ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠣᠶᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠦ ᠶᠢᠨ ᠦᠨᠤᠷ ᠲᠠᠢ ᠳᠡᠯᠡᠬᠡᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/9/27
                                         ᠪᠤᠷᠵᠢᠬᠢᠨ ᠳᠡᠯᠬᠡᠷ       ᠨᠤᠳᠤᠭ ᠤᠨ ᠠᠷᠤ ᠶᠢᠨ ᠦᠨᠳᠤᠷ ᠬᠦᠬᠡ ᠠᠭᠤᠯᠠᠰ ᠢ ᠲᠠᠪᠠᠭᠠᠳ ᠪᠠᠭᠤᠪᠠᠯ ᠪᠠᠷᠠᠭᠤᠨ ᠠᠴᠠ ᠵᠡᠬᠦᠨᠰᠢ ᠰᠤᠨᠤᠯᠵᠠᠭᠰᠠᠨ ᠦᠷᠬᠡᠨ ᠶᠡᠭᠡ ᠬᠦᠨᠳᠡᠢ ᠬᠠᠷᠠᠭ᠎ᠠ ᠲᠡᠯᠡᠨ ᠴᠡᠩᠬᠡᠷᠳᠤᠨ᠎ᠡ᠃ ᠠᠳᠤᠭᠤ ᠮᠠᠯ ᠠᠯᠠᠭᠯᠠᠨ ᠪᠡᠯᠴᠢᠭᠰᠡᠨ ᠡᠨᠡ ᠰᠠᠶᠢᠬᠠᠨ ᠨᠤᠳᠤᠭ ᠪᠤᠯ ᠡᠬᠡᠴᠢ ᠶᠢᠨ ᠮᠤᠷᠳᠠᠭᠰᠠᠨ ᠭᠠᠵᠠᠷ ᠪᠤᠯᠬᠤ ᠶᠤᠮ᠃ ᠲᠠᠯ᠎ᠠ ᠶᠢᠨ ᠲᠤᠮᠳᠠᠭᠤᠷ ᠤᠷᠤᠰᠤᠭᠰᠠᠨ ᠭᠤᠤᠯ ᠤᠨ ᠲᠤᠬᠤᠢ ᠳᠤ ᠤᠰᠤᠨ ᠤ ᠰᠢᠪᠠᠭᠤᠳ ᠭᠠᠩᠭᠠᠨᠠᠯᠳᠤᠨ᠂ ᠦᠷᠯᠦᠬᠡ ᠶᠢᠨ ᠮᠠᠨᠠᠨ ᠲᠤᠮᠳᠠ ᠭᠡᠨᠡᠳᠳᠡ ᠨᠢᠬᠡ ᠬᠤᠶᠠᠷ ᠲᠤᠭᠤᠷᠤᠤ ᠨᠢᠰᠤᠨ ᠬᠦᠬᠡᠷᠬᠦ ᠨᠢ ᠦᠯᠢᠬᠡᠷ ᠲᠤᠮᠤᠭ ᠤᠨ ᠶᠢᠷᠳᠢᠨᠴᠤ ᠬᠡᠮᠡᠷ ᠶᠤᠮ᠃ ᠭᠠᠭᠴᠠᠬᠠᠨ ᠠᠭᠤᠯᠠ ᠳᠠᠪᠠᠭ᠎ᠠ ᠪᠠᠷ ᠵᠠᠭᠠᠭᠯᠠᠭᠳᠠᠵᠤ ᠪᠠᠶᠢᠯ᠎ᠠ ᠴᠤ ᠡᠨᠡ ᠨᠤᠳᠤᠭ ᠤᠨ ᠬᠡᠯᠡ ᠶᠠᠷᠢᠶ᠎ᠠ ᠨᠢ ᠬᠦᠷᠳᠡᠯ᠎ᠡ ᠮᠠᠨ ᠤ ᠬᠢ ᠶᠢ ᠪᠤᠳᠤᠪᠠᠯ ᠴᠡᠪᠡᠷ ᠮᠤᠩᠭᠤᠯ ᠪᠠᠶᠢᠵᠤ᠂ ᠢᠳᠡᠵᠤ ᠤᠤᠭᠤᠬᠤ ᠶᠠᠪᠤᠬᠤ ᠰᠠᠭᠤᠬᠤ ᠨᠢ ᠬᠦᠷᠳᠡᠯ᠎ᠡ ᠰᠤᠨᠢᠷᠬᠠᠯᠳᠠᠢ ᠰᠠᠶᠢᠬᠠᠨ ᠰᠠᠨᠠᠭᠳᠠᠳᠠᠭ ᠪᠠᠶᠢᠯ᠎ᠠ᠃ ᠱᠤᠩ ᠤᠨ ᠮᠤᠳᠤᠨ ᠳᠤ ᠨᠢ ᠤᠶᠠᠭ᠎ᠠ ᠲᠠᠢ ᠮᠤᠷᠢᠳ ᠲᠤᠷᠬᠢᠨ᠂ ᠠᠶᠢᠯ ᠪᠤᠯᠭᠠᠨ ᠨᠢ ᠠᠷᠭᠠᠯ ᠢᠶᠠᠨ ᠬᠦᠷᠳᠡᠯ᠎ᠡ ᠪᠠᠷᠤᠭ ᠴᠠᠪᠴᠢᠭᠠᠳ ᠭᠠᠷᠭᠠᠭᠰᠠᠨ ᠴᠢᠯᠠᠭᠤᠨ ᠬᠡᠷᠡᠮ ᠮᠡᠳᠤ ᠭᠤᠶᠤ ᠴᠡᠪᠡᠷ ᠵᠡᠷᠭᠡᠯᠡᠵᠤ᠂ ᠰᠢᠷᠠᠰᠤ ᠴᠠᠭ᠎ᠠ ᠪᠠᠷ ᠪᠤᠶᠢᠵᠢᠭᠰᠠᠨ ᠪᠢᠷᠠᠭᠤᠨ ᠴᠢᠨᠡᠭᠡ ᠪᠦᠳᠤᠬᠦᠨ ᠭᠠᠷᠵᠠ ᠨᠤᠭᠤᠳ ᠲᠡᠷᠬᠡ ᠤᠨᠤᠭ᠎ᠠ ᠲᠠᠢ ᠬᠦᠮᠤᠨ ᠳᠤ ᠠᠷᠰᠯᠠᠨ ᠰᠢᠭ᠋ ᠠᠷᠬᠢᠷᠠᠨ ᠨᠤᠴᠤᠳᠠᠭ ᠴᠤ ᠨᠢᠳᠤᠨ ᠳᠤ ᠦᠯᠤ ᠲᠤᠭᠤᠭᠳᠠᠭᠰᠠᠨ ᠨᠢᠬᠡ ᠶᠢ ᠪᠠᠨ ᠤᠶᠢᠰᠢᠶᠠᠬᠤ ᠴᠤ ᠦᠭᠡᠢ ᠪᠠᠷ ᠬᠠᠰᠢᠶ᠎ᠠ ᠬᠡᠷᠡᠮ ᠤᠨ ᠤᠭ ᠢᠶᠠᠷ ᠨᠠᠷᠠ ᠡᠬᠡᠬᠡᠵᠤ ᠬᠡᠪᠳᠡᠬᠦ ᠶᠤᠮ᠃ ᠵᠤᠨ ᠤ ᠰᠠᠶᠢᠬᠠᠨ ᠴᠠᠭ ᠲᠤ ᠵᠡᠯ᠎ᠡ ᠲᠦᠬᠦᠷᠳᠡᠯ᠎ᠡ ᠡᠯᠬᠦᠭᠰᠡᠨ ᠬᠤᠷᠤᠳ ᠨᠢ ᠬᠤᠯᠠ ᠠᠴᠠ ᠰᠢᠷᠭᠠᠯᠳᠤᠨ ᠬᠠᠷᠠᠭᠳᠠᠵᠤ ᠰᠢᠯᠤᠰᠤ ᠬᠤᠷᠠᠭᠤᠯᠬᠤ ᠨᠢ ᠬᠡᠴᠡᠬᠦᠤ᠃ ᠬᠠᠶᠠ ᠨᠢᠭᠡ ᠰᠤᠭᠳᠤᠭᠤ ᠬᠦᠯᠴᠤᠬᠦᠤ ᠡᠷ᠎ᠡ ᠮᠤᠷᠢᠨ ᠤ ᠨᠢᠷᠤᠭᠤᠨ ᠳᠤ ᠠᠶᠢᠷᠠᠭ ᠤᠨ ᠬᠤᠯᠤ ᠰᠢᠭ᠋ ᠬᠡᠯᠪᠡᠯᠵᠡᠨ ᠪᠠᠶᠢᠯ᠎ᠠ ᠴᠤ ᠲᠤᠭᠳᠠᠭᠠᠳ ᠪᠠᠶᠢᠳᠠᠭ ᠨᠢ ᠭᠠᠶᠢᠬᠠᠮᠰᠢᠭᠳᠠᠢ᠃ ᠠᠶᠢᠯ ᠤᠨ ᠲᠤᠮᠳᠠᠭᠤᠷ ᠴᠤᠪᠠ᠂ ᠤᠭᠴᠤᠷ ᠡᠮᠤᠰᠦᠭᠰᠡᠨ ᠪᠡᠷᠢᠶᠡᠳ ᠬᠦᠭᠰᠢᠳ ᠲᠠᠳᠠᠭᠤᠷ ᠵᠡᠬᠦᠬᠦ ᠨᠢ ᠵᠡᠬᠦᠵᠤ᠂ ᠤᠯᠠᠭᠠᠨ ᠨᠤᠭᠤᠭᠠᠨ ᠫᠠᠩᠰᠠ ᠪᠠᠷ ᠭᠡᠵᠢᠬᠡ ᠪᠠᠨ ᠤᠷᠢᠶᠠᠵᠤ ᠬᠡᠳᠤ ᠭᠤᠷᠪᠠ ᠪᠠᠷ ᠨᠠᠰᠢ ᠴᠠᠰᠢ ᠶᠠᠪᠤᠬᠤ ᠶᠤᠮ᠃ ᠡᠳᠡᠬᠡᠷ ᠨᠢ ᠨᠠᠳᠠ ᠳᠤ ᠪᠦᠷ ᠰᠠᠶᠢᠬᠠᠨ ᠰᠠᠨᠠᠭᠳᠠᠳᠠᠭ᠃ ᠬᠡᠪᠡᠴᠤ ᠨᠢᠭᠡ ᠤᠳᠠᠭ᠎ᠠ ᠶᠢᠨ ᠤᠴᠠᠷᠠᠯ ᠨᠢ ᠡᠨᠡ ᠨᠤᠲᠤᠭ ᠤᠨ ᠰᠠᠶᠢᠬᠠᠨ ᠰᠠᠭᠤᠭᠳᠠᠯ ᠢ ᠵᠢᠭᠠᠬᠠᠨ ᠡᠪᠳᠡᠭᠰᠡᠨ ᠶᠤᠮ᠃ ᠶᠠᠭᠤ ᠶᠤᠮ ᠭᠡᠪᠡᠯ ᠡᠬᠡᠴᠢ ᠶᠢᠨ ᠬᠦᠷᠢ ᠦᠬᠢᠨ ᠲᠡᠬᠦᠤ ᠨᠠᠷᠠ ᠡᠭᠡᠴᠢ ᠵᠤᠨ ᠤ ᠲᠤᠨᠤᠭᠰᠠᠨ ᠪᠤᠷᠤᠭᠠᠨ ᠤ ᠱᠠᠯᠪᠠ ᠤᠰᠤᠨ ᠳᠤ ᠬᠦᠯ ᠨᠢᠴᠤᠬᠦᠨ ᠤᠷᠤᠵᠤ᠂ ᠨᠦᠢᠳᠠᠨ ᠦᠬᠡᠷ ᠤᠨ ᠪᠠᠭᠠᠰᠤ ᠶᠢ ᠰᠢᠪᠡᠷ ᠲᠠᠢ ᠨᠤᠬᠤᠵᠤ᠂ ᠨᠤᠬᠤᠭᠰᠠᠨ ᠰᠢᠪᠠᠷ ᠢᠶᠠᠷ ᠢᠶᠠᠨ ᠤᠪᠤᠭᠠᠯᠠᠵᠤ ᠵᠡᠷᠬᠡᠯᠡᠭᠰᠡᠨ ᠠᠷᠭᠠᠯ ᠤᠨ ᠢᠶᠠᠨ ᠭᠠᠳᠠᠭᠤᠷ ᠰᠢᠪᠠᠵᠤ ᠪᠠᠶᠢᠭᠰᠠᠨ ᠢ ᠬᠠᠷᠠᠵᠤ ᠵᠢᠪᠡᠬᠦᠤ ᠬᠦᠷᠦᠭᠰᠡᠨ ᠶᠤᠮ᠃ ᠪᠢ ᠭᠠᠶᠢᠬᠠᠬᠤ ᠵᠢᠭᠰᠢᠬᠦ ᠬᠤᠤᠰᠯᠠᠨ ᠵᠤᠭᠰᠤᠵᠤ ᠪᠠᠶᠢᠬᠤ ᠳᠤ ᠨᠠᠷᠠ ᠡᠬᠡᠴᠢ ᠮᠢᠨᠤ ᠦᠬᠡᠳᠡ ᠠᠴᠠ ᠬᠡ ᠬᠡ ᠢᠨᠢᠶᠡᠵᠤ ︽ᠢᠷ᠎ᠡ ᠡ︕ ᠮᠢᠨᠤ ᠲᠡᠬᠦᠤ᠂ ᠡᠬᠡᠴᠢ ᠲᠠᠢ ᠪᠠᠨ ᠬᠠᠮᠳᠤ ᠰᠢᠪᠠᠶ᠎ᠠ︾ ᠬᠡᠬᠦᠯᠡᠷ ᠪᠢ ᠭᠤᠳ ᠭᠠᠷᠤᠭᠠᠳ ᠲᠤᠳᠠᠭᠠᠭᠰᠠᠨ ᠶᠤᠮ᠃      ᠨᠢᠬᠡ ᠤᠳᠠᠭ᠎ᠠ ᠵᠤᠨ ᠤ ᠠᠮᠠᠷᠠᠯᠳᠠ ᠪᠠᠷ ᠪᠢ ᠡᠵᠢ ᠲᠠᠢ ᠪᠠᠨ ᠡᠬᠡᠴᠢ ᠶᠢᠨ ᠳᠤ ᠤᠴᠢᠯ᠎ᠠ᠃ ᠦᠨᠤ ᠬᠠᠮᠳᠤ ᠠᠷᠭᠠᠯ ᠤᠨ ᠵᠠᠭᠠᠭ ᠰᠢᠪᠠᠶ᠎ᠠ ᠭᠡᠵᠤ ᠨᠠᠭᠠᠳᠤᠮ ᠬᠢᠵᠤ ᠪᠠᠶᠢᠭᠰᠠᠨ ᠨᠠᠷᠠ ᠡᠬᠡᠴᠢ ᠬᠠᠷᠢᠯᠠᠬᠤ ᠪᠤᠯᠵᠤ᠂ ᠤᠯᠠᠨ ᠬᠦᠮᠤᠨ ᠬᠤᠷᠢᠮ ᠳᠤ ᠬᠦᠷᠴᠤ ᠢᠷᠡᠯ᠎ᠡ᠃ ᠭᠤᠷᠪᠠᠨ ᠲᠠᠰᠤᠯᠭ᠎ᠠ ᠰᠢᠷᠤᠢ ᠶᠢᠨ ᠪᠠᠶᠢᠰᠢᠩ ᠬᠦᠮᠤᠨ ᠢᠶᠠᠷ ᠲᠦᠬᠦᠷᠴᠤ᠂ ᠵᠡᠬᠦᠨ ᠲᠠᠰᠤᠯᠭᠠᠨ ᠳᠤ ᠨᠢ ᠤᠷᠤᠪᠠᠯ ᠨᠠᠷᠠ ᠡᠭᠡᠴᠢ ᠭᠡᠵᠢᠬᠡ ᠪᠠᠨ ᠠᠳᠤᠷᠢᠭᠤᠯᠴᠢᠬᠠᠭᠰᠠᠨ ᠪᠦᠬᠡᠳ ᠤ ᠡᠩᠬᠡᠰᠬᠡ ᠲᠦᠷᠬᠢᠵᠤ ᠂ ᠰᠢᠪᠡᠷ ᠨᠤᠬᠤᠵᠤ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠡᠳᠡᠭᠡᠳ ᠭᠤᠶᠤ ᠬᠠᠷᠠᠭᠳᠠᠯ᠎ᠠ᠃ ᠨᠢᠯᠪᠤᠰᠤ ᠪᠠᠨ ᠵᠦᠯᠬᠦᠵᠤ ᠰᠠᠭᠤᠭᠰᠠᠨ ᠨᠠᠷᠠ ᠡᠬᠡᠴᠢ ︽ᠮᠢᠨᠤ ᠲᠡᠬᠦᠤ ᠬᠦᠷᠤᠬᠡᠳ ᠢᠷᠡᠪᠡᠤ︖ ᠪᠢᠴᠢᠭ ᠢᠶᠠᠨ ᠰᠠᠶᠢᠨ ᠦᠵᠡ︕︾ ᠭᠡᠳ ᠬᠡᠳᠤᠨ ᠰᠢᠬᠢᠷ ᠦᠭᠬᠦᠭᠰᠡᠨ ᠶᠤᠮ᠃ ᠤᠳᠠᠯ ᠦᠬᠡᠢ ᠬᠤᠷᠢᠮ ᠤᠨ ᠰᠢᠷᠡᠭᠡ ᠵᠠᠰᠠᠵᠤ᠂ ᠰᠢᠨ᠎ᠡ ᠬᠦᠷᠬᠡᠨ ᠰᠢᠷᠡᠭᠡ ᠪᠤᠯᠭᠠᠨ ᠳᠤ ᠠᠷᠢᠬᠢ ᠬᠡᠮᠨᠡᠨ ᠪᠠᠷᠢᠵᠤ᠂ ᠪᠦᠰᠡ ᠠᠴᠠ ᠪᠠᠨ ᠲᠠᠮᠠᠬᠢᠨ ᠬᠠᠪᠳᠠᠭ᠎ᠠ ᠬᠡᠳᠤ ᠬᠡᠳᠤ ᠶᠢ ᠤᠨᠵᠢᠭᠤᠯᠤᠨ᠂ ᠬᠠᠪᠳᠠᠭ᠎ᠠ ᠶᠢ ᠴᠢᠮᠡᠭᠯᠡᠭᠰᠡᠨ ᠦᠩᠬᠡ ᠦᠩᠬᠡ ᠶᠢᠨ ᠫᠢᠶᠤᠤᠳᠠᠢ ︵ᠪᠦᠰᠡ︶ ᠨᠢ ᠤᠨᠴᠠ ᠰᠠᠶᠢᠬᠠᠨ ᠰᠤᠯᠤᠩᠭᠠᠷᠠᠵᠤ ᠬᠠᠷᠠᠭᠳᠠᠨ᠎ᠠ᠃ ᠠᠷᠢᠬᠢᠨ ᠤ ᠬᠠᠯᠠᠭᠤᠨ ᠨᠡᠮᠡᠭᠳᠡᠬᠦ ᠪᠠᠷ ᠨᠢᠬᠡ ᠬᠤᠶᠠᠷ ᠰᠤᠭᠳᠤᠭᠤ ᠭᠠᠷᠴᠢᠬᠠᠭᠠᠳ ᠤᠴᠢᠷ ᠤᠬᠠᠭᠠᠨ ᠨᠢ ᠤᠯᠳᠠᠭᠳᠠᠬᠤ ᠦᠬᠡᠢ ᠠᠭᠰᠤᠮ ᠲᠠᠯᠪᠢᠵᠤ᠂ ᠬᠡᠷᠡᠮ ᠬᠠᠨ᠎ᠠ ᠲᠦᠰᠢᠵᠤ ᠤᠯᠢᠤ ᠰᠤᠯᠢᠤ ᠲᠤᠩᠭᠤᠳᠴᠤ ᠪᠠᠶᠢᠪᠠ᠃ ᠪᠢ ᠭᠠᠳᠠᠨ᠎ᠠ ᠭᠠᠷᠴᠤ ᠭᠡᠷ ᠤᠨ ᠠᠷᠤ ᠳᠤ ᠤᠴᠢᠪᠠᠯ ᠦᠩᠬᠡ ᠨᠢ ᠬᠤᠶᠢᠭᠰᠠᠨ ᠪᠦᠮᠪᠦᠭᠡ ᠭᠡᠷ ᠬᠠᠷᠠᠭᠳᠠᠯ᠎ᠠ᠃ ᠡᠨᠡ ᠪᠦᠮᠪᠦᠭᠡ ᠭᠡᠷ ᠨᠢ ᠮᠠᠨ ᠤ ᠨᠤᠳᠤᠭ ᠤᠨ ᠠᠮᠤ ᠪᠤᠳᠠᠭ᠎ᠠ ᠬᠠᠳᠠᠭᠠᠯᠠᠳᠠᠭ ᠰᠠᠩ ᠤᠨ ᠭᠡᠷ ᠲᠠᠢ ᠲᠦᠰᠦᠬᠡᠳᠠᠢ ᠴᠤ ᠪᠠᠰᠠ ᠤᠨᠳᠤᠤ᠃ ᠢᠰᠡᠬᠡᠢ ᠪᠦᠷᠢᠶᠡᠰᠤ ᠲᠠᠢ ᠡᠨᠡ ᠭᠡᠷ ᠲᠤ ᠨᠢ ᠶᠠᠭᠤ ᠬᠠᠳᠠᠭᠠᠯᠠᠳᠠᠭ ᠶᠤᠮ ᠪᠤᠯ ᠭᠡᠵᠤ ᠨᠠᠮᠬᠠᠨ ᠡᠬᠦᠳᠡ ᠶᠢ ᠨᠢ ᠲᠠᠳᠠᠯ᠎ᠠ᠃ ᠲᠤᠭᠤᠨᠤ ᠪᠠᠷ ᠨᠢ ᠲᠤᠰᠤᠭᠰᠠᠨ ᠨᠠᠷᠠᠨ ᠤ ᠭᠡᠷᠡᠯ ᠳᠤ ᠬᠤᠶᠢᠮᠤᠷ ᠲᠠᠭᠠᠭᠤᠯᠵᠤ ᠲᠡᠯᠭᠡᠭᠰᠡᠨ ᠬᠤᠨᠢᠨ ᠮᠢᠬ᠎ᠠ ᠤᠨᠴᠠ ᠶᠢᠨ ᠰᠤᠷᠭᠤᠭ ᠬᠠᠷᠠᠭᠳᠠᠵᠤ᠂ ᠵᠡᠬᠦᠨ ᠲᠠᠯ᠎ᠠ ᠪᠠᠷ ᠨᠢ ᠵᠡᠷᠭᠡᠯᠡᠭᠰᠡᠨ ᠬᠡᠳᠤᠨ ᠪᠤᠳᠤᠩ ᠳᠤ ᠰᠦ ᠴᠠᠭ᠎ᠠ ᠪᠢᠯᠬᠠᠵᠤ᠂ ᠠᠷᠠᠰᠤ ᠡᠯᠳᠡᠭᠰᠡᠨ ᠦᠨᠤᠷ ᠪᠤᠯᠤᠨ ᠰᠢᠨ᠎ᠡ ᠬᠤᠨᠢᠨ ᠮᠢᠬ᠎ᠠ ᠶᠢᠨ ᠦᠨᠤᠷ ᠬᠤᠳᠬᠤᠯᠳᠤᠨ ᠦᠬᠡᠳᠡ ᠠᠴᠠ ᠰᠠᠩᠬᠢᠬᠤ ᠳᠤ ᠠᠩᠬ᠎ᠠ ᠤᠳᠠᠭ᠎ᠠ ᠡᠶᠢᠮᠤᠷᠬᠦ ᠦᠨᠤᠷ ᠲᠠᠢ ᠤᠴᠠᠷᠠᠵᠤ ᠪᠠᠶᠢᠭ᠎ᠠ ᠨᠠᠳᠠ ᠳᠤ ᠤᠬᠢᠭᠤ ᠬᠦᠷᠬᠦ ᠮᠡᠳᠤ ᠰᠠᠨᠠᠭᠳᠠᠨ ᠪᠤᠴᠠᠨ ᠭᠠᠷᠴᠤ ᠤᠷᠳᠤ ᠠᠮᠢᠰᠬᠤᠭ᠎ᠠ ᠠᠪᠤᠯ᠎ᠠ᠃ ᠠᠳᠡ ᠮᠤᠷᠳᠠᠨ ᠢᠷᠡᠵᠤ ᠶᠠᠭᠤ ᠪᠦᠬᠦᠨ ᠳᠤ ᠨᠢ ᠲᠠᠰᠤᠯ ᠪᠠᠷᠢᠯ ᠢᠶᠠᠨ ᠤᠯᠤᠭᠰᠠᠨ ᠶᠡᠭᠡ ᠡᠬᠡᠴᠢ ᠮᠢᠨᠤ ᠪᠠᠶᠢᠳᠠᠯ ᠢ ᠦᠵᠡᠨ ᠭᠠᠷᠴᠤ ᠢᠨᠢᠶᠡᠳᠤ ᠨᠢ ᠬᠦᠷᠴᠤ ︽ᠡᠨᠡ ᠴᠢᠨᠢ ᠮᠤᠩᠭᠤᠯ ᠭᠡᠷ ᠰᠢᠤ︕︾ ᠭᠡᠯ᠎ᠡ᠃ ᠲᠡᠷᠡ ᠤᠳᠠᠭ᠎ᠠ ᠪᠤᠯ ᠮᠢᠨᠤ ᠮᠤᠩᠭᠤᠯ ᠭᠡᠷ ᠯᠤᠭ᠎ᠠ ᠶᠢᠨ ᠬᠠᠮᠤᠭ ᠠᠩᠬᠠᠨ ᠤ ᠤᠴᠠᠷᠠᠯ ᠪᠤᠯᠬᠤ ᠶᠤᠮ᠃ ᠬᠠᠭᠠᠰ ᠲᠠᠷᠢᠶᠠᠯᠠᠬᠤ ᠬᠠᠭᠠᠰ ᠮᠠᠯᠵᠢᠬᠤ ᠤᠷᠤᠨ ᠳᠤ ᠲᠦᠷᠤᠵᠤ ᠦᠰᠤᠯ᠎ᠡ ᠴᠤ ᠮᠠᠨ ᠤ ᠨᠤᠲᠤᠭ ᠲᠤ ᠮᠤᠩᠭᠤᠯ ᠭᠡᠷ ᠲᠤ ᠰᠠᠭᠤᠬᠤ ᠪᠠᠶᠢᠳᠤᠭᠠᠢ᠂ ᠰᠦ ᠴᠠᠭ᠎ᠠ ᠳᠤ ᠪᠠᠨ ᠤᠯᠢᠭᠳᠠᠢ ᠴᠠᠳᠤᠭ᠎ᠠ ᠦᠭᠡᠢ ᠪᠠᠷ ᠪᠢ ᠪᠠᠭ᠎ᠠ ᠨᠠᠰᠤ ᠪᠠᠨ ᠦᠩᠭᠡᠷᠡᠭᠦᠯᠦᠭᠰᠡᠨ ᠶᠤᠮ᠃ ᠲᠡᠭᠡᠬᠦ ᠪᠠᠷ ᠮᠤᠩᠭᠤᠯ ᠬᠡᠷ ᠬᠡᠳᠡᠭ ᠴᠢᠨᠢ ᠦᠪᠡᠷ ᠤᠨ ᠬᠡᠰᠡᠨ ᠤᠨᠳᠤᠤ ᠦᠨᠤᠷ ᠲᠠᠢ ᠶᠤᠮ ᠪᠠᠶᠢᠨ᠎ᠠ ᠬᠡᠬᠦ ᠠᠩᠬ᠎ᠠ ᠠᠯᠬᠤᠮ ᠤᠨ ᠲᠦᠷᠦᠭᠳᠡᠯ ᠲᠠᠢ ᠪᠤᠯᠤᠭᠰᠠᠨ ᠶᠤᠮ᠃       ᠠᠵᠢᠯ ᠳᠤ ᠭᠠᠷᠤᠭᠰᠠᠨ ᠤ ᠲᠠᠷᠠᠭ᠎ᠠ ᠪᠢ ᠮᠤᠩᠭᠤᠯ ᠬᠡᠷ ᠲᠤ ᠠᠩᠬ᠎ᠠ ᠤᠳᠠᠭ᠎ᠠ ᠬᠤᠨᠤᠭᠰᠠᠨ ᠶᠤᠮ᠃ ᠲᠡᠷᠡ ᠤᠳᠠᠭ᠎ᠠ ᠪᠢᠳᠡ ᠪᠦᠳᠤᠨ ᠡᠳᠤᠷ ᠬᠡᠬᠡᠷ᠎ᠡ ᠲᠠᠪᠬᠢᠭᠤᠯᠬᠤ ᠳᠤ ᠨᠢᠭᠡ ᠠᠶᠢᠯ ᠴᠤ ᠲᠤᠬᠢᠶᠠᠯᠳᠤᠭ᠎ᠠ ᠦᠬᠡᠢ ᠪᠠᠶᠢᠵᠤ᠂ ᠦᠳᠡᠰᠢ ᠪᠤᠯᠬᠤ ᠪᠠᠷ ᠪᠦᠳᠤᠬᠦᠨ ᠬᠡᠳᠡᠰᠤ ᠮᠢᠨᠢ ᠨᠠᠷᠢᠨ ᠬᠡᠳᠡᠰᠤ ᠪᠠᠨ ᠵᠠᠯᠭᠢᠮᠠᠷ ᠦᠯᠦᠰᠴᠤ ᠤᠮᠳᠠᠭᠠᠰᠤᠯ᠎ᠠ᠃ ᠵᠢᠯᠤᠭᠤᠴᠢ ᠠᠬ᠎ᠠ ︽ᠲᠡᠨᠳᠡ — ᠬᠠᠷᠠᠭᠳᠠᠵᠤ ᠪᠠᠶᠢᠭ᠎ᠠ ᠲᠡᠷᠡ ᠭᠡᠷᠡᠯ ᠴᠢᠨᠢ ᠮᠠᠨ ᠤ ᠤᠴᠢᠬᠤ ᠠᠶᠢᠯ ᠶᠤᠮ᠂ ᠵᠢᠭᠠᠬᠠᠨ ᠲᠡᠰᠴᠤ ᠪᠠᠢ︕︾ ᠭᠡᠬᠦ ᠪᠠᠷ ᠦᠯᠤᠰᠴᠤ ᠤᠮᠳᠠᠭᠠᠰᠬᠤ ᠮᠢᠨᠢ ᠠᠷᠠᠢ ᠨᠠᠮᠳᠠᠬᠤ ᠮᠡᠳᠤ ᠪᠤᠯᠵᠠᠢ᠃ ᠬᠡᠪᠡᠴᠤ ᠬᠤᠯᠠ ᠠᠴᠠ ᠬᠠᠷᠠᠭᠳᠠᠭᠰᠠᠨ ᠲᠡᠷᠡ ᠭᠡᠷᠡᠯ ᠳᠤ ᠬᠦᠷᠬᠦ ᠳᠤ ᠪᠠᠰᠠ ᠨᠡᠯᠢᠶᠡᠳ ᠵᠠᠮᠨᠠᠬᠤ ᠳᠤ ᠰᠠᠶ᠋ᠢ ᠲᠠᠯ᠎ᠠ ᠶᠢᠨ ᠠᠭᠤᠳᠠᠮ ᠭᠡᠳᠡᠭ ᠴᠢᠨᠢ ᠬᠦᠮᠤᠨ ᠳᠤ ᠮᠤᠨᠳᠠᠭ ᠶᠡᠭᠡ ᠲᠡᠪᠴᠢᠶᠡᠷᠢ ᠶᠢᠨ ᠤᠬᠠᠭᠠᠨ ᠰᠢᠨᠳᠠᠰᠤ ᠦᠪᠯᠡᠵᠤ ᠦᠭᠳᠡᠭ ᠶᠤᠮ ᠭᠡᠳᠡᠭ ᠢ ᠵᠢᠭᠠᠬᠠᠨ ᠤᠬᠠᠭᠠᠷᠠᠯ᠎ᠠ᠃ ︽ᠡᠨᠡᠤᠬᠡᠨ ᠳᠤ ᠭᠡᠳᠡᠭ ᠨᠢ ᠡᠳᠤᠷ ᠤᠨ ᠵᠠᠮ ᠤᠨ ᠤᠷᠳᠤ︾ ᠭᠡᠳᠡᠭ ᠦᠨᠡᠨ ᠪᠠᠶᠢᠵᠠᠢ᠃ ᠬᠠᠪᠤᠷ ᠤᠨ ᠬᠠᠷ᠎ᠠ ᠰᠠᠯᠬᠢᠨ ᠳᠤ ᠪᠦᠳᠤᠨ ᠡᠳᠤᠷ ᠳᠦᠩᠰᠢᠭᠦᠯᠵᠤ᠂ ᠵᠢᠭᠡᠬᠦᠰᠬᠦ ᠦᠯᠤᠰᠬᠦ ᠲᠠᠪᠬᠤᠴᠠᠭᠰᠠᠨ ᠮᠠᠨᠤᠰ ᠲᠤ ᠮᠤᠩᠭᠤᠯ ᠬᠡᠷ ᠤᠨ ᠡᠬᠦᠳᠡ ᠪᠠᠷ ᠠᠯᠬᠤᠨ ᠤᠷᠤᠬᠤ ᠲᠠᠢ ᠵᠡᠷᠭᠡ ᠳᠤ ᠭᠠᠯ ᠤᠨ ᠢᠯᠴᠢ ᠨᠢᠯᠬᠢᠨ᠂ ᠶᠠᠳᠠᠷᠠᠭ᠎ᠠ ᠴᠢᠯᠡᠭᠡ ᠨᠢᠭᠡᠯᠡ ᠲᠤᠤᠷ᠎ᠠ ᠨᠦᠷᠢᠬᠡᠳ ᠢᠷᠡᠬᠦ ᠰᠢᠭ᠋᠂ ᠪᠠᠰᠠ ᠲᠡᠷᠡ ᠢᠯᠴᠢ ᠭᠡᠷᠡᠯ ᠳᠤ ᠲᠦᠳᠡᠬᠡᠨ ᠰᠠᠷᠨᠢᠭᠠᠳ ᠤᠳᠬᠤ ᠰᠢᠭ᠋ ᠪᠤᠯᠵᠠᠢ᠃ ᠲᠡᠷᠡ ᠡᠷᠢᠨ ᠳᠤ ᠶᠠᠭ ᠲᠦᠯ ᠲᠤᠰᠴᠤ ᠪᠠᠶᠢᠭᠰᠠᠨ ᠪᠤᠯᠬᠤᠷ ᠶᠠᠳᠠᠷ ᠲᠤᠷᠤᠢ ᠬᠤᠶᠠᠷ ᠭᠤᠷᠪᠠᠨ ᠢᠰᠢᠬᠡ ᠬᠤᠷᠠᠭ᠎ᠠ ᠠᠳᠠᠰᠬ᠎ᠠ ᠳᠤ ᠲᠠᠭᠠᠳᠠᠢ ᠬᠡᠪᠳᠡᠵᠤ᠂ ᠬᠠᠶᠠ ᠪᠤᠰᠴᠤ ᠢᠷᠡᠬᠡᠳ ᠲᠤᠵᠢᠷ ᠲᠤᠵᠢᠷ ᠠᠯᠬᠤᠨ᠎ᠠ᠃ ᠨᠠᠰᠤᠳᠠᠨ ᠡᠵᠢ ᠡᠷᠬᠢᠨᠡᠭ ᠤᠨ ᠡᠮᠤᠨ᠎ᠡ ᠡᠷᠬᠢᠯᠳᠤᠨ ᠪᠠᠶᠢᠭᠰᠠᠨ ᠢᠶᠠᠨ ᠤᠳᠠᠵᠤ ᠲᠦᠳᠡᠯ ᠦᠬᠡᠢ ᠪᠤᠷᠴᠠ ᠲᠠᠢ ᠱᠦᠯᠤᠨ ᠳᠤ ᠴᠠᠭ᠎ᠠ ᠲᠠᠢ ᠭᠤᠯᠢᠷ ᠬᠤᠭᠤᠯᠠ ᠬᠢᠵᠤ ᠭᠠᠷᠤᠯ᠎ᠠ᠃ ᠲᠤᠯᠭ᠎ᠠ ᠶᠢᠨ ᠭᠠᠯ ᠲᠦᠷᠡᠯᠵᠡᠨ᠂ ᠲᠤᠭᠤᠭ᠎ᠠ ᠲᠠᠢ ᠱᠦᠯᠤᠡ ᠠᠴᠠ ᠪᠤᠷᠴᠠ ᠮᠢᠬ᠎ᠠ᠂ ᠴᠠᠭ᠎ᠠ ᠶᠢᠨ ᠦᠨᠤᠷ ᠬᠠᠩᠬᠤᠯᠵᠤ᠂ ᠦᠷᠤᠬᠡ ᠲᠦᠬᠦᠷᠡᠩ ᠦᠶᠦᠭ ᠲᠤᠯᠠᠭᠠᠨ ᠠᠮᠢᠰᠬᠤᠯ ᠲᠦᠬᠡᠵᠠᠢ᠃ ᠪᠠᠭ᠎ᠠ ᠶᠢᠨ ᠦᠶ᠎ᠡ ᠳᠤ ᠡᠬᠡᠴᠢ ᠶᠢᠨ ᠳᠤ ᠤᠴᠢᠭᠠᠳ ᠠᠩᠬ᠎ᠠ ᠮᠤᠩᠭᠤᠯ ᠭᠡᠷ ᠲᠤ ᠤᠷᠤᠬᠤ ᠳᠤ ᠮᠦᠨ ᠡᠶᠢᠮᠤ ᠦᠨᠤᠷ ᠦᠨᠤᠷᠳᠡᠵᠤ ᠪᠠᠶᠢᠭᠰᠠᠨ ᠶᠤᠮ᠃ ᠲᠡᠬᠡᠬᠦ ᠳᠤ ᠶᠠᠭᠤᠨ ᠳᠤ ᠲᠡᠭᠡᠵᠤ ᠠᠭᠠᠰᠢᠯᠠᠵᠤ ᠪᠠᠶᠢᠭᠰᠠᠨ ᠶᠤᠮ ᠳ᠋ᠠ ᠭᠡᠵᠤ ᠦᠪᠡᠷ ᠢ ᠪᠠᠨ ᠵᠢᠮᠡᠯᠡᠵᠤ ᠰᠠᠭᠤᠯ᠎ᠠ᠃ ᠤᠳᠠᠯ ᠦᠬᠡᠢ ᠬᠤᠭᠤᠯᠠ ᠪᠤᠯᠵᠤ᠂ ᠪᠢᠳᠡ ᠠᠮᠠ ᠬᠠᠮᠠᠷ ᠢᠶᠠᠨ ᠤᠯᠤᠯ ᠦᠬᠡᠢ ᠢᠳᠡᠵᠤ ᠭᠠᠷᠴᠠᠢ᠃ ᠮᠦᠨ ᠬᠡᠳᠡᠰᠤ ᠲᠦᠬᠦᠷᠴᠤ ᠪᠡᠶ᠎ᠡ ᠬᠠᠯᠠᠰᠬᠤ ᠪᠠᠷ ᠪᠢ ᠰᠠᠶ᠋ᠢ ᠬᠡᠷ ᠲᠤᠳᠤᠷᠠᠬᠢ ᠶᠢ ᠨᠠᠷᠢᠨ ᠠᠵᠢᠭᠯᠠᠬᠤ ᠲᠡᠩᠬᠡᠬᠡ ᠲᠠᠢ ᠪᠤᠯᠵᠤ ᠪᠢᠯᠡ᠃ ᠬᠡᠷ ᠤᠨ ᠪᠠᠷᠠᠭᠤᠨ ᠲᠠᠯ᠎ᠠ ᠪᠠᠷ ᠡᠮᠡᠬᠡᠯ ᠬᠠᠵᠠᠭᠠᠷ᠂ ᠵᠡᠬᠦᠨ ᠲᠠᠯ᠎ᠠ ᠪᠠᠷ ᠰᠠᠪᠠ ᠰᠠᠭᠤᠯᠭ᠎ᠠ ᠭᠤᠤᠯᠴᠠᠭᠤ ᠲᠠᠯᠪᠢᠵᠠᠢ᠃ ᠬᠡᠳᠤᠬᠡᠨ ᠬᠦᠮᠤᠨ ᠡᠷᠬᠢᠯᠳᠤᠵᠤ ᠪᠠᠭᠳᠠᠬᠤ ᠵᠢᠵᠢᠭᠬᠡᠨ ᠡᠨᠡ ᠬᠡᠷ ᠢ ᠲᠡᠮᠤᠷ ᠵᠤᠤᠬᠠᠨ ᠠᠴᠠ ᠪᠠᠳᠠᠷᠠᠬᠤ ᠬᠦᠷᠵᠡᠩ ᠤᠨ ᠭᠠᠯ ᠤᠨ ᠢᠯᠴᠢ ᠦᠨᠴᠦᠭ ᠪᠤᠯᠤᠩ ᠦᠬᠡᠢ ᠲᠤᠯᠠᠭᠠᠯᠠᠵᠤ ᠪᠠᠶᠢᠪᠠ᠃ ᠭᠠᠳᠠᠨ᠎ᠠ ᠬᠡᠳᠦ᠋ᠢᠪᠡᠷ ᠬᠠᠪᠤᠷ ᠤᠨ ᠬᠠᠷ᠎ᠠ ᠰᠠᠯᠬᠢ ᠰᠠᠯᠬᠢᠯᠠᠵᠤ ᠱᠤᠤᠬᠢᠵᠤ ᠠᠭᠰᠠᠨ ᠴᠦ ᠬᠡᠷ ᠲᠤᠳᠤᠷ᠎ᠠ ᠤᠨᠴᠠ ᠨᠠᠮᠤᠭᠤᠬᠠᠨ ᠲᠤᠯᠠᠭᠠᠬᠠᠨ ᠪᠠᠶᠢᠵᠤ᠂ ᠪᠦᠳᠡᠬᠢᠬᠢᠨ ᠳ᠋ᠧᠩ ᠤᠨ ᠬᠡᠬᠡ ᠳᠤ ᠵᠤᠭᠤᠭ ᠲᠡᠯᠬᠡᠬᠦ ᠳᠤ ᠲᠠᠭᠠᠳᠠᠢ ᠰᠠᠶᠢᠬᠠᠨ ᠰᠠᠨᠠᠭᠳᠠᠯ᠎ᠠ᠃ ᠰᠦᠨᠢ ᠤᠨᠳᠠᠬᠤ ᠪᠤᠯᠬᠤ ᠳᠤ ᠲᠡᠮᠤᠷ ᠲᠤᠯᠭ᠎ᠠ ᠶᠢ ᠬᠠᠪᠴᠢᠵᠤ ᠨᠠᠰᠤᠳᠠᠨ ᠡᠵᠢ ᠤᠷᠤ ᠲᠡᠪᠢᠰᠬᠡᠷ ᠲᠡᠪᠢᠰᠴᠤ᠂ ᠪᠢᠳᠡ ᠪᠠᠷᠤᠭ ᠬᠠᠪᠢᠷᠭ᠎ᠠ ᠪᠠᠨ ᠰᠢᠭᠠᠮᠠᠷ ᠰᠢᠬᠠᠯᠴᠠᠨ ᠪᠠᠶᠢᠭᠰᠠᠨ ᠴᠦ ᠡᠳᠤᠷ ᠤᠨ ᠶᠠᠳᠠᠷᠠᠭ᠎ᠠ ᠳᠤ ᠪᠠᠨ ᠲᠡᠶᠢᠯᠦᠭᠳᠡᠨ ᠯᠦᠭ ᠰᠦᠭ ᠦᠬᠡᠢ ᠤᠨᠳᠠᠵᠤ ᠤᠷᠬᠢᠵᠠᠢ ᠃ ᠬᠡᠨᠡᠳᠳᠡ ᠲᠤᠯᠤᠭᠠᠢ ᠦᠵᠦᠬᠦᠷ ᠢᠰᠢᠬᠡ ᠮᠠᠶᠢᠯᠠᠬᠤ ᠪᠠᠷ ᠨᠢᠳᠤ ᠨᠡᠬᠡᠬᠡᠪᠡᠯ ᠦᠷ ᠤᠨ ᠤᠯᠠᠭᠠᠨ ᠬᠡᠬᠡ ᠦᠷᠤᠬᠡ ᠲᠦᠬᠦᠷᠡᠩ ᠲᠤᠨᠤᠷᠠᠨ ᠪᠠᠶᠢᠪᠠ᠃ ᠨᠠᠰᠤᠳᠡᠨ ᠡᠵᠢ ᠠᠯᠢ ᠡᠷᠳᠡ ᠪᠤᠰᠤᠭᠰᠠᠨ ᠲᠦᠯᠦᠪ ᠲᠠᠢ᠂ ᠵᠤᠤᠬᠠᠨ ᠲᠡᠬᠡᠷ᠎ᠡ ᠪᠤᠴᠠᠯᠤᠭᠰᠠᠨ ᠴᠠᠢ ᠠᠭᠤᠷ ᠰᠠᠪᠰᠠᠵᠤ ᠪᠠᠶᠢᠯ᠎ᠠ᠃ ᠲᠡᠨᠳᠡ ᠪᠢᠳᠡ ᠭᠤᠷᠪᠠ ᠬᠤᠨᠤᠭ ᠠᠵᠢᠯᠯᠠᠯ᠎ᠠ᠃ ᠬᠡᠷ ᠤᠨ ᠡᠵᠡᠨ ᠠᠬ᠎ᠠ ᠳᠦᠩᠰᠦᠭᠦᠷ ᠲᠤᠭᠤᠢ ᠴᠤ ᠨᠠᠰᠤᠳᠠᠨ ᠡᠵᠢ ᠳᠤ ᠶᠤᠰᠤᠳᠠᠢ ᠡᠯᠪᠡᠷᠢᠯ ᠠᠴᠢᠯᠠᠯ ᠲᠠᠢ ᠨᠢ ᠲᠤᠳᠤ᠃ ᠡᠳᠡᠨᠠᠶᠢᠬᠢᠨ ᠭᠤᠷᠪᠠᠨ ᠲᠠᠰᠤᠯᠭ᠎ᠠ ᠪᠠᠶᠢᠰᠢᠩ ᠬᠡᠷ ᠪᠠᠷᠢᠵᠤ᠂ ᠲᠤᠬᠢᠯᠢᠭ ᠰᠠᠶᠢᠬᠠᠨ ᠠᠮᠢᠳᠤᠷᠠᠵᠤ ᠪᠠᠶᠢᠯ᠎ᠠ ᠴᠤ ᠨᠠᠰᠤᠳᠡᠨ ᠡᠵᠢ ᠲᠡᠷᠡ ᠬᠡᠷ ᠲᠤ ᠨᠢ ᠲᠠᠳᠬᠤ ᠦᠬᠡᠢ ᠪᠤᠯᠬᠤᠷ ᠡᠨᠡ ᠮᠤᠩᠭᠤᠯ ᠭᠡᠷ ᠲᠤ ᠪᠠᠨ ᠢᠯᠠᠬᠦᠤ ᠰᠠᠭᠤᠳᠠᠭ᠃     ᠬᠠᠯᠠᠭᠤᠨ ᠳᠤᠯᠠᠭᠠᠨ ᠠᠮᠢᠳᠤᠷᠠᠯ ᠬᠡᠵᠢᠶᠡᠳᠡ ᠠᠳᠡ ᠪᠤᠢ ᠰᠢᠤ ᠬᠡᠵᠤ ᠲᠤᠯᠭᠠᠨ ᠤ ᠢᠯᠴᠢ ᠦᠬᠡᠳᠡ ᠠᠴᠠ ᠴᠢᠨᠢ ᠤᠭᠳᠤᠬᠤ ᠪᠦᠬᠡᠳ ᠠᠶᠠᠭ᠎ᠠ ᠬᠠᠯᠠᠭᠤᠨ ᠴᠠᠢ ᠶᠢ ᠬᠡᠨ ᠳᠤ ᠴᠤ ᠠᠳᠠᠯᠢᠬᠠᠨ ᠬᠦᠷᠳᠡᠬᠡᠳᠡᠭ︔ ᠰᠤᠷᠳᠤᠭᠤ ᠨᠠᠮᠪᠠ ᠲᠠᠳᠠᠨ ᠭᠡᠳᠡᠶᠢᠨ ᠤᠷᠤᠬᠤ ᠳᠤ ᠪᠤᠯᠤᠮᠵᠢ ᠦᠬᠡᠢ ᠨᠠᠮᠬᠠᠨ ᠡᠬᠦᠳᠡ ᠲᠠᠢ ᠮᠤᠩᠭᠤᠯ ᠬᠡᠷ ᠲᠤ ᠪᠡᠶ᠎ᠡ ᠪᠢᠯᠳᠡᠷ ᠤᠨ ᠶᠡᠭᠡ ᠪᠠᠭ᠎ᠠ᠂ ᠡᠷᠬᠡ ᠵᠡᠷᠬᠡ ᠶᠢᠨ ᠡᠷᠬᠢᠮ ᠳᠤᠤᠷᠠᠳᠤ ᠭᠡᠵᠤ ᠢᠯᠭᠠᠯ ᠦᠬᠡᠢ ᠶᠠᠮᠠᠷ ᠬᠦᠮᠤᠨ ᠴᠤ ᠲᠤᠯᠤᠭᠠᠢ ᠲᠠᠷᠤᠨ ᠨᠢᠷᠤᠭᠤ ᠪᠦᠬᠦ᠋ᠢᠪᠡᠯ ᠰᠠᠶ᠋ᠢ ᠤᠷᠤᠵᠤ ᠲᠡᠶᠢᠯᠳᠡᠭ︔ ᠠᠬᠠᠮᠠᠳ ᠲᠤᠮᠤᠭ᠎ᠠ ᠲᠠᠢ ᠬᠦᠮᠤᠰ ᠬᠤᠶᠢᠮᠤᠷ ᠰᠠᠭᠠᠳᠠᠨ ᠪᠠᠶᠢᠪᠠᠯ ᠤᠷᠤᠭᠰᠠᠨ ᠬᠦᠮᠤᠨ ᠪᠤᠯᠭᠠᠨ ᠠᠮᠤᠷ ᠮᠡᠨᠳᠤ ᠰᠤᠷᠠᠭᠠᠳ ᠰᠠᠶ᠋ᠢ ᠰᠠᠭᠤᠳᠠᠯ ᠢᠶᠠᠨ ᠤᠯᠳᠠᠭ︔ ᠲᠤᠯᠭ᠎ᠠ ᠪᠠᠨ ᠲᠤᠭᠤᠷᠢᠭᠰᠠᠠ ᠡᠨᠡ ᠵᠢᠵᠢᠭᠬᠡᠨ ᠶᠢᠷᠳᠢᠨᠴᠤ ᠳᠤ ᠲᠠᠯᠠᠨ ᠰᠠᠷᠬᠢᠨᠠᠭ ᠰᠢᠭ᠋ ᠤᠯᠠᠨ ᠤᠯᠠᠨ ᠲᠠᠰᠤᠯᠭ᠎ᠠ ᠭᠡᠷ ᠪᠠᠶᠢᠬᠤ ᠦᠬᠡᠢ ᠤᠴᠢᠷ ᠠᠴᠠ ᠶᠠᠭᠤ ᠪᠦᠬᠦᠨ ᠨᠢ ᠪᠦᠷ ᠢᠯᠡ ᠰᠠᠷᠠᠭᠤᠯ ᠪᠠᠶᠢᠵᠤ᠂ ᠬᠡᠨ ᠨᠢᠭᠡᠨ ᠠᠴᠠ ᠪᠠᠨ ᠨᠢᠭᠤᠵᠤ ᠬᠠᠪᠴᠢᠬᠤ ᠶᠠᠭᠤᠮ᠎ᠠ ᠬᠡᠵᠤ ᠠᠯᠠᠭ᠎ᠠ︔ ᠬᠠᠪᠤᠷ ᠤᠨ ᠬᠠᠳᠠᠭᠤ ᠴᠠᠭ ᠲᠤ ᠴᠠᠢ ᠶᠢᠨ ᠰᠦ ᠨᠢ ᠬᠤᠮᠰᠠᠳᠠᠨ ᠪᠠᠶᠢᠯ᠎ᠠ ᠴᠤ ᠠᠮᠢ ᠵᠠᠯᠭᠠᠭᠤᠯᠬᠤ ᠬᠡᠵᠤ ᠢᠰᠢᠬᠡ ᠬᠤᠷᠠᠭ᠎ᠠ ᠪᠠᠨ ᠤᠭᠵᠢᠬᠤ ᠪᠦᠬᠡᠳ ᠬᠡᠷ ᠲᠤ ᠪᠠᠨ ᠠᠪᠴᠤ ᠬᠤᠨᠤᠳᠠᠭ ᠠᠴᠠ ᠪᠠᠶᠢᠭᠠᠯᠢ ᠬᠦᠮᠤᠨ ᠲᠠᠢ ᠪᠠᠨ ᠦ ᠵᠠᠢ ᠦᠬᠡᠢ ᠢᠳᠡᠬᠡᠰᠢᠨ ᠲᠠᠰᠴᠤ᠂ ᠬᠦᠮᠤᠨ ᠮᠠᠯ ᠢᠯᠭᠠᠯ ᠦᠬᠡᠢ ᠬᠠᠶᠢᠷ᠎ᠠ ᠶᠢᠨ ᠢᠪᠢᠯᠤᠯ ᠳᠤ ᠵᠡᠷᠬᠡ ᠳᠤ ᠪᠠᠨ ᠪᠠᠭᠳᠠᠨ ᠤᠨᠳᠤᠷᠳᠠᠭ︔ ᠡᠶᠢᠮᠤ ᠤᠷᠴᠢᠨ ᠳᠤ ᠤᠳᠠᠭᠠᠨ ᠠᠮᠢᠳᠤᠷᠠᠭᠰᠠᠨ ᠬᠦᠮᠤᠨ ᠳᠤ ᠤᠶᠠᠨ ᠬᠠᠶᠢᠯᠭᠠᠨ᠂ ᠡᠷᠬᠡ ᠲᠡᠭᠰᠢ᠂ ᠢᠯᠠ ᠴᠠᠶᠢᠯᠭᠠᠨ᠂ ᠦᠩᠬᠢᠶᠡᠮᠤᠷ ᠲᠤᠰᠠᠴᠢ᠂ ᠠᠰᠠᠷᠠᠩᠭᠤᠢ ᠡᠨᠡᠷᠢᠩᠬᠦᠢ ᠵᠠᠩ ᠲᠤᠭᠳᠠᠬᠤ ᠦᠬᠡᠢ ᠪᠠᠶᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ ᠳ᠋ᠠ ᠪᠢ ᠦᠪᠡᠷ ᠲᠤ ᠪᠠᠨ ᠳ᠋ᠦᠩᠨᠡᠨ ᠤᠯᠵᠠᠷᠬᠠᠯ᠎ᠠ᠃ ᠲᠠᠯ᠎ᠠ ᠶᠢᠨ ᠬᠦᠨ ᠳᠤ ᠪᠤᠮᠪᠤᠶᠢᠵᠤ ᠪᠠᠶᠢᠭ᠎ᠠ ᠲᠡᠷᠡ ᠵᠢᠵᠢᠭᠭᠡᠨ ᠲᠡᠯᠡᠬᠡᠢ ᠶᠢ ᠪᠢᠳᠡᠬᠡᠢ ᠪᠠᠰᠤ᠂ ᠲᠡᠨᠳᠡ ᠠᠭᠠᠭ ᠲᠠᠢ ᠠᠮᠢᠳᠤᠷᠠᠯ ᠪᠤᠴᠠᠯᠵᠤ᠂ ᠠᠩᠭᠠᠵᠤ ᠴᠠᠩᠭᠠᠵᠤ᠂ ᠦᠯᠦᠰᠴᠤ ᠦᠯᠪᠡᠷᠦᠭᠰᠡᠨ ᠨᠢᠬᠡᠨ ᠳᠤ ᠵᠡᠬᠦᠳᠤᠨ ᠳᠤ ᠨᠢ ᠬᠤᠨᠤᠭᠰᠢᠮᠠᠷ ᠰᠦ ᠴᠠᠭ᠎ᠠ ᠬᠠᠩᠬᠤᠯᠤᠭᠠᠰᠤᠳᠠᠢ ᠶᠤᠮ ᠭᠡᠬᠦ ᠲᠤᠷᠠᠳᠬᠠᠯ ᠬᠠᠪᠤᠷ ᠤᠨ ᠢᠷᠭᠤᠢ ᠰᠢᠭ᠋ ᠲᠤᠳᠤ ᠠᠴᠠ ᠲᠤᠳᠤ ᠲᠡᠯᠭᠡᠷᠡᠵᠤ ᠦᠯᠡᠳᠡᠭᠰᠨᠨ ᠶᠤᠮ ᠡ᠃    ᠤᠶᠢᠷ᠎ᠠ ᠶᠢᠨ ᠬᠡᠳᠤᠨ ᠵᠢᠯ ᠳᠤ ᠮᠠᠨ ᠤ ᠡᠷᠬᠢᠨ ᠲᠤᠭᠤᠷᠢᠨ ᠳᠤ ᠮᠤᠩᠭᠤᠯ ᠠᠮᠢᠳᠤᠷᠠᠯ ᠢᠶᠠᠨ ᠬᠤᠳᠠ ᠶᠢᠨ ᠵᠠᠢ ᠳᠤ ᠠᠭᠤᠰᠬᠠᠬᠤ ᠪᠠᠷ ᠴᠢᠷᠮᠡᠶᠢᠬᠤ ᠬᠦᠮᠤᠰ ᠴᠤ ᠤᠯᠠᠨ ᠪᠤᠯᠵᠠᠢ᠃ ᠪᠢ ᠴᠤ ᠬᠤᠳᠠ ᠳᠤ ᠬᠦᠯ ᠲᠤᠭᠳᠠᠨ ᠬᠦᠮᠤᠨ ᠤ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠨᠢᠬᠡ ᠬᠠᠭᠤᠴᠢᠨ ᠠᠰᠠᠷ ᠢ ᠬᠤᠳᠠᠯᠳᠤᠨ ᠠᠪᠬᠤ ᠪᠠᠷ ᠪᠤᠯᠤᠭᠰᠠᠨ ᠶᠤᠮ᠃ ᠬᠠᠮᠤᠭ ᠤᠯᠵᠠᠷᠬᠠᠭᠰᠠᠨ ᠵᠦᠢᠯ ᠭᠡᠪᠡᠯ ᠨᠢᠬᠡᠳᠤᠬᠡᠷ ᠲᠠᠪᠬᠤᠷ ᠤᠨ ᠠᠰᠠᠷ ᠲᠤ ᠪᠠᠨ ᠪᠠᠰᠠ ᠵᠢᠭᠠᠬᠠᠨ ᠬᠦᠷᠢᠶ᠎ᠡ ᠲᠠᠢ᠃ ᠡᠬᠡᠨᠡᠷ ᠮᠢᠨᠢ ᠴᠡᠴᠡᠭ ᠬᠤᠸᠠᠷ ᠲᠠᠷᠢᠨ᠎ᠠ ᠬᠡᠵᠤ ᠭᠦᠭᠰᠡᠬᠦ ᠳᠤ ᠪᠢ ᠬᠠᠷᠢᠨ ᠬᠦᠷᠢᠶᠡᠨ ᠳᠤ ᠪᠤᠰᠬᠠᠭᠰᠠᠨ ᠲᠠᠪᠤᠨ ᠬᠠᠨᠠᠳᠤ ᠵᠢᠭᠠᠬᠠᠨ ᠮᠤᠩᠭᠤᠯ ᠬᠡᠷ ᠲᠤ ᠨᠢᠳᠤ ᠭᠡᠷᠡᠯᠲᠦᠭᠰᠡᠨ ᠶᠤᠮ᠃ ᠤᠤᠯ ᠤᠨ ᠭᠡᠷ ᠤᠨ ᠡᠵᠡᠨ ᠠᠴᠠ ᠠᠰᠠᠭᠤᠪᠠᠯ ᠮᠤᠩᠭᠤᠯ ᠭᠡᠷ ᠢᠶᠠᠨ ᠠᠪᠠᠴᠢᠬᠤ ᠦᠬᠡᠢ᠂ ᠦᠯᠡᠳᠡᠭᠡᠵᠤ ᠦᠭᠬᠦ ᠶᠤᠮ ᠬᠡᠨ᠎ᠡ᠃ ᠮᠢᠨᠤ ᠪᠠᠶᠠᠷᠯᠠᠭᠰᠠᠨ ᠭᠡᠵᠢ ᠡ︕ ᠵᠤᠨ ᠤ ᠰᠠᠶᠢᠬᠠᠨ ᠴᠠᠭ ᠲᠤ ᠬᠡᠤᠬᠡᠳ ᠲᠠᠢ ᠪᠠᠨ ᠱᠠᠭ᠎ᠠ ᠲᠤᠭᠯᠠᠵᠤ᠂ ᠨᠤᠮ ᠤᠩᠰᠢᠪᠠᠯ ᠲᠡᠯᠪᠡ ᠭᠤᠶᠤ ᠬᠡᠵᠤ ᠲᠦᠰᠦᠭᠡᠯᠡᠵᠤ ᠰᠠᠭᠤᠵᠠᠢ᠃ ᠲᠡᠭᠡᠬᠡᠳ ᠠᠰᠠᠷ ᠢᠶᠠᠨ ᠲᠦᠷᠬᠡᠬᠡᠨ ᠰᠢᠭ ᠵᠠᠰᠠᠵᠤ ᠡᠬᠢᠯᠡᠭᠰᠡᠨ ᠶᠤᠮ᠃ ᠭᠡᠪᠡᠴᠤ ᠨᠢᠭᠡ ᠡᠳᠤᠷ ᠵᠡᠬᠡᠯᠢ ᠭᠤᠳᠤᠮᠵᠢ ᠶᠢᠨ ᠬᠠᠮᠢᠶᠠᠷᠤᠯᠳᠠ ᠶᠢᠨ ᠬᠦᠮᠤᠰ ᠡᠬᠦᠳᠡᠨ ᠳᠤ ᠵᠠᠯᠠᠷᠠᠨ ᠪᠠᠭᠤᠵᠤ᠂ ᠡᠨᠡ ᠮᠤᠩᠭᠤᠯ ᠭᠡᠷ ᠢᠶᠠᠨ ᠪᠠᠭᠤᠯᠭ᠎ᠠ ᠂ ᠮᠠᠨ ᠤ ᠬᠤᠳᠠ ※ ※ ※ ᠤᠢ ᠶᠢ ᠪᠡᠯᠬᠡᠯᠡᠬᠦ ᠤᠴᠢᠷ ᠠᠴᠠ ᠵᠡᠬᠡᠯᠢ ᠭᠤᠳᠤᠮᠵᠢ ᠶᠢᠨ ᠲᠦᠷᠢ ᠲᠦᠷᠬᠦ ᠶᠢ ᠨᠢᠭᠡᠳᠤᠯᠳᠠᠢ ᠲᠦᠯᠦᠪᠵᠢᠭᠦᠯᠵᠤ ᠴᠡᠭᠴᠡᠯᠡᠵᠤ ᠪᠠᠶᠢᠨ᠎ᠠ ᠬᠡᠴᠢᠬᠡᠯ᠎ᠡ᠃ ᠪᠢ ᠤᠶᠢᠰᠢᠶᠠᠭᠰᠠᠨ ᠴᠤ ᠦᠬᠡᠢ᠃ ᠮᠢᠨᠤ ᠬᠦᠷᠢᠶᠡᠨ ᠳᠤ ᠪᠠᠶᠢᠭ᠎ᠠ ᠮᠤᠩᠭᠤᠯ ᠬᠡᠷ ᠶᠠᠭᠠᠬᠢᠭᠠᠳ ᠬᠤᠳᠠ ᠶᠢᠨ ᠦᠩᠬᠡ ᠲᠦᠷᠬᠦ ᠳᠤ ᠬᠠᠷᠰᠢ ᠪᠤᠯᠪᠠ︖ ᠬᠡᠷᠪᠡ ᠶᠡᠭᠡ ᠵᠠᠮ ᠤᠨ ᠬᠠᠵᠠᠭᠤ ᠳᠤ ᠪᠤᠰᠬᠠᠨ᠂ ᠤᠯᠠᠨ ᠤ ᠬᠦᠯ ᠭᠠᠷ ᠲᠤ ᠰᠠᠭᠠᠳ ᠪᠤᠯᠤᠭᠰᠠᠨ ᠴᠤ ᠪᠤᠯ ᠶᠠᠭᠠᠬᠢᠬᠤᠪ ᠳ᠋ᠠ᠂ ᠡᠨᠡ ᠴᠢᠨᠢ ᠠᠷᠪᠠᠭ᠋ᠠᠨ ᠠᠰᠠᠷ ᠲᠠᠢ ᠵᠠᠮ ᠠᠴᠠ ᠵᠠᠶᠢᠳᠠᠭᠤ ᠵᠢᠵᠢᠭᠬᠡᠨ ᠰᠠᠭᠤᠭᠠᠯᠢ ᠬᠤᠷᠢᠶᠠᠯᠠᠯ ᠰᠢᠤ ᠳ᠋ᠠ᠃ ᠲᠡᠷᠡ ᠮᠦᠷᠳᠡᠭᠡᠨ ᠡᠨᠡ ᠵᠢᠵᠢᠭ ᠬᠦᠷᠢᠶ᠎ᠡ ᠴᠤ ᠮᠢᠨᠤ ᠬᠤᠪᠢ ᠶᠢᠨ ᠦᠮᠴᠢ ᠰᠢᠤ᠃ ᠬᠦᠷᠢᠶ᠎ᠡ ᠬᠠᠰᠢᠶᠠᠨ ᠳᠤ ᠪᠠᠨ ᠶᠠᠭᠤ ᠪᠤᠰᠬᠠᠬᠤ ᠨᠢ ᠴᠢᠮ᠎ᠠ ᠳᠤ ᠶᠠᠮᠠᠷ ᠬᠠᠮᠢᠶ᠎ᠠ︖ ᠳᠠᠬᠢᠭᠠᠳ ᠬᠡᠯᠡᠬᠦ ᠳᠤ ᠡᠨᠡ ᠮᠤᠩᠭᠤᠯ ᠬᠡᠷ ᠴᠢᠨᠢ ᠮᠤᠳᠤᠨ ᠪᠦᠳᠤᠴᠡ ᠲᠠᠢ᠂ ᠶᠠᠮᠠᠷ ᠲᠤ ᠪᠠᠨ ᠲᠤᠭᠤᠰᠬ᠎ᠠ ᠴᠢᠯᠠᠭᠤ ᠪᠠᠷ ᠪᠠᠶᠢᠭᠤᠯᠤᠭᠰᠠᠨ ᠪᠠᠶᠢᠰᠢᠩ ᠭᠡᠷ ᠪᠢᠰᠢ ᠰᠢᠤ ᠳ᠋ᠠ᠃ ᠭᠡᠪᠡᠴᠤ ᠲᠡᠳᠡ ᠪᠠᠶᠢᠨ ᠲᠠᠬᠢᠨ ᠢᠷᠡᠬᠡᠳ ᠪᠠᠶᠢᠬᠤ ᠪᠠᠷ ᠡᠬᠡᠨᠡᠷ ᠮᠢᠨᠢ ︽ᠪᠠᠭᠤᠯᠭᠠᠴᠢᠬ᠎ᠠ᠂ ᠶᠠᠮᠠᠷ ᠠᠷᠭ᠎ᠠ ᠪᠠᠶᠢᠨᠠᠪ︖︾ ᠭᠡᠵᠤ ᠢᠳᠬᠠᠬᠤ ᠬᠠᠭᠠᠰ᠂ ᠠᠷᠭᠠᠳᠠᠬᠤ ᠬᠠᠭᠠᠰ ᠪᠤᠯᠬᠤ ᠪᠠᠷ ᠪᠢ ᠬᠡᠳᠤᠨ ᠡᠳᠤᠷ ᠨᠦᠢᠷ ᠬᠤᠭᠤᠯᠠ ᠦᠬᠡᠢ ᠶᠠᠪᠤᠵᠤ ᠡᠴᠤᠰ ᠲᠤ ᠪᠠᠨ ᠪᠠᠭᠤᠯᠭᠠᠵᠤ ᠦᠭᠴᠠᠢ᠃ ᠬᠡᠪᠡᠴᠤ ᠪᠢ ᠬᠠᠭᠤᠴᠢᠨ ᠮᠤᠩᠭᠤᠯ ᠬᠡᠷ ᠭᠡᠵᠤ ᠶᠡᠷᠤ ᠪᠤᠳᠤᠭᠰᠠᠨ ᠦᠬᠡᠢ᠂ ᠰᠠᠶᠢᠬᠠᠨ ᠪᠤᠭᠤᠵᠤ ᠪᠠᠭᠯᠠᠭᠠᠳ ᠨᠤᠳᠤᠭ ᠲᠤ ᠪᠠᠶᠢᠭ᠎ᠠ ᠠᠴᠢ ᠬᠦᠤ ᠳᠤ ᠪᠠᠨ ᠭᠤᠪᠢᠭᠤᠯᠵᠤ ᠶᠠᠪᠤᠭᠤᠯᠬᠤ ᠪᠠᠷ ᠪᠤᠯᠤᠯ᠎ᠠ᠃ ᠭᠤᠪᠢᠭᠤᠯᠬᠤ ᠪᠠᠷ ᠢᠷᠡᠭᠰᠡᠨ ᠵᠠᠯᠠᠭᠤ ᠢᠷᠡᠴᠢᠬᠡᠬᠡᠳ ︽ᠠᠬ᠎ᠠ ᠡ᠂ ᠪᠢ ᠭᠤᠪᠢᠭᠤᠯᠭ᠎ᠠ ᠶᠢᠨ ᠠᠵᠢᠯ ᠬᠢᠵᠤ ᠡᠳᠤᠢ ᠵᠢᠯ ᠪᠤᠯᠳᠠᠯ᠎ᠠ ᠮᠤᠩᠭᠤᠯ ᠭᠡᠷ ᠢ ᠠᠩᠬ᠎ᠠ ᠤᠳᠠᠭ᠎ᠠ ᠭᠤᠪᠢᠭᠤᠯᠬᠤ ᠪᠤᠯᠵᠤ ᠪᠠᠶᠢᠨ᠎ᠠ᠃ ᠡᠬᠦᠨ ᠢ ᠭᠤᠪᠢᠭᠤᠯᠬᠤ ᠰᠦᠢᠳᠬᠡᠯ ᠪᠠᠷᠤᠭ ᠰᠢᠨ᠎ᠡ ᠮᠤᠩᠭᠤᠯ ᠭᠡᠷ ᠬᠤᠳᠠᠯᠳᠤᠭᠠᠳ ᠠᠪᠤᠴᠢᠬᠠᠨ᠎ᠠ ᠰᠢᠤ︾ ᠭᠡᠵᠤ ᠢᠨᠢᠶᠡᠴᠢᠭᠡᠯ᠎ᠡ᠃ ᠪᠢ ᠶᠠᠭᠤ ᠴᠤ ᠲᠤᠤᠭᠠᠷᠤᠭᠰᠠᠨ ᠦᠬᠡᠢ᠂ ᠮᠦᠩᠬᠦ ᠶᠢ ᠨᠢ ᠨᠢᠬᠡ ᠴᠦ ᠲᠤᠳᠠᠭᠤᠯᠤᠭᠰᠠᠨ ᠦᠬᠡᠢ ᠪᠠᠷ ᠭᠤᠪᠢᠭᠤᠯᠵᠤ ᠶᠠᠪᠤᠭᠤᠯᠤᠭᠠᠳ ᠰᠠᠨᠠᠭ᠎ᠠ ᠰᠡᠳᠬᠢᠯ ᠲᠠᠶᠢᠪᠤᠰᠢᠷᠠᠭᠰᠠᠨ ᠶᠤᠮ᠃ ᠲᠡᠷᠡ ᠵᠤᠨ ᠨᠢ ᠨᠤᠲᠤᠭ ᠲᠤ ᠪᠠᠨ ᠬᠠᠷᠢᠬᠤ ᠳᠤ ᠠᠴᠢ ᠬᠦᠤ ᠬᠦᠷᠢᠶᠡᠨ ᠲᠤᠮᠳᠠ ᠪᠠᠨ ᠭᠤᠪᠢᠭᠤᠯᠤᠭᠰᠠᠨ ᠬᠡᠷ ᠢ ᠪᠤᠰᠬᠠᠵᠤ᠂ ᠮᠠᠨ ᠤ ᠨᠤᠲᠤᠭ ᠲᠤ ᠲᠠᠰᠤᠷᠠᠭᠠᠳ ᠤᠳᠠᠭᠰᠠᠨ ᠮᠤᠩᠭᠤᠯ ᠭᠡᠷ ᠲᠠᠬᠢᠨ ᠪᠤᠰᠤᠭᠰᠠᠨ ᠶᠤᠮ᠃ ᠲᠡᠭᠡᠬᠡᠳ ᠯᠠ ᠠᠯᠢ ᠨᠢᠭᠡᠨ ᠡᠳᠤᠷ ᠲᠡᠷᠡᠬᠦ ᠮᠤᠩᠭᠤᠯ ᠭᠡᠷ ᠲᠤ ᠪᠠᠨ ᠮᠢᠬ᠎ᠠ ᠬᠦᠰᠬᠦᠯᠡᠨ ᠵᠤᠭᠤᠭᠯᠠᠵᠤ᠂ ᠰᠦ ᠴᠠᠭ᠎ᠠ ᠶᠢᠨ ᠦᠨᠤᠷ ᠢᠶᠠᠨ ᠬᠠᠩᠬᠤᠯᠤᠭᠤᠯᠵᠤ ᠰᠠᠭᠤᠬᠤ ᠶᠤᠮ᠃ ᠪᠤᠯᠳᠠᠭ ᠰᠠᠨ ᠪᠤᠯ ᠬᠠᠶᠠ ᠪᠠᠰᠠ ᠨᠠᠷᠠ ᠡᠬᠡᠴᠢ ᠰᠢᠭ ᠢᠶᠠᠨ ᠲᠤᠨᠤᠭᠰᠠᠨ ᠪᠤᠷᠤᠭᠠᠨ ᠤ ᠤᠰᠤᠨ ᠳᠤ ᠦᠬᠡᠷ ᠤᠨ ᠢᠶᠠᠨ ᠪᠠᠭᠠᠰᠤ ᠶᠢ ᠨᠤᠬᠤᠨ᠂ ᠠᠯᠳᠠᠵᠤ ᠬᠡᠭᠡᠭᠰᠡᠨ ᠠᠮᠢᠳᠤᠷᠠᠯ ᠤᠨ ᠢᠶᠠᠨ ᠴᠤᠭᠤᠷᠬᠠᠢ ᠶᠢ ᠨᠦᠬᠦᠨ ᠰᠡᠯᠪᠢᠨ᠎ᠡ ᠬᠡᠵᠤ ᠮᠦᠷᠤᠬᠡᠳᠤᠨ ᠶᠠᠪᠤᠬᠤ ᠪᠤᠯᠵᠠᠢ᠃      ᠰᠦ ᠶᠢᠨ ᠦᠨᠤᠷ ᠲᠠᠢ ᠲᠡᠯᠡᠬᠡᠢ ᠮᠢᠨᠤ ᠡ︕ ᠢᠷᠡᠯᠲᠡ᠄ ᠬᠤᠯᠪᠤᠭ᠎ᠠ ᠪᠦᠷᠬᠡ
 
ᠢᠷᠡᠯᠲᠡ᠄ ᠬᠤᠯᠪᠤᠭ᠎ᠠ ᠪᠦᠷᠭᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠦᠵᠡᠰᠭᠦᠯᠡᠩᠳᠦ ᠰᠠᠶᠢᠬᠠᠨ ᠬᠤᠶᠢᠳᠤ ᠬᠤᠰᠢᠭᠤ
ᠢᠷᠡᠪᠡᠦ ᠬᠠᠪᠤᠷ ᠡ
ᠨᠠᠶᠢᠷ ᠤᠨ ᠵᠤᠳ ︵ᠬᠤᠯᠪᠤᠭ᠎ᠠ︶
ᠬᠤᠷᠰᠢᠭᠰᠠᠨ ᠡᠮᠨᠡᠯᠭᠡ ᠳᠤ ᠪᠠᠨ ᠤᠷᠤᠯᠴᠠᠶ᠎ᠠ ︵ᠬᠤᠯᠪᠤᠭ᠎ᠠ︶
ᠡᠮᠡᠭᠳᠡᠶᠢᠴᠦᠳ ᠤᠨ ᠪᠠᠶᠠᠷ ᠲᠤ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号