ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠣᠶᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠨᠠᠭᠠᠳᠤᠮ ᠲᠤᠭᠯᠠᠭᠠᠮ — — ᠮᠤᠩᠭᠤᠯ ᠰᠢᠳᠠᠷ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/3/25
     ᠮᠤᠩᠭᠤᠯ ᠰᠢᠳᠠᠷ᠎ᠠ      ᠬᠤᠶᠠᠷ ᠬᠦᠮᠦᠨ ᠲᠣᠭᠯᠠᠳᠠᠭ ᠣᠯᠠᠮᠵᠢᠯᠠᠯᠳᠣ ᠬᠦᠯᠭᠡᠳᠦ ᠨᠠᠭᠠᠳᠣᠮ ᠤᠨ ᠨᠢᠭᠡᠨ ᠵᠦᠢᠯ᠃ ᠮᠣᠩᠭᠤᠯ ᠰᠢᠳᠠᠷ᠎ᠠ  ᠨᠢ ᠬᠦᠮᠦᠰ ᠤᠨ ᠣᠬᠠᠭᠠᠨ ᠪᠣᠳᠣᠯᠭ᠎ᠠ ᠶᠢ ᠬᠦᠭᠵᠢᠭᠡᠨ᠂ ᠣᠢ ᠪᠢᠯᠢᠭ ᠢ ᠨᠡᠭᠡᠭᠳᠡᠭᠦᠯᠵᠣ᠂ ᠣᠷᠠᠯᠢᠭ ᠰᠡᠳᠬᠢᠭᠦᠢ ᠶᠢ ᠨᠡᠮᠡᠭᠳᠡᠭᠦᠯᠬᠦ ᠣᠨᠴᠠ ᠶᠢᠨ ᠦᠢᠯᠡᠳᠦᠯ ᠲᠠᠢ ᠲᠣᠭᠯᠠᠭᠠᠮ ᠪᠣᠯᠬᠤᠷ ᠮᠣᠩᠭᠤᠯᠴᠣᠳ ︿︿ᠨᠠᠭᠠᠳᠣᠮ ᠤᠨ ᠲᠡᠭᠡᠳᠦ ᠨᠠᠢᠮᠠᠨ ᠬᠦᠯᠳᠦ ᠰᠢᠳᠠᠷ᠎ᠠ﹀﹀ ᠭᠡᠵᠤ ᠣᠨ ᠣᠳᠠᠭᠠᠨ ᠣᠯᠠᠮᠵᠢᠯᠠᠨ ᠬᠠᠳᠠᠭᠠᠯᠠᠵᠣ ᠣᠷᠣᠯᠳᠣᠨ ᠲᠣᠭᠯᠠᠭᠰᠠᠭᠠᠷ ᠢᠷᠡᠵᠡᠢ ᠃ ᠤᠳᠤ ᠬᠤᠷᠴᠢᠨ ᠵᠡᠬᠦᠨ ᠭᠠᠷᠤᠨ ᠬᠤᠶᠢᠳᠤ ᠬᠤᠰᠢᠭᠤᠨ ᠤ ᠤᠯᠠᠩᠭᠢ ᠮᠤᠩᠭᠤᠯ ᠰᠤᠷᠭᠠᠭᠤᠯᠢ ᠨᠤᠭᠤᠳ ᠨᠢ ᠬᠤᠶᠠᠳᠤᠭᠠᠷ ᠬᠢᠴᠢᠶᠡᠯᠯᠭᠡ ᠶᠢᠨ ᠴᠠᠭ ᠲᠤ ᠰᠤᠷᠤᠭᠴᠢᠳ ᠲᠤ ᠮᠤᠩᠭᠤᠯ ᠰᠢᠳᠠᠷ᠎ᠠ ᠵᠢᠭᠠᠬᠤ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃    ᠮᠣᠩᠭᠤᠯ ᠰᠢᠳᠠᠷ᠎ᠠ ᠨᠢ ᠲᠠᠯ᠎ᠠ ᠪᠦᠷᠢ ᠳᠤ 8 ᠬᠦᠦ᠂ 8 ᠪᠣᠳᠠ᠂ ᠨᠡᠶᠢᠳᠡ 16 ᠪᠣᠳᠠ᠂ ᠬᠤᠶᠠᠷ ᠲᠠᠯ᠎ᠠ ᠨᠡᠶᠢᠯᠡᠭᠡᠳ 32 ᠰᠢᠳᠠᠷ᠎ᠠ ᠲᠠᠢ ᠪᠠᠶᠢᠳᠠᠭ᠃ ᠨᠡᠭᠦᠳᠡᠯ ᠤᠨ ᠬᠤᠪᠢ ᠳᠤ ᠮᠣᠩᠭᠤᠯ ᠰᠢᠳᠠᠷ᠎ᠠ ᠨᠢᠭᠡ ᠣᠳᠠᠭ᠎ᠠ ᠨᠢᠭᠡ ᠯᠠ ᠨᠡᠭᠦᠳᠡᠯ ᠨᠡᠭᠦᠵᠣ ᠪᠣᠯᠳᠠᠭ᠃ ᠣᠯᠠᠨ ᠣᠯᠣᠰ ᠤᠨ ᠰᠢᠳᠠᠷ᠎ᠠ ᠰᠢᠭ᠋ ᠨᠣᠶᠠᠨ ᠬᠠᠩᠭᠠᠢ ᠰᠡᠯᠭᠦᠭᠦ ᠲᠠᠪᠬᠤᠷ ᠨᠡᠭᠦᠳᠡᠯ ᠪᠠᠶᠢᠳᠠᠭ ᠦᠭᠡᠢ᠃ ᠲᠣᠬᠠᠶᠢᠯᠠᠪᠠᠯ ᠡᠬᠢᠨ ᠤ ᠨᠡᠭᠦᠳᠡᠯ ᠤᠨ ᠬᠦᠦ ᠶᠢ ᠭᠠᠷᠭᠠᠪᠠᠯ ᠪᠣᠰᠣᠳ ᠬᠦᠦ ᠨᠢ ᠨᠢᠭᠡ ᠨᠡᠭᠦᠳᠡᠯ  ᠳᠤ ᠵᠦᠪᠬᠡᠨ ᠨᠢᠭᠡ ᠯᠠ ᠠᠯᠬᠤᠮ ᠨᠡᠭᠦᠵᠣ ᠪᠣᠯᠳᠠᠭ ᠪᠠ ᠨᠢᠳᠣᠨ ᠳᠡᠭᠡᠨ ᠯᠠ ᠢᠳᠡᠳᠡᠭ᠃ ᠬᠦᠦ ᠲᠦᠷᠢᠵᠣ ᠡᠴᠦᠰ  ᠤᠨ ᠱᠣᠭᠤᠮ ᠳᠤ ᠬᠦᠷᠪᠠᠯ ᠮᠥᠨ ᠭᠠᠭᠴᠠᠬᠠᠨ ᠪᠠᠷᠰᠠ ᠯᠠ ᠪᠣᠯᠵᠣ ᠬᠤᠪᠢᠷᠠᠳᠠᠭ᠃ ᠬᠠᠷᠢᠨ ᠦᠨᠦᠳᠦᠷ ᠤᠨ ᠣᠯᠠᠨ ᠣᠯᠣᠰ ᠤᠨ ᠰᠢᠳᠠᠷ᠎ᠠ ᠰᠢᠭ᠋ ᠬᠦᠦ ᠵᠠᠭᠤᠷᠳᠣ ᠢᠳᠡᠯᠳᠡ ᠪᠡ ᠬᠦᠦ ᠲᠦᠷᠢᠵᠣ ᠡᠴᠦᠰ ᠤᠨ ᠱᠣᠭᠤᠮ ᠳᠤ ᠬᠦᠷᠪᠡᠯ ᠪᠠᠷᠰᠠ᠂ ᠬᠠᠩᠭᠠᠢ᠂ ᠲᠡᠮᠡᠭᠡ᠂ ᠮᠣᠷᠢ ᠵᠡᠷᠭᠡ ᠲᠣᠷ᠎ᠠ ᠶᠢᠨ ᠨᠢᠭᠡᠨ ᠪᠣᠳᠠ ᠬᠤᠪᠢᠷᠠᠵᠣ ᠪᠣᠯᠳᠠᠭ ᠦᠭᠡᠢ᠃ ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠬᠦᠯᠭᠡ ᠨᠢ ᠬᠦᠨᠳᠡᠯᠡᠨ ᠶᠢᠰᠦᠨ ᠱᠣᠭᠤᠮ᠂ ᠭᠤᠯᠳᠣ ᠶᠢᠰᠦᠨ ᠱᠣᠭᠤᠮ ᠢᠶᠠᠷ ᠬᠠᠨᠠᠴᠢᠯᠠᠨ ᠪᠦᠳᠦᠭᠰᠡᠨ ᠵᠢᠷᠠᠨ ᠲᠡᠭᠰᠢ ᠲᠦᠷᠪᠡᠯᠵᠢᠨ ᠵᠢᠵᠢᠭ ᠰᠠᠭᠤᠳᠠᠯ ᠲᠠᠢ ᠠᠮᠠᠨ ᠲᠦᠷᠪᠡᠯᠵᠢᠨ ᠬᠦᠯᠭᠡ ᠲᠠᠢ ᠪᠠᠶᠢᠳᠠᠭ᠃ ᠰᠢᠳᠠᠷ᠎ᠠ ᠶᠢᠨ ᠲᠣᠬᠠᠢ ᠬᠤᠯᠪᠣᠭᠳᠠᠯ ᠪᠦᠭᠦᠢ ᠮᠡᠳᠡᠭᠡ ᠪᠠᠷᠢᠮᠳᠠ ᠶᠢ ᠦᠨᠳᠦᠰᠦᠯᠡᠪᠡᠯ 13 ᠳ᠋ᠣᠭᠠᠷ ᠵᠠᠭᠤᠨ ᠤ ᠦᠶ᠎ᠡ ᠳᠤ ᠮᠣᠩᠭᠤᠯ  ᠤᠨ ᠡᠵᠡᠨᠳᠦ ᠣᠯᠣᠰ ᠪᠠᠶᠢᠭᠤᠯᠣᠭᠳᠠᠵᠣ᠂ ᠪᠠᠷᠠᠭᠤᠨ ᠣᠷᠣᠨ ᠤ ᠣᠯᠣᠰ ᠣᠷᠣᠨ ᠲᠠᠢ ᠲᠣᠭᠳᠠᠮᠠᠯ ᠬᠠᠷᠢᠴᠠᠭ᠎ᠠ ᠲᠠᠢ ᠪᠣᠯᠵᠣ᠂ ᠦᠷᠭᠡᠨ ᠲᠡᠯᠭᠡᠷ ᠠᠵᠣ ᠠᠬᠤᠢ ᠰᠣᠶᠣᠯ ᠤᠨ ᠬᠠᠷᠢᠴᠠᠭ᠎ᠠ ᠬᠤᠯᠪᠣᠭ᠎ᠠ ᠡᠭᠦᠰᠬᠦ ᠶᠢ ᠲᠠᠭᠠᠯᠳᠣᠨ ᠰᠢᠳᠠᠷ᠎ᠠ ᠨᠢᠭᠡᠨᠳᠡ ᠮᠣᠩᠭᠤᠯ ᠨᠣᠳᠤᠭ ᠲᠤ ᠲᠦᠭᠡᠮᠡᠯ ᠲᠡᠯᠭᠡᠷᠡᠵᠣ᠂ ᠬᠤᠪᠢᠷᠠᠨ ᠭᠦᠭᠵᠢᠭᠡᠳ ᠦᠨᠳᠦᠰᠦᠳᠡᠨ ᠤ ᠣᠨᠴᠠᠯᠢᠭ ᠪᠦᠭᠦᠢ ᠮᠣᠩᠭᠤᠯ ᠰᠢᠳᠠᠷ᠎ᠠ ᠪᠣᠯᠣᠭᠰᠠᠠ ᠪᠠᠶᠢᠨ᠎ᠠ᠃ ᠴᠢᠩᠬᠢᠰ ᠬᠠᠭᠠᠨ ᠤ ᠴᠡᠷᠢᠭ ᠲᠠᠶᠢᠨ ᠤ ᠠᠵᠢᠯᠯᠠᠭ᠎ᠠ ᠶᠢ ᠲᠠᠭᠠᠯᠳᠣᠨ ᠮᠣᠩᠭᠤᠯ ᠰᠢᠳᠠᠷ᠎ᠠ 13 —14 ᠳ᠋ᠣᠭᠡᠷ ᠵᠠᠭᠤᠨ ᠤ ᠦᠶ᠎ᠡ ᠳᠤ ᠲᠠᠬᠢᠨ ᠡᠸᠦ᠋ᠷᠦᠫᠠ ᠳᠤ ᠣᠯᠠᠮᠵᠢᠯᠠᠭᠳᠠᠵᠣ ᠦᠨᠦᠳᠦᠷ ᠤᠨ ᠣᠯᠠᠨ ᠣᠯᠣᠰ ᠤᠨ ᠰᠢᠳᠠᠷ᠎ᠠ ᠪᠣᠯᠵᠣ ᠬᠦᠭᠵᠢᠪᠠ᠃    ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠪᠦᠳᠦᠴᠠ ᠶᠢ ᠣᠷᠠᠨ ᠰᠡᠶᠢᠯᠪᠦᠷᠢᠳᠦ ᠰᠢᠳᠠᠷ᠎ᠠ᠂ ᠬᠠᠭᠠᠰ ᠣᠷᠠᠨ ᠰᠡᠶᠢᠯᠪᠦᠷᠢᠳᠣ ᠰᠢᠳᠠᠷ᠎ᠠ᠂ ᠡᠩ ᠤᠨ ᠰᠡᠶᠢᠯᠪᠦᠷᠢᠳᠣ ᠰᠢᠳᠠᠷ᠎ᠠ᠂ ᠴᠢᠳᠬᠤᠮᠠᠯ ᠰᠢᠳᠠᠷ᠎ᠠ ᠭᠡᠵᠤ ᠠᠩᠬᠢᠯᠠᠵᠣ ᠪᠠᠶᠢᠳᠠᠭ᠃ ᠡᠳᠡᠭᠡᠷ ᠨᠢ ᠣᠯᠠᠩᠬᠢ ᠳᠠᠭᠠᠨ ᠪᠣᠷᠣ ᠴᠠᠭᠠᠨ ᠽᠠᠨᠳᠠᠨ ᠮᠣᠳᠣ᠂ ᠬᠤᠰᠣ᠂ ᠠᠭᠠᠷᠣ᠂ ᠣᠯᠠᠭᠠᠨ ᠨᠠᠷᠠᠰᠣ᠂ ᠰᠣᠮᠣᠨ ᠮᠣᠳᠣ᠂ ᠭᠦᠢᠯᠡᠰᠦᠨ ᠮᠣᠳᠣᠨ ᠤ ᠦᠨᠳᠦᠰᠦ ᠵᠡᠷᠭᠡ ᠬᠠᠭᠠᠷᠠᠵᠣ ᠣᠰᠬᠤ ᠦᠭᠡᠢ ᠬᠠᠳᠠᠭᠤᠯᠢᠭ ᠰᠠᠶᠢᠨ ᠮᠣᠳᠣ ᠪᠣᠶᠣ ᠦᠭᠡᠷ  ᠤᠨ ᠡᠪᠡᠷ᠂ ᠲᠡᠮᠡᠭᠡᠨ ᠤ ᠶᠠᠰᠣ᠂ ᠮᠠᠯ ᠤᠨ ᠱᠠᠭ᠎ᠠ᠂ ᠲᠣᠶᠢᠭ ᠵᠡᠷᠭᠡ ᠶᠠᠰᠣ ᠪᠠᠷ ᠣᠷᠠᠯᠠᠨ ᠰᠡᠶᠢᠯᠳᠡᠭ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠲᠡᠨᠢᠭᠡᠷ᠂ ᠬᠠᠰ᠂ ᠵᠠᠭᠠᠨ ᠤ ᠰᠣᠶᠤᠭ᠎ᠠ ᠪᠠᠷ ᠰᠡᠶᠢᠯᠦᠭᠰᠡᠨ ᠪᠣᠶᠣ ᠭᠠᠣᠯᠢ᠂ ᠵᠡᠰ᠂ ᠮᠦᠩᠬᠦ ᠵᠡᠷᠭᠡ ᠲᠡᠮᠦᠷᠯᠢᠭ ᠵᠦᠢᠯ ᠢᠶᠠᠷ ᠴᠢᠳᠬᠤᠵᠣ ᠣᠷᠠᠯᠠᠭᠰᠠᠨ ᠰᠢᠳᠠᠷ᠎ᠠ ᠴᠦ ᠪᠠᠶᠢᠳᠠᠭ᠃ ᠮᠣᠩᠭᠤᠯ ᠰᠢᠳᠠᠷ᠎ᠠ ᠨᠢ ᠬᠦᠮᠦᠰ ᠤᠨ ᠰᠡᠳᠬᠢᠭᠦᠢ ᠪᠣᠳᠣᠯᠭ᠎ᠠ ᠶᠢ ᠬᠦᠭᠵᠢᠭᠡᠵᠣ᠂ ᠰᠦᠰᠦ ᠵᠣᠷᠢᠭ ᠢ ᠲᠠᠶᠢᠴᠢᠯᠠᠨ ᠲᠠᠪᠳᠠᠬᠤ ᠬᠦᠨᠳᠦ ᠴᠢᠬᠤᠯᠠ ᠦᠢᠯᠡᠳᠦᠯ  ᠲᠠᠢ ᠪᠠᠷ ᠦᠯᠦ ᠪᠠᠷᠠᠨ ᠨᠢᠭᠡᠨ ᠶᠣᠰᠣᠨ ᠤ ᠮᠣᠩᠭᠤᠯᠴᠣᠳ ᠤᠨ ᠭᠠᠷ ᠣᠷᠠᠯᠠᠯ ᠤᠨ ᠮᠡᠷᠭᠡᠵᠢᠯ ᠢ ᠰᠣᠳᠣᠯᠵᠣ ᠭᠤᠸ᠎ᠠ ᠰᠠᠶᠢᠬᠠᠨ ᠢ ᠪᠠᠭ᠋ᠠᠷᠬᠠᠨ ᠰᠣᠨᠢᠷᠬᠠᠬᠤ ᠭᠠᠶᠢᠬᠠᠮᠰᠢᠭᠳᠣ ᠣᠷᠠᠨ ᠪᠦᠳᠦᠭᠡᠯ ᠪᠣᠯᠬᠤ ᠶᠤᠮ᠃ ᠣᠷᠠᠨ ᠰᠡᠶᠢᠯᠪᠦᠷᠢᠳᠦ ᠰᠢᠳᠠᠷ᠎ᠠ ᠪᠣᠯ ᠰᠢᠷ ᠪᠣᠳᠤᠭ ᠰᠠᠭᠤᠯᠭᠠᠨ ᠦᠩᠭᠡ ᠦᠵᠡᠮᠵᠢ ᠶᠢ ᠨᠢ ᠢᠯᠭᠠᠭᠰᠠᠨ ᠰᠢᠨᠵᠢ ᠮᠠᠶ᠋ᠢᠭ ᠢ ᠨᠢ ᠪᠦᠷᠢᠯᠳᠦᠭᠦᠯᠦᠭᠰᠡᠨ ᠠᠮᠢᠳᠣ ᠲᠦᠷᠰᠦᠯᠢᠭ ᠣᠷᠠᠯᠠᠨ ᠰᠡᠶᠢᠯᠦᠭᠰᠡᠨ ᠰᠢᠳᠠᠷ᠎ᠠ ᠪᠣᠯᠣᠨ᠎ᠠ᠃ ᠡᠨᠡ ᠬᠦ ᠣᠷᠠᠨ ᠰᠡᠶᠢᠯᠪᠦᠷᠢᠳᠦ ᠰᠢᠳᠠᠷ᠎ᠠ ᠶᠢᠨ ᠬᠤᠶᠠᠷ ᠡᠳᠡᠭᠡᠳ ᠢ ᠦᠩᠭᠡ ᠪᠣᠳᠤᠭ ᠢᠶᠠᠷ ᠪᠣᠳᠣᠭᠰᠠᠨ ᠠᠴᠠ ᠭᠠᠳᠠᠨ᠎ᠠ ᠨᠢᠭᠡ ᠲᠠᠯ᠎ᠠ  ᠶᠢᠨ ᠨᠣᠶᠠᠨ ᠨᠢ ᠮᠣᠷᠢ ᠣᠨᠣᠭᠰᠠᠨ ᠪᠣᠯ ᠨᠦᠭᠦᠭᠡ ᠲᠠᠯ᠎ᠠ ᠶᠢᠨ ᠨᠣᠶᠠᠨ ᠨᠢ ᠰᠢᠷᠡᠭᠡᠨ ᠳᠤ ᠰᠠᠭᠠᠳᠣᠭᠰᠠᠨ︔ ᠨᠢᠭᠡ ᠲᠠᠯ᠎ᠠ ᠶᠢᠨ ᠪᠠᠷᠰᠠ ᠨᠢ ᠪᠠᠷᠰ ᠪᠣᠯ ᠨᠦᠭᠦᠭᠡ ᠨᠢ ᠠᠷᠰᠯᠠᠨ᠃ ᠨᠢᠭᠡ ᠲᠠᠯ᠎ᠠ ᠶᠢᠨ ᠲᠡᠮᠡᠭᠡ ᠨᠢ ᠪᠣᠣᠷ᠎ᠠ ᠣᠷᠣᠭᠰᠠᠨ ᠲᠡᠮᠡᠭᠡ ᠪᠣᠯ ᠨᠦᠭᠦᠭᠡ ᠨᠢ ᠪᠣᠳᠣᠭᠤ ᠲᠠᠢ ᠢᠩᠭᠡ ᠪᠣᠶᠣ ᠠᠳᠠ᠃ ᠮᠣᠷᠢ ᠨᠢ ᠨᠢᠭᠡ ᠲᠠᠯ᠎ᠠ ᠨᠢ ᠣᠨᠠᠭ᠎ᠠ ᠲᠠᠢ ᠭᠡᠭᠦᠦ ᠪᠣᠯ ᠨᠦᠭᠦᠭᠡ ᠲᠠᠯ᠎ᠠ ᠨᠢ ᠠᠵᠢᠷᠭ᠎ᠠ︔ ᠲᠡᠷᠭᠡᠨ ᠤ ᠨᠢᠭᠡ ᠲᠠᠯ᠎ᠠ ᠨᠢ ᠲᠡᠮᠡᠭᠡ ᠬᠦᠯᠦᠭᠰᠡᠨ ᠪᠣᠯ ᠨᠦᠭᠦᠭᠡ ᠲᠠᠯ᠎ᠠ ᠨᠢ ᠮᠣᠷᠢ ᠬᠦᠯᠦᠭᠰᠡᠨ︔ ᠬᠦᠦ ᠨᠢ ᠠᠷᠰᠯᠠᠨ ᠪᠣᠶᠣ ᠪᠠᠮᠪᠠᠷ ᠬᠡᠭᠦ ᠮᠡᠳᠦ ᠪᠠᠷ ᠢᠯᠭᠠᠪᠣᠷᠢᠯᠠᠨ ᠰᠡᠶᠢᠯᠦᠭᠰᠡᠨ ᠪᠠᠶᠢᠳᠠᠭ᠃    ᠨᠣᠶᠠᠨ — ᠨᠣᠶᠠᠨ ᠨᠢ ᠠᠯᠳᠠᠨ ᠲᠦᠷᠦ ᠶᠢ ᠲᠣᠭᠳᠠᠭᠠᠬᠤ ᠯᠠᠭᠱᠠᠨ ᠲᠣᠩᠭᠠᠯᠠᠭ ᠲᠦᠷᠢ ᠲᠠᠢ᠂ ᠠᠳᠠᠭᠠᠳᠠᠨ ᠲᠠᠶᠢᠰᠣᠨ ᠢ ᠲᠠᠷᠣᠬᠤ ᠠᠤᠭ᠎ᠠ ᠲᠠᠶᠢᠴᠢᠨ ᠰᠦᠷ ᠲᠠᠢ ᠮᠦᠩᠭᠦᠨ ᠬᠤᠶᠠᠭ ᠬᠡᠳᠦᠷᠴᠦ᠂ ᠠᠯᠳᠠᠨ ᠲᠣᠭᠤᠯᠭ᠎ᠠ ᠲᠠᠷᠣᠵᠣ᠂ ᠠᠵᠢᠨᠠᠢ ᠬᠦᠯᠦᠭ ᠣᠨᠣᠵᠣ᠂ ᠴᠡᠷᠢᠭ ᠲᠠᠶᠢᠴᠢᠯᠠᠨ ᠪᠠᠶᠢᠬᠤ ᠦᠷᠯᠦᠭ ᠮᠠᠶ᠋ᠢᠭ ᠲᠠᠢ ᠪᠣᠶᠣ ᠲᠦᠰᠢᠯᠭᠡᠳᠦ ᠰᠠᠨᠳᠠᠯᠢ ᠳᠤ ᠰᠠᠭᠠᠳᠠᠵᠣ᠂ ᠰᠡᠯᠡᠮ᠎ᠡ ᠲᠣᠯᠣᠨ ᠲᠦᠷᠦ ᠶᠢᠨ ᠶᠡᠭᠡ ᠬᠡᠷᠡᠭ ᠢ ᠲᠦᠪ ᠭᠤᠣᠯᠴᠢ ᠪᠠᠷ ᠰᠢᠭᠦᠨ ᠲᠠᠰᠣᠯᠵᠣ ᠪᠠᠶᠢᠬᠤ ᠮᠠᠶ᠋ᠢᠭ ᠲᠠᠢ ᠪᠠᠶᠢᠳᠠᠭ᠃    ᠪᠠᠷᠰᠠ — ᠪᠠᠷᠰᠠ ᠨᠢ ᠭᠤᠣᠯᠳᠠᠭᠤ ᠭᠤᠷᠪᠠᠨ ᠵᠦᠢᠯ ᠪᠠᠶᠢᠳᠠᠭ᠃    ᠨᠣᠶᠠᠨ ᠤ ᠵᠠᠬᠢᠶ᠎ᠠ ᠶᠢ ᠬᠦᠯᠢᠶᠡᠵᠣ ᠨᠣᠮᠣ ᠰᠣᠮᠣ ᠲᠡᠯᠢᠭᠰᠡᠨ ᠪᠠᠷᠰ ᠤᠨ ᠬᠦᠴᠦᠨ ᠲᠠᠢ ᠵᠠᠩᠵᠣᠨ ᠮᠠᠶ᠋ᠢᠭ ᠲᠠᠢ᠃    ᠠᠮᠢᠳᠠᠨ ᠤ ᠬᠠᠭᠠᠨ ᠠᠷᠰᠯᠠᠨ ᠠᠤᠭ᠎ᠠ ᠰᠦᠷ ᠭᠠᠶᠢᠬᠠᠭᠤᠯᠣᠨ ᠠᠯᠠᠭᠠᠨ ᠪᠦᠮᠪᠦᠭᠡ ᠲᠣᠭᠯᠠᠵᠣ ᠠᠯᠢᠶᠠᠯᠠᠨ ᠨᠠᠭᠠᠳᠣᠭᠰᠠᠨ ᠰᠢᠨᠵᠢ ᠲᠠᠢ︔    ᠠᠯᠠᠭ ᠡᠷᠢᠶᠡᠨ ᠪᠠᠷᠰ ᠠᠷᠬᠢᠷᠠᠵᠣ ᠪᠠᠶᠢᠭ᠎ᠠ ᠲᠣᠭᠰᠢᠨ ᠰᠦᠷᠯᠢᠭ ᠲᠦᠷᠢ ᠲᠠᠢ ᠪᠠᠶᠢᠳᠠᠭ᠃    ᠲᠡᠮᠡᠭᠡ — ᠠᠶᠠᠨ ᠵᠠᠮ ᠳᠤ ᠲᠠᠭᠠᠭᠠᠴᠠᠳᠠᠢ᠂ ᠠᠳᠠᠨ ᠣᠯᠠᠭᠠᠨ ᠲᠡᠮᠡᠭᠡ ᠰᠢᠷᠡᠭᠡ ᠪᠦᠬᠦ ᠰᠡᠭᠰᠡᠯᠵᠡᠭᠦᠯᠦᠨ ᠰᠢᠯᠢ ᠬᠠᠨᠳᠠᠷᠣᠭᠰᠠᠨ ᠰᠢᠨᠵᠢ ᠲᠠᠢ︔ ᠣᠮᠤᠭ ᠰᠦᠷ ᠨᠢ ᠪᠠᠳᠠᠷᠠᠭᠰᠠᠨ ᠣᠷᠣᠭᠰᠠᠨ ᠬᠠᠷ᠎ᠠ ᠪᠣᠣᠷ᠎ᠠ ᠭᠦᠭᠡᠰᠦ ᠬᠠᠶᠠᠯᠠᠨ ᠲᠡᠪᠰᠡᠯᠡᠨ ᠱᠠᠯᠠᠵᠣ ᠪᠠᠶᠢᠭ᠎ᠠ ᠲᠦᠷᠢ ᠲᠠᠢ︔ ᠪᠣᠳᠣᠭᠤ ᠪᠠᠨ ᠲᠠᠭᠠᠭᠤᠯᠣᠭᠰᠨᠨ ᠬᠦᠭᠡ ᠢᠩᠭᠡ ᠪᠣᠶᠢᠯᠠᠨ ᠬᠠᠶᠢᠯᠠᠵᠣ ᠪᠠᠶᠢᠭ᠎ᠠ ᠮᠠᠶ᠋ᠢᠭ ᠲᠠᠢ᠃    ᠮᠣᠷᠢ — ᠮᠣᠷᠢ ᠨᠢ ᠠᠳᠣᠭᠤᠨ ᠰᠦᠷᠦᠭ ᠤᠨ ᠮᠠᠩᠯᠠᠢ ᠠᠮᠪᠠᠨ ᠵᠣ ᠲᠠᠢ ᠠᠵᠢᠷᠭ᠎ᠠ᠂ ᠲᠠᠯ ᠮᠣᠨᠳᠠᠭ᠎ᠠ ᠬᠡᠶᠢᠰᠭᠡᠵᠣ᠂ ᠲᠡᠪᠭᠡᠷᠦᠨ ᠴᠠᠮᠨᠠᠭᠰᠠᠨ ᠲᠦᠷᠢ ᠲᠠᠢ︔ ᠠᠯᠣᠰ ᠤᠨ ᠠᠶᠠᠨ ᠳᠤ ᠲᠡᠪᠬᠢᠭᠰᠡᠨ ᠠᠵᠢᠨᠠᠢ ᠬᠦᠯᠦᠭ ᠤᠨ ᠣᠳᠣᠮ ᠰᠢᠨ᠎ᠡ ᠠᠶᠠᠨ ᠢ ᠬᠦᠯᠢᠶᠡᠵᠣ ᠪᠠᠭᠠᠳᠠᠭᠠᠨᠠᠨ ᠰᠢᠯᠭᠡᠭᠰᠡᠨ ᠰᠢᠨᠵᠢ ᠲᠠᠢ︔ ᠰᠦ ᠲᠠᠯᠠᠩ ᠨᠢ ᠴᠢᠨᠦᠭᠰᠡᠨ ᠰᠦᠷᠦᠭ ᠤᠨ ᠡᠬᠡ ᠬᠦᠭᠡᠷᠦᠬᠦᠨ ᠣᠨᠠᠭ᠎ᠠ ᠪᠠᠨ ᠲᠠᠭᠠᠭᠤᠯᠵᠣ ᠦᠣᠷᠰᠡᠵᠣ ᠢᠨᠴᠠᠭᠠᠭᠰᠠᠨ ᠪᠠᠶᠢᠳᠠᠯ ᠲᠠᠢ ᠪᠠᠶᠢᠳᠠᠭ᠃ ᠠᠵᠢᠷᠭ᠎ᠠ᠂ ᠠᠭᠳᠠ᠂ ᠬᠡᠭᠦᠦ ᠵᠡᠷᠭᠡ ᠲᠦᠷᠦᠯ ᠪᠦᠷᠢ ᠶᠢᠨ ᠲᠦᠷᠢ ᠶᠢ ᠠᠮᠢᠳᠣᠯᠢᠭ ᠰᠡᠪᠡᠭᠦᠨ ᠣᠷᠠᠯᠠᠨ ᠰᠡᠶᠢᠯᠦᠭᠰᠡᠨ ᠪᠠᠶᠢᠳᠠᠭ᠃    ᠬᠠᠩᠭᠠᠢ — ᠬᠠᠩᠭᠠᠢ ᠨᠢ ᠬᠤᠯᠠ ᠶᠢᠨ ᠠᠶᠠᠨ ᠢ ᠬᠦᠭᠡᠭᠡᠭᠰᠨᠨ ᠴᠦ ᠬᠠᠮᠬᠠᠷᠠᠵᠣ ᠡᠪᠳᠡᠷᠡᠬᠦ ᠦᠭᠡᠢ ᠪᠦᠬᠡᠯᠢᠭ ᠣᠯᠠᠭᠠᠨ ᠬᠤᠰᠣᠨ ᠪᠦᠳᠦᠴᠡ ᠲᠠᠢ ᠮᠣᠬᠤᠯᠠᠭ ᠲᠡᠷᠭᠡ ᠪᠠ ᠬᠠᠮ ᠲᠡᠷᠭᠡ ᠳᠤ ᠮᠣᠷᠢ ᠪᠣᠶᠣ ᠲᠡᠮᠡᠭᠡ ᠬᠦᠯᠦᠭᠰᠡᠨ ᠰᠡᠶᠢᠯᠪᠦᠷᠢ ᠲᠠᠢ ᠪᠠᠶᠢᠳᠠᠭ᠃    ᠬᠦᠦ — ᠬᠦᠦ ᠨᠢ ᠬᠦᠭᠡᠷᠦᠬᠦᠨ ᠬᠡᠣᠬᠡᠳ ᠪᠠᠷᠢᠯᠳᠣᠵᠣ ᠪᠠᠶᠢᠭ᠎ᠠ ᠪᠠᠶᠢᠳᠠᠯ ᠲᠠᠢ᠃ ᠬᠦᠯᠦᠭ ᠮᠣᠷᠢ ᠣᠨᠣᠵᠣ ᠣᠷᠣᠯᠳᠣᠵᠣ ᠪᠠᠶᠢᠭ᠎ᠠ ᠮᠠᠶ᠋ᠢᠭ ᠲᠠᠢ︔ ᠠᠪᠠ ᠶᠢᠨ ᠰᠠᠶᠢᠨ ᠨᠣᠬᠠᠢ ᠠᠯᠢᠶᠠᠯᠠᠨ ᠲᠣᠭᠯᠠᠭᠰᠠᠨ ᠰᠢᠨᠵᠢ ᠲᠠᠢ︔ ᠠᠷᠰᠯᠠᠨ ᠤ ᠵᠣᠯᠵᠠᠭ᠎ᠠ ᠪᠦᠮᠪᠦᠭᠡ ᠠᠯᠠᠭᠠᠳᠠᠵᠣ ᠪᠠᠶᠢᠭ᠎ᠠ ᠮᠠᠶ᠋ᠢᠭ ᠲᠠᠢ ᠪᠠᠶᠢᠳᠠᠭ᠃    ᠮᠣᠩᠭᠤᠯ ᠰᠢᠳᠠᠷ᠎ᠠ ᠨᠢ ᠮᠣᠩᠭᠤᠯᠴᠣᠳ ᠤᠨ ᠡᠷᠳᠡᠨ ᠤ ᠦᠶ᠎ᠡ ᠶᠢᠨ ᠠᠮᠢᠳᠣᠷᠠᠯ ᠲᠡᠮᠡᠴᠡᠯ ᠤᠨ ᠣᠨᠴᠠᠯᠢᠭ ᠢ ᠬᠦᠨᠵᠡᠭᠡᠢ ᠬᠠᠷᠠᠭᠤᠯᠣᠭᠰᠨᠨ ᠪᠠᠶᠢᠳᠠᠭ᠃ ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠪᠦᠳᠦᠴᠡ ᠪᠦᠷᠢᠯᠳᠦᠯ ᠨᠢ ᠮᠣᠩᠭᠤᠯᠴᠣᠳ ᠤᠨ ᠠᠮᠢᠳᠣᠷᠠᠯ ᠲᠡᠮᠡᠴᠡᠯ ᠤᠨ ᠣᠨᠴᠠᠯᠢᠭ ᠢ ᠢᠯᠡ ᠲᠣᠳᠣ ᠲᠣᠰᠬᠠᠵᠣ᠂ ᠲᠠᠪᠣᠨ ᠬᠤᠰᠢᠭᠤ ᠮᠠᠯ ᠰᠦᠷᠦᠭ ᠢᠶᠠᠷ ᠲᠠᠩᠰᠤᠭ ᠠᠮᠢᠳᠣᠷᠠᠯ ᠤᠨ ᠡᠬᠢ ᠢᠷᠡᠯᠳᠡ ᠪᠣᠯᠭᠠᠭᠰᠠᠨ ᠲᠠᠯ᠎ᠠ ᠨᠣᠳᠤᠭ ᠤᠨ ᠨᠡᠭᠦᠳᠡᠯ ᠠᠮᠢᠳᠣᠷᠠᠯ ᠤᠨ ᠪᠣᠳᠠᠳᠣ ᠵᠢᠷᠣᠭᠯᠠᠯ ᠪᠣᠯᠣᠭᠰᠠᠨ ᠪᠠᠶᠢᠨ᠎ᠠ᠃ ᠲᠣᠬᠠᠶᠢᠯᠠᠪᠠᠯ ᠡᠷᠳᠡᠨ ᠤ ᠮᠣᠩᠭᠤᠯᠴᠣᠳ ᠤᠨ ᠠᠵᠣ ᠠᠮᠢᠳᠣᠷᠠᠯ᠂ ᠲᠠᠶᠢᠨ ᠪᠠᠶᠢᠯᠳᠣᠭᠠᠨ ᠤ ᠭᠤᠣᠯ ᠪᠠᠭᠠᠵᠢ ᠬᠡᠷᠡᠭᠰᠡᠯ ᠤᠳ ᠪᠣᠯᠵᠣ ᠪᠠᠶᠢᠭᠰᠠᠨ ᠮᠣᠷᠢ᠂ ᠲᠡᠷᠭᠡ᠂ ᠲᠡᠮᠡᠭᠡ ᠵᠡᠷᠭᠡ ᠨᠢ ᠪᠦᠷ ᠰᠢᠳᠠᠷ᠎ᠠ ᠶᠢᠨ ᠭᠤᠣᠯ ᠴᠣᠭᠴᠠ ᠪᠣᠯᠵᠣ ᠪᠦᠷᠢᠯᠳᠦᠭᠰᠡᠨ ᠢᠶᠠᠷ ᠦᠯᠦ ᠪᠠᠷᠠᠨ ᠮᠣᠷᠢ᠂ ᠲᠡᠷᠭᠡ ᠶᠢᠨ ᠣᠷᠠᠯᠢᠭ ᠰᠡᠶᠢᠯᠪᠣᠷᠢ ᠨᠢ ᠴᠦ ᠮᠣᠩᠭᠤᠯᠴᠣᠳ ᠤᠨ ᠠᠮᠢᠳᠣᠷᠠᠯ ᠢ ᠢᠯᠡᠷᠡᠭᠦᠯᠵᠣ᠂ ᠵᠠᠭᠠᠨᠳᠣ ᠴᠡᠷᠢᠭ ᠨᠢ ᠲᠡᠮᠡᠭᠡ ᠪᠠᠷ ᠣᠷᠣᠯᠠᠭᠳᠠᠵᠣ᠂ ᠶᠠᠪᠠᠭᠠᠨ ᠴᠡᠷᠢᠭ ᠨᠢ ᠮᠣᠷᠢ ᠣᠷᠣᠯᠳᠣᠵᠣ ᠪᠠᠶᠢᠭ᠎ᠠ ᠬᠡᠣᠬᠡᠳ ᠪᠣᠶᠣ ᠪᠦᠬᠡ ᠪᠠᠷᠢᠯᠳᠣᠵᠣ ᠪᠠᠶᠢᠭ᠎ᠠ ᠬᠡᠣᠬᠡᠳ ᠵᠡᠷᠭᠡ ᠣᠷᠠᠨ ᠰᠡᠶᠢᠯᠪᠦᠷᠢ ᠲᠠᠢ ᠪᠣᠯᠣᠭᠰᠠᠨ ᠨᠢ ᠡᠷᠳᠡᠨ ᠤ ᠮᠣᠩᠭᠤᠯᠴᠣᠳ ᠤᠨ ᠰᠣᠶᠣᠯ ᠤᠨ ᠪᠠᠶᠢᠳᠠᠯ ᠢ ᠠᠷᠭ᠎ᠠ ᠦᠭᠡᠢ ᠰᠠᠶᠢᠬᠠᠨ ᠬᠠᠳᠠᠭᠠᠯᠠᠨ ᠰᠢᠩᠭᠡᠭᠡᠭᠰᠡᠨ ᠪᠠᠶᠢᠳᠠᠭ᠃ ᠮᠣᠩᠭᠤᠯ ᠰᠢᠳᠠᠷ᠎ᠠ ᠨᠢ ᠪᠠᠰᠠ ᠮᠣᠩᠭᠤᠯᠴᠣᠳ ᠤᠨ ᠵᠠᠩ ᠴᠢᠨᠠᠷ ᠤᠨ ᠣᠨᠴᠠᠯᠢᠭ ᠢ ᠭᠦᠢᠴᠡᠳ ᠬᠠᠳᠠᠭᠠᠯᠠᠪᠠ᠃ ᠮᠣᠩᠭᠤᠯᠴᠣᠳ ᠶᠡᠷᠦ ᠠᠴᠠ ︿︿ᠠᠮᠠᠨ ᠪᠡᠯᠭᠡ ᠬᠠᠮᠢᠭᠠᠰᠢ ᠪᠣᠯ ᠠᠯᠣᠰ ᠤᠨ ᠪᠡᠯᠭᠡ ᠲᠡᠰᠢ ᠪᠠᠨ﹀﹀ ᠭᠡᠵᠤ ᠪᠡᠯᠭᠡᠳᠡᠳᠡᠭ᠃ ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠶᠣᠰᠣ ᠲᠦᠷᠢᠮ ᠠᠴᠠ ᠦᠵᠡᠪᠡᠯ ︿︿ᠢᠷᠸ᠎ᠠ  ᠶᠢᠨ ᠲᠠᠪᠤ ᠬᠢᠵᠣ ᠪᠣᠯᠬᠤ ᠦᠭᠡᠢ﹀﹀᠂ ︿︿ᠴᠢᠳᠦᠷ ᠮᠠᠳ ᠬᠢᠵᠣ ᠪᠣᠯᠬᠤ ᠦᠭᠡᠢ﹀﹀᠂ ︿︿ᠨᠢᠴᠦᠭᠦᠨ ᠢᠳᠡᠵᠣ ᠪᠣᠯᠬᠤ ᠦᠭᠡᠢ﹀﹀ ᠬᠡᠭᠦ ᠮᠡᠳᠦ ᠶᠢᠨ ᠪᠡᠯᠭᠡ ᠮᠠᠭᠤᠳᠠᠢ ᠵᠦᠢᠯ ᠤᠳ ᠢ ᠴᠡᠭᠡᠷᠯᠡᠭᠰᠡᠨ ᠬᠤᠷᠢᠭ᠎ᠠ ᠴᠡᠭᠡᠷ ᠲᠠᠢ ᠪᠠᠶᠢᠳᠠᠭ᠃ ᠨᠠᠰᠣᠳᠠᠨ ᠪᠠ ᠵᠣᠴᠢᠳ ᠢ ᠬᠦᠨᠳᠦᠳᠭᠡᠬᠦ ᠵᠠᠩ ᠵᠢᠷᠣᠮ ᠴᠦ ᠨᠠᠭᠠᠳᠣᠮ ᠤᠨ ᠲᠣᠮᠳᠠ ᠭᠦᠢᠴᠡᠳ ᠲᠣᠰᠬᠠᠯ ᠢᠶᠠᠨ ᠣᠯᠵᠣ᠂ ᠡᠬᠢᠨ ᠤ ᠨᠡᠭᠦᠳᠡᠯ ᠢ ᠨᠠᠰᠣᠨ ᠤ ᠠᠬᠠᠮᠠᠳ ᠪᠠ ᠵᠣᠴᠢᠨ ᠳᠤ ᠨᠠᠶᠢᠷ ᠲᠠᠯᠪᠢᠬᠤ᠂ ᠣᠨᠴᠠ ᠣᠷᠠᠨ ᠱᠦᠭᠦᠳᠡᠯ ᠬᠢᠭᠰᠡᠨ ᠴᠦ ᠬᠤᠷᠣᠰᠣᠯ ᠡᠪᠦᠷᠯᠡᠬᠦ ᠦᠭᠡᠢ᠂ ᠲᠡᠶᠢᠯᠦᠭᠰᠡᠨ ᠴᠦ ᠣᠮᠣᠭᠰᠢᠨ ᠪᠠᠷᠳᠠᠮᠨᠠᠬᠤ ᠦᠭᠡᠢ ᠵᠡᠷᠭᠡ ᠵᠢᠷᠣᠮ ᠶᠣᠰᠣ ᠲᠠᠢ ᠪᠠᠶᠢᠳᠠᠭ᠃    ᠮᠣᠩᠭᠤᠯ ᠰᠢᠳᠠᠷ᠎ᠠ ᠨᠢ ᠮᠣᠩᠭᠤᠯᠴᠣᠳ ᠤᠨ ᠣᠢ ᠪᠢᠯᠢᠭ ᠢ ᠬᠦᠭᠵᠢᠭᠡᠵᠣ᠂ ᠣᠬᠠᠭᠠᠨ ᠰᠠᠨᠠᠭ᠎ᠠ ᠶᠢ ᠨᠡᠭᠡᠭᠡᠭᠳᠡᠭᠦᠯᠬᠦ ᠣᠶᠣᠨ ᠤ ᠰᠣᠷᠢᠨᠵᠢᠨ ᠪᠣᠯᠣᠭᠰᠠᠨ ᠤ ᠬᠤᠪᠢ ᠳᠤ ᠣᠯᠠᠨ ᠲᠦᠮᠡᠨᠴᠢ ᠴᠢᠨᠠᠷ ᠲᠠᠢ ᠣᠷᠠᠯᠢᠭ ᠤᠨ ᠲᠣᠭᠯᠠᠭᠠᠮ ᠪᠣᠯᠵᠣ᠂ ᠣᠯᠠᠨ ᠵᠠᠭᠤᠨ ᠵᠢᠯ ᠣᠯᠠᠮᠵᠢᠯᠠᠭᠳᠠᠭᠰᠠᠨ ᠪᠠᠶᠢᠳᠠᠭ᠃ ᠲᠡᠷᠡ ᠨᠢ ᠲᠡᠣᠬᠡᠨ ᠠᠴᠠ ᠠᠪᠣᠭᠠᠳ ᠪᠠᠶᠠᠨ ᠶᠠᠳᠠᠭᠤ ᠭᠡᠵᠤ ᠢᠯᠭᠠᠬᠤ ᠦᠭᠡᠢ᠂ ᠡᠪᠦᠭᠡᠨ ᠵᠠᠯᠠᠭᠤ ᠭᠡᠵᠤ᠂ ᠡᠷᠡᠭᠳᠡᠢ ᠡᠮᠡᠭᠳᠡᠢ ᠬᠠᠮᠢᠶ᠎ᠠ ᠦᠭᠡᠢ ᠪᠦᠷ ᠡᠷᠭᠡ ᠲᠡᠭᠰᠢ ᠪᠠᠷ ᠲᠣᠭᠯᠠᠳᠠᠭ ᠨᠡᠶᠢᠳᠡ ᠮᠣᠩᠭᠤᠯ ᠤᠨ ᠨᠠᠭᠠᠳᠣᠮ ᠪᠠᠶᠢᠵᠠᠢ᠃ ᠮᠣᠩᠭᠤᠯ ᠰᠢᠳᠠᠷ᠎ᠠ ᠳᠤ ᠪᠣᠳᠠ ᠬᠦᠦ ᠨᠡᠶᠢᠳᠡ ᠭᠤᠴᠢᠨ ᠬᠤᠶᠠᠷ ᠪᠠᠶᠢᠳᠠᠭ᠃ ᠡᠭᠦᠨ ᠢ ᠦᠩᠭᠡ ᠪᠣᠳᠤᠭ ᠪᠣᠶᠣ ᠡᠯᠳᠡᠪ ᠵᠦᠢᠯ ᠤᠨ ᠰᠡᠶᠢᠯᠪᠣᠷᠢ ᠶᠢᠨ ᠬᠤᠪᠢᠶᠠᠷᠢ ᠪᠠᠷ ᠬᠤᠶᠠᠷ ᠠᠩᠬᠢ ᠬᠤᠪᠢᠶᠠᠵᠣ ᠲᠣᠭᠯᠠᠭᠴᠢ ᠬᠤᠶᠠᠷ ᠡᠳᠡᠭᠡᠳ ᠲᠣᠰ ᠪᠦᠷᠢ ᠠᠷᠪᠠᠨ ᠵᠢᠷᠭᠤᠭᠠᠨ ᠰᠢᠳᠠᠷ᠎ᠠ ᠠᠪᠳᠠᠭ᠃ ᠲᠠᠯ᠎ᠠ ᠪᠦᠷᠢ ᠨᠢ ᠨᠢᠭᠡ ᠨᠣᠶᠠᠨ᠂ ᠨᠢᠭᠡᠨ ᠪᠠᠷᠰᠠ᠂ ᠬᠤᠶᠠᠷ ᠮᠣᠷᠢ᠂ ᠬᠤᠶᠠᠷ ᠲᠡᠮᠡᠭᠡ᠂ ᠬᠤᠶᠠᠷ ᠬᠠᠩᠭᠠᠢ ︵ᠪᠠᠰᠠ ᠲᠡᠷᠭᠡ ᠪᠣᠶᠣ ᠬᠠᠰᠠᠭ ᠭᠡᠳᠡᠭ︶ ᠪᠠ ᠨᠠᠢᠮᠠᠨ ᠬᠦᠦ ᠲᠠᠢ᠂ ᠨᠣᠶᠠᠨ ᠢ ᠪᠠᠰᠠ ᠰᠦᠯᠳᠡ ᠭᠡᠵᠤ᠂ ᠪᠠᠰᠠ ᠲᠡᠮᠡᠭᠡ ᠮᠣᠷᠢ ᠬᠠᠩᠭᠠᠢ ᠶᠢ ᠪᠣᠳᠠ ᠭᠡᠵᠤ ᠨᠡᠷᠡᠯᠡᠳᠡᠭ᠃ ᠰᠢᠳᠠᠷ᠎ᠠ ᠦᠷᠦᠬᠦ ᠲᠡᠪᠢᠰᠭᠡᠷ ᠢ ᠬᠦᠯᠭᠡ ᠭᠡᠳᠡᠭ᠃ ᠬᠦᠯᠭᠡ ᠨᠢ ᠲᠡᠭᠰᠢ ᠲᠦᠷᠪᠡᠯᠵᠢᠨ ᠬᠡᠯᠪᠡᠷᠢ ᠲᠠᠢ᠂ ᠬᠦᠨᠳᠡᠯᠡᠨ ᠭᠤᠯᠳᠣ ᠪᠠᠷ ᠵᠡᠷᠭᠡ ᠣᠷᠣᠰᠢᠬᠤ ᠶᠢᠰᠦᠨ ᠵᠢᠷᠣᠭᠠᠰᠣ  ᠪᠠᠷ ᠬᠠᠷᠢᠯᠴᠠᠨ ᠰᠦᠯᠵᠢᠵᠣ ᠬᠠᠨᠠᠴᠢᠯᠠᠨ ᠪᠦᠳᠦᠭᠰᠡᠨ ᠨᠠᠢᠮᠠᠨ ᠨᠠᠢᠮᠠ ᠶᠢᠨ ᠵᠢᠷᠠᠨ ᠲᠦᠷᠪᠡᠨ ᠵᠢᠵᠢᠭ ᠲᠦᠷᠪᠡᠯᠵᠢᠨ ᠴᠣᠩᠬᠤ ᠪᠠᠷ ᠰᠠᠭᠤᠳᠠᠯ ᠪᠣᠯᠭᠠᠵᠣ᠂ ᠡᠨᠡ ᠬᠦ ᠰᠠᠭᠤᠳᠠᠯ ᠳᠠᠭᠠᠨ ᠬᠦᠯ ᠨᠡᠭᠦᠳᠡᠯ ᠤᠨ ᠵᠢᠷᠣᠮ ᠢᠶᠠᠷ ᠰᠢᠳᠠᠷ᠎ᠠ ᠪᠠᠨ ᠨᠡᠭᠦᠯᠭᠡᠳᠡᠭ᠃ ᠬᠦᠯᠭᠡ ᠶᠢ ᠠᠮᠨ ᠲᠦᠷᠪᠡᠯᠵᠢᠨ ᠰᠢᠷᠡᠭᠡ ᠪᠣᠶᠣ ᠮᠣᠳᠣᠨ ᠬᠠᠪᠳᠠᠰᠣᠨ ᠳᠤ ᠰᠡᠶᠢᠯᠵᠣ ᠵᠢᠷᠣᠬᠤ ᠠᠴᠠ ᠭᠠᠳᠠᠨ᠎ᠠ ᠢᠯᠬᠢ᠂ ᠪᠦᠰ ᠪᠣᠶᠣ ᠴᠠᠭᠠᠰᠣᠨ ᠲᠡᠭᠡᠷ᠎ᠡ ᠵᠢᠷᠣᠵᠣ ᠪᠦᠳᠦᠭᠡᠳᠡᠭ᠃ ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠣᠣᠭᠠᠨ ᠪᠠᠶᠢᠷᠢᠯᠠᠯ ᠪᠣᠯ ᠲᠠᠯ᠎ᠠ ᠲᠠᠯ᠎ᠠ ᠶᠢᠨ ᠨᠠᠢᠮᠠᠨ ᠰᠠᠭᠤᠳᠠᠯ ᠤᠨ ᠭᠤᠣᠯ ᠬᠤᠶᠠᠷ ᠰᠠᠭᠤᠳᠠᠯ ᠳᠤ ᠨᠣᠶᠠᠨ ᠢ ᠪᠠᠷᠠᠭᠤᠨ ᠮᠦᠷᠦᠨ ᠳᠤ᠂ ᠪᠠᠷᠰᠠ ᠶᠢ ᠵᠡᠭᠦᠨ ᠮᠦᠷᠦᠨ ᠳᠤ ᠪᠠᠶᠢᠷᠢᠯᠠᠭᠤᠯᠵᠣ᠂ ᠬᠤᠶᠠᠷ ᠬᠠᠵᠠᠭᠤ ᠲᠡᠰᠢ ᠪᠠᠨ ᠲᠡᠮᠡᠭᠡ ᠮᠣᠷᠢ ᠬᠠᠩᠭᠠᠢ ᠵᠡᠷᠭᠡ ᠲᠡᠰ ᠲᠠᠷᠠᠭᠠᠯᠠᠯ ᠢᠶᠠᠷ ᠦᠷᠦᠵᠣ᠂ ᠪᠣᠳᠠ ᠪᠦᠷᠢ ᠶᠢᠨ ᠡᠮᠦᠨ᠎ᠡ ᠰᠠᠭᠤᠳᠠᠯ ᠳᠤ ᠨᠠᠢᠮᠠᠨ ᠬᠦᠦ ᠪᠠᠨ ᠪᠠᠶᠢᠷᠢᠯᠠᠭᠤᠯᠳᠠᠭ᠃ ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠣᠯᠠᠮᠵᠢᠯᠠᠯᠳᠦ ᠲᠦᠷᠢᠮ ᠳᠤ ᠨᠡᠭᠦᠳᠡᠯ ᠤᠨ ᠡᠬᠢᠨ ᠳᠤ ᠨᠣᠶᠠᠨ ᠤ ᠡᠮᠦᠨᠡᠬᠢ ᠬᠦᠦ ᠪᠣᠶᠣ ᠪᠠᠷᠰᠠ ᠶᠢᠨ ᠡᠮᠦᠨᠡᠬᠢ ᠬᠦᠦ ᠰᠠᠭᠤᠳᠠᠯ ᠲᠡᠭᠳᠡᠨ ᠣᠷᠣᠭᠰᠢ ᠬᠤᠶᠠᠷ ᠠᠯᠬᠤᠮ ᠨᠡᠭᠦᠵᠣ᠂ ᠬᠤᠶᠠᠷ ᠡᠳᠡᠭᠡᠳ ᠤᠨ ᠬᠦᠦ ᠪᠠᠨ ᠠᠭᠤᠯᠵᠠᠨ ᠵᠣᠭᠰᠣᠳᠠᠭ᠃ ᠡᠭᠦᠨ ᠠᠴᠠ ᠪᠣᠰᠣᠳ ᠬᠦᠦ ᠡᠬᠢᠯᠡᠵᠣ ᠶᠠᠪᠣᠳᠠᠭ ᠦᠭᠡᠢ ᠪᠦᠭᠡᠳ ᠴᠦᠮ ᠨᠢᠭᠡ ᠨᠢᠭᠡ ᠠᠯᠬᠤᠮ ᠢᠶᠠᠷ ᠨᠡᠭᠦᠭᠦ ᠵᠢᠷᠣᠮᠯᠠᠯ ᠲᠠᠢ᠃ ᠡᠳᠡᠭᠡᠷ ᠪᠣᠳᠠ ᠬᠦᠦ ᠶᠢᠨ ᠠᠯᠢ ᠨᠢ ᠴᠦ ᠦᠪᠡᠷ ᠤᠨ ᠢᠶᠠᠨ ᠪᠣᠳᠠ ᠬᠦᠦ ᠶᠢᠨ ᠪᠠᠶᠢᠭ᠎ᠠ ᠰᠠᠭᠤᠳᠠᠯ ᠳᠤ ᠨᠡᠭᠦᠵᠣ ᠪᠣᠯᠬᠤ ᠦᠭᠡᠢ᠃ ᠮᠣᠷᠢ ᠪᠣᠯ ᠶᠠᠮᠠᠷᠪᠠ ᠨᠢᠭᠡᠨ ᠪᠣᠳᠠ ᠬᠦᠦ ᠶᠢᠨ ᠲᠡᠭᠡᠭᠦᠷ ᠦᠰᠦᠷᠦᠨ ᠭᠠᠷᠴᠣ ᠪᠣᠯᠳᠠᠭ᠃ ᠡᠭᠦᠨ ᠢ ᠭᠠᠷᠭᠠᠪᠠᠯ ᠪᠣᠰᠣᠳ ᠨᠢ ᠰᠢᠳᠠᠷ᠎ᠠ ᠪᠠᠶᠢᠭ᠎ᠠ ᠰᠠᠭᠤᠳᠠᠯ ᠤᠨ ᠲᠡᠭᠡᠭᠦᠷ ᠦᠰᠦᠷᠦᠨ ᠭᠠᠷᠴᠣ ᠪᠣᠯᠳᠠᠭ ᠦᠭᠡᠢ᠃    ᠪᠣᠳᠠ ᠬᠦᠦ ᠶᠢᠨ ᠨᠡᠭᠦᠳᠡᠯ — ᠪᠣᠳᠠ ᠬᠦᠦ ᠶᠢᠨ ᠨᠡᠭᠦᠳᠡᠯ ᠨᠢ ᠲᠣᠰ ᠲᠣᠰ ᠤᠨ ᠶᠣᠰᠣ ᠵᠣᠷᠰᠢᠯ ᠲᠠᠢ ᠪᠠᠶᠢᠳᠠᠭ᠃    ᠨᠣᠶᠠᠨ ᠤ ᠨᠡᠭᠦᠳᠡᠯ — ᠨᠣᠶᠠᠨ ᠪᠣᠯ ᠨᠦᠭᠦᠭᠡ ᠡᠳᠡᠭᠡᠳ ᠤᠨ ᠢᠶᠠᠨ ᠪᠣᠳᠠ ᠬᠦᠦ ᠶᠢᠨ ᠬᠦᠴᠦᠨ ᠲᠣᠰᠣᠭᠰᠠᠨ ᠦᠭᠡᠢ ᠪᠠᠭᠤᠳᠠᠯ ᠳᠤ ᠬᠦᠨᠳᠡᠯᠡᠨ ᠭᠤᠯᠳᠣ ᠵᠢᠰᠢᠭᠦᠦ ᠪᠠᠷ ᠨᠠᠢᠮᠠᠨ ᠲᠡᠰᠢ ᠪᠠᠨ ᠨᠢᠭᠡ ᠠᠯᠬᠤᠮ ᠢᠶᠠᠷ ᠨᠡᠭᠦᠳᠡᠭ᠃  ᠪᠠᠷᠰᠠ ᠶᠢᠨ ᠨᠡᠭᠦᠳᠡᠯ — ᠪᠡᠷᠰᠠ ᠪᠣᠯ ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠬᠠᠮᠤᠭ ᠤᠨ ᠠᠮᠢᠳᠣ ᠬᠦᠳᠡᠯᠦᠩᠭᠦᠢ ᠬᠦᠴᠦᠨ  ᠲᠠᠢ ᠪᠣᠳᠠ ᠪᠣᠯᠣᠨ᠎ᠠ᠃ ᠲᠡᠮᠡᠭᠡ ᠬᠠᠩᠭᠠᠢ ᠶᠢᠨ ᠬᠦᠯ ᠨᠡᠭᠦᠳᠡᠯ ᠢᠶᠠᠷ ᠪᠦᠷ ᠶᠠᠪᠣᠵᠣ ᠪᠣᠯᠳᠠᠭ᠃ ᠲᠣᠬᠠᠶᠢᠯᠠᠪᠠᠯ ᠬᠦᠨᠳᠡᠯᠡᠨ ᠭᠤᠯᠳᠣ ᠵᠢᠱᠢᠭᠦᠦ ᠱᠣᠭᠤᠮ ᠢᠶᠠᠷ ᠰᠠᠭᠤᠳᠠᠯ ᠪᠦᠬᠦᠨ ᠳᠤ ᠪᠦᠷ ᠰᠢᠪᠳᠣᠯᠣᠨ ᠬᠦᠷᠴᠦ ᠰᠢᠪᠳᠣ ᠬᠦᠷᠴᠦ ᠪᠣᠯᠳᠠᠭ᠃   ᠲᠡᠮᠡᠭᠡᠨ ᠤ ᠨᠡᠭᠦᠳᠡᠯ — ᠲᠡᠮᠡᠭᠡ ᠪᠣᠯ ᠵᠢᠰᠢᠭᠦᠦ ᠱᠣᠭᠤᠮ ᠢᠶᠠᠷ ᠲᠦᠷᠪᠡᠨ ᠲᠡᠰᠢ ᠪᠠᠨ ᠰᠠᠭᠤᠳᠠᠯ ᠪᠦᠬᠦᠨ ᠳᠤ ᠴᠦᠮ ᠰᠢᠪᠳᠣ ᠬᠦᠷᠴᠦ ᠪᠣᠯᠳᠠᠭ᠃   ᠮᠣᠷᠢᠨ ᠤ ᠨᠡᠭᠦᠳᠡᠯ — ᠮᠣᠷᠢ ᠪᠣᠯ ᠨᠠᠢᠮᠠᠨ ᠲᠡᠰᠢ ᠪᠠᠨ ᠨᠢᠭᠡ ᠯᠠ ᠦᠰᠦᠷᠴᠦ ᠦᠷᠦᠭᠡᠯᠳᠠᠵᠣ ᠨᠡᠭᠦᠳᠡᠭ᠃    ᠬᠠᠩᠭᠠᠢ ᠶᠢᠨ ᠨᠡᠭᠦᠳᠡᠯ — ᠬᠠᠩᠭᠠᠢ ᠪᠣᠯ ᠬᠦᠨᠳᠡᠯᠡᠨ ᠭᠤᠯᠳᠣ ᠱᠣᠭᠤᠮ ᠢᠶᠠᠷ ᠣᠷᠣᠭᠰᠢ ᠪᠠᠨ ᠨᠢᠭᠡ ᠠᠯᠬᠤᠮ ᠨᠡᠭᠦᠵᠣ᠂ ᠵᠢᠰᠢᠭᠦᠦ ᠪᠠᠷ ᠨᠢᠳᠣᠨ ᠳᠡᠭᠡᠨ ᠢᠳᠡᠳᠡᠭ᠃    ᠪᠣᠳᠠ ᠬᠦᠦ ᠶᠢᠨ ᠢᠳᠡᠯᠳᠡ — ᠪᠣᠳᠠ ᠬᠦᠦ ᠪᠣᠯ ᠶᠠᠪᠣᠬᠤ ᠮᠦᠷ ᠨᠡᠭᠦᠳᠡᠯ ᠳᠤ ᠲᠣᠬᠢᠶᠠᠯᠳᠣᠭᠰᠠᠨ ᠨᠦᠭᠦᠭᠡ ᠲᠠᠯ᠎ᠠ ᠶᠢᠨ ᠪᠣᠳᠠ ᠬᠦᠦ ᠶᠢ ᠢᠳᠡᠨ᠎ᠡ᠂ ᠢᠳᠡᠭᠳᠡᠭᠰᠡᠨ ᠰᠢᠳᠠᠷ᠎ᠠ ᠶᠢ ᠬᠦᠯᠭᠡ ᠠᠴᠠ ᠭᠠᠷᠭᠠᠵᠣ ᠣᠷᠣᠨ ᠳᠤᠨᠢ ᠨᠡᠭᠦᠵᠣ ᠣᠷᠣᠭᠰᠠᠨ ᠪᠣᠳᠠ ᠪᠣᠶᠣ ᠬᠦᠦ ᠪᠠᠨ ᠲᠠᠯᠪᠢᠨ᠎ᠠ᠃ ᠡᠭᠦᠨ ᠳᠤ ᠬᠦᠦ ᠪᠣᠯ ᠨᠢᠭᠡ ᠠᠯᠬᠤᠮ ᠵᠢᠰᠢᠭᠦᠦ ᠲᠡᠰᠢ ᠣᠷᠣᠭᠰᠢ ᠪᠠᠨ ᠢᠳᠡᠵᠣ ᠪᠣᠯᠳᠠᠭ᠃ ᠬᠡᠯᠡᠯᠭᠡᠨ ᠦᠭᠡᠢ ᠢᠳᠡᠯᠳᠡ ᠲᠠᠭᠠᠷᠠᠭᠰᠠᠨ ᠪᠦᠭᠦᠨ ᠢ ᠢᠳᠡᠭᠦ ᠪᠠᠨ ᠲᠣᠭᠳᠠᠭᠠᠳᠠᠭ᠃ ᠬᠦᠦ ᠣᠷᠣᠭᠰᠢ ᠲᠦᠷᠢᠵᠣ ᠶᠠᠪᠣᠭᠰᠠᠭᠠᠷ ᠨᠦᠬᠦᠭᠡ ᠡᠳᠡᠭᠡᠳ ᠤᠨ ᠡᠴᠦᠰ ᠤᠨ ᠱᠣᠭᠤᠮ ᠳᠤ ᠬᠦᠷᠦᠭᠡᠳ ᠵᠢᠰᠢᠭᠦᠦ ᠪᠠᠷ ᠭᠤᠷᠪᠠᠨ ᠠᠯᠬᠤᠮ ᠪᠠᠭᠤᠪᠠᠯ ᠪᠠᠭᠤᠷᠠᠢ ᠭᠦᠦ ᠪᠠᠭᠠᠳᠣᠷ ᠪᠠᠷᠰᠠ ᠪᠣᠯᠣᠨ ᠬᠤᠪᠢᠯᠵᠣ ᠪᠠᠷᠰᠠ ᠶᠢᠨ ᠬᠦᠯ ᠢᠶᠠᠷ ᠶᠠᠪᠣᠳᠠᠭ᠃ ᠡᠭᠦᠨ ᠢ ︿︿ᠣᠷᠮ᠎ᠠ ᠲᠠᠢ ᠪᠠᠷᠰᠠ﹀﹀ ᠭᠡᠳᠡᠭ᠃ ᠬᠡᠷᠪᠡ ᠪᠣᠴᠠᠵᠣ ᠨᠢᠭᠡ ᠪᠠᠭᠤᠭᠰᠠᠨ ᠪᠣᠯ ︿︿ᠣᠷᠮ᠎ᠠ ᠦᠭᠡᠢ ᠪᠠᠷᠰᠠ﹀﹀ ᠬᠡᠬᠦ ᠪᠣᠶᠣ ︿︿ᠨᠢᠳᠦ ᠲᠠᠢ ᠬᠠᠩᠭᠠᠢ﹀﹀ ᠭᠡᠵᠤ ᠵᠢᠰᠢᠭᠦᠦ ᠪᠠᠷ ᠢᠶᠠᠨ ᠨᠢᠭᠡ ᠠᠯᠬᠤᠮ ᠬᠦᠴᠣᠨ ᠲᠣᠰᠴᠣ᠂ ᠬᠠᠩᠭᠠᠢ ᠶᠢᠨ ᠨᠡᠭᠦᠳᠡᠯ ᠢᠶᠠᠷ ᠨᠡᠭᠦᠳᠡᠭ᠃ ᠰᠡᠭᠦᠯᠴᠢ ᠶᠢᠨ ᠦᠶ᠎ᠡ ᠳᠤ᠂ ᠬᠦᠦ ᠲᠦᠷᠢᠵᠣ ᠡᠴᠦᠰ ᠤᠨ ᠱᠣᠭᠤᠮ ᠳᠤ ᠬᠦᠷᠦᠮᠡᠭᠴᠡ ᠪᠠᠨ ᠪᠠᠷᠰᠠ ᠪᠣᠯᠵᠣ ᠬᠤᠪᠢᠷᠠᠳᠠᠭ ᠪᠣᠯᠣᠭᠰᠠᠨ ᠪᠠᠶᠢᠨ᠎ᠠ᠃   ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠨᠠᠷᠡᠰ — ᠮᠣᠩᠭᠤᠯ ᠰᠢᠳᠠᠷ᠎ᠠ ᠳᠤ ᠪᠡᠶ᠎ᠡ ᠪᠠᠨ ᠲᠠᠭᠠᠭᠠᠭᠰᠨᠨ ᠲᠣᠰᠬᠠᠢ ᠨᠡᠷ᠎ᠡ ᠲᠣᠮᠢᠶ᠎ᠠ  ᠲᠠᠢ ᠶᠤᠮ᠃ ᠪᠠᠶᠢᠩᠭᠤ ᠬᠡᠷᠡᠭᠯᠡᠳᠡᠳᠡᠭ ᠨᠡᠷᠡᠰ ᠲᠤ ᠣᠣᠭᠠᠨ ᠦᠷᠦᠭᠡ᠂ ᠨᠡᠭᠦᠳᠡᠯ᠂ ᠱᠠᠯᠠᠭ᠎ᠠ᠂ ᠨᠡᠭᠡᠭᠡᠯᠳᠡ᠂ ᠲᠠᠷᠤᠭ᠎ᠠ᠂ ᠮᠠᠳ᠂ ᠵᠢᠳ᠂ ᠳ᠋ᠤᠭ᠂ ᠴᠣᠳ ᠭᠡᠬᠦ ᠮᠡᠳᠦ ᠶᠢᠨ ᠣᠯᠠᠨ ᠵᠦᠢᠯ ᠪᠠᠶᠢᠳᠠᠭ᠃   ᠣᠣᠭᠠᠨ ᠦᠷᠦᠭᠡ — ᠨᠢᠭᠡ ᠴᠦ ᠨᠡᠭᠦᠳᠡᠯ ᠬᠦᠳᠡᠯᠦᠭᠡᠳᠦᠢ ᠦᠷᠦᠭᠡᠰᠦᠳᠡᠢ ᠰᠢᠳᠠᠷ᠎ᠠ᠃   ᠨᠡᠭᠦᠳᠡᠯ — ᠨᠢᠭᠡ ᠶᠠᠪᠣᠭ᠎ᠠ ᠪᠣᠶᠣ ᠡᠭᠡᠯᠵᠢ ᠶᠢᠨ ᠬᠦᠳᠡᠯᠦᠭᠡ ᠶᠢ ᠨᠡᠭᠦᠳᠡᠯ ᠭᠡᠳᠡᠭ᠃   ᠱᠠᠯᠠᠭ᠎ᠠ — ᠨᠢᠭᠡ ᠲᠠᠯ᠎ᠠ ᠶᠢᠨ ᠪᠣᠳᠠ ᠬᠦᠦ ᠨᠢ ᠲᠠᠷᠠᠭᠠᠴᠢ ᠶᠢᠨ ᠨᠡᠭᠦᠳᠡᠯ ᠳᠤ ᠪᠠᠨ ᠨᠦᠭᠦᠭᠡ ᠲᠠᠯ᠎ᠠ ᠶᠢᠨ ᠢᠶᠠᠨ ᠨᠣᠶᠠᠨ ᠢ ᠢᠳᠡᠬᠦ ᠭᠡᠵᠤ ᠬᠠᠯᠳᠠᠵᠣ ᠨᠡᠭᠦᠭᠦ ᠶᠢ ᠱᠠᠯᠠᠭ᠎ᠠ ᠭᠡᠳᠡᠭ᠃ ᠱᠠᠯᠠᠭᠳᠠᠭᠰᠠᠨ ᠨᠣᠶᠠᠨ ᠡᠭᠦᠨ ᠠᠴᠠ ᠵᠠᠶᠢᠯᠠᠬᠤ ᠭᠤᠷᠪᠠᠨ ᠵᠦᠢᠯ ᠤᠨ ᠠᠷᠭ᠎ᠠ ᠪᠠᠶᠢᠳᠠᠭ᠃    ᠱᠠᠯᠠᠭᠰᠠᠨ ᠲᠡᠷᠡ ᠬᠦ ᠪᠣᠳᠠ ᠬᠦᠦ ᠶᠢ ᠨᠢ ᠢᠳᠡᠬᠦ︔    ᠬᠦᠴᠦᠨ ᠲᠣᠰᠣᠭᠰᠠᠨ ᠦᠭᠡᠢ ᠦᠭᠡᠷ᠎ᠡ ᠪᠠᠭᠤᠳᠠᠯ ᠳᠤ ᠵᠠᠶᠢᠯᠠᠬᠤ︔    ᠦᠪᠡᠷ ᠤᠨ ᠪᠣᠳᠠ ᠬᠦᠦ ᠪᠠᠷ ᠢᠶᠠᠨ ᠲᠡᠷᠡᠬᠦ ᠱᠠᠯᠠᠵᠣ ᠪᠠᠶᠢᠭ᠎ᠠ ᠪᠣᠳᠠ ᠶᠢᠨ ᠬᠦᠴᠦᠨ ᠢ ᠪᠦᠭᠯᠡᠬᠦ ᠵᠡᠷᠭᠡ ᠠᠷᠭ᠎ᠠ ᠪᠠᠶᠢᠳᠠᠭ᠃ ᠡᠭᠦᠨ ᠳᠤ ᠮᠣᠷᠢᠨ ᠤ ᠱᠠᠯᠠᠭ᠎ᠠ᠂ ᠬᠦᠦ ᠶᠢᠨ ᠴᠣᠯᠠᠭ᠎ᠠ ᠶᠢ ᠪᠦᠭᠯᠡᠬᠦ ᠠᠷᠭ᠎ᠠ ᠦᠭᠡᠢ ᠪᠣᠯᠬᠤᠷ ᠨᠣᠶᠠᠨ  ᠢᠶᠠᠨ ᠵᠠᠶᠢᠯᠠᠭᠤᠯᠬᠤ ᠪᠣᠶᠣ ᠱᠠᠯᠠᠭᠰᠠᠨ ᠪᠣᠳᠠ ᠭᠦᠦ ᠶᠢ ᠨᠢ ᠢᠳᠡᠬᠦ ᠯᠠ ᠬᠡᠷᠡᠭᠳᠡᠢ ᠪᠠᠶᠢᠳᠠᠭ᠃    ᠬᠠᠷᠢᠨ ᠱᠠᠯᠠᠭ᠎ᠠ — ᠨᠣᠶᠠᠨ ᠢ ᠲᠠᠰᠣᠷᠠᠯᠳᠠ ᠦᠭᠡᠢ ᠱᠠᠯᠠᠬᠤ ᠨᠡᠭᠦᠳᠡᠯ᠃ ᠪᠠᠰᠠ ᠲᠡᠩᠳᠡᠢ ᠱᠠᠯᠠᠭ᠎ᠠ ᠭᠡᠳᠡᠭ᠃    ᠠᠴᠠᠨ ᠱᠠᠯᠠᠭ᠎ᠠ —ᠨᠣᠶᠠᠨ ᠢ ᠱᠠᠯᠠᠬᠤ ᠶᠢᠨ ᠬᠠᠮᠳᠣ ᠪᠣᠰᠣᠳ ᠪᠣᠳᠠ ᠬᠦᠦ ᠶᠢ ᠨᠢ ᠢᠳᠡᠬᠦ ᠭᠡᠵᠤ ᠪᠠᠶᠢᠭ᠎ᠠ ᠮᠣᠷᠢᠨ ᠤ ᠬᠢᠰᠭᠢᠭᠡ ᠨᠡᠭᠦᠳᠡᠯ᠃    ᠲᠠᠪᠬᠤᠷ ᠱᠠᠯᠠᠭ᠎ᠠ — ᠨᠡᠭᠡᠭᠡᠭᠰᠡᠨ ᠪᠣᠳᠠ ᠪᠠ ᠨᠡᠭᠡᠭᠡᠭᠳᠡᠭᠰᠡᠨ ᠪᠣᠳᠠ ᠵᠡᠷᠭᠡ ᠪᠠᠷ ᠨᠣᠶᠠᠨ ᠢ ᠱᠠᠯᠠᠭᠰᠠᠨ ᠨᠡᠭᠦᠳᠡᠯ ᠃    ᠨᠡᠭᠡᠭᠡᠯᠳᠡ — ᠨᠡᠭᠦᠵᠣ ᠪᠠᠶᠢᠭ᠎ᠠ ᠪᠣᠳᠠ ᠪᠣᠶᠣ ᠬᠦᠦ ᠨᠢ ᠦᠪᠡᠷ ᠤᠨ ᠢᠶᠠᠨ ᠨᠦᠭᠦᠭᠡ ᠨᠢᠭᠡ ᠪᠣᠳᠠ ᠶᠢᠨ ᠬᠦᠴᠦᠨ ᠢ ᠣᠩᠭᠤᠶᠢᠯᠭᠠᠵᠣ᠂ ᠰᠢᠯᠵᠢᠨ ᠨᠡᠭᠦᠳᠡᠯᠯᠡᠭᠡᠳ ᠪᠣᠰᠣᠳ ᠤᠨ ᠨᠣᠶᠠᠨ ᠢ ᠱᠠᠯᠠᠵᠣ ᠶᠠᠪᠣᠬᠤ ᠬᠦᠳᠡᠯᠦᠭᠡ᠃    ᠲᠠᠷᠤᠭ᠎ᠠ᠂ ᠪᠠᠷᠰᠠ᠂ ᠲᠡᠷᠭᠡ᠂ ᠲᠡᠮᠡᠭᠡ ᠵᠡᠷᠭᠡ ᠬᠤᠯᠠ ᠨᠡᠭᠦᠳᠡᠯ ᠲᠠᠢ ᠪᠣᠳᠠ ᠪᠠᠷ ᠨᠦᠭᠦᠭᠡ ᠲᠠᠯ᠎ᠠ ᠶᠢᠨ ᠨᠣᠶᠠᠨ ᠪᠣᠶᠣ ᠪᠠᠷᠰᠠ ᠪᠠᠨ ᠬᠠᠮᠠᠭᠠᠯᠠᠵᠣ ᠪᠠᠶᠢᠬᠤ ᠪᠣᠳᠠ ᠪᠦ᠋ᠦ ᠶᠢ ᠬᠦᠳᠡᠯᠭᠡᠬᠦ ᠦᠭᠡᠢ ᠭᠡᠵᠤ ᠭᠤᠯᠳᠣ ᠬᠦᠯᠳᠡᠯᠡᠨ ᠵᠢᠰᠢᠭᠦᠦ ᠱᠣᠭᠤᠮ ᠠᠴᠠ ᠬᠠᠷᠪᠣᠨ ᠲᠠᠭᠠᠷᠢᠵᠣ᠂ ᠲᠠᠷᠣᠵᠣ ᠲᠡᠯᠪᠢᠬᠤ ᠨᠡᠭᠦᠳᠡᠯ᠃    ᠮᠠᠳ — ᠱᠠᠯᠠᠭᠳᠠᠭᠰᠠᠨ ᠨᠣᠶᠠᠨ ᠵᠠᠶᠢᠯᠠᠬᠤ ᠠᠷᠭ᠎ᠠ ᠪᠣᠯᠬᠤ ᠦᠭᠡᠢ᠃ ︿︿ᠨᠣᠶᠠᠨ ᠤ ᠦᠭᠦᠯ﹀﹀ ᠭᠡᠰᠡᠨ ᠠᠷᠠᠪ ᠭᠠᠷᠣᠯ ᠲᠠᠢ ᠦᠭᠡ᠃    ᠱᠠᠭ — ᠪᠠᠷᠰᠠ ᠬᠠᠩᠭᠠᠢ᠂ ᠮᠣᠷᠢ ᠪᠠᠷ ᠨᠣᠶᠠᠨ ᠢ ᠱᠠᠯᠠᠬᠤ᠃ ︿︿ᠸᠠᠩ﹀﹀ ᠪᠣᠶᠣ ︿︿ᠨᠣᠶᠠᠨ﹀﹀ ᠭᠡᠰᠡᠨ ᠠᠷᠠᠪ ᠭᠠᠷᠣᠯ ᠲᠠᠢ ᠦᠭᠡ᠃    ᠳ᠋ᠤᠭ — ᠲᠡᠮᠡᠭᠡ ᠪᠠᠷ ᠨᠣᠶᠠᠨ ᠢ ᠬᠠᠯᠳᠠᠵᠣ ᠨᠡᠭᠦᠭᠦ᠃ ᠪᠠᠰᠠ ᠳ᠋ᠣᠭᠯᠠᠭ᠎ᠠ ᠭᠡᠳᠡᠭ᠃    ᠴᠣᠳ — ᠬᠦᠦ ᠪᠠᠷ ᠨᠣᠶᠠᠨ ᠢ ᠬᠠᠯᠳᠠᠵᠣ ᠨᠡᠭᠦᠭᠦ᠃    ᠴᠦᠷ —ᠮᠣᠷᠢᠨ ᠤ ᠱᠠᠯᠠᠭ᠎ᠠ᠂ ᠵᠠᠷᠢᠮ ᠭᠠᠵᠠᠷ ᠲᠤ ᠰᠢᠭᠤᠷᠭ᠎ᠠ ᠭᠡᠳᠡᠭ᠃    ᠰᠣᠣᠰ — ᠲᠡᠮᠡᠭᠡ ᠪᠠᠷ ᠨᠣᠶᠠᠨ ᠢ ᠱᠠᠯᠠᠵᠣ ᠮᠠᠳᠯᠠᠬᠤ᠃    ᠵᠢᠳ — ᠶᠠᠪᠣᠬᠤ ᠡᠭᠡᠯᠵᠢ ᠲᠠᠭᠠᠷᠠᠭᠰᠨᠨ ᠨᠣᠶᠠᠨ᠂ ᠱᠠᠯᠠᠭᠠᠨ ᠳᠤ ᠣᠴᠠᠷᠠᠭᠰᠨᠨ ᠪᠢᠰᠢ ᠪᠠᠶᠢᠳᠠᠯ᠎ᠠ ᠪᠠᠨ ᠶᠠᠪᠣᠬᠤ ᠨᠡᠭᠦᠳᠡᠯ ᠪᠣᠯᠣᠭᠰᠨᠨ ᠪᠦᠭᠡᠳ ᠬᠦᠦ ᠨᠢ ᠪᠠᠰᠠ ᠬᠦᠯ ᠨᠡᠭᠦᠳᠡᠯ ᠦᠭᠡᠢ ᠪᠣᠯᠬᠤ᠃    ᠨᠢᠴᠦᠭᠦᠨ — ᠨᠢᠭᠡ ᠲᠠᠯ᠎ᠠ ᠶᠢᠨ ᠪᠣᠳᠠ ᠬᠦᠦ ᠶᠢ ᠴᠦᠮ ᠢᠳᠡᠵᠣ ᠭᠠᠭᠴᠠ ᠨᠣᠶᠠᠨ ᠦᠯᠡᠳᠡᠬᠦ᠃ ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠣᠯᠠᠮᠵᠢᠯᠠᠯᠳᠦ ᠶᠣᠰᠣᠨ ᠳᠤ ᠨᠢᠴᠦᠭᠦᠨ ᠢᠳᠡᠵᠣ ᠪᠣᠯᠬᠤ ᠦᠭᠡᠢ᠂ ᠡᠩ ᠤᠨ ᠪᠠᠶᠢᠳᠠᠯ ᠳᠤ ᠬᠡᠨ ᠠᠯᠢᠨ ᠳᠤ ᠪᠠᠨ ᠵᠠᠪᠠᠯ ᠨᠢᠭᠡ ᠬᠦᠦ ᠪᠣᠶᠣ ᠪᠣᠳᠠ ᠦᠯᠡᠳᠡᠭᠡᠬᠦ ᠬᠡᠷᠡᠭᠳᠡᠢ᠃ ᠬᠡᠷᠪᠡ ᠨᠢᠴᠦᠭᠦᠨ ᠢᠳᠡᠬᠦ ᠳᠤ ᠬᠦᠷᠪᠡᠯ ᠬᠠᠶᠢᠨᠴᠠᠭ᠎ᠠ ᠳᠤ ᠲᠣᠭᠠᠴᠠᠳᠠᠭ᠃ ᠲᠠᠷᠣᠢ ᠲᠡᠩᠴᠡᠭᠦᠦ ᠭᠡᠰᠡᠨ ᠦᠭᠡ᠃    ᠬᠠᠶᠢᠨ — ᠪᠠᠰᠠ ᠬᠠᠶᠢᠨᠴᠠᠭ᠎ᠠ ᠭᠡᠳᠡᠭ᠃ ᠰᠢᠳᠠᠷ᠎ᠠ ᠶᠢᠨ ᠲᠡᠩᠴᠡᠯ ᠢ ᠬᠡᠯᠡᠨ᠎ᠡ᠃ ᠵᠢᠳ ᠢ ᠬᠠᠶᠢᠨ ᠳᠤ ᠲᠣᠭᠠᠴᠠᠨ᠎ᠠ︔ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠢᠶᠠᠨ ᠴᠦᠮ ᠨᠢᠴᠦᠭᠦᠨ ᠢ ᠬᠠᠶᠢᠨ ᠳᠤ ᠲᠣᠭᠠᠴᠠᠨ᠎ᠠ︔ ᠬᠤᠶᠠᠷ ᠲᠠᠯ᠎ᠠ ᠪᠠᠷ  ᠢᠶᠠᠨ ᠲᠣᠰ ᠪᠦᠷᠢ ᠭᠠᠭᠴᠠ ᠲᠡᠮᠡᠭᠡ ᠪᠣᠶᠣ ᠭᠠᠭᠴᠠ ᠮᠣᠷᠢ ᠲᠠᠢ ᠦᠯᠡᠳᠡᠬᠦ ᠶᠢ ᠬᠠᠶᠢᠨ ᠳᠤ ᠲᠣᠭᠠᠴᠠᠨ᠎ᠠ᠃ ᠬᠠᠶᠢᠨ ᠱᠠᠯᠠᠭ᠎ᠠ ᠠᠴᠠ ᠮᠣᠯᠳᠣᠷᠠᠵᠣ ᠴᠢᠳᠠᠬᠤ ᠦᠭᠡᠢ ᠪᠣᠶᠣ ᠬᠠᠶᠢᠨ ᠨᠡᠭᠦᠳᠡᠯ ᠢᠶᠠᠷ ᠵᠠᠯᠭᠠᠯᠳᠤᠭ᠎ᠠ ᠨᠡᠭᠦᠭᠦ ᠶᠢ ᠬᠠᠶᠢᠨ ᠳᠤ ᠲᠣᠭᠠᠴᠠᠨ᠎ᠠ᠃ ᠲᠣᠰ ᠪᠦᠷᠢ ᠭᠠᠭᠴᠠᠬᠠᠨ ᠮᠦᠷᠭᠦᠭᠡ ᠬᠦᠦ ᠲᠠᠢ ᠦᠯᠡᠳᠡᠭᠦ ᠶᠢ ᠬᠠᠶᠢᠨ ᠳᠤ ᠲᠣᠭᠠᠴᠠᠨ᠎ᠠ᠃ ᠬᠤᠶᠠᠷ ᠡᠳᠡᠭᠡᠳ ᠢᠶᠠᠷ ᠢᠶᠠᠨ ᠬᠠᠶᠢᠨᠴᠠᠬᠤ ᠶᠢ ᠵᠦᠪᠰᠢᠶᠡᠷᠡᠬᠦ ᠶᠢ ᠬᠠᠶᠢᠨ ᠳᠤ ᠲᠣᠭᠠᠴᠠᠨ᠎ᠠ᠃ ᠮᠣᠩᠭᠤᠯᠴᠣᠳ ᠮᠣᠷᠢᠨ ᠴᠢᠳᠦᠷ ᠮᠠᠳ ᠬᠢᠬᠦ ᠶᠢ ᠴᠡᠭᠡᠷᠯᠡᠳᠡᠭ ᠪᠣᠯᠬᠤᠷ ᠮᠣᠷᠢ ᠪᠠᠷ ᠮᠠᠳᠯᠠᠭᠰᠠᠨ ᠢ ᠱᠦᠭᠦᠭᠰᠡᠨ ᠳᠤ ᠲᠣᠭᠠᠴᠠᠳᠠᠭ ᠦᠭᠡᠢ ᠬᠠᠷᠢᠨ ᠬᠠᠶᠢᠨ ᠢᠶᠠᠷ ᠪᠣᠳᠣᠳᠠᠭ᠃    ᠠᠪᠣᠨ ᠱᠠᠭ ᠮᠠᠳ — ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠶᠣᠰᠣᠨ ᠳᠤ ᠱᠦᠭᠦᠭᠳᠡᠭᠰᠡᠨ ᠲᠠᠯ᠎ᠠ ᠳᠤ ᠵᠠᠪᠠᠯ ᠨᠢᠭᠡ ᠪᠣᠳᠠ ᠪᠣᠶᠣ ᠬᠦᠦ ᠦᠯᠡᠳᠡᠭᠡᠳᠡᠭ ᠵᠢᠷᠣᠮ ᠲᠠᠢ᠂ ᠬᠡᠷᠪᠡ ᠦᠯᠡᠳᠡᠭᠡᠬᠦ ᠦᠭᠡᠢ ᠪᠣᠯ ᠨᠢᠴᠦᠭᠦᠨ ᠪᠣᠯᠵᠣ ᠬᠠᠶᠢᠨᠴᠠᠭ᠎ᠠ ᠪᠣᠯᠳᠠᠭ ᠃ ᠭᠡᠳᠡᠯ᠎ᠡ ᠲᠡᠷᠡ ᠬᠦ ᠦᠯᠡᠳᠡᠭᠡᠬᠦ ᠶᠣᠰᠣᠳᠠᠢ ᠪᠣᠳᠠ ᠪᠣᠶᠣ ᠬᠦᠦ ᠶᠢ ᠨᠢ ᠢᠳᠡᠩᠭᠦᠳᠡ ᠪᠠᠨ ᠮᠠᠳᠯᠠᠵᠣ ᠴᠢᠳᠠᠪᠠᠯ ᠱᠦᠭᠦᠭᠰᠡᠨ ᠳᠤ ᠲᠣᠭᠠᠴᠠᠵᠣ᠂ ᠡᠭᠦᠨ ᠢ ᠱᠠᠭ ᠮᠠᠳ ᠭᠡᠳᠡᠭ᠃ ᠪᠠᠰᠠ ᠣᠷᠠᠨ ᠮᠠᠳ ᠭᠡᠳᠡᠭ᠃ ᠡᠨᠡ ᠨᠢ ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠣᠨᠴᠠᠭᠠᠢ ᠲᠦᠷᠢᠮ ᠤᠨ ᠨᠢᠭᠡ ᠪᠣᠯᠣᠨ᠎ᠠ᠃   ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠣᠷᠣᠯᠳᠣᠭᠠᠨ ᠮᠦᠷᠦᠶᠢᠴᠡᠭᠡᠨ ᠪᠣᠯ ᠣᠯᠠᠨ ᠲᠦᠮᠡᠨᠴᠢ ᠴᠢᠨᠠᠷ ᠲᠠᠢ ᠲᠠᠮᠢᠷ ᠣᠷᠠᠯᠢᠭ ᠤᠨ ᠬᠦᠳᠡᠯᠭᠡᠭᠡᠨ ᠶᠤᠮ᠃ ᠮᠣᠩᠭᠤᠯᠴᠣᠳ ᠡᠷᠳᠡ ᠲᠡᠭᠡᠳᠦ ᠦᠶ᠎ᠡ ᠠᠴᠠ ᠪᠠᠨ ᠰᠢᠳᠠᠷ᠎ᠠ ᠶᠢᠨ ᠮᠦᠷᠦᠶᠢᠴᠡᠭᠡᠨ ᠢ ᠣᠢ ᠪᠢᠯᠢᠭ ᠨᠡᠭᠡᠭᠡᠭᠳᠡᠭᠦᠯᠦᠨ ᠣᠬᠠᠭᠠᠨ ᠪᠣᠳᠣᠯᠭ᠎ᠠ ᠪᠠᠨ ᠰᠢᠯᠭᠠᠬᠤ ᠣᠶᠣᠨ ᠤ ᠲᠣᠭᠯᠠᠭᠠᠮ ᠪᠣᠯᠭᠠᠨ ᠮᠠᠰᠢ ᠨᠠᠨᠳᠢᠩᠨᠠᠨ ᠡᠷᠬᠢᠮᠯᠡᠭᠰᠡᠭᠡᠷ ᠢᠷᠡᠪᠡ᠃ ᠬᠡᠯᠡᠯᠭᠡᠨ ᠦᠭᠡᠢ ᠦᠩᠭᠡᠷᠡᠭᠰᠡᠨ ᠨᠡᠶᠢᠭᠡᠮ ᠤᠨ ᠹᠸᠣᠳᠠᠯ ᠤᠨ ᠬᠡᠪᠰᠢᠮᠡᠯ ᠪᠢᠳᠡᠭᠦᠮᠵᠢᠯᠡᠯ  ᠠᠴᠠ ᠪᠣᠯᠵᠣ ᠮᠣᠩᠭᠤᠯ ᠰᠢᠳᠠᠷ᠎ᠠ ᠲᠡᠶᠢᠮᠦ ᠶᠡᠭᠡ ᠲᠡᠯᠭᠡᠷᠡᠨ ᠲᠦᠭᠡᠮᠡᠯᠵᠢᠵᠣ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠯᠪᠠᠴᠣ ᠠᠷᠠᠳ  ᠤᠨ ᠲᠣᠮᠳᠠ ᠠᠳᠠᠯᠢ ᠪᠣᠰᠣ ᠬᠡᠮᠵᠢᠶ᠎ᠡ ᠪᠠᠷ ᠲᠠᠷᠬᠠᠵᠣ ᠪᠠᠶᠢᠵᠠᠢ᠃ ᠠᠷᠠᠳ ᠲᠦᠮᠡᠨ ᠡᠷᠬᠡ ᠴᠢᠯᠦᠭᠡ ᠣᠯᠵᠣ ᠡᠯ᠎ᠡ ᠦᠨᠳᠦᠰᠦᠳᠡᠨ ᠡᠷᠭᠡ ᠲᠡᠭᠰᠢ ᠪᠣᠯᠵᠣ ᠦᠨᠳᠦᠰᠦᠳᠡᠨ ᠤ ᠰᠣᠶᠣᠯ ᠣᠷᠠᠯᠢᠭ ᠦᠷᠨᠢᠩᠭᠦᠢ ᠪᠠᠷ ᠬᠦᠭᠵᠢᠬᠦ ᠶᠢ ᠲᠠᠭᠠᠯᠳᠣᠨ ︿︿ᠡᠷ᠎ᠡ ᠶᠢᠨ ᠭᠤᠷᠪᠠᠨ ᠨᠠᠭᠠᠳᠣᠮ﹀﹀ ᠢᠶᠠᠷ ᠦᠨᠳᠦᠰᠦᠨ ᠠᠭᠤᠯᠭ᠎ᠠ ᠪᠠᠨ ᠪᠣᠯᠭᠠᠭᠰᠨᠨ ᠠᠷᠠᠳ ᠤᠨ ᠨᠠᠶᠢᠷ ᠶᠡᠭᠡ ᠪᠠᠷ ᠬᠦᠭᠵᠢᠭᠰᠡᠨ ᠪᠦᠭᠡᠳ ᠮᠣᠩᠭᠤᠯ ᠰᠢᠳᠠᠷ᠎ᠠ ᠴᠦ ᠮᠣᠩᠭᠤᠯᠴᠣᠳ ᠤᠨ ᠬᠦᠰᠡᠯ ᠱᠠᠭᠠᠷᠳᠠᠯᠭ᠎ᠠ ᠶᠣᠰᠣᠭᠠᠷ ᠦᠨᠳᠦᠰᠦᠳᠡᠨ ᠤ ᠨᠠᠶᠢᠷ ᠨᠠᠭᠠᠳᠣᠮ ᠪᠠ ᠪᠡᠶ᠎ᠡ ᠲᠠᠮᠢᠷ ᠤᠨ ᠣᠷᠣᠯᠳᠣᠭᠠᠨ ᠤ ᠴᠢᠬᠤᠯᠠ ᠠᠭᠤᠯᠭ᠎ᠠ ᠪᠣᠯᠪᠠ᠃   ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠣᠷᠣᠯᠳᠣᠬᠤ ᠶᠣᠰᠣᠨ ᠤ ᠲᠠᠯ᠎ᠠ ᠪᠠᠷ ᠭᠤᠣᠯᠳᠠᠭᠤ ᠮᠣᠩᠭᠤᠯ ᠰᠢᠳᠠᠷ᠎ᠠ ᠶᠢᠨ ᠣᠯᠠᠮᠵᠢᠯᠠᠯᠳᠣ ᠠᠷᠭ᠎ᠠ ᠪᠣᠯᠬᠤ ᠨᠣᠭᠤᠯᠣᠭᠠᠳᠣ ᠣᠷᠣᠯᠳᠣᠭᠠᠨ ᠤ ᠲᠦᠷᠢᠮ ᠢ ᠬᠡᠷᠡᠭᠵᠢᠭᠦᠯᠳᠡᠭ᠃ ᠨᠣᠭᠤᠯᠤᠭ᠎ᠠ ᠪᠦᠷᠢ  ᠳᠤ ᠬᠤᠨᠵᠢᠭᠳᠠᠭᠰᠠᠨ ᠬᠦᠮᠦᠰ ᠨᠢ ᠪᠠᠭᠤᠭᠠᠳ ᠬᠤᠨᠵᠢᠭᠰᠠᠨ ᠬᠦᠮᠦᠰ ᠨᠢ ᠦᠯᠡᠳᠡᠨ ᠲᠠᠷᠠᠭᠠᠴᠢ ᠶᠢᠨ ᠨᠣᠭᠤᠯᠣᠭᠠᠨ  ᠳᠤ ᠣᠷᠣᠯᠴᠠᠵᠣ ᠵᠠᠯᠭᠠᠨ ᠣᠷᠣᠯᠳᠣᠳᠠᠭ᠃ ᠶᠠᠭ ᠮᠣᠩᠭᠤᠯ ᠪᠦᠬᠡ ᠶᠢᠨ ᠶᠣᠰᠣᠭᠠᠷ ᠬᠤᠨᠵᠢᠭᠰᠠᠨ ᠨᠢ ᠲᠠᠪᠰᠢᠵᠣ᠂ ᠬᠤᠨᠵᠢᠭᠳᠠᠭᠰᠨᠨ ᠨᠢ ᠬᠤᠴᠣᠷᠣᠭᠰᠠᠭᠠᠷ ᠪᠠᠶᠢᠵᠣ ᠲᠡᠳ᠋ ᠲᠡᠷᠢᠭᠦᠨ ᠰᠢᠯᠭᠠᠷᠠᠳᠠᠭ᠃ ᠰᠢᠳᠠᠷ᠎ᠠ ᠶᠢᠨ ᠣᠷᠣᠯᠳᠣᠭᠠᠨ ᠳᠤ ᠶᠡᠷᠦ ᠨᠢ ︵ᠨᠠᠶᠢᠷ ᠨᠠᠭᠠᠳᠣᠮ ᠳᠤ︶ 64 ᠨᠡᠷᠡᠰ᠂ 128 ᠨᠡᠷᠡᠰ᠂ 256 ᠨᠡᠷᠡᠰ ᠰᠢᠳᠠᠷᠴᠢᠨ ᠣᠷᠣᠯᠳᠣᠳᠠᠭ᠃ ᠪᠠᠰᠠ ᠣᠷᠣᠯᠴᠠᠬᠤ ᠬᠦᠮᠦᠨ ᠪᠠ ᠴᠠᠭ ᠤᠨ ᠪᠠᠶᠢᠳᠠᠯ ᠢ ᠦᠨᠳᠦᠰᠦᠯᠡᠵᠣ᠂ ᠲᠣᠭᠤᠶᠢᠯᠠᠩ ᠦᠭᠡᠢ ᠡᠷᠬᠢᠶᠡᠨᠳᠦ ᠣᠷᠣᠯᠳᠣᠭᠠᠨ ᠪᠠ ᠲᠣᠭᠤᠶᠢᠯᠠᠩ ᠬᠤᠪᠢᠶᠠᠭᠰᠨ ᠡᠷᠬᠢᠶᠡᠨᠳᠣ ᠣᠷᠣᠯᠳᠣᠭᠠᠨ ᠭᠡᠬᠦ ᠵᠡᠷᠭᠡ ᠠᠷᠭ᠎ᠠ ᠪᠠᠶᠢᠳᠠᠭ᠃ ᠰᠢᠳᠠᠷ᠎ᠠ  ᠶᠢᠨ ᠱᠠᠩ ᠢ ᠶᠡᠷᠦ ᠨᠢ ᠣᠷᠣᠯᠴᠠᠬᠤ ᠬᠦᠮᠦᠨ ᠤ ᠲᠤᠭ᠎ᠠ ᠶᠢ ᠦᠨᠳᠦᠰᠦᠯᠡᠵᠣ ᠲᠡᠭᠡᠷ᠎ᠡ ᠲᠦᠷᠪᠡ᠂ ᠲᠡᠭᠡᠷ᠎ᠡ ᠨᠠᠢᠮᠠ᠂ ᠠᠷᠪᠠᠨ ᠵᠢᠷᠭᠤᠭ᠎ᠠ᠂ ᠭᠤᠴᠢᠨ ᠬᠤᠶᠠᠷ ᠨᠡᠷᠡᠰ ᠵᠡᠷᠭᠡ ᠪᠠᠷ ᠱᠠᠩᠨᠠᠳᠠᠭ᠃
 
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠱᠤᠩᠬᠤᠷ ᠤᠨ ᠴᠤᠭᠯᠠᠭᠠᠨ
ᠬᠤᠷᠴᠢᠨ ᠦᠯᠢᠬᠡᠷᠳᠤ ᠠᠷᠠᠳ ᠤᠨ ᠲᠠᠭᠤᠤ
ᠤᠷᠤᠨ ᠤ ᠲᠡᠰ ᠤᠨ ᠬᠤᠯᠪᠤᠭ᠎ᠠ ᠶᠢᠨ ᠤᠯᠠᠮᠵᠢᠯᠠᠭᠴᠢ ᠬᠠᠶᠢᠴᠢᠩ ᠰᠢᠪᠠᠭᠤ ᠶᠢᠨ ᠲᠤᠪᠴᠢ ᠨᠠᠮᠳᠠᠷ
ᠤᠯᠠᠮᠵᠢᠯᠠᠯᠳᠤ ᠲᠠᠭᠤᠤᠷᠢᠯᠢᠭ — — ᠬᠤᠯᠪᠤᠭ᠎ᠠ
ᠤᠯᠠᠮᠵᠢᠯᠠᠯᠳᠤ ᠤᠷ᠎ᠠ ᠮᠡᠷᠭᠡᠵᠢᠯ — ᠮᠤᠷᠢᠨ ᠡᠮᠡᠬᠡᠯ ᠬᠢᠬᠦ ᠮᠡᠷᠬᠡᠵᠢᠯ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号