᠵᠠᠩᠵᠤᠨ ᠨᠡᠷᠡᠯᠡᠵᠦ᠂ ᠰᠡᠩᠭᠡᠷᠢᠨᠴᠢᠨ ᠢ ᠲᠤᠰᠠᠯᠠᠭᠴᠢ ᠰᠠᠶᠢᠳ  ᠢᠶᠠᠷ ᠲᠤᠮᠢᠯᠠᠨ᠂ ᠴᠢᠶᠠᠨ ᠴᠢᠩ ᠭᠦᠩ ᠳᠤ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ ᠢᠶᠠᠨ ᠪᠤᠭᠤᠮᠳᠡ ᠶᠢ ᠬᠠᠮᠠᠭᠠᠯᠠᠬᠤ ᠡᠬᠦᠷᠭᠡ ᠶᠢ ᠲᠤᠰᠢᠶᠠᠵᠦ᠂ ᠪᠠᠰᠠ ᠰᠡᠩᠭᠡᠷᠢᠨᠴᠢᠨ ᠳᠤ ︽ᠨᠠᠬᠤᠨᠢᠰᠦ︾ ᠢᠯᠳᠦ ᠱᠠᠩᠨᠠᠪᠠ᠃ ᠰᠡᠩᠭᠡᠷᠢᠨᠴᠢᠨ ᠵᠠᠷᠯᠢᠭ ᠬᠦᠯᠢᠶᠡᠭᠰᠡᠨ  ᠤ ᠲᠠᠷᠠᠭ᠎ᠠ ᠲᠡᠷᠡ ᠲᠠᠷᠤᠢ ᠳᠤᠨᠢ ᠡᠷᠡᠯᠬᠡᠭ ᠬᠤᠷᠴᠠ ᠬᠤᠷᠢᠶ᠎ᠡ᠂ ᠭᠠᠯ ᠵᠡᠪᠰᠡᠭ ᠤᠨ ᠬᠤᠷᠢᠶ᠎ᠡ᠂ ᠬᠤᠶᠠᠷ ᠵᠢᠬᠦᠷ ᠤᠨ ᠭᠠᠪᠰᠢᠭᠠᠢ ᠬᠤᠷᠢᠶ᠎ᠡ᠂ ᠨᠠᠢᠮᠠᠨ ᠬᠤᠰᠢᠭᠤᠨ ᠤ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠤᠨ ᠬᠤᠷᠢᠶ᠎ᠡ᠂ ᠴᠠᠭᠳᠡᠨ ᠬᠠᠮᠠᠭᠠᠯᠠᠬᠤ ᠲᠠᠪᠤᠨ ᠬᠤᠷᠢᠶ᠎ᠡ ᠪᠤᠯᠤᠨ ᠴᠠᠬᠠᠷ ᠤᠨ ᠡᠯ᠎ᠡ ᠨᠤᠶᠠᠳ ᠴᠡᠷᠢᠭ ᠢ ᠨᠢᠬᠡᠳᠦᠯᠳᠡᠢ ᠤᠳᠤᠷᠢᠳᠴᠦ᠂ ᠪᠠᠰᠠ ᠵᠢᠷᠢᠮ᠂ ᠵᠤᠰᠤᠳᠦ᠂ ᠵᠤᠤ ᠤᠳᠡ ᠵᠡᠬᠦᠨ ᠭᠤᠷᠪᠡᠨ ᠴᠢᠭᠤᠯᠭᠠᠨ ᠤ ᠮᠤᠩᠭᠤᠯ ᠤᠨ ᠤᠯᠠᠨ ᠸᠠᠩ ᠨᠡᠷ ᠲᠠᠢ ᠬᠠᠮᠳᠤ ᠪᠡᠬᠡᠵᠢᠩ ᠠᠴᠠ ᠮᠤᠷᠳᠡᠪᠡ᠃ ᠶᠢᠰᠦᠳᠦᠬᠡᠷ ᠰᠡᠷ᠎ᠡ ᠳᠤᠨᠢ ᠽᠢ ᠵᠢᠩ ᠭᠤᠸᠠᠨ ᠪᠤᠭᠤᠮᠳᠡ ᠳᠤ ᠴᠡᠷᠢᠭ ᠪᠠᠭᠤᠵᠦ ᠰᠠᠬᠢᠨ ᠬᠠᠮᠠᠭᠠᠯᠠᠪᠠ᠃ ᠠᠷᠪᠠᠳᠤᠭᠠᠷ ᠰᠡᠷ᠎ᠡ ᠳᠤᠨᠢ ᠤᠮᠠᠷᠡᠰᠢ ᠲᠠᠶᠢᠯᠠᠬᠤ ᠴᠡᠷᠢᠭ ᠼᠠᠩ ᠵᠸᠦ ᠪᠠᠷ ᠲᠠᠮᠵᠢᠨ ᠲᠢᠶᠠᠨᠵᠢᠨ ᠤ ᠤᠷᠡᠯᠴᠠᠭᠠᠬᠢ ᠵᠢᠩ ᠬᠠᠢ ᠰᠢᠶᠠᠨ ᠤ ᠳ᠋ᠦ᠋ ᠯᠢᠦ ᠵᠧᠨ ᠪᠠᠯᠭᠠᠰᠤ ᠳᠤ ᠤᠷᠤᠵᠦ᠂ ᠰᠢᠭᠤᠳ ᠲᠢᠶᠠᠨᠵᠢᠨ ᠢ ᠰᠢᠬᠠᠮᠳᠠᠭᠤᠯᠪᠠ᠃ ᠰᠡᠩᠭᠡᠷᠢᠨᠴᠢᠨ ᠴᠢᠩ ᠤᠯᠤᠰ ᠤᠨ ᠴᠡᠷᠢᠭ ᠢ ᠲᠠᠶᠢᠴᠢᠯᠠᠨ ᠲᠢᠶᠠᠨᠵᠢᠨ ᠤ ᠡᠮᠦᠨᠡᠬᠢ ᠸᠠᠩ ᠴᠢᠩ ᠲᠦᠸᠧ ᠳᠤ ᠦᠳᠳᠡᠷ ᠲᠦᠷᠭᠡᠨ ᠬᠦᠷᠴᠦ᠂ ᠤᠮᠠᠷᠡᠰᠢ ᠲᠠᠶᠢᠯᠠᠬᠤ ᠴᠡᠷᠢᠭ ᠲᠠᠢ ᠰᠢᠷᠦᠬᠦᠨ ᠪᠠᠶᠢᠳᠤᠭᠰᠡᠨ ᠳᠤ᠂ ᠤᠮᠠᠷᠡᠰᠢ ᠲᠠᠶᠢᠯᠠᠬᠤ ᠴᠡᠷᠢᠭ ᠶᠡᠬᠡᠳᠡ ᠬᠤᠬᠢᠷᠡᠨ᠂ ᠯᠢᠶᠠᠨ ᠵᠧᠨ ᠤᠷᠴᠢᠮ ᠤᠬᠤᠷᠢᠪᠡ᠃ ᠡᠬᠦᠨ ᠳᠤ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠰᠡᠩᠭᠡᠷᠢᠨᠴᠢᠨ ᠳᠤ ︽ᠬᠤᠷᠴᠠ ᠪᠠᠭᠠᠳᠤᠷ︾ ᠴᠤᠯᠠ ᠬᠠᠶᠢᠷᠡᠯᠡᠪᠡ᠃ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠲᠦᠷᠪᠡᠳᠦᠭᠡᠷ ᠤᠨ ᠤ ᠨᠠᠢᠮᠠᠨ ᠰᠡᠷ᠎ᠡ ᠳᠤ᠂ ᠰᠡᠩᠭᠡᠷᠢᠨᠴᠢᠨ ᠢᠶᠠᠷ ᠹᠧᠩ ᠬᠤᠸᠠᠨ ᠶᠤᠸᠠᠨ ᠤ ᠬᠡᠷᠡᠭ ᠢ ᠬᠠᠮᠢᠶᠠᠷᠤᠭᠤᠯᠪᠠ᠃ ᠲᠤᠰ ᠵᠢᠯ ᠳᠤᠨᠢ ᠰᠡᠩᠭᠡᠷᠢᠨᠴᠢᠨ ᠯᠢᠶᠠᠨ ᠵᠧᠨ ᠪᠠᠯᠭᠠᠰᠤᠨ ᠳᠤ ᠠᠷᠭ᠎ᠠ ᠪᠠᠷ ᠤᠮᠠᠷᠡᠰᠢ ᠲᠠᠶᠢᠯᠠᠬᠤ ᠴᠡᠷᠢᠭ ᠢ ᠶᠡᠬᠡᠳᠡ ᠢᠯᠡᠵᠦ᠂ ᠴᠡᠷᠢᠭ ᠤᠨ ᠲᠦᠷᠦᠬᠦᠦ ᠯᠢᠨ ᠹᠧᠩ ᠰᠢᠶᠠᠩ ᠢ ᠪᠠᠷᠢᠪᠴᠢᠯᠡᠨ᠂ ᠲᠦᠮᠡ ᠢᠯᠡᠬᠦᠦ ᠴᠡᠷᠢᠭ ᠢ ᠪᠦᠬᠦᠨ ᠢ ᠤᠰᠠᠳᠬᠠᠪᠠ᠃ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠲᠠᠪᠤᠳᠤᠭᠠᠷ ᠤᠨ ᠤ ᠴᠠᠭᠠᠨ ᠰᠡᠷ᠎ᠡ ᠳᠤ᠂ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠰᠡᠩᠭᠡᠷᠢᠨᠴᠢᠨ ᠢ ︽ᠪᠤᠳᠤᠯᠭᠠᠳᠦ ᠴᠢᠨ ᠸᠠᠩ︾ ᠭᠡᠵᠤ ᠬᠦᠨᠳᠦ ᠡᠷᠬᠦᠮᠵᠢᠯᠡᠵᠦ᠂ ᠪᠠᠰᠠ ᠦᠪᠡᠷ  ᠤᠨ ᠪᠡᠶ᠎ᠡ ᠪᠠᠷ ᠢᠶᠠᠨ ᠲᠤᠬᠤᠨᠢᠭᠤᠯᠵᠦ᠂ ᠲᠦᠷᠦ ᠶᠢᠨ ᠰᠤᠪᠤᠳ ᠨᠢᠬᠡ ᠬᠡᠯᠯᠬᠢᠶ᠎ᠡ᠂ ᠲᠦᠷᠪᠡᠨ ᠪᠠᠭᠴᠠᠳᠦ ᠯᠤᠤᠳᠦ ᠮᠠᠩᠨᠤᠭ ᠲᠡᠪᠡᠯ ᠨᠢᠬᠡ ᠵᠠᠬ᠎ᠠ ᠱᠠᠩᠨᠠᠪᠠ᠃ ᠲᠦᠷᠪᠡᠨ ᠰᠡᠷ᠎ᠡ ᠶᠢᠨ ᠠᠷᠪᠠᠨ ᠨᠠᠢᠮᠠᠨ ᠳᠤ᠂ ᠦᠶ᠎ᠡ ᠤᠯᠠᠷᠢᠨ ᠵᠠᠯᠭᠠᠮᠵᠢᠯᠠᠬᠤ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠃ ᠲᠡᠪᠤᠨ ᠰᠡᠷ᠎ᠡ ᠳᠤᠨᠢ ᠲᠡᠬᠦᠨ ᠤ ᠲᠦᠷᠦᠭᠰᠡᠨ ᠡᠴᠢᠬᠡ ᠶᠢ ᠲᠦᠷᠪᠡᠳᠦᠭᠡᠷ ᠲᠡᠰ ᠤᠨ ᠪᠢᠴᠢ ︵ᠲᠠᠶᠢᠵᠢ︶ ᠠᠴᠠ ᠨᠢ ᠪᠠᠶᠢᠰᠠ ᠪᠠᠷ ᠨᠡᠬᠡᠮᠵᠢᠯᠡᠨ ᠡᠷᠬᠦᠮᠵᠢᠯᠡᠪᠡ᠃     ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠲᠠᠪᠤᠳᠤᠭᠠᠷ ᠤᠨ ᠳᠤ᠂ ᠰᠡᠩᠭᠡᠷᠢᠨᠴᠢᠨ ᠵᠠᠷᠯᠢᠭ ᠬᠦᠯᠢᠶᠡᠨ ᠴᠢᠩ ᠤᠯᠤᠰ ᠤᠨ ᠴᠡᠷᠢᠭ ᠢ ᠲᠠᠶᠢᠴᠢᠯᠠᠨ ᠭᠤᠤ ᠲᠠᠩ ᠵᠸᠤ ᠬᠦᠷᠴᠦ᠂ ᠤᠮᠠᠷᠡᠰᠢ ᠲᠠᠶᠢᠯᠠᠬᠤ ᠴᠡᠷᠢᠭ ᠯᠢ ᠺᠠᠢ ᠹᠠᠩ ᠤᠨ ᠬᠡᠰᠡᠭ ᠢ ᠪᠦᠰᠡᠯᠡᠨ ᠲᠠᠭᠠᠷᠢᠪᠡ᠃ ᠰᠡᠩᠭᠡᠷᠢᠨᠴᠢᠨ ᠠᠷᠭ᠎ᠠ ᠪᠠᠷ ᠤᠮᠠᠷᠡᠰᠢ ᠲᠠᠶᠢᠯᠠᠬᠤ ᠴᠡᠷᠢᠭ ᠢ ᠭᠤᠤ ᠲᠡᠩ ᠵᠸᠦ ᠠᠴᠠ ᠤᠬᠤᠷᠢᠭᠤᠯᠤᠨ ᠡᠮᠦᠨᠡᠰᠢ ᠰᠢᠯᠵᠢᠬᠦᠯᠵᠦ᠂ ᠪᠠᠰᠠ ᠴᠢᠩ ᠤᠯᠤᠰ ᠤᠨ ᠴᠡᠷᠢᠭ ᠢᠶᠠᠨ ᠲᠠᠶᠢᠴᠢᠯᠠᠨ ᠷᠧᠨ ᠫᠢᠩ ᠰᠢᠶᠠᠨ  ᠤ ᠹᠧᠩ ᠭᠤᠸᠠᠨ ᠲᠦᠨ ᠳᠤ ᠤᠮᠠᠷᠡᠰᠢ ᠲᠠᠶᠢᠯᠠᠬᠤ ᠴᠡᠷᠢᠭ ᠢ ᠪᠦᠰᠡᠯᠡᠵᠦ᠂ ᠴᠡᠷᠢᠭ ᠲᠤᠮᠢᠯᠠᠨ ᠰᠤᠪᠠᠭ ᠮᠠᠯᠳᠠᠭᠤᠯᠵᠦ ᠲᠠᠳᠠᠮᠠᠯ ᠭᠤᠤᠯ ᠤᠨ ᠤᠰᠤ ᠶᠢ ᠲᠠᠳᠡᠨ ᠤᠮᠠᠷᠡᠰᠢ ᠲᠠᠶᠢᠯᠠᠬᠤ ᠴᠡᠷᠢᠭ ᠤᠨ ᠴᠡᠷᠢᠭ ᠤᠨ ᠬᠤᠷᠢᠶ᠎ᠡ ᠳᠤ ᠤᠷᠤᠭᠤᠯᠵᠦ᠂ ᠪᠠᠰᠠ ᠮᠤᠷᠢᠳᠦ ᠴᠡᠷᠢᠭ ᠢᠶᠠᠷ ᠬᠠᠮᠵᠢᠭᠤᠯᠤᠨ ᠭᠠᠯᠯᠠᠭᠰᠠᠨ ᠠᠴᠠ ᠤᠮᠠᠷᠡᠰᠢ ᠲᠠᠶᠢᠯᠠᠬᠤ ᠴᠡᠷᠢᠭ ᠢᠯᠠᠭᠳᠡᠵᠦ᠂ ᠯᠢ ᠺᠠᠢ ᠹᠠᠩ ᠨᠡᠷ ᠪᠠᠷᠢᠪᠴᠢᠯᠠᠭᠳᠠᠪᠠ᠃ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠴᠢᠨ ᠵᠧᠩ ᠳ᠋ᠢᠶᠠᠨ ᠤᠷᠳᠤᠨ ᠳᠤ ᠶᠡᠭᠡ ᠬᠤᠷᠢᠮ ᠲᠠᠯᠪᠢᠨ ᠰᠡᠩᠭᠡᠷᠢᠨᠴᠢᠨ ᠪᠤᠯᠤᠨ ᠪᠦᠬᠦᠳᠡ ᠵᠠᠩᠵᠤᠨ ᠴᠡᠷᠢᠭ ᠢ ᠬᠦᠨᠳᠦ ᠪᠠᠷ ᠲᠠᠶᠢᠯᠠᠨ ᠱᠠᠩᠨᠠᠵᠦ᠂ ᠪᠠᠰᠠ ᠬᠠᠭᠠᠨ ᠤ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠰᠡᠩᠭᠡᠷᠢᠨᠴᠢᠨ ᠳᠤ ᠵᠢᠯ ᠤᠨ ᠹᠦᠩᠯᠦ ᠶᠢ ᠨᠢ ᠲᠠᠬᠢᠨ ᠢᠶᠠᠷ ᠨᠡᠮᠡᠵᠦ ︵ᠤᠤᠯ ᠳᠠᠭᠠᠨ ᠵᠢᠯ ᠤᠨ ᠹᠦᠩᠯᠦ ᠨᠢ ᠬᠤᠶᠠᠷ ᠮᠢᠩᠭ᠎ᠠ ᠲᠠᠪᠤᠨ ᠵᠠᠭᠤᠨ ᠯᠠᠩ  ᠪᠡᠶᠢᠵᠡᠢ︶ ᠦᠭᠪᠡ᠃ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠲᠤᠯᠤᠳᠤᠭᠠᠷ ᠤᠨ ᠤ ᠲᠠᠪᠤᠨ ᠰᠡᠷ᠎ᠡ ᠳᠤ᠂ ᠰᠡᠩᠭᠡᠷᠢᠨᠴᠢᠨ ᠢ ᠬᠦᠪᠡᠬᠡᠳᠦ ᠤᠯᠠᠭᠠᠨ ᠬᠤᠰᠢᠭᠤᠨ ᠤ ᠬᠢᠳᠡᠳ ᠴᠡᠷᠢᠭ ᠤᠨ ᠠᠮᠪᠠᠨ ᠡᠷᠬᠦᠮᠵᠢᠯᠡᠪᠡ᠃    ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠨᠠᠢᠮᠠᠳᠤᠭᠠᠷ ᠤᠨ ᠳᠤ᠂ ᠪᠦᠬᠦᠳᠡ ᠶᠢ ᠵᠠᠬᠢᠷᠤᠭᠴᠢ ᠲᠠᠨ ᠲᠢᠩ ᠰᠢᠶᠠᠩ ᠪᠤᠯᠤᠨ ᠲᠤᠮᠢᠩᠭ᠎ᠠ ᠲᠢᠶᠠᠨᠵᠢᠨ ᠤ ᠳ᠋ᠠᠭᠦ᠋ ᠪᠤᠭᠤᠮᠳᠡ ᠶᠢ ᠰᠡᠷᠬᠡᠶᠢᠯᠡᠨ ᠰᠠᠬᠢᠵᠦ ᠪᠠᠶᠢᠵᠡᠢ᠂ ᠬᠡᠪᠡᠴᠦ ᠰᠡᠷᠬᠡᠶᠢᠯᠡᠯᠳᠡ ᠰᠤᠯᠡ ᠮᠦᠷᠳᠡᠭᠡᠨ ᠲᠠᠶᠢᠨ ᠤ ᠠᠵᠠ ᠲᠤᠬᠢᠶᠠᠯ ᠢ ᠠᠯᠳᠠᠭᠰᠠᠨ ᠠᠴᠠ ᠲᠦᠷᠦᠬᠦᠦ ᠤᠳᠠᠭᠠᠨ ᠤ ᠳ᠋ᠠᠭᠦ᠋ ᠶᠢᠨ ᠲᠠᠶᠢᠨ ᠢᠯᠠᠭᠳᠠᠵᠦ᠂ ᠭᠠᠳᠠᠭᠠᠳᠦ ᠶᠢᠨ ᠲᠦᠷᠢᠮᠡᠬᠡᠶᠢᠯᠡᠭᠴᠢᠳ ᠤᠨ ᠶᠤᠰᠤ ᠪᠤᠰᠤ ᠱᠠᠭᠠᠷᠳᠠᠯᠭ᠎ᠠ ᠶᠢ ᠬᠦᠯᠢᠶᠠᠨ ᠠᠪᠤᠪᠡ᠃ ᠵᠢᠷᠭᠤᠳᠤᠭᠠᠷ ᠰᠡᠷ᠎ᠡ ᠳᠤᠨᠢ᠂ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠡᠪᠰᠡᠬᠦ ᠡᠳᠡᠬᠡᠳ ᠤᠨ ᠡᠷᠬᠢᠨ ᠰᠠᠶᠢᠳ ᠭᠦᠢ ᠯᠢᠶᠠᠩ᠂ ᠬᠤᠸᠠᠱᠠᠨᠠ ᠶᠢ ᠲᠤᠮᠢᠯᠠᠨ ᠠᠩᠭ᠍ᠯᠢ ᠶᠢᠨ ᠪᠦᠷᠢᠨ ᠡᠷᠬᠡᠳᠦ ᠲᠦᠯᠦᠬᠡᠯᠡᠭᠴᠢ ᠡᠷᠵᠢᠨ ᠲᠠᠢ ᠲᠢᠶᠠᠨᠵᠢᠨ ᠳᠤ ︽ᠲᠢᠶᠠᠨᠵᠢᠨ ᠤ ᠬᠡᠷ᠎ᠡ︾ ᠲᠤᠭᠳᠡᠪᠡ᠃ ᠰᠡᠩᠭᠡᠷᠢᠨᠴᠢᠨ ᠡᠨᠡᠬᠦ ᠴᠢᠮᠡᠭᠡ ᠶᠢ ᠰᠤᠨᠤᠰᠤᠭᠰᠠᠨ ᠤ ᠲᠠᠷᠠᠭ᠎ᠠ ᠲᠡᠷᠡ ᠲᠠᠷᠤᠢ  ᠳᠤᠨᠢ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠳᠤ ᠠᠶᠢᠯᠠᠳᠬᠠᠯ ᠲᠡᠪᠰᠢᠬᠦᠯᠵᠦ᠂ ᠬᠡᠯᠡᠯᠴᠡᠭᠡᠷ ᠬᠢᠭᠰᠡᠨ ᠲᠦᠯᠦᠬᠡᠯᠡᠭᠴᠢ ᠶᠢ ᠡᠷᠡᠰ ᠪᠤᠴᠠᠭᠠᠨ ᠢᠷᠡᠬᠦᠯᠵᠦ᠂ ᠪᠦᠬᠦ ᠤᠯᠤᠰ ᠤᠨ ᠴᠡᠷᠢᠭ ᠢ ᠲᠠᠶᠢᠴᠢᠯᠠᠨ᠂ ᠠᠮᠤ ᠬᠦᠨᠡᠰᠦ ᠪᠡᠯᠡᠳᠭᠡᠵᠦ᠂ ᠴᠡᠷᠢᠭ ᠠᠩᠭᠢ  ᠪᠠᠨ ᠴᠡᠭᠴᠡᠯᠡᠨ᠂ ᠭᠠᠳᠠᠭᠠᠳᠦ ᠶᠢᠨ ᠲᠦᠷᠢᠮᠡᠬᠡᠶᠢᠯᠡᠭᠴᠢᠳ ᠢ ᠬᠦᠬᠡᠬᠡᠵᠦ ᠭᠠᠷᠭᠠᠬᠤ ᠶᠢ ᠱᠠᠭᠠᠷᠳᠡᠪᠡ᠃  ᠲᠤᠬᠠᠢ ᠶᠢᠨ ᠴᠠᠭ ᠮᠦᠴᠠ ᠳᠤ ᠴᠢᠩ ᠤᠨ ᠲᠦᠷᠦ ᠳᠤ ᠡᠪᠰᠡᠬᠦ ᠪᠦᠯᠦᠭ ᠲᠠᠪᠠᠭᠤ ᠪᠠᠶᠢᠷᠢ ᠶᠢ ᠡᠵᠡᠯᠡᠵᠦ ᠪᠠᠶᠢᠭᠰᠠᠨ ᠠᠴᠠ ᠰᠡᠩᠭᠡᠷᠢᠨᠴᠢᠨ ᠤ ᠰᠢᠳᠦᠷᠭᠤ ᠲᠦᠰᠢᠮᠡᠯ ᠤᠯᠤᠰ ᠢᠶᠠᠨ ᠬᠠᠮᠠᠭᠠᠯᠠᠬᠤ ᠠᠷᠭ᠎ᠠ ᠪᠤᠳᠤᠯᠭ᠎ᠠ ᠬᠡᠷᠡᠭᠯᠡᠭᠳᠡᠭᠰᠡᠨ ᠦᠭᠡᠢ ᠪᠠᠶᠢᠵᠡᠢ᠃ ᠶᠢᠰᠦᠳᠦᠭᠡᠷ ᠤᠨ ᠤ ᠲᠦᠷᠪᠡᠨ ᠰᠡᠷ᠎ᠡ   ᠳᠤ᠂ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠰᠡᠩᠭᠡᠷᠢᠨᠴᠢᠨ ᠢ ᠲᠢᠶᠠᠨᠵᠢᠨ  ᠳᠤ ᠲᠤᠮᠢᠯᠡᠵᠦ᠂ ᠪᠠᠶᠢᠴᠠᠭᠠᠭᠴᠢ ᠲᠦᠰᠢᠮᠡᠯ ᠪᠤᠯᠭᠠᠵᠦ ᠳ᠋ᠠᠭᠦ᠋ ᠭᠠᠷᠡᠮ ᠪᠤᠯᠤᠨ ᠪᠡᠭᠡᠵᠢᠩ ᠤᠨ ᠵᠡᠬᠦᠨᠳᠡᠬᠢ ᠶᠢ ᠰᠠᠬᠢᠨ ᠬᠠᠮᠠᠭᠠᠯᠠᠭᠤᠯᠪᠡ᠃ ᠰᠡᠩᠭᠡᠷᠢᠨᠴᠢᠨ ᠳ᠋ᠠᠬᠦ᠋ ᠭᠠᠷᠡᠮ ᠳᠤ ᠬᠦᠷᠦᠭᠰᠡᠨ ᠤ ᠲᠠᠷᠠᠭ᠎ᠠ᠂ ᠲᠦᠷᠦᠬᠦᠦ ᠤᠳᠠᠭ᠎ᠠ ᠶᠢᠨ ᠲᠠᠶᠢᠨ  ᠤ ᠢᠯᠠᠭᠳᠠᠯ ᠠᠴᠠ ᠰᠤᠷᠭᠠᠮᠵᠢ ᠠᠪᠴᠦ᠂ ᠳ᠋ᠠᠬᠦ᠋ ᠶᠢᠨ ᠲᠠᠯᠠᠢ ᠶᠢᠨ ᠭᠠᠷᠡᠮ ᠪᠤᠯᠤᠨ ᠱᠤᠸᠠᠩ ᠭᠠᠩ ᠤᠨ ᠬᠠᠮᠠᠭᠠᠯᠠᠯᠳᠡ ᠶᠢᠨ ᠪᠠᠷᠢᠯᠭ᠎ᠠ ᠶᠢ ᠢᠳᠡᠪᠬᠢᠳᠡᠢ ᠭᠡᠷᠡᠭᠵᠢᠬᠦᠯᠵᠦ᠂ ᠴᠡᠷᠢᠭ ᠠᠩᠭᠢ ᠪᠠᠨ ᠴᠡᠭᠴᠡᠯᠡᠨ ᠲᠦᠷᠢᠮᠡᠬᠡᠶᠢᠯᠡᠭᠴᠢᠳ ᠢ ᠡᠰᠡᠷᠬᠦᠴᠡᠬᠦ ᠠᠯᠢᠪᠡ ᠪᠡᠯᠡᠳᠭᠡᠯ ᠠᠵᠢᠯ ᠢ ᠰᠠᠶᠢᠳᠦᠷ ᠬᠢᠪᠡ᠃ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠶᠢᠰᠦᠳᠦᠭᠡᠷ ᠤᠨ ᠤ ᠵᠢᠷᠭᠤᠭᠠᠨ ᠰᠡᠷ᠎ᠡ ᠳᠤ᠂ ᠠᠩᠭ᠍ᠯᠢ ᠹᠷᠠᠨᠼᠢ ᠶᠢᠨ ᠰᠢᠨ᠎ᠡ ᠲᠤᠮᠢᠯᠠᠭᠰᠠᠨ ᠲᠤᠮᠳᠡᠳᠦ ᠳᠤ ᠰᠠᠭᠤᠭ᠎ᠠ ᠡᠯᠴᠢᠨ ᠰᠠᠶᠢᠳ ᠫᠷᠦ᠋ᠰ᠂ ᠪᠧᠷᠪᠧᠯᠦᠨ ᠪᠦᠬᠦᠳᠡ ᠬᠦᠯᠬᠡ ᠤᠩᠭᠤᠴᠠᠳᠦ ᠴᠡᠷᠢᠭ ᠢᠶᠠᠨ ᠲᠠᠭᠠᠭᠤᠯᠤᠨ ᠤᠰᠤᠨ ᠵᠠᠮ  ᠢᠶᠠᠷ ᠤᠮᠠᠷᠡᠰᠢ ᠴᠢᠭᠯᠡᠪᠡ᠃ ᠡᠨᠡᠬᠦ ᠰᠠᠯᠪᠤᠷᠢ ᠬᠦᠯᠬᠡ ᠤᠩᠭᠤᠴᠠᠳᠦ ᠴᠡᠷᠢᠭ ᠠᠩᠭᠢ ᠨᠢ ᠨᠢᠬᠡᠨ ᠲᠠᠯᠠᠢ ᠴᠠᠭᠳᠠᠬᠤ ᠤᠩᠭᠤᠴᠠ ᠪᠤᠯᠤᠨ ᠠᠷᠪᠠᠨ ᠭᠤᠷᠪᠡᠨ ᠫᠤᠤᠳᠦ ᠤᠩᠭᠤᠴᠠ ᠪᠠᠷ ᠪᠦᠷᠢᠯᠳᠦᠪᠡ᠃ ᠲᠡᠳᠡ ᠲᠢᠶᠠᠨᠵᠢᠨ ᠤ ᠳ᠋ᠡᠬᠦ᠋ ᠭᠠᠷᠡᠮ ᠬᠦᠷᠦᠬᠡᠳ᠂ ᠲᠤᠮᠳᠡᠳᠦ ᠶᠢᠨ ᠴᠡᠷᠢᠭ ᠠᠩᠭᠢ ᠶᠢᠨ ᠰᠡᠷᠬᠡᠶᠢᠯᠡᠯᠳᠡ ᠶᠢ ᠪᠠᠰᠤᠮᠵᠢᠯᠡᠵᠦ᠂ ᠲᠤᠮᠳᠡᠳᠦ ᠤᠯᠤᠰ ᠤᠨ ᠴᠡᠷᠢᠭ ᠠᠩᠭᠢ ᠶᠢᠨ ᠢᠳᠬᠠᠯ ᠪᠤᠯᠤᠨ ᠰᠡᠷᠡᠮᠵᠢᠯᠡᠬᠦᠯᠦᠯ ᠢ ᠦᠯᠦ ᠬᠠᠶᠢᠬᠤᠷᠤᠨ᠂ ᠲᠤᠮᠳᠡᠳᠦ ᠤᠯᠤᠰ ᠤᠨ ᠴᠡᠷᠢᠭ  ᠤᠨ ᠰᠡᠷᠬᠡᠶᠢᠯᠡᠯᠳᠡ ᠶᠢᠨ ᠤᠷᠤᠨ ᠪᠤᠯᠬᠤ ᠳ᠋ᠡᠬᠦ᠋ ᠭᠠᠷᠡᠮ ᠳᠤ ᠢᠯᠡ ᠪᠠᠷ ᠲᠠᠭᠠᠷᠢᠨ ᠤᠷᠤᠭᠠᠳ ᠲᠤᠮᠳᠡᠳᠦ ᠤᠯᠤᠰ  ᠤᠨ ᠴᠡᠷᠢᠭ ᠪᠠᠶᠢᠯᠳᠤᠭᠴᠢᠳ ᠤᠨ ᠬᠤᠷᠤᠰᠦᠯ ᠢ ᠲᠤᠶᠢᠯ ᠤᠨ ᠶᠡᠭᠡ ᠪᠠᠷ ᠲᠡᠭᠳᠡᠭᠡᠵᠦ᠂ ᠰᠡᠩᠭᠡᠷᠢᠨᠴᠢᠨ ᠲᠦᠷᠢᠮᠡᠬᠡᠶᠢᠯᠡᠭᠴᠢᠳ ᠢ ᠡᠷᠡᠰ ᠡᠰᠡᠷᠬᠦᠴᠡᠬᠦ ᠲᠠᠶᠢᠨ ᠤ ᠵᠠᠷᠯᠢᠭ ᠪᠠᠭᠤᠯᠭᠠᠨ᠂ ᠨᠢᠬᠡ ᠰᠦᠨᠢ ᠨᠢᠬᠡ ᠡᠳᠦᠷ ᠤᠨ ᠰᠢᠷᠦᠬᠦᠨ ᠲᠠᠶᠢᠯᠠᠯᠳᠤᠭᠠᠨ ᠢᠶᠠᠷ ᠲᠠᠮᠵᠢᠭᠠᠳ᠂ ᠠᠩᠭ᠍ᠯᠢ ᠴᠡᠷᠢᠭ ᠤᠨ ᠵᠢᠷᠭᠤᠭᠠᠨ ᠫᠤᠤᠳᠦ ᠤᠩᠭᠤᠴᠠ ᠨᠢ ᠪᠠᠶᠢᠯᠳᠦᠵᠦ ᠴᠢᠳᠠᠬᠤ ᠦᠭᠡᠢ ᠪᠤᠯᠳᠡᠯ᠎ᠡ ᠴᠤᠬᠢᠭᠳᠠᠵᠦ᠂ ᠡᠬᠦᠨ ᠳᠤ ᠲᠦᠷᠪᠡᠨ ᠤᠩᠭᠤᠴᠠ ᠨᠢ  ᠵᠢᠪᠪᠦᠵᠦ᠂ ᠬᠤᠷᠢᠨ ᠲᠠᠪᠤᠨ ᠤᠰᠤᠴᠢᠨ ᠪᠤᠯᠤᠨ ᠵᠢᠷᠡᠨ ᠲᠦᠷᠪᠡᠨ ᠲᠠᠯᠠᠢ ᠶᠢᠨ ᠴᠡᠷᠢᠭ ᠤᠨ ᠬᠠᠭᠤᠷᠡᠢ ᠳᠤ ᠪᠠᠶᠢᠯᠳᠤᠬᠤ ᠴᠡᠷᠢᠭ  ᠨᠢ ᠠᠯᠠᠭᠳᠠᠵᠦ᠂ ᠶᠢᠷᠡᠨ ᠭᠤᠷᠪᠡᠨ ᠤᠰᠤᠴᠢᠨ ᠪᠤᠯᠤᠨ ᠬᠤᠶᠠᠷ ᠵᠠᠭᠤ ᠲᠠᠪᠢᠨ ᠲᠠᠯᠠᠢ ᠶᠢᠨ ᠴᠡᠷᠢᠭ ᠤᠨ ᠬᠠᠭᠤᠷᠡᠢ  ᠳᠤ ᠪᠠᠶᠢᠯᠳᠤᠬᠤ ᠴᠡᠷᠢᠭ ᠨᠢ ᠰᠢᠷᠬᠠᠳᠡᠨ᠂ ᠦᠬᠦᠵᠦ ᠰᠢᠷᠬᠠᠳᠠᠭᠰᠠᠨ ᠪᠦᠬᠦ ᠲᠤᠭ᠎ᠠ ᠨᠢ ᠲᠦᠷᠪᠡᠨ ᠵᠠᠭᠤ ᠭᠤᠴᠢᠨ ᠲᠦᠷᠪᠡ ᠬᠦᠷᠴᠦ᠂ ᠹᠷᠠᠨᠼᠢ ᠶᠢᠨ ᠴᠡᠷᠢᠭ ᠤᠨ ᠦᠬᠦᠵᠦ ᠰᠢᠷᠬᠠᠳᠠᠭᠰᠠᠨ ᠲᠤᠭ᠎ᠠ ᠨᠢ ᠬᠠᠭᠤᠷᠡᠢ ᠳᠤ ᠪᠠᠶᠢᠯᠳᠤᠬᠤ ᠠᠩᠭᠢ ᠶᠢᠨ ᠴᠡᠷᠢᠭ ᠤᠨ ᠬᠠᠭᠠᠰ ᠲᠤᠭ᠎ᠠ ᠶᠢ ᠡᠵᠡᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠠᠩᠭ᠍ᠯᠢ ᠶᠢᠨ ᠲᠠᠯᠠᠢ ᠶᠢᠨ ᠴᠡᠷᠢᠭ ᠤᠨ ᠰᠧᠯᠢᠩ ᠾᠧ ᠪᠧ ᠬᠦᠨᠳᠦ ᠰᠢᠷᠬᠠᠳᠡᠵᠡᠢ᠃ ᠡᠨᠡ ᠤᠳᠠᠭᠠᠨ ᠤ ᠳ᠋ᠡᠭᠦ᠋ ᠭᠠᠷᠠᠮ ᠤᠨ ᠬᠠᠮᠠᠭᠠᠯᠠᠯᠳᠡ ᠶᠢᠨ ᠲᠠᠶᠢᠨ ᠨᠢ ᠮᠢᠩᠭ᠎ᠠ ᠨᠠᠢᠮᠠᠨ ᠵᠠᠭᠤ ᠲᠦᠴᠢᠨ ᠤᠨ ᠳᠤ ᠦᠷᠦᠨᠡᠳᠡᠬᠢᠨ ᠤ ᠬᠦᠷᠦᠩᠭᠡᠳᠡᠨ ᠠᠩᠭᠢ ᠶᠢᠨ ᠵᠡᠪᠰᠡᠭᠳᠦ ᠬᠦᠴᠦᠨ ᠲᠦᠷᠢᠮᠡᠬᠡᠶᠢᠯᠡᠨ ᠤᠷᠤᠵᠦ ᠢᠷᠡᠭᠰᠡᠨ ᠠᠴᠠ ᠨᠠᠰᠢᠬᠢ᠂ ᠲᠤᠮᠳᠡᠳᠦ ᠤᠯᠤᠰ ᠤᠨ ᠴᠡᠷᠢᠭ ᠠᠩᠭᠢ ᠶᠢᠨ ᠠᠩᠬᠠᠳᠠᠭᠴᠢ ᠤᠳᠠᠭᠠᠨ ᠤ ᠲᠤᠮᠤ ᠢᠯᠠᠯᠳᠡ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠡᠨᠡ ᠤᠳᠠᠭᠠᠨ ᠤ ᠲᠠᠶᠢᠨ ᠤ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠭᠴᠢ ᠪᠤᠯᠤᠨ ᠵᠢᠯᠤᠭᠤᠳᠤᠭᠴᠢ ᠨᠢ ᠪᠤᠯᠤᠭᠰᠡᠨ ᠰᠡᠩᠭᠡᠷᠢᠨᠴᠢᠨ ᠮᠠᠨ ᠤ ᠤᠯᠤᠰ ᠤᠨ ᠲᠤᠰᠠᠭᠠᠷ ᠲᠤᠭᠳᠠᠨᠢᠯ ᠪᠤᠯᠤᠨ  ᠨᠡᠷ᠎ᠡ ᠲᠦᠷᠦ ᠶᠢ ᠬᠠᠮᠠᠭᠠᠯᠠᠬᠤ ᠳᠤ ᠪᠠᠯᠠᠷᠡᠰᠢ ᠦᠭᠡᠢ ᠭᠠᠪᠢᠶ᠎ᠠ ᠵᠢᠳᠬᠦᠯ ᠦᠵᠡᠬᠦᠯᠪᠡ᠃ ᠴᠢᠩ ᠤᠨ ᠲᠦᠷᠦ ᠠᠴᠠ ᠲᠠᠶᠢᠯᠠᠢ  ᠶᠢᠨ ᠰᠡᠷᠬᠡᠶᠢᠯᠡᠯᠳᠡ ᠪᠤᠯᠤᠨ ᠭᠠᠳᠠᠭᠠᠳᠦ ᠶᠢᠨ ᠲᠦᠷᠢᠮᠡᠬᠡᠶᠢᠯᠡᠯ ᠢ ᠡᠰᠡᠷᠬᠦᠴᠡᠬᠦ ᠲᠠᠶᠢᠨ ᠳᠤ ᠭᠠᠪᠢᠶ᠎ᠠ ᠪᠠᠶᠢᠭᠤᠯᠤᠭᠰᠠᠨ ᠵᠠᠩᠵᠤᠨ ᠴᠡᠷᠢᠭ ᠢ ᠶᠡᠭᠡ ᠪᠠᠷ ᠱᠠᠩᠨᠠᠪᠠ᠃ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠰᠡᠷ᠎ᠡ ᠳᠤ᠂ ᠰᠡᠩᠭᠡᠷᠢᠨᠴᠢᠨ ᠪᠡᠬᠡᠵᠢᠩ ᠳᠤ ᠪᠤᠴᠠᠨ ᠠᠵᠢᠯ ᠢᠶᠠᠨ ᠬᠠᠷᠢᠭᠤ ᠮᠡᠳᠡᠬᠦᠯᠦᠭᠰᠡᠨ ᠳᠤ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠰᠢᠷ᠎ᠡ ᠬᠦᠷᠮ᠎ᠡ ᠱᠠᠩᠨᠠᠵᠡᠢ᠃ ᠲᠠᠷᠠᠭ᠎ᠠ ᠵᠢᠯ ᠤᠨ ᠬᠢᠨ ᠲᠦᠮᠡᠨ ᠨᠠᠰᠤᠳᠦ ᠶᠢᠨ ᠲᠦᠷᠦᠭᠰᠡᠨ ᠡᠳᠦᠷ ᠤᠨ ᠪᠠᠶᠠᠷ ᠲᠤ ᠬᠠᠭᠠᠨ ᠠᠴᠠ ᠰᠡᠩᠭᠡᠷᠢᠨᠴᠢᠨ  ᠳᠤ ᠪᠠᠰᠠ ᠬᠦᠢᠯᠡᠰᠦᠨ ᠰᠢᠷ᠎ᠡ ᠦᠩᠭᠡ ᠲᠠᠢ ᠪᠤᠯᠠᠭ᠎ᠠ ᠶᠢᠨ ᠠᠷᠠᠰᠤᠨ ᠬᠦᠷᠮ᠎ᠡ ᠱᠠᠩᠨᠠᠵᠦ᠂ ᠮᠥᠨ ᠯᠡ ᠲᠢᠶᠠᠨᠵᠢᠨ  ᠳᠤ ᠲᠤᠮᠢᠯᠠᠨ ᠬᠠᠮᠠᠭᠠᠯᠠᠯᠳᠡ ᠶᠢᠨ ᠠᠵᠢᠯ ᠬᠢᠯᠬᠡᠪᠡ᠃      ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠠᠷᠪᠠᠳᠤᠭᠠᠷ ᠤᠨ ᠳᠤ᠂ ᠠᠩᠭ᠍ᠯᠢ ᠹᠷᠠᠨᠼᠢ ᠶᠢᠨ ᠬᠤᠯᠪᠤᠭᠠᠳᠦ ᠴᠡᠷᠢᠭ ᠴᠡᠷᠢᠭ ᠠᠩᠭᠢ ᠪᠠᠨ ᠲᠠᠬᠢᠨ ᠰᠢᠨ᠎ᠠ ᠪᠠᠷ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠨ᠂ ᠲᠤᠨᠤᠭᠠᠨ ᠰᠡᠷ᠎ᠡ ᠳᠤ ᠲᠢᠶᠠᠨᠵᠢᠨ ᠢ ᠲᠠᠭᠠᠷᠢᠵᠦ᠂ ᠰᠡᠩᠭᠡᠷᠢᠨᠴᠢᠨ ᠤ ᠴᠡᠷᠢᠭ ᠲᠠᠶᠢᠯᠦᠭᠳᠡᠨ ᠲᠦᠩᠵᠸᠦ ᠳᠤ  ᠤᠬᠤᠷᠢᠭᠰᠠᠨ ᠳᠤ᠂ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠭᠤᠷᠪᠡᠨ ᠨᠢᠳᠦᠳᠦ ᠲᠤᠭᠤᠰ ᠤᠨ ᠤᠳᠤᠭ᠎ᠠ ᠶᠢ ᠨᠢ ᠮᠤᠯᠭᠤᠯᠵᠦ᠂ ᠰᠢᠯᠤᠭᠤᠨ ᠰᠢᠷ᠎ᠡ ᠬᠤᠰᠢᠭᠤ ᠶᠢ ᠵᠠᠬᠢᠷᠬᠤ ᠲᠤᠳᠤᠭᠠᠳᠦ ᠬᠢᠶ᠎ᠡ ᠶᠢᠨ ᠶᠡᠭᠡ ᠲᠦᠰᠢᠮᠡᠯ ᠪᠠ ᠬᠦᠪᠡᠭᠡᠳᠦ ᠬᠦᠬᠡ ᠬᠤᠰᠢᠭᠤ ᠶᠢᠨ ᠮᠠᠨᠵᠦ ᠴᠡᠷᠢᠭ ᠤᠨ ᠠᠮᠪᠠᠨ ᠤ ᠬᠡᠷᠬᠡᠮ ᠢ ᠨᠢ ᠤᠭᠴᠠᠷᠠᠭᠤᠯᠵᠦ᠂ ᠬᠦᠩᠭᠡᠨ ᠰᠢᠳᠭᠡᠭᠰᠡᠨ ᠢᠶᠠᠨ ᠢᠯᠡᠷᠬᠡᠶᠢᠯᠡᠪᠡ᠃ ᠵᠠᠯᠭᠠᠠᠭᠳ ᠪᠠ ᠯᠢ ᠴᠢᠶᠥᠥ ᠶᠢᠨ ᠪᠠᠶᠢᠯᠳᠤᠭᠠᠨ ᠢᠯᠠᠭᠳᠠᠵᠦ᠂ ᠠᠩᠭ᠍ᠯᠢ ᠹᠷᠠᠨᠼᠢ ᠶᠢᠨ ᠬᠤᠯᠪᠤᠭᠠᠳᠦ ᠴᠡᠷᠢᠭ ᠪᠡᠬᠡᠵᠢᠩ ᠳᠤ ᠲᠤᠪᠳᠤᠯᠤᠨ ᠤᠷᠤᠵᠦ ᠢᠷᠡᠨ᠂ ᠶᠤᠸᠠᠨ ᠮᠢᠩ ᠶᠤᠸᠠᠨ ᠴᠡᠴᠡᠷᠯᠢᠭ ᠢ ᠭᠠᠯᠳᠡᠪᠡ᠃ ᠡᠪᠰᠡᠬᠦ ᠪᠦᠯᠦᠭ ᠤᠨ ᠶᠡᠭᠡ ᠰᠠᠶᠢᠳ ᠨᠢ ᠰᠡᠩᠭᠡᠷᠢᠨᠴᠢᠨ ᠢ ᠭᠠᠳᠠᠭᠠᠳᠦ ᠶᠢᠨ ᠲᠦᠷᠢᠮᠡᠬᠡᠶᠢᠯᠡᠭᠴᠢᠳ ᠢ ᠬᠤᠷᠤᠰᠬᠠᠭᠰᠠᠨ ᠠᠴᠠ ᠡᠶᠢᠮᠦᠷᠬᠦ ᠬᠡᠮᠵᠢᠶᠡᠨ ᠳᠤ ᠬᠦᠷᠪᠡ ᠭᠡᠵᠤ ᠶᠡᠬᠡᠳᠡ ᠵᠢᠮᠡᠯᠡᠵᠦ᠂ ᠬᠠᠭᠠᠨ ᠳᠤ ᠢᠯᠡᠴᠢᠯᠡᠨ ᠵᠠᠭᠠᠯᠳᠤᠪᠠ᠃ ᠨᠠᠢᠮᠠᠨ ᠰᠡᠷ᠎ᠡ ᠳᠤᠨᠢ᠂ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠰᠡᠩᠭᠡᠷᠢᠨᠴᠢᠨ ᠤ ᠸᠠᠩ ᠤᠨ ᠬᠡᠷᠬᠡᠮ ᠢ ᠨᠢ ᠤᠭᠴᠠᠷᠠᠭᠤᠯᠤᠭᠰᠠᠨ ᠪᠤᠯᠪᠠᠴᠦ ᠪᠠᠶᠢᠴᠠᠭᠠᠭᠴᠢ ᠲᠦᠰᠢᠮᠡᠯ ᠤᠨ ᠲᠤᠰᠢᠶᠠᠯ ᠢ ᠨᠢ ᠮᠥᠨ ᠦᠯᠡᠳᠡᠬᠡᠨ ᠦᠭᠪᠡ᠃ ᠠᠷᠪᠠᠨ ᠰᠡᠷ᠎ᠡ ᠳᠤᠨᠢ ︽ᠪᠡᠭᠡᠵᠢᠩ ᠤᠨ ᠬᠡᠷ᠎ᠡ︾ ᠶᠢ ᠲᠤᠭᠳᠡᠪᠡ᠃      ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠠᠷᠪᠠᠳᠤᠭᠠᠷ ᠤᠨ ᠤ ᠶᠢᠰᠦᠨ ᠰᠡᠷ᠎ᠡ ᠳᠤ᠂ ᡁᠢ ᠯᠢᠦᠢ᠂ ᠱᠠᠨᠳᠦ᠋ᠩ ᠬᠢᠬᠡᠳ ᠾᠧ ᠵᠢᠶᠠᠨ ᠹᠦ᠋ ᠤᠷᠴᠢᠮ ᠨᠢᠶᠠᠨ ᠵᠢᠶᠦ᠋ᠨ ᠴᠡᠷᠢᠭ ᠪᠤᠰᠤᠯᠴᠠᠪᠠ᠃ ᠴᠢᠩ ᠤᠨ ᠲᠦᠷᠦ ᠠᠴᠠ ᠰᠡᠩᠭᠡᠷᠢᠨᠴᠢᠨ ᠤ ᠵᠢᠶᠦ᠋ᠨ ᠸᠠᠩ ᠤᠨ ᠬᠡᠷᠬᠡᠮ ᠢ ᠰᠡᠷᠭᠦᠬᠡᠨ᠂ ᠲᠡᠬᠦᠨ ᠢ ᠵᠠᠷᠯᠢᠭᠳᠡᠨ ᠲᠦᠮᠡ ᠢᠯᠡᠬᠦᠦ ᠴᠡᠷᠢᠭ ᠲᠠᠭᠠᠭᠠᠭᠤᠯᠤᠨ ᠱᠠᠨᠳᠦ᠋ᠩ ᠳᠤ ᠤᠴᠢᠭᠤᠯᠤᠨ ᠨᠢᠶᠠᠨ ᠵᠢᠶᠦ᠋ᠨ  ᠴᠡᠷᠢᠭ ᠲᠠᠢ ᠪᠠᠶᠢᠯᠳᠤᠭᠤᠯᠪᠡ᠃ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠶᠢᠨ ᠠᠷᠪᠠᠨ ᠨᠢᠬᠡᠳᠦᠭᠡᠷ ᠤᠨ  ᠤ ᠠᠷᠪᠠᠨ ᠬᠤᠶᠠᠳᠤᠭᠠᠷ ᠰᠡᠷ᠎ᠡ ᠶᠢᠨ ᠬᠤᠷᠢᠨ ᠲᠦᠷᠪᠡᠨ ᠤ ᠡᠳᠦᠷ᠂ ᠰᠠᠶᠢᠳ ᠨᠡᠷ ᠤᠨ ᠵᠦᠪᠯᠡᠯ ᠳᠡᠭᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ︔ ᠰᠡᠩᠭᠡᠷᠢᠨᠴᠢᠨ ᠬᠠᠭᠠᠨ ᠳᠤ ᠪᠤᠳᠤᠷᠤᠯ ᠪᠢᠴᠢᠭ ᠪᠢᠴᠢᠵᠦ᠂ ᠵᠢᠷᠢᠮ ᠤᠨ ᠴᠢᠭᠤᠯᠭᠠᠨ ᠤ ᠲᠠᠷᠤᠭ᠎ᠠ  ᠶᠢᠨ ᠬᠠᠷᠢᠭᠤᠴᠠᠯᠭ᠎ᠠ ᠴᠢᠬᠤᠯᠡ᠂ ᠡᠨᠡᠬᠦ ᠲᠤᠰᠢᠶᠠᠯ ᠢ ᠬᠠᠪᠰᠤᠷᠭᠠᠨ ᠬᠠᠷᠢᠭᠤᠴᠠᠵᠦ ᠪᠤᠯᠬᠤ ᠦᠭᠡᠢ᠂ ᠦᠬᠡᠷ᠎ᠡ ᠬᠦᠮᠦᠨ ᠲᠤᠬᠢᠷᠠᠭᠤᠯᠬᠤ ᠪᠤᠯᠪᠠᠤ ᠭᠡᠵᠤ ᠠᠶᠢᠯᠠᠳᠬᠠᠪᠠ᠃ ᠲᠦᠬᠡᠮᠡᠯ ᠡᠯᠪᠡᠭᠳᠦ ᠬᠠᠭᠠᠨ ᠰᠡᠩᠭᠡᠷᠢᠨᠴᠢᠨ ᠤ ᠠᠶᠢᠯᠠᠳᠬᠠᠯ ᠢ ᠦᠨᠳᠦᠰᠦᠯᠡᠨ᠂ ᠲᠠᠷᠬᠠᠨ ᠴᠢᠨ ᠸᠠᠩ ᠰᠤᠳᠨᠠᠮᠫᠤᠩᠰᠤᠭ ᠢ ᠲᠤᠮᠢᠯᠠᠨ ᠴᠢᠭᠤᠯᠭᠠᠨ ᠤ ᠲᠠᠷᠤᠭ᠎ᠠ ᠪᠤᠯᠭᠠᠪᠠ᠃ ᠪᠦᠷᠢᠨᠳᠦ ᠵᠠᠰᠠᠭᠴᠢ ᠶᠢᠨ ᠲᠡᠷᠢᠬᠦᠨ ᠤᠨ ︵1862 ᠤᠨ︶ ᠳᠤ᠂ ᠰᠡᠩᠭᠡᠷᠢᠨᠴᠢᠨ ᠤ ᠪᠤᠳᠤᠯᠭᠠᠳᠦ ᠴᠢᠨ ᠸᠠᠩ ᠤᠨ ᠬᠡᠷᠬᠡᠮ ᠢ ᠨᠢ ᠲᠠᠬᠢᠨ ᠰᠡᠷᠬᠦᠬᠡᠵᠦ᠂ ᠤᠳᠡᠯ ᠦᠭᠡᠢ ᠦᠶ᠎ᠡ ᠵᠠᠯᠭᠠᠮᠵᠢᠯᠠᠭᠤᠯᠬᠤ ᠵᠠᠷᠯᠢᠭ ᠪᠠᠭᠤᠯᠭᠠᠪᠠ᠃ ᠡᠨᠡ ᠦᠶᠡᠰ᠂ ᠴᠢᠩ ᠤᠨ ᠲᠦᠷᠦ ᠠᠴᠠ ᠪᠠᠶᠢᠴᠠᠭᠠᠭᠴᠢ ᠲᠦᠰᠢᠮᠡᠯ ᠰᠡᠩᠭᠡᠷᠢᠨᠴᠢᠨ ᠳᠤ ᡁᠢ ᠯᠤ᠋᠂ ᠱᠠᠨᠳᠦ᠋ᠩ᠂ ᠾᠧᠨᠡᠨ᠂ ᠬᠤᠪᠸᠢ᠂ ᠠᠨᠾᠦ᠋ᠢ ᠲᠠᠪᠤᠨ ᠮᠤᠵᠢ ᠶᠢᠨ ᠴᠡᠷᠢᠭ ᠮᠤᠷᠢ ᠶᠢ ᠶᠡᠷᠦᠩᠭᠡᠶᠢᠯᠡᠨ ᠵᠠᠬᠢᠷᠬᠤ ᠡᠷᠬᠡ ᠤᠯᠭᠤᠪᠡ᠃ ᠰᠡᠩᠭᠡᠷᠢᠨᠴᠢᠨ ᠮᠤᠷᠢᠳᠦ ᠴᠡᠷᠢᠭ ᠤᠨ ᠲᠠᠪᠠᠭᠤᠯᠢᠭ ᠪᠤᠯᠤᠨ ᠲᠠᠪᠤᠨ ᠮᠤᠵᠢ ᠶᠢᠨ ᠴᠡᠷᠢᠭ ᠤᠨ ᠬᠦᠴᠦᠨ ᠳᠤ ᠲᠦᠰᠢᠭᠯᠡᠨ᠂ ᠬᠡᠳᠦᠨ ᠵᠢᠯ ᠲᠤᠳᠤᠷ᠎ᠡ ᠨᠢᠶᠠᠨ ᠵᠢᠶᠦ᠋ᠨ ᠴᠡᠷᠢᠭ ᠢ ᠤᠯᠠᠨ ᠤᠳᠠᠭ᠎ᠠ ᠢᠯᠡᠪᠡ᠃ ᠪᠦᠷᠢᠨᠳᠦ ᠵᠠᠰᠠᠭᠴᠢ  ᠶᠢᠨ ᠭᠤᠷᠪᠠᠳᠤᠭᠠᠷ ᠤᠨ ︵1864 ᠤᠨ︶ ᠤ ᠠᠷᠪᠡᠨ ᠨᠢᠬᠡᠨ ᠰᠡᠷ᠎ᠡ ᠳᠤ ᠪᠤᠯᠤᠭᠰᠠᠨ᠂ ᠬᠤᠪᠸᠢ ᠮᠤᠵᠢ ᠶᠢᠨ ᠵᠡᠬᠦᠨᠳᠡᠬᠢ ᠾᠦᠸᠧ ᠱᠠᠨ ᠤ ᠾᠧᠢ ᠱᠢ ᠳ᠋ᠦ᠋ ᠶᠢᠨ ᠰᠢᠢᠳᠪᠦᠷᠢᠳᠦ ᠪᠠᠶᠢᠯᠳᠤᠭᠠᠨ ᠳᠤ ᠰᠡᠩᠭᠡᠷᠢᠨᠴᠢᠨ ᠤᠰᠠᠳᠬᠠᠬᠤ ᠲᠠᠭᠠᠭᠤᠯᠬᠤ ᠬᠤᠶᠠᠷ ᠵᠦᠢᠯ ᠤᠨ ᠠᠷᠭ᠎ᠠ ᠪᠠᠷ ᠨᠢᠶᠠᠨ ᠵᠢᠶᠦ᠋ᠨ ᠴᠡᠷᠢᠭ ᠤᠨ ᠠᠷᠪᠠᠨ ᠬᠡᠳᠦᠨ ᠲᠦᠮᠡᠨ ᠬᠦᠮᠦᠨ ᠢ ᠤᠷᠤᠭᠤᠯᠤᠨ ᠠᠪᠴᠦ᠂ ᠠᠷᠪᠠᠨ ᠬᠡᠳᠦᠨ ᠲᠦᠮᠡᠨ ᠬᠦᠮᠦᠨ ᠢ ᠨᠢ ᠪᠤᠳᠠᠷᠠᠭᠤᠯᠵᠦ ᠰᠠᠷᠨᠢᠭᠤᠯᠤᠨ᠂ ᠴᠢᠩ ᠤᠯᠤᠰ ᠤᠨ ᠴᠡᠷᠢᠭ ᠴᠦ ᠬᠦᠨᠳᠦ ᠨᠤᠴᠢᠳᠡᠢ ᠬᠤᠬᠢᠷᠠᠭᠰᠠᠨ ᠪᠠᠶᠢᠨ᠎ᠠ᠃ ᠪᠦᠷᠢᠨᠳᠦ ᠵᠠᠰᠠᠭᠴᠢ ᠶᠢᠨ ᠲᠦᠷᠪᠡᠳᠦᠭᠡᠷ ᠤᠨ ᠤ ᠲᠦᠷᠪᠡᠨ ᠰᠡᠷ᠎ᠡ ᠳᠤ᠂ ᠰᠡᠩᠭᠡᠷᠢᠨᠴᠢᠨ ᠨᠢᠬᠡ ᠲᠦᠮᠡ ᠨᠢᠬᠡ  ᠮᠢᠭᠭ᠎ᠠ ᠭᠠᠷᠤᠢ ᠴᠡᠷᠢᠭ ᠲᠠᠭᠠᠭᠤᠯᠤᠨ ᠵᠡᠬᠦᠨ ᠵᠠᠮ ᠤᠨ ᠨᠢᠶᠠᠨ ᠵᠢᠶᠦ᠋ᠨ ᠴᠡᠷᠢᠭ ᠯᠠᠢ ᠸᠧᠨ ᠭᠤᠸᠠᠩ᠂ ᠵᠠᠩ ᠴᠦᠩ ᠢᠦᠢ ᠶᠢᠨ ᠪᠦᠯᠦᠭ ᠢ ᠨᠡᠬᠡᠮᠵᠢᠯᠡᠨ ᠴᠤᠬᠢᠵᠦ᠂ ᠱᠠᠨᠳᠦ᠋ᠩ ᠮᠤᠵᠢ ᠶᠢᠨ ᠼᠤᠤ ᠵᠸᠦ ᠶᠢᠨ ᠾᠧ ᠽᠧ ᠰᠢᠶᠠᠨ ᠤ ᠭᠤᠤ ᠯᠸᠦ ᠵᠠᠢ ᠬᠦᠷᠳᠡᠯ᠎ᠡ ᠨᠡᠬᠡᠮᠵᠢᠯᠡᠬᠡᠳ᠂ ᠨᠢᠶᠠᠨ ᠵᠢᠶᠦ᠋ᠨ  ᠴᠡᠷᠢᠭ ᠤᠨ ᠪᠦᠰᠡᠯᠡᠨ ᠲᠠᠭᠠᠷᠢᠯᠳᠡ ᠳᠤ ᠤᠴᠠᠷᠡᠵᠦ᠂ ᠪᠦᠬᠦ ᠴᠡᠷᠢᠭ ᠨᠢ  ᠤᠰᠠᠳᠬᠠᠭᠳᠡᠨ᠂ ᠰᠡᠩᠭᠡᠷᠢᠨᠴᠢᠨ ᠲᠠᠶᠢᠨ ᠤ ᠲᠤᠮᠳᠡ ᠪᠡᠶ᠎ᠡ ᠦᠷᠡᠭᠳᠡᠪᠡ᠃    ᠰᠡᠩᠭᠡᠷᠢᠨᠴᠢᠨ ᠲᠠᠶᠢᠨ ᠳᠤ ᠢᠯᠠᠭᠳᠡᠨ ᠠᠯᠠᠭᠳᠠᠭᠰᠠᠨ ᠤ ᠲᠠᠷᠠᠭ᠎ᠠ ᠬᠤᠶᠠᠷ ᠤᠷᠳᠤᠨ ᠤ ᠲᠠᠶᠢᠬᠡᠦ ᠪᠤᠯᠤᠨ ᠪᠦᠷᠢᠨᠳᠦ ᠵᠠᠰᠠᠭᠴᠢ ᠬᠠᠭᠠᠨ ᠶᠡᠬᠡᠳᠡ ᠬᠡᠯᠮᠡᠭᠳᠡᠵᠦ᠂ ᠪᠦᠷᠢᠨᠳᠦ ᠵᠠᠰᠠᠭᠴᠢ ᠬᠠᠭᠠᠨ ᠪᠠᠶ᠎ᠠ ᠪᠠᠷ ᠢᠶᠠᠨ ᠬᠦᠷᠴᠦ ᠤᠷᠤᠰᠢᠭᠤᠯᠬᠤ ᠶᠤᠰᠤᠯᠠᠯ ᠳᠤ ᠤᠷᠤᠯᠴᠠᠪᠠ᠃ ᠰᠡᠩᠭᠡᠷᠢᠨᠴᠢᠨ ᠤ ᠴᠢᠨᠳᠡᠷ ᠶᠢᠨ ᠤᠭ ᠨᠤᠳᠤᠭ ᠲᠤᠨᠢ ᠬᠦᠷᠭᠡᠵᠦ᠂ ᠬᠦᠩ ᠵᠦ ᠯᠢᠩ ᠲᠠᠪᠠᠭ᠎ᠠ ︵ᠤᠳᠤ ᠶᠢᠨ ᠯᠢᠶᠥᠥᠨᠢᠩ ᠮᠤᠵᠢ ᠶᠢᠨ ᠹᠠᠺᠦ᠋ ᠰᠢᠶᠠᠨ ᠤ ᠲᠦᠷᠪᠡᠨ ᠭᠡᠷ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠰᠢᠶᠠᠩ ᠤᠨ ᠬᠠᠷᠢᠶ᠎ᠠ︶ ᠳᠤ ᠤᠷᠤᠰᠢᠭᠤᠯᠪᠠ᠃ ᠬᠠᠭᠠᠨ ᠡᠵᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠬᠦᠬᠡ ᠴᠢᠯᠠᠭᠤᠨ ᠲᠡᠭᠡᠷ᠎ᠡ ᠯᠤᠤ ᠰᠡᠶᠢᠯᠦᠭᠰᠡᠨ ᠬᠦᠰᠢᠶ᠎ᠡ ᠪᠤᠰᠬᠠᠵᠦ᠂ ᠪᠦᠷᠢᠨᠳᠦ ᠵᠠᠰᠠᠭᠴᠢ ᠬᠠᠭᠠᠨ ᠦᠪᠡᠷ ᠤᠨ ᠪᠡᠶ᠎ᠡ ᠪᠠᠷ  ᠢᠶᠠᠨ ᠬᠦᠰᠢᠶᠡᠨ ᠪᠢᠴᠢᠭ ᠪᠢᠴᠢᠵᠦ ᠦᠭᠪᠡ᠃ ᠪᠦᠷᠢᠨᠳᠦ ᠵᠠᠰᠠᠭᠴᠢ ᠬᠠᠭᠠᠨ ᠤ ᠵᠠᠷᠯᠢᠭ ᠪᠠᠭᠤᠯᠭᠠᠨ᠂ ᠰᠡᠩᠭᠡᠷᠢᠨᠴᠢᠨ ᠰᠢᠳᠤᠷᠭᠤ ᠰᠡᠳᠬᠢᠯ ᠢᠶᠠᠷ ᠤᠯᠤᠰ ᠲᠤᠷ ᠵᠢᠳᠬᠦᠵᠦ᠂ ᠤᠯᠠᠨ ᠠᠴᠠ ᠢᠯᠡᠬᠦᠦ ᠵᠤᠪᠠᠵᠦ ᠵᠦᠳᠡᠷᠡᠨ᠂ ᠰᠢᠳᠤᠷᠭᠤ ᠪᠠᠳᠤ ᠴᠢᠨᠡᠷ ᠲᠤᠭᠳᠠᠨᠢᠪᠠ ᠬᠡᠮᠡᠨ ᠬᠠᠭᠠᠨ ᠲᠦᠷᠦ ᠶᠢᠨ ᠬᠠᠮᠤᠭ ᠶᠡᠭᠡ ᠬᠠᠶᠢᠷ᠎ᠡ ᠬᠠᠯᠠᠮᠵᠢ ᠬᠠᠶᠢᠷᠠᠯᠠᠨ᠂ ᠲᠠᠢ ᠮᠢᠶᠥᠥ ᠪᠠᠶᠢᠭᠤᠯᠤᠨ ᠦᠭᠴᠦ᠂ ᠬᠦᠷᠦᠭ ᠵᠢᠷᠤᠭ ᠢ ᠨᠢ ᠵᠢᠷᠤᠭᠤᠯᠤᠨ ᠬᠠᠭᠠᠨ ᠤ ᠬᠤᠳᠡ ᠶᠢᠨ ᠽᠢ ᠭᠤᠸᠠᠩ ᠭᠧ ᠳᠤ ᠡᠯᠬᠦᠬᠦᠯᠦᠭᠰᠡᠨ ᠤ ᠬᠠᠮᠳᠤ᠂ ᠲᠡᠭᠦᠨ ᠤ ᠲᠠᠶᠢᠨ ᠪᠠᠶᠢᠯᠳᠤᠭᠠᠨ ᠬᠢᠵᠦ ᠶᠠᠪᠤᠭᠰᠠᠨ ᠲᠠᠪᠤᠨ ᠮᠤᠵᠢ ᠳᠤ ᠰᠦᠮ᠎ᠡ ᠪᠠᠶᠢᠭᠤᠯᠤᠨ ᠦᠭᠪᠡ᠃ ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠦ ᠬᠤᠰᠢᠭᠤᠨ ᠤ ᠵᠢᠷᠭᠠᠯᠠᠩ ᠤᠨ ᠪᠤᠳᠤᠯᠭᠠᠳᠦ ᠴᠢᠨ ᠸᠠᠩ ᠤᠨ ᠬᠤᠷᠤᠭ᠎ᠠ ᠶᠢᠨ ᠵᠡᠬᠦᠨᠳᠡᠢ ᠰᠡᠩᠭᠡᠷᠢᠨᠴᠢᠨ ᠤ ᠭᠡᠷ ᠤᠨ ᠰᠦᠮ᠎ᠡ ᠪᠠᠶᠢᠭᠤᠯᠵᠦ᠂ ᠰᠡᠩᠭᠡᠷᠢᠨᠴᠢᠨ ᠤ ᠬᠦᠷᠦᠭ  ᠢ ᠲᠠᠬᠢᠪᠠ᠃ ᠦᠪᠦᠷ ᠰᠢᠷᠭ᠎ᠠ ᠳᠤ ᠰᠡᠩᠭᠡᠷᠢᠨᠴᠢᠨ ᠤ ᠬᠦᠷᠦᠭ ᠤᠨ ᠰᠦᠮ᠎ᠡ ᠶᠢ ᠪᠠᠰᠠ ᠨᠢᠬᠡ  ᠪᠠᠶᠢᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃          ᠢᠷᠡᠯᠳᠡ — ︽ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠦ ᠬᠤᠰᠢᠭᠤᠨ ᠤ ᠤᠶᠢᠯᠠᠯᠭ᠎ᠠ︾
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2 ᠬᠥᠮᠦᠨ ᠤᠯᠤᠰ ᠤᠨ ᠲᠠᠰ ᠤᠨ ᠪᠣᠳᠠᠰ ᠤᠨ ᠪᠤᠰᠤ ᠰᠣᠶᠣᠯ ᠤᠨ ᠥᠪ ᠤᠨ ᠲᠥᠯᠥᠭᠡᠯᠡᠬᠦ ᠴᠢᠨᠠᠷᠲᠠᠶ ᠁
ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠤ ᠬᠤᠰᠢᠭᠤᠨ ᠤ ᠦᠪᠡᠷᠳᠡᠭᠡᠨ ᠵᠠᠰᠬᠠᠤ ᠤᠷᠤᠨ ᠤ ᠲᠡᠰ ᠤᠨ ︽ᠪᠣᠳᠠᠰ ᠤᠨ ᠁
ᠬᠤᠷᠴᠢᠨ ᠵᠡᠬᠦᠨ ᠬᠤᠶᠢᠳᠤ ᠬᠤᠰᠢᠭᠤᠨ ᠤ ᠬᠤᠰᠢᠭᠤᠨ ᠲᠡᠰ ᠤᠨ ︽ᠪᠣᠳᠠᠰ ᠤᠨ ᠪᠤᠰᠤ ᠰᠣᠶᠣᠯ ᠤᠨ ᠥᠪ︾᠁
ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠤ ᠬᠤᠰᠢᠭᠤᠨ ᠤ ᠬᠤᠰᠢᠭᠤᠨ ᠲᠡᠰ ᠤᠨ ︽ᠪᠣᠳᠠᠰ ᠤᠨ ᠪᠤᠰᠤ ᠰᠣᠶᠣᠯ ᠤᠨ ᠁
ᠬᠠᠭᠤᠴᠢᠳ ᠤᠨ ᠣᠨᠢᠰᠤᠭ᠎ᠠ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号